2005 年 12 月 7 日 星期三 【乍雨乍晴】

我test左喇﹐原來我真係接受唔到﹐高估左自己添！又係自己搞到自己唔開心。

嘿...唔知仲可以講d咩喇...

>>December 7, 2005 at 4:25:09 PM GMT+8

2005 年 12 月 6 日 星期二 【乍雨乍晴】

或者要我果篇entry消失係有原因既﹐我都相信呢個世界有緣份。可能真係唔需要一篇咁既entry出現係呢度﹐所以佢就消失左喇。

究竟相信緣份係咪消極既諗法呢？但又真係好多野好似整定咁﹐就好似我相信當同一個人緣份已經完結﹐就算你點樣係出現率最高既地區徘徊﹐你都唔會撞到果個人。好神奇﹐但相信緣份﹐咪即係相信宿命論？當你相信呢個世界上所有野都係注定﹐個個都有宿命的話﹐呢個世界上所有既野都好似冇哂意義﹐因為擺脫唔到命運﹐如果係命運的話﹐就唔需要努力。咁相信命運既人係咪都係懶人呢？抑或只係樂天知命？好confused...

我真係好想知人應該相信d乜野。

>>December 7, 2005 at 4:48:58 AM GMT+8

2005 年 12 月 6 日 星期二 【乍雨乍晴】

我真係好唔開心好唔開心....我好唔開心咁寫好一篇entry﹐突然間又server down﹐成篇冇左﹐係咪連個diary都要玩我先安樂？！點解要咁對我喎！究竟我做錯左d咩呀？連個server都要玩我......

>>December 6, 2005 at 4:25:59 PM GMT+8

2005 年 12 月 4 日 星期日 【颳風】

冇得飲茶﹐唔開心...仲諗住一家人飲完茶我先去影相﹐唉﹐打唔響個如意算盤添！

又勁遲到先去﹐因為又揀唔到衫出街。究竟係我d衫既問題﹐定係我個人既問題呢？好煩呀...搞到遲左半個鐘﹐勁唔好意思囉...

同高芬﹑thy﹑b﹑華仔﹑仙﹑harbour番中大影相﹐好開心﹐又做左好多gap野﹐之前影都冇咁gap﹐宜家gap盡佢~~不過宜家唔得閒整佢post出黎﹐因為要準備聽日個interview呢！我覺得宜家interview真係好似以前考試﹐除左係緊張果下似之外﹐我果種臨急抱佛腳都好似﹐哈！朱roy過左d料比我﹐真係要比d心機溫一溫佢先。但宜家又好眼訓﹐可能要等聽日先可以好好咁睇喇。

阿哥買左個新keyboard比我﹐等我打字果時冇咁大聲﹐唔好嘈到屋企人。我都想要好耐﹐因為自己夜訓﹐嘈到屋企人真係好衰女。不過﹐要習慣呢隻keyboard都真係要一段時間﹐我宜家係咁打錯字呢﹐又冇以前果個咁就手。well﹐呢d就叫做「等價交換」啦﹐每樣野都會有個代價既（即係好似opportunity cost咁）﹐要個靜既keyboard﹐就要接受佢既唔就手；就好似選擇自由﹐就要接受冇左一d野咁。其實我真係明架...

呀...頭先晚飯果時同佢地傾開中學時代既野﹐都真係好似好耐世紀之前既事咁﹐我就好似冇左幾年既記憶一樣﹐如果唔係佢地講起﹐我都唔記得發生過d咁既事﹐想當年原來都幾好玩。我完全唔知果幾年究竟有d咩野發生過﹐就連點解憎一個人或者點解比一個人憎都已經唔記得喇！或者呢個都係冇記性既一個好處黎既...可能過幾年之後﹐呢幾年發生既野又會好似果幾年咁﹐消失得無影無蹤。但係係呢一刻﹐對我黎講﹐呢三年既記憶係我一生中最深刻﹑甚至係最開心既三年﹐我覺得呢三年既大學生活比到好多快樂同滿足感我。我知道我應該珍惜﹐珍惜所經歷過既﹑得到過既同埋...失去過既...呢三年既記憶我唔想忘記...

>>December 4, 2005 at 5:12:26 PM GMT+8

2005 年 12 月 3 日 星期六 【颳風】

尋日卒之都有去個open day﹐不過係好唔開心咁去﹐我唔知點解﹐究竟係因為個open day呢﹐還是因為d乜野﹐我一起身就覺得好唔開心﹐好唔想去咁﹐但唔去又覺得洗d錢洗得好唔抵﹐所以都係出左去。去到除左一個「x」字之外﹐我都諗唔到有咩可以好好咁形容佢既安排。竟然係交低CV同相﹐度埋高就走得喇！！整個過程唔需要花多過十分鐘囉！但佢個website又講話"The Open Day will take up a large part of the day, depending on the number of candidates."﹐我頂佢﹐take佢自己large part of the day咋掛...如果d人係特登請左假去既話﹐都真係唔知好嬲定好笑...仲有﹐我完全唔可以理解佢淨睇cv﹐用咩去judge一個人有冇得screen囉﹐我就收唔到電話喇﹐可能係我識既語言未夠多啦~~但佢睇cv就知我講英文講得好唔好﹑個personality岩唔岩既話﹐我就真係覺得佢個recruitment team好勁喇！

哂完時間就番左屋企訓大覺﹐夜晚再出去舅父度食飯。又要戒口﹐見到d大閘蟹都係有得睇冇得食﹐勁慘...

唔想講野﹐如果唔係佢地問我野﹐我諗全日都唔使講野...

如果可以控制思想就好喇...

希望星期一in得成啦...

--------------------------------------------

我覺得如果一起身見到太陽既話﹐果日既心情點都好d...就好似今日咁。

--------------------------------------------

呀...原來我個diary得兩個人睇...都好...希望你地睇得明我寫咩啦。

>>December 4, 2005 at 4:44:19 PM GMT+8

2005 年 12 月 2 日 星期五 【晴】

今日一個人係屋企﹐又諗多左...可能係因為d歌﹐可能係因為「獨留兒童在家中」﹐又可能只係見到d會令我亂諗野既initiator﹐又或者係全部加埋既effect...

準備好哂所有doc﹐都copy哂d information諗住聽日睇﹐相都影埋﹐所有野都plan好喇﹐不過突然間﹐我又唔想去interview喇...點解會咁架...諗起都想喊...

希望聽朝唔係咁啦...

>>December 2, 2005 at 4:37:31 PM GMT+8

2005 年 12 月 1 日 星期四 【微冷】

今日睇左d公司既資料﹐準備聽日interview。又睇左d forum﹐睇下人地點講間公司同埋做呢行既野。睇下睇下﹐又會有少少唔sure自己係咪真係咁想做呢行。都話我反覆架啦﹐一時一樣﹐尋日先話勁想做﹐今日又話唔肯定喇！不過interview就一定會去既﹐因為我相都影左喇﹐唔會哂左佢既。同相舖個老闆傾左幾句﹐佢話我地條村都有d人係呢行﹐都會去佢度影相拎去interview﹐就後就見成左喇！我都想係佢到影完相就in得成呢﹐我話希望我係下一個~~哈！

又諗番起d野喇...成日話自己記性唔好﹐原來都唔係丫﹐只係有d似「花姨」：選擇性失憶！之不過好多時選擇權都唔係我度既~~

---------------------------------

如果根據郭碧珊所講既症狀﹐咁我咪即係自己一個人獨力撐過左panic attack同depression？？咁我會覺得自己好叻架喎！

---------------------------------

想知同唔想知之間﹐有時都會令自己做出好多令自己都費解既野。我知道自己宜家係承受唔到任何既事實﹐同時又按捺唔住自己既好奇心﹐不過我真係唔敢﹐我唔敢想像我會見到d乜野﹐又或者係我見到某d野既時候會有咩反應。我好難得先可以控制住自己係呢個狀態﹐我怕只係我輕輕一click就可以令呢個平衡崩潰。代價太大喇...

>>December 2, 2005 at 9:25:55 AM GMT+8

2005 年 12 月 1 日 星期四 【晴】

又開始搵工﹐好似有d漫無目的咁﹐係就係想搵ngo﹐但咩ngo呢？ngo都有好多種架嘛！同動物有關既都唔請我喇﹐我都唔知自己insist on ngo係為咩﹐有d confused喇又...

星期六既walk-in﹐好想win呀！聽日要全日備戰先得！

呢便寫既野越黎越多﹐果便越黎越唔想寫﹐可能係因為果便要寫書面語﹐難表達d啦！同埋果便太多人睇﹐成日都要就住就住﹐唔可以太露骨。我諗呢便算private d既﹐我出「手」可以出得狠d﹐哈！係喎﹐我都想知邊個睇緊呢個﹐如果可以留個言就好喇......

>>December 1, 2005 at 4:38:59 PM GMT+8

2005 年 11 月 30 日 星期三 【微冷】

今日本來都好地地﹐同佢地食完飯番屋企既途中又黎喇...

同billy﹑roy三個人坐埋一齊﹐冇啦啦講開介指。其實介指呢樣野都真係令我耿耿於懷﹐我唔明點解拍幾次拖都冇人送過介指比我﹐尤其係當我身邊既女朋友們都有既時候﹐我會覺得係咪我地冇咁certain所以冇呢樣野呢？我都明白呢d係好形式化﹑表面化既野﹐但我想講﹐呢樣野所比到既象徵意義對我黎講非常重要﹐可惜無論係明示﹑暗示﹐我都得唔到我想要既結果。可能咁係因為我未遇到真正適合既果個人﹐可能啦...但...會唔會其實只係因為佢地孤寒呢？well...xp

見到其他人一雙一對﹐其實唔係咁好受﹐尤其係佳節將到﹐諗起唔再係兩個人一齊過﹐就硬係有d頂住頂住。我唔想想當年架﹐但我又控制唔到﹐我叫自己唔好諗﹐但唔得﹐佢係都要諗。諗好多好多﹐諗以前﹑諗以後﹑諗好多「如果...如果...」﹐然後係《如果‧愛》.........

sorry﹐寫寫下成篇變左爛gap添...ar...我都唔想架﹐咁我呢期反覆丫嘛！

---------------------------

我明白呢d係life changes﹐人生總有唔同階段﹐而家我身處既係兩個階段之間唔銜接既地方﹐兩頭唔到岸﹐既唔可以返番去最美好既校園生活﹐又未能踏進工作既人生。呢個唔銜接既地方﹐就宜家既我睇黎係無限地遠﹐唔知行到幾時先可以去到另外一邊。

若愛上一個人　決定一起走　半路才發覺心還有點野
看不到終點　起點卻已太遠

其實我明架﹐只不過明同做係兩回事之嘛。

或者真係正如佢地所講﹐我唔識得interview啦。我唔識得用d好好既說話去包裝自己﹑去推銷自己﹐個腦又轉得唔夠快﹐冇計。有d懷疑究竟十幾年黎我學過d咩呢？學左咁多野﹐只不過因為口才唔好就比人抹殺﹐真係好唔抵呀！我唔甘心！.\_/.

>>November 30, 2005 at 6:00:08 PM GMT+8

2005 年 11 月 29 日 星期二 【微冷】

每朝早起身除左習慣要先戰勝睡魔之外﹐仲要同自己既思想搏鬥一輪先可以掙扎起身﹐如果果日係理智勝出的話﹐就好似今日咁﹐輕輕鬆鬆咁過喇！

今日爬左起身就後就決定要去跑步﹐之但係淨係想係唔夠架﹐仲要天時地利人和...我平時跑開果條路因工程關係封左呢﹐於是跑左去另外一邊﹐原來去一d平時唔會去既地方﹐感覺可以咁好﹐睇一d自己平時冇發現﹐或者冇留意既野﹐令自己心情都好d。又一次證明「世界這樣大」。

專登整到今日個schedule tight d﹐食完lunch就出去睇戲﹐睇左《proof》﹐好好睇﹐女主角Gwyenth Paltrow做得好好﹐個古仔其實好簡單﹐但演繹起黎會令人覺得不平凡。睇完戲去左剪頭髮。um...我覺得都ok啦﹐可以再型d就好喇﹐不過頭髮本身所限﹐都係做唔到d好正既look架喇﹐宜家正正經經咁都ok既﹐但係個樣又再細個d喇......剪完去左shopping﹐本身想買既野都好似冇買到﹐買左d冇plan過既野番黎﹐我買左件長身cardigan﹐想買好耐﹐唔知點解係今日就出手買左﹐可能又係時候洗下錢。之但係﹐咭數都未找﹐宜家又有少少內疚喇。唉...幾時先可以自己找咭數呢？唔想自己既pleasure成為左屋企人既負擔呀...

行左陣沙田﹐係以前成日都會行既地方。係果度睇到好多野都唔同左﹐不過同時亦令我諗番起好多野。我好慶幸我所諗既都係開心既野﹐果種感覺仲留係我心入面。我相信我應該珍惜呢一切一切﹐起碼我真係開心過。終有一日﹐我可以講得出"thanks for everything"。

>>November 29, 2005 at 4:54:21 PM GMT+8