2005 年 7 月 7 日 星期四 【晴】

有人生日！？

因為大家都有工作在身，
所以只有晚上出來聚一聚食餐飯呢。
去左食左實必勝既「必勝客」食！
好耐無試過堂食lu...自從pizza hut變左一間不在平民化的餐館後。

早D出去買蛋糕~~
之後就對號入坐，
因為七點半full左book位所以要六點半到，
就係咁坐左成個鐘...終於齊人開餐。

一個四人餐一個二人餐，
剛好分到六個人份量~~ha
食豪D放盡D啦~~
一路食一路傾左好多野，
傾番好多TPIT既義工回憶~~
依個話題係永遠都會出現既話題呢~^^
大家的經驗太深刻了。
何時再能一起上路呢。

軟殼蟹pizza，
味道幾特別哦~~係少左D蟹肉羅。
其中其他的食物都係普普通通咁~~沒甚特別喔。

傾下坐下原來10點多了，
見D侍應都忙收拾，
咁就出最後一道菜式啦！
「旋風黑森林」！
行左咁多間都係東海堂D款特別D。
偏愛黑森林蛋糕呢。

餘興未了，
我題議去打「士碌架」，
大家都無乜打過就試下啦。
過到去舊墟個邊，
暴龍話某人住係那邊呢，
就去一去望下，
再電一電佢，見到佢一知我地成班係樓下就即刻拉窗簾！
哈哈~~~個窗果然係好唔安全既位置呢~ha
下次一齊落黎玩啦要。
傾左陣笑左陣，
就上番去桌球城，
其中最爆笑當然係呀偉啦，
用o麗輔助器都入唔到，
哈...唔通仲會係得一支竹一個人，哈哈。

>>July 15, 2005 at 4:26:44 AM GMT+8

2005 年 7 月 4 日 星期一 【晴】

莫壽曾中學30週年校慶！
都唔知點解自己會想去睇下~~~
最後都係同左D同事、義工同朋友去睇，
初時只係抱住睇下D舞蹈同唱歌就算啦。

一路睇一路問暴龍，
問下佢一D學校既歷史及背景，
先知原來莫記既課外活動咁精彩！
突然覺得自己既大官好唔掂添...嗚。

一路睇左幾場表演，
都見到D熟識既同學仔！
佢地個個都多才多藝呀！^^
最令我感興趣既係民族舞、合唱團、Jass舞蹈、花式跳繩同個原創音樂劇！
其中最震撼係音樂劇！
勿論佢地係咪做得好出色，
而係我係第一次見識到音樂舞台劇係乜野黎！
仲好佩服佢地全程英文對白，
唱英文歌仲好流利同埋唱工都好了得！
好佩服！
雖然知道自己要聽英文好難同唔明，
不過為左唔想miss左佢地既舞台表情演譯，
最後都係放棄睇字幕！^^"
我都好想可以有咁樣既參與！
不過第一步既係要學習去睇去欣賞依類文藝劇。

完左~~
佢地就慢慢敘舊，
我地就無聊下先~~
無無下呀偉佢地走先，
餘下既人就去左食宵夜！
「澳門茶餐廳」都不錯呢！^^
之後就都無再去打機，
就這樣搭車返屋企。

>>July 10, 2005 at 5:19:42 PM GMT+8

2005 年 7 月 3 日 星期日 【晴】

早上在大官宣傳，
作為舊生好耐沒有再入返依間學校啦。

我地既活動範圍係大堂樓梯位左右，
因為小息同小息之間有成個鐘時間，
所以都好hea~~唉~~
練下結他先。

係地下既範圍走左陣，
發覺原來有幾個室都轉左調左位。
咁樣去左一輪，
突然好有感覺的...少不免也有一點點的思緒呢...

返到中心，
唔知點解總覺得出一出去宣傳活動好累人的...。

下午，
權權佢地突然得閒陪我過旺角，
咁就拉埋佢地出去。
諗住練完結他join番佢地去行下食下野，
點知突然一個電話就走左人......
無奈......

行多陣打下機就番去買野食。


b.t.-今天學左D睇簡譜野同新solo方法，好有難度呀！手指好難協調到！要苦練啦！

>>July 10, 2005 at 4:59:17 PM GMT+8

2005 年 7 月 2 日 星期六 【清涼】

很熱很熱的一個假期！
熱得要命的！
完全心煩！
拿起結他也不能集中練習~~
亦無心情上網。
記得有D正經野要整，
好難集中精神處理，
最後選擇了返中心攪~~
一來今日少同事返工靜D，
二來麻......有次氣羅~~haha

返去印左一大堆學歷證書同義工證書，
發覺自己無乜「大殺傷力」既證書呢！^^"
只係義工個D有成十幾張~~呵呵，
這樣子唔知算唔算「大殺傷力」了。haha

約左小強睇戲，
最後都係要去到銅鑼灣皇室，
算了，既然他想去咁遠，
今天就讓他話事吧。

睇依個強戰世界，
外星人侵略地球，
男主角既好運度可以說同「行運超人」差不多！
果然係男主角效應！
點都打唔中打唔死~~
不過依套戲都勁多疑點同不明白既位！
有一幕男主角佢地係一間屋既地下室避難，
之後起身發覺成架747客機係對上既地面墜毀！
最神奇既係...主角既7人車居然無中招，
仲泊到係個連門口都無左既建築物旁邊！？
之後仲勁呀！
講到外星人點勁點勁！
又話佢地老早虎視耽耽左地球依個行星十幾萬年，
D機器又有防護罩點打都無事！
不過居然係個地下室俾佢地玩捉迷藏搵唔到主角佢地！？
好心佢地帶個熱能探測先黎地球啦！
最後仲離譜！
本來侵略得好地地，
突然就話D外星戰艦突然間失控動不了！？
又變到無埋防護罩，
跟著就比十幾支火箭炮狂炸！？
無端端就俾地球人打贏場仗！？
主角仲成家人大難不死大團圓結局！？
睇完好有爛尾feel.............

本來一開頭睇都好期待！
睇左20、30分鐘就好期待個結局會係點！
場面實在一贊！
係西片先可以係景觀上做到咁震撼！
人設同對話都很有深度絕不馬虎！
不過就係個結局有點過唔到關！
唉......純官能刺激吧。

食晚飯，
去左間上海野食，
傾左好多中學時代既野~~~
因為唔同班所以都無乜熟識的感覺。
不過明天就要入大官裡面做宣傳lu。

>>July 6, 2005 at 5:52:45 PM GMT+8

2005 年 7 月 1 日 星期五 【晴】

擔心左幾日，
這幾天總會為了今天的試玩日憂心......
總覺得這樣的活動反落的反應不好，
我們同事又放左好多心機去宣傳，
成日都怕得個吉......
憂心左一陣子呢...^^"
返三節，
望到個更表都覺得好累！
三節呀~~

今日成個無限頻道基本上得我們「宣傳二課組」的三位同事！
一開頭諗住set up個場好易，
點知原來都大執位左一輪！
為的...就是攪得更有氣氛更似一個開放日！
執完都好滿意個場地呢~~^^

大緊張左一輪就到4點正式開始！
率先有4、5個女仔黎左試玩結他，
再黎就有5個6個既男男女女魚貫到來！
好開心見到咁既情況！
這樣子才能考驗我們的合作同默契呢！

今日的我負責做半個接待的試玩親善大使~~^^
主要係同D玩完既青年人去傾下同個別宣傳一下，
好開心有這段同青年人分享學音樂樂趣的時段呢！
周圍行黎行去，
見到幾個房既義工導師都好努力，
好感謝他們義務支持我地既中心宣傳活動呀！
無佢地今日又無咁既情景，
這一個充滿youth氣氛的無限頻道呢！

晚上，
又是另一個情境，
黎個小型試玩日，
好似小班教學咁小型~~ha
難得有些遠道而黎的青年人也不辭勞苦深夜趕黎呢！
自己也得已放輕鬆去參與一下呢！
當然也solo了一小段自學鼓呢~~~呵呵

統計一下，
今日的戰績也很令人滿意，
新同學報名的也有兩三個，
也令很多非會員認識到這樣有趣的青少年中心呢！
而這樣的試玩日，
也成為了我們興趣班服務的新試點，
開始可以突破一下困局了！^^

>>July 6, 2005 at 5:25:05 PM GMT+8

2005 年 6 月 30 日 星期四 【暴雨】

今天是7月1日，
是「香港回歸紀念日」，
也是我認為的「香港法定遊行日」。
暫時沒有一年有參與這樣的「盛事」呢。
不想一知半解的就參與，
不想被一些不良的傳媒誤解成「無法無天，青年也上街」。
濫用左青年人的位置及力量。
今年度...也是沒有參與呢。

與屋企人飲茶，
聽最細妹講佢既遊北京後的感想，
又長城又天安門又故宮的~~
中國...我還是喜歡去觀看那些武俠小說的自然景觀呢！^^
去旅行...都係想去日本呢。^^

下午當值Counter，
無驚無險就到6點了。
悠閒的一個下午。

晚上約了打羽毛球，
一個突如其來的想法叫fd幫手Book 場，
初初都無乜諗過會多人黎既~~
最後都有8個人出現呢！^^
包括成個月無見既Soho~~ha
足不出戶既Ka ho~^^

還有一個新朋友，
「她」也抽空參與呢~
當初也驚佢遲放工會唔黎，
不過聽到佢話應承左無理由唔黎，
最後都玩左短短1個鐘就走呢~~^^
怕佢同其他人夾唔黎，
不過你肯賞面出現已經好開心喔。
D fd話佢好靜唔講野喎，
下次仲要玩耐D先得啦！

11點完，
第一次試打咁夜既場~hahah
同依班fd都真係成年半無一齊玩過羽毛球~ha
打完就去左個間陽光甜品食宵夜糖水。

佢地話我今日好唔抵...
前前後後實質只係打左半個鐘多，
我倒不覺得呢~~
今天...能與他與她相聚已經很開心呢。^^
對我來說能一大班朋友見面已經值回票價。
而且....................

就係咁簡單就得啦！^^V

>>July 3, 2005 at 5:42:55 PM GMT+8

2005 年 6 月 29 日 星期三 【暴雨】

早上的工作，
為星期六的試玩日作準備，
亦為中心的網頁付三分努力！
現在也可算只欠上網，
大家不久可看看我設計的部份呢！^^

返早上一節，
下午約了小強景華過沙田，
想買把靚縮骨傘不過無把睇得上眼。
之後過左宜家，
不斷見梳化同床就彈上去！
我去到宜家通常都會做既指定動作。
小強要揀CD櫃，
最後揀左個裝250套左右的CD櫃，
原本都好重下！^^"
之後佢不理會我同景華的勸告，
一定要花錢叫街車返屋企，
唉...當佢決定一件事就勸都勸唔到...由佢啦。
之後一齊搭車返到聯和墟。

明天就要去打羽毛球lu~~
約實既人好似愈黎愈少咁添...^^"
唔知.........黎唔黎呢...

>>July 3, 2005 at 3:19:29 AM GMT+8

2005 年 6 月 28 日 星期二 【晴】

今天好開心呢！
心情確實愉快了很多！
不斷會係office講笑、搗蛋！^^

今早第二次到了靈風宣傳，
今天變左做鼓手！
表演下D自學三腳貓工夫！
好開心自己既表演也不過不失~~ha
要繼續努力自學~~^^

返到中心就忙左一輪興趣班工作，
之後開始諗SYP既活動~~
有一陣陣好擔心既感覺出現左....@.@"

玩左陣鼓、玩左陣「精神不健康」既同事、印左個「已有進步」印俾Susanna之後就放工，
過左去大中行下，
探下波子頭就入左瑞興，
抵受不住Beyond既演唱會VCD！
猶疑左2分鐘就買左！

返到屋企突然上唔到網！？(另一部機又上到？)
開始睇Beyond vcd！
實左太型爆太正啦！
現場睇左之後再睇VCD，
有種「補完」的感覺！
貫中同家強超型爆！^^
諗起夾Band夢...
身邊既fd就因為$既問題堅持唔到學音樂...
有D兒戲既籍口不過又係事實...唉........
小強做Bass...豪做鼓手...權同我做主音結他...
依家可能只可以獨腳戲自彈自唱lu。
要苦練習木結他！^^

>>June 30, 2005 at 4:02:24 PM GMT+8

2005 年 6 月 27 日 星期一 【清涼】

某人的一個無心約會，
突然間做成十幾人既組合一齊出街~~
仲話要請大家食飯！？
都唔知好定唔好lu。

七點左右約左部份人一齊去~~
今天的我無乜心情的~~
呀偉出唔到？
唔好俾我估中別有內情呢~~hehe

Book 場成功了！
打到11點！？
總覺得好似打埋D宵夜時間咁~~^^"
聽到一些趣事...
心情愉快了很多呢~~ahha

出到去尖咀，
先知原來小強仲會約班展翅fd~~
唔係話唔歡迎...
不過係大家未有心理準備咁樣join埋一齊，
始終...
咁大班既兩個不同組群係好難突然夾得埋~~
盡量配合吧。

271轉綠色小巴返屋企，
2點幾返到去，
明天就返早了。

>>June 29, 2005 at 5:16:33 PM GMT+8

2005 年 6 月 26 日 星期日 【清涼】

星期一，
今天要到靈風作宣傳~~
宣傳大軍要出發了！^^

十點返到去，
無人係度...？
一問之下原來佢地約九點半！？
點解我唔知既！？
算~~之後搭的趕去。

今次無乜帶架生去，
只係帶左電結他同電子琴~~
要我solo！？
我學緊第一堂渣~~^^"
看見其他機構，還是老樣子，
好似唔多重視依D宣傳咁既？
最後反應也總算不錯呢！^^

今天，
很久之前約左大伙出去網吧打機，
放兩點，
留到四點join暴華出先。

好心打俾暴暴問下佢得未~~
點知...有點兒傾到火火地...
唔講啦...好似要做到跪地求佢咁...
沒有一個理由合心意...
何況更是因為...算了...
拍拖就是這樣子...
火...是因為咁遲都唔講明白...
火...是因為覺得我們原來讓人覺得是不講理的而遲遲不敢道明...
火...是因為要陪人所以...
道理是明白，可是很無奈。
網吧...唔多人玩既話...有什意義...？
屋企也可以了吧。

呀偉打黎~~
爆左幾句...
大家也是因為「那個」而很火呢...
算！
唔理咁多，等我冷靜下吧。

行左陣，就去左join嘉祺學結他，
今堂開始學探Chord的應用，
唔...開始識睇流行曲簡譜呢。
識左一兩首民歌~~好開心~^^

學完join左景華小強，
行下行下去左食飯，
呀偉就繼續打機~~

食完之後~~~
都係決定唔join網吧~~
走左去打街機~~好想彈結他呢！^^
好想去任性一下。

突發其想想約打羽毛球，
唔知book唔book得成呢。

充滿樂與怒的一天~

>>June 29, 2005 at 4:48:12 PM GMT+8