2003 年 9 月 21 日 星期日 【晴】

唔知點解，
近排都係咁，
好早好早就會醒左，
但係又訓唔番，
又唔係咁敢訓番，
因為驚訓左會訓過頭。


最慘既係，
我都唔係早訓，
打算訓耐少少都失敗左，
攪到失晒預算，
即係唔夠訓 lor。


唉，個頭仲有 d 痛 tim……

2003 年 9 月 20 日 星期六 【乍寒還暖】

又到星期日，
一早起身整早餐食，
之後返崇拜，
今日係由吳宣倫博士講人生的決擇。


我學到的信息係，
要時常說出造就人的說話，
要多鼓勵人，
幫助人，而非揶揄人。


下午首先去先達，
花了十元買了一個唔合身既電話套，
激死我。


之後坐車去觀塘踢波，
等車既時候，
見到個天都幾黑，
心知不妙。
果然，下起滂沱大雨。
我地呢 d 足球痴，
當然唔會咁輕易退卻。
照踢可也，
不過個背包就濕晒…… ><


夜晚爸爸放工返黎，
第一件事就係開十八台睇馬，
同埋煲煙。
我就當然回避入房，
飯都唔敢食。


十點幾，先出返黎整飯食。
睇晒昨晚借番黎個幾本漫畫，
就去訓了。

>>September 22, 2003 at 5:57:16 AM GMT+8

2003 年 9 月 19 日 星期五 【晴】

每逢週未週日，
我都沒有刻意安排節目，
但通常最後都會有野做。


好像今個星期六，
朝早返工係例牌節目。
一點鐘放工，
首先坐 14 號去中港城。
途中少不免會講吓電話。
今日為左講呢個電話，
特意問媽媽借了 Handfree，
誰料效果極差，
結果都係冇用到。


去到尖沙咀，
首先行左冇野適合我既開倉，
跟住去左無印，
看看有沒有爆谷，
有就有，可惜沒有我想找的味。


之後返左屋企，
買左條法式三文治作午餐，
法式三文治真係好好味，
雜誌也曾介紹過我屋企樓下間鋪頭。


在下午茶時間食完午餐後，
中同 H 君打電話黎約我睇波打機，
上到佢屋企，
打左陣機，
見距離開波仲有一段時間，
就落左街食鐵板餐。


食完返到去，
睇左半場都未夠，
佢 d 屋企人就陸陸續續返晒黎，
結果下半場未開波我就走了。

>>September 22, 2003 at 5:56:54 AM GMT+8

2003 年 9 月 18 日 星期四 【晴】

語言文字係一種好神奇的東西。
可以視之為兩刃劍，
用得好，
可以運籌於帷幄之中，
決勝於千裡之外。


但正所謂水能載舟，亦能覆舟。
如果呢把兩刃劍用得唔好，
傷到人之餘，也會傷到自己。


同時拔劍出鞘的時間也很重要，
時間掌握得好，
可以制敵於先。
相反，太早或太遲都可能有反效果。


所以，語言文字其實都係一門技藝，
需要有相當高既技巧，
先可以運用得巧妙。


我自問係一個唔識講大話既人，
講野亦都直腸直肚，
唔係好曉轉彎。


既然唔識轉彎，
踩 break 會唔會好 d？


現在面臨緊既係，
有 d 野唔知講唔講好。
現在情況未穩定，
如果講，可能會傷到自己。

但等到情況穩定既時候，
可能已經太遲了。
究竟應該幾時講？
定係直頭踩 break 唔講，
等佢自己發現？

>>September 20, 2003 at 3:44:55 AM GMT+8

2003 年 9 月 17 日 星期三 【晴】

呢個題目其實都掙扎左好耐究竟寫唔寫，
一黎我冇乜記性，
到寫既時候已經唔記得。
二黎我想唔到應該點表達。
所以一直都不了了之……


我係一個幾細膽既人，
尤其是對未知既野，
失係會好懼怕。


我想信每個人對未知既事物都會很好奇，
未知的那種誘惑力，
給予我們動力，
去探索，去尋找答案，
將未知既變成已知。


有一樣野，
到目前為止都未有人找到答案。
就係死亡。
死亡神秘既地方，
係從來沒有死個既人，
返黎話番畀你知，
死左之後會點。


身為一個基督徒，
我有一個盼望，
就係得到永生。
可能我信心未夠，
我依然好驚。
我間唔中諗起關於死亡既野，
我個心就會很唔安落，
唔知點咁。


或者，
我應該多 d 做靈修，
多 d 睇聖經，
多 d 祈禱。

>>September 18, 2003 at 3:24:58 AM GMT+8

2003 年 9 月 16 日 星期二 【晴】

語文能力既培養真係唔係一朝一夕既事，
好似我 d 英文咁，
冇番十年八年都唔駛旨意有咩進展。


今日講既唔係英文，
而係日文。
話說自九月開始，
我改左星期二上日文課，
昨日係第二堂。
我上個星期講過，
我個班有三類學生，
一係一個星期上一堂，
學左日文起碼半年既。
一係就暑假上密集式課，
學左個零月既。
最後一 d 就係插班生。


講番頭兩類。
佢地用既課文同教材一樣，
教既老師係同一人，
上堂既時數都係一樣。
但係昨日上堂，
我既感覺就係暑期班既同學既根底打得冇我地咁好。


講番 d 上堂攪笑野，
以前，講緊上初班既時候，
得毛主席會上堂做功課（因為佢返屋企唔做 =_=|）
但係今堂，
一齊上開堂既同學仔都被佢感染左，
大家齊齊做做功課。
點解會咁呢？
因為唔做功課就冇野做。
我上次講過，
人多左，咁老師照顧每一個學生既時間都少左。
例如練會語咁，
輪十幾二十個先到我，
咁頭幾個我都仲可以跟住念。
但之後就發覺不如做功課吧啦。


另一件有趣事就係，
其中一個暑期班既女同學練會話時，
老師係度笑，
同學仔以為佢笑同學講得唔好，
其實佢係笑緊我地係課室後面開緊餐。
有位同拿左好多零食出黎……^_^

>>September 17, 2003 at 3:12:53 AM GMT+8

2003 年 9 月 15 日 星期一 【乍寒還暖】

其實我都係一個幾火大既人，
不過唔係人人都可以見到我起火，
一黎我唔係咁易起到火，
二黎通常 d 火都好細，
好易撲滅。


之但係星星之火都可以燎原，
只要有燃料助燃，
星星之火都可以變變熊熊大火。


我發覺有人受軟唔愛硬，
有人相反受硬唔愛軟。
今日放工返到屋企，
發覺書枱上既野被人執走晒。
我都唔係第一次同佢講，
叫佢唔好攪我書枱上既野，
因為我好多時隨手就拿張環保紙寫低 d notes。
之後就放係枱面，
執走左我就自然唔見左好多資訊。


咁都未算，
我飯盒放左係公司包，
我媽媽好心想係裡面拿出黎幫我預備明天既午餐，
我同佢講：「唔駛你攪啦！放低佢。」
點知轉頭我個飯盒已經被人 fill 左，
放係雪櫃內。
既然原來佢地唔識聽廣東話，
我唯有親力親為，
將飯盒裡既野倒番晒出黎。


我決定左，
以後如果我個飯盒整好左之後被人攪過，
無論加野好減野好，
我都唔會食。
如果朝早出門口之前發現，
我就倒番出黎，由頭整過；
如果返到公司先發現，
我就原封不動拿番屋企，
最多食少餐者。

>>September 17, 2003 at 2:38:36 AM GMT+8

2003 年 9 月 14 日 星期日 【乍寒還暖】

香港人生活節奏急速，
看看街頭，
每個人都行得很匆忙，
只要係行慢 d ，
都會阻到後面那個。


我生活在香港，
自然需要跟上這個社會的節奏。
加上我又係玩野外定向的，
所以行得比別人更加快。


可能你會問，
玩野外定向和行得快有甚麼關係？


因為我體能唔好，
成日跑唔到，
本身已經輸人一條街，
如果唔行快 d，
咁咪輸足九條街？


但係最近，
我開始學習行的藝術。
即係行慢 d 。
原因有幾個：

1. 我本身係多汗人，行得愈快，d 汗出得愈多。
好快就成身濕晒。行得慢 d ，自然冇出咁多汗，
外觀都好 d。

2. 我行得快，唔代表人地都行得快。
隨非得我一個自己行，
如果唔係都要就吓人唔好行咁快。
尤其是可能我既行等於人地跑既時候……

3. 生活實在太緊張喇，
享受步行有阻舒緩壓力。


可惜的是，
大部份時間找都係趕時間，
所以我仍然行得快，
行得比正常快，
行得比他人快。

>>September 16, 2003 at 9:07:41 AM GMT+8

2003 年 9 月 13 日 星期六 【乍寒還暖】

今日有個定向班，
應承了幫手，
咁一早我就起身，
收拾好行裝，
落街食早餐。
落到街，見到落緊毛毛雨，
都知慘架喇，
要被雨淋。


係茶餐廳時睇新聞，
見到有個閃電既，
敝！雷暴警告！
咁我即刻打畀負責人，
點知打極個衰仔都唔聽電話，
（佢話放左係背囊聽唔到電話響 wor）


咁唯有打鑼咁找另外一個負責人，
原來佢都已經知道，
等齊人之後會宣佈取消。
咁我食完早餐咪上番去瞓 lor。
過左一個鐘到，
天文台除下雷暴警告，
咁個負責人就打畀我，
叫我即刻上山。


上到山，
一路被雨淋，一路睇住佢地教，
仲要係傾盆大雨。
成身濕晒。
個 course 完左之後，
我地出左去旺角睇戲。
去到大家樂，得番 d 下午茶餐。
我淨係食左隻雞~]加杯紅豆冰。
由於成身濕晒，係冷氣底下好凍，
見仲有成個鐘先睇戲，
咁我地就落左旺角街頭打左陣機先返上去。


講番套戲，
彭浩翔作品，
真係唔錯。


>>September 15, 2003 at 5:21:24 AM GMT+8

2003 年 9 月 12 日 星期五 【晴】

自從第一次見到佢，
我已經被佢嬌小玲瓏既外表深深地吸引住，
二零零一年十一月二十一日，
我第一次同佢出街，
開始朝夕相對既日子。


兩年後既今日，
第三者終於都出現了，
同之前既佢相比，
新既佢體形大成陪，
但係唱歌好聽好多，
而且亦亦都多才多藝，
又有上進心，
時常進修，提升自己既能力。


其實早係五月，
我已經有衝動同之前既佢講再見，
不過最後都係過唔到自己那關，
最終都沒有接新既佢番黎。


而今天是一個值得紀念既日子，
因為我終於對新既佢許下了形影不離既諾言。
係新既佢未到之前，
我想我仲會同失寵既佢相處多個零兩個星期，
然之後，就會正式同佢分開，
各有各既生活。
我當然會同新既佢一齊啦，
而佢，相信佢都有佢既價值既，
好快會找到人要佢……


藍、白、紅，
係法國國旗既顏色，
也都代表三齣法國電影。
同時，正好代表了三個佢。
藍色既 T610 訂了未有貨，
白色既 8310 係我身旁，
紅色既 T610 媽媽買了，
係屋企叉緊電……


>>September 15, 2003 at 4:43:42 AM GMT+8