2002 年 10 月 2 日 星期三 【晴】

我甩了爸爸媽媽同朱姐底呀，真係好唔好意思呀。對不起。
食得開心ｄ喇大家。

>>October 7, 2002 at 7:56:28 AM GMT+8

2002 年 10 月 1 日 星期二 【晴】

早上test完。爸爸打來問我呀，開心。

爸爸下午應該會去打soft ball的喎，要向宿度睇下先得。嘻。爸爸真係好勁呀，幾累都可以打喎，之前踢左３個鐘足波，之後又行山喎。

但係我覺得累呀。所以我估係因為咁，我讀讀下經訓左，攬住本聖經咁。好彩向5:00左右gut起身，剛剛睇到好多一點點的人打soft ball，咁算唔算睇左爸爸打波呢？唔制呀，睇唔到，爸爸打波應該好好睇的架。

晚上係exchange o'nite，我係PIC來的，噢，累呀，但係好開心啊，同ｄexchange玩同食，呵。

>>October 7, 2002 at 7:58:05 AM GMT+8

2002 年 9 月 30 日 星期一 【晴】

早上meet爸爸。我地一起食腸粉，好好味啊！雖然係林左ｄｄ，但係真係好滿足呀！我好享受一起食腸粉的感覺呀。熱辣辣腸粉係我歡喜的香港早餐喎，爸爸又係我歡喜的人喎，所以真係好開心的呀。真的呀。

之後就meet其他的人，初初見到有好多都唔識喎，媽媽又好似同爸爸有好多野傾咁喎，加埋有ｄ累累，就好想訓喇。但係訓唔到，就開始同大家結交結交喇。大家都好好呀，一ｄ都唔嫌棄我喎，仲好照顧我，同教我好多野添。真好呀。

爸爸一路都係同媽媽行喎，媽媽好似有好多野諗緊呀。香港人，放鬆ｄ啦。原來媽媽佢條腰痛痛呀，噢。

小航啦、淑賢啦、沙燕啦……都係大哥哥大姐姐咁呀。等Enoch的時候佢地幫我噴蚊怕水同查防曬喎，我原本係乜都無諗住用的喎，好周到呀。仲有謝謝淑賢準備的吞拿魚包，好味道。仲有小航的照顧呀，不斷的俾包包我吃，真的很好呀。

去到浪茄，大家都唔想郁咁喎。累喇應該，係咪大家開始番工，成日都要屈住，需要既應該係抖抖而唔係出來玩呢？但係見到大家悠然自得，唔，我都好享受啊，呵。都係掉掉沙、玩水水咁，好彩有淑賢肯同我一起下水玩咋，好舒服啊，難得黎到，唔落會好浪費嘛。好彩有落咋，唔係會後悔姐。嘻。係呀，下次要準備好，帶埋泳衣……的，玩盡ｄ先。好想同爸爸佢地，多ｄ人一起玩呀。太貪玩喇我。

回程時同淑賢傾偈，我向佢身上學了很多東西呀。
淑賢話每一段時間，神都會教我地一樣功課。我諗呢，朱軒前排話過我對朋友的問題，佢話我唔會找人幫手，咁樣係好自負（其實我唔記得exactly的term）的喎。Maybe it's true，但係我當時唔係十分認同的呀。不過I don't really care how you view me。所以我都唔想同朱哥哥爭辯。但係我之後諗番，咁樣係我無當朋友係朋友呀，我真係錯的呀。謝謝朱軒。謝謝提醒。艷艷真係有太多野要學喇。神依家教緊我點樣去做一個朋友，點樣去放手呀。知道，聽命。我唔會再咁硬硬的呀，我會柔軟的，聽你的話。

仲有淑賢話人世險惡呀。其實成日都俾人warn我要小心ｄ人，但係呢我我真係唔知應該點呀。我信大家喎，點樣可以人地一做乜就話人地有陰謀？係咪要成日都小心人地會art我呢？但係人地點會無端端要art我喎。咁佢就算art左我，咁佢都唔開心架喎，係囉，點解要art人呢？要保護自己？咁講大話咪會更傷害自己，無理由的喎。咁係咪為左自己利益呢？咁樣唔係只係art自己嘛？最後都係自己辛苦喎。好唔明。其實都無動機，仲乜要咁喎。光明正大唔係會好坦然，會更開心嗎？

仲有係要分是非黑白呀，要襯大學時思想多ｄ。學左好多呀，謝謝淑賢。

之後找番爸爸媽媽一起行，爸爸講番佢ｄ行山威水史呀，好叻呀爸爸。Honour honour呀。

噢，累啊！向車上，人家讓左位俾我坐呀，謝謝。我同淑賢傾傾下，一起都訓著左呀。我地頭碰住頭咁訓喎，嘻，好得意呀。

之後同爸爸媽媽食波士頓牛扒，呵呵，好美味啊！行到倦倦餓餓，可以同爸爸媽媽一起食到豐富的一餐，好滿足啊。仲要有oldies聽喎，舒服。爸爸仲bargain到９折呀，威威，據理力爭呀。不過欠爸爸$73呀依家。係呀，爸爸佢原來有一日去接媽媽個陣俾人捉到買錯飛呀，要罰＄＄呀，好甘的呀，但係無辦法啊，無奈。（扁扁咀咀）

番到大學，見到華媽媽同LeeAnn呀，好開心呀，7B一家呀。佢地陪我等校巴，又俾好多燒餅餅我吃喎，好好好好感動呀，感謝呀！感謝神，感謝我的同學仔。我覺得好warm呀。嘻。

番到宿，再次挑戰10層樓梯呀！行到一半都係去中途站小休小休同吹吹水先，小腿結實10倍呀！累喇，依家既體能果然係無以前咁好呀，已經倦喎。

明天８半要HRM test啊，睇睇notes先訓呀。早抖爸爸，早抖媽媽。你地都累累喇應該，好好休息呀。明天我地一起都上８半嘛。

感謝主的帶領呀，可以識到大家，真係不枉此行呀。

>>October 7, 2002 at 7:41:49 AM GMT+8

2002 年 9 月 28 日 星期六 【晴】

由上兩個禮拜開始就好想關心周圍的人，我見到好多人需要人的聆聽同代禱。我好想做呢個人，去為關心大家，為大家分擔，做一個祈禱人呀。不過呢個星期比之前的兩個星期更多野做，呢方面好似做得無咁好添。其實呢，我覺得越忙，ｄ時間好似越見駛咁，做多好多野咁，只要keep住健健康康咁忙（唔亂）就得啦。不過，有ｄ覺得自己正在燃燒自己的GPA啊。

今日2:30pm係文傑浸喎，我尋晚唔情願去，打去找文傑，佢好唔開心咁。之後同采采講，佢叫我應該取捨，唔好去行山。我之後開始就諗，同神傾偈喇。
求告了很久。HRM test、爸爸媽媽反對、多野拎……全部都係我的藉口來的。我係重視既，呢ｄ全部都唔係問題。浸禮真係好值得高興的呀，係要脫離罪惡的一個見證呀。一生人得一次咋，我竟然咁諗，真係好唔岩呀，對不起呀文傑。我仲令采采咁唔開心添。我要同佢地say sorry呀。

我無將神放向首位，剩係掛住自己咁會好辛苦……好罪罪呀。我真係好曳呀，神呀辛苦你喇。我要反省呀！我唔得再咁喇！對唔住呀。我要定睛番向你度呀。

仲有呢，我同弟弟傾佢唔肯讀書既問題，佢堆我話遲ｄ先傾，之後我都無時間，所以上一個星期我寫左封信俾弟弟，但係媽咪話佢掉左，好唔開心，我覺得弟弟佢唔重視我喇。星期五番到家，我見到弟弟不停咁打機同睇電視，無野岩睇就睇帶，去到好夜都仲係咁而唔溫習或者休息，我好睇唔過眼的呀。我一路同神傾既時候，弟弟既打機聲就一路都向耳邊出現，我覺得好irritating，就更加唔開心添。點解佢重視自己的成績，一ｄ都唔為自己的將來努力，去負責任既。我對弟弟抱住ｄ放棄既態度呀。我無左份包容。可能我將自己的一套硬加向佢身上。佢有佢的辛勞，佢有佢的諗法。只要唔係逃避就得啦。從前的我是一個很懂得忍耐的人，但係依家就無左份毫無保留的包容喇。 我記得滕牧師話管教同縱容既分別，我縱容並唔係愛佢架。我真係為佢憂慮的呀。我……可以點呢？

我同神一起傾到兩點多ｄ，但係我傾完，弟弟都仲打緊機呀。我係咪對弟弟太harsh呢？

今朝早堂唱凡事謙虛，溫柔忍耐，ｄ眼淚就唔聽話咁走出黎喎。神呀。我要保守我的心勝過一切。係呀，真係無一樣野可以及得上你的。
依家好袒然呀，真開心。尊注咁讚美主，侍奉主。謝謝主！

可能唔多夠訓，今日同小朋友玩完有ｄ倦呀。以諾閃左過黎BB班度同我玩喎。咁有兩隻豬仔公仔喎，以諾話一隻係朱哥哥，一隻係我喎，豬姐姐，噢。我同佢一起用個保齡球的樽打朱哥哥個pat pat呀，嘻，好好玩啊。係以諾提出的呀今次，唔好怪我呀。BB好好玩啊。

我一完左崇拜就閃番家執野去文傑度喇，真係好累的啊，好彩俾左兩袋大佬，真的不好意思呀。但係，咁都足以取了我的狗命呀！

向車上面，媽咪打過黎，佢warn我話唔好跟埋文傑去受洗呀。媽咪話我呀。

見到采采同文傑，我即刻同佢地認錯。我唔可以再犯同樣的錯呀！
我覺得真係無去錯呀，同芯芯，采采同嘉寶一起唱詩，係第一次的呀。個氣氛真的好歡喜快樂呀，一起同心讚美主，好享受啊！ｄ歌好好聽添呀。

我見到文傑受浸，真係好感動呀。謝謝主俾我見證到呀。一個好漂亮的生命呀。

采采佢可以向黎緊12月浸呀，好為佢高興。我都好想可以同采采一起呀，佢係我的prayer partner嘛。仲要係梁牧師浸喎，真係好恨呀。爸爸媽媽佢地好反對呀，佢地原本話我grad就俾我的，但係依家就話出黎做多幾年野先……佢地反悔呀，不斷的拖，真係唔開心。

係喇，我聽受浸的一位弟兄分享，我好感受到人越大，壓力都越大呀。尋日團契時Gary同阿池都呻話依家番工好大壓力，仲要係人心叵惻的。Cece（坐我隔黎的）就即刻轉過黎同我講話我要小心ｄ呀，佢話我太單純喇。其實我都係見過佢兩次的呀，仲要係無乜傾偈既時間喎，點解我會俾佢咁既感覺呢？Anyway啦。嘻，我覺得我的學生生涯都好享受呀，要更積極去做每一樣野呀。

抱住ｄ野番到宿，心諗可以抖番下先，點知部lift壞了。救命呀，我住10樓的呀，真係要cher盡我ｄ精力嘛？番到來喇，沖個涼吃ｄ野補一補先得呀。一會守小賣又要行喇……

>>September 29, 2002 at 4:25:39 PM GMT+8

2002 年 9 月 22 日 星期日 【陰】

早上起身好累呀，好想可以訓多陣。

今朝我猶疑過想走堂的呀，我俾太多藉口自己喇，唔得咁架。搞到番到去都已經遲左５個字。太曳喇我。唔俾再咁喇。

上完堂就番宿出handbills，無乜靈感。畫完就算喇都係。其實我咪又係一路做野一路食野，怪唔得畫唔出ｄ乜啦。咁樣都真係唔係得呀，搞到自己成條金魚咁。

食飽飽又開core會 --> 宿生會會 --> exchange o'nite會，番上宿已經1:00喇，眼訓呀。

>>September 23, 2002 at 5:05:41 PM GMT+8

2002 年 9 月 21 日 星期六 【晴】

今朝起身仲落雨，仲要好大的呀。我望住個天，等左個幾兩個鐘，到左八點左右終於都停喇，好開心啊，解困咁。嘻。

早上落左去買野煲涼茶喎，其實我估爸爸都唔會鐘意飲的，因為媽媽話爸爸唔鐘意食ｄ健康既野喎，但係對佢好的嘛。唔好唔飲呀。

煲落左就番早堂，有ｄ驚個爐喎，但係應該無野既……睇番英德的一ｄ片段，覺得好滿足呀，好有與神的兒女一起服侍佢既感覺，好warm的。但係睇番，自己原來有ｄ掛住玩咁，無去真正咁服侍主，無記念住英德小朋友既生命。佢地向我眼中都係小小的耶穌來的呀。

完左早堂就番番家去閂火同雪佢地喎，所以無番到主日學呀，神會唔鐘意的，我估。對不起呀。我之後都係唔會再咁做的喇，好對唔住呀。

番番兒童部，Jesse佢地話我打小朋友呀。R哂頭咁喎。原來佢地話睇英德的片段，見到我咁做呀。我真係有？我記得我係同文科跳緊舞喎……算啦。??輝（兒童部的頭頭）quit左我吧啦。小朋友啊～～

之後去新hui找媽咪拎菜同發泡膠盒，ｄ隔離老闆聽媽咪話我要去燒野食就俾左好多野來呀，媽咪人緣真好。番到家之後同媽咪去飲茶，傾傾偈，好開心。

小鈴姐姐話我呢，一到左緊張關頭就會騰雞的啊，原來我係咁的，做唔到大事喎咁樣，我都真係要改善改善先得呀。謝謝小鈴。

去BBQ了，向置樂剩番我同高高同阿肥去買其他東西喎，真係唔少野的架。但係，真係買得太多肉喇，（我印象中呢個係18-20個人份量的啊）我估係阿肥佢好鐘意食掛，所以由佢買啦。但係原來唔係的呀。Waste Money呀。仲浪費食物添。要負責任呀我。高高同阿肥都好苦呀，要拎咁多野。我見到連阿肥都有ｄ頂唔住咁（爸爸話阿肥係鐵人來的），要放低抖抖咁就好唔好意思喇。係咪真係跟我的都無乜好結果的呢？唔制呀。辛苦你地喇。

去到大家都好似剩係想食野咁，我覺得大家都唔多想玩咁呀，傾傾偈都好的既。我見到凱寧好累呀，其他人都無乜精神咁的。唔，應該係好辛苦的了。

我覺得好得意呀，爸爸剩係燻腸腸的，但係係好味的喎。

之後就掛ｄ燈籠向棵樹到，我覺得好靚呀，中秋節呀！（笑）

仲有呢，第一次踢毽呀，係好好玩的呀。向中學個陣成日睇德光佢地踢，自己著裙仔，一路都無得踢喎。不過係真係要講ｄ技巧的喎，正腳好難的呀。係呀，婉欣佢踢得有ｄmechanic咁喎，但係又會踢到的喎，爸爸阿肥同朱軒又好強喎，個個都好叻呀。

累累了，大家都散喇，明早要番工番學呀。

走個陣先望上天，月亮好隱約咁出現呀。呢個就係最圓的月亮喇原來。係咪得我一個人咁睇呢？爸爸媽媽佢地應該會傾傾，會開開心心的。其他人都閃去巴士站到喇，要趕番家抖抖喇。我都要係加快腳步呀。

今次個BBQ搞得唔好呀，大家都太累喇，無乜mood去玩同傾咁。諗番大家累到無左表情咁，我第一次見大家係咁的，要檢討檢討下，要揀番個合適ｄ既時間。我覺得大家都好似俾俾面我咁去，我更加覺得對不起大家呀。如果要再搞我話，我會搞得好ｄ的。

謝謝大家。

累累，艷艷都要抖抖喇。

>>September 23, 2002 at 11:54:04 AM GMT+8

2002 年 9 月 20 日 星期五 【晴】

下午舅父話叫我同媽媽佢地去佢到燒野食喎，星期日都燒喇，都係唔去lu。我已經唔去聽晚食盤菜喇，真不好意思呀。其實我未食過的架，好想去食呀，我估大家圍埋一起食會好開心的，不過呢，舅父話下次再叫盤菜俾我食呀，嘻嘻。

番團契途中撞到伯伯（劉叔）喎，佢唔係咁開心呀，因為屋企的經濟狀況同兒女的問題呀，我話會為佢祈禱，佢好開心呀。原來為人祈禱呢一句話會咁令人歡喜既，我要多ｄ為人祈禱呀。我一路行番陳瑞芝就一路祈喎，好驚唔記得左呀會。不過，我團契遲到呀，唔岩呀我。

完左團契就閃番置樂買竹庶茅根個ｄ野，爸爸話喉嚨唔舒服好耐呀，咁聽日仲要燒野食就會更死的架。但係呢，幾檔菜檔都無得賣喎，我再閃埋去ｄ買雜不lun的藥鋪都唔齊貨喎，好唔開心呀。好沮喪咁回家。

食完飯之後同爸爸媽媽傾弟弟的問題喎，媽咪話細佬成日掛住打機同同女仔傾電話呀。不過弟弟真係幾令人擔心的呀。佢的成績唔太好的，如果咁樣落去真係唔得的架。我真係幫唔到佢ｄ乜呀，我同佢講佢會無乜耐性的，要佢自已有問題先會找的，對佢有ｄ虧欠既感覺呀。我真係要同佢傾傾偈呀。

晚上突然落雨呀，驚驚呀，聽日會唔會燒唔成野食的呀，我買左的東西會waste了的啊。祈禱祈禱呀！

>>September 23, 2002 at 11:51:37 AM GMT+8

2002 年 9 月 19 日 星期四 【陰】

上完兩堂早堂就回家喇，番到家，好想訓個覺咁。但係日光日白，都係做下野好ｄ。Lunch同媽咪同姨姨飲茶，呢ｄ悠閒既生活真好。

>>September 23, 2002 at 7:42:31 AM GMT+8

2002 年 9 月 18 日 星期三 【晴】

今朝約高高食早餐同佢再傾傾偈。話哂都係我家姐喎，要關心下佢先得呀。
其實今日真係唔多掂呀，起身已經講唔到野，之後同高高傾偈，發現自己把聲磁性左好多呀，唔。

上堂上到一半我就已經入唔到腦喇，咳咳同頭暈呀，好唔舒服咁。之後就閃番宿抖抖咁。貴叔話我病病呀，但係又話我隻眼好清喎，應該無病咁。我都係要訓番覺好的喇。番上宿同媽媽搞好少少野同食番ｄ野就訓喇。走堂呀我，好曳呀。訓左半粒鐘到，果然係好好多呀，只係仲咳緊姐。我仲要忍唔到口食左半條餡餅喎，死多幾錢重添。Master哥哥之後就叫我去煲腐碌蛋，要快ｄ煲食番碗先得呀，補一補先嘻。我今次好曳呀，飲左３碗呀。仲要俾小六見到添……不過我無偷食湯丸喎今次‧

今次個中秋賞月會都搞得好成功呀，ｄ宿生都玩同食得好開心，嘻。不過派剩左好多燈籠喎，笠左兩pack喎，星期日可以唔駛買喇，真開心，save money呀，嘻。

之後有個宿友仔話一起去玩　燭喎，我好想去玩的呀，因為我未玩過咁樣的架。佢仲話等我開完部會先一起玩喎。但係我都係唔敢呀，同一個男孩子咁樣玩到咁夜都唔好的，而且，唔熟都唔好玩的嘛。

開完會已經兩點喇，今晚個月光都幾圓丫，我估星期日會更好睇的，訓喇～～



>>September 23, 2002 at 6:52:12 AM GMT+8

2002 年 9 月 17 日 星期二 【晴】

嘻，今朝起身見望出去青蔥一片的，太陽伯伯出來了，感謝主呀。

今天上完堂去出City同媽媽＆采采＆朱軒同Melody同阿肥食lunch。我原來預左會遲成個鐘的，但係今日Miss突然放早４個字喎，佢一話可以走我就閃出去，我仲要撘到校巴呀，真感恩。我第一次唔駛等校巴咋。之後去到meet媽媽去酒樓，都唔覺得好遲咁，真好。
其實間鐘咁食都唔錯呀，不過要save money呀，唔可以成日咁的，得閒開心一次就夠喇。係喇，之後大家都要番工番學，我就同媽媽行行坐坐傾傾，搞到成日都急急要找廁所，嘻，但係好開心啊。坐Starbucks好舒服的呀，好似去番旅行既感覺，傾下嘆下，真寫意。我要識飲咖啡呀，美味咖啡。係呀，晚上同埋朱姐去好好食飯添呀。美味的菜飯啊，今次又食得好飽啊。朱姐今次有收穫啊，不過累死媽媽了。媽媽聽日仲要早堂添……

晚上鬼哥哥上來呀，佢一見我就跳後左一野，之後就指住我話從來都未見過我有黑眼圈架。好唔開心呀！我要好好保養自己先得呀。

今日見到大家，好覺得大家都好勞累，為工作，為功課，為家庭，真係好大的擔子呀。媽媽啦、Melody啦、肥啦、采啦、高高啦、同房啦……要為佢地祈禱呀。

我好想多ｄ關心周圍的人，唔剩止係弟兄姊妹喎，真係架。
唔知點解呢排都成日諗住家既需要喎，要好好為佢地祈禱呀。謝謝爸爸。

>>September 23, 2002 at 11:56:22 AM GMT+8