2005 年 12 月 20 日 星期二 【乍雨乍晴】

去左cx body check﹐由於仲要寫reference questionnair既關係﹐我諗我個contract call應該要等一段時間。同阿婷都傾左陣﹐都係既﹐一日都未有contract call﹐又唔知幾時train﹐做住議員助理都好既﹐起碼有番收入先﹐因為我今日又大出血﹐唔只﹐呢期都會囉...我foresee到我quit既時候應該會被一定程度既仇視﹐不過﹐都係唔好諗咁多喇﹐可能倒頭來佢都預左﹐我根本就冇自己想像中咁重要。係架﹐呢個世界真係冇話冇左邊個唔得﹐因為我到宜家都仲生存緊丫嘛﹐已經證明左即使某d人離開自己既生命﹐又或者係自己離開某人既生命﹐都唔代表自己果台戲要剎科﹐只不過係台戲既某個角色要換人喇咁解之嘛﹐我明既...

講番個questionnair﹐我搵左pedro幫我﹐其實覺得自己好衰﹐好日都唔搵佢﹐一搵佢就係要佢幫手﹐真係「有事鍾無豔﹐無事夏迎春」？好衰仔呀...但佢又真係好好人﹐一口就應承左幫我。好﹐我都要同佢傾下計先~~~其實我一直都希望有一個咁wise又咁open-minded既長輩可以聽下我講野﹑比下意見我﹐做我既人生嚮導﹐或者應該咁講﹐我好需要「指引」...我發現用自己既力量唔係好搵到我既方向﹐我想借助一d外力﹐係協助又好﹑係啟導都好啦﹐我只係唔想原地踏步。當見到個個都進步緊又自己一直留係原地既時候﹐果種感覺好難受﹐而呢種感覺亦都唔係第一次出現喇﹐我都仲未可以好好咁deal with...

下晝出左去沙田閒逛﹐自己一個人﹐感覺可以好free﹐亦都可以好孤獨﹐不過都可以算係一種享受。沙田真係一個好多回憶既地方﹐因為佢最近學校﹐自然好多時都會選擇去沙田行街。差唔多見到每一樣野都可以諗起佢：佢鍾意逛citysuper﹑鍾意食朱古力﹑一齊買過禮物﹑一齊去過戲院﹑佢受唔住lush既氣味﹑佢鍾意用一本pocket size notebook記低哂所有工作﹑同佢一齊到過既食肆...好多好多...上年既呢個時刻同今年真係好唔同﹐係回憶既同時﹐仲有dd唔開心﹐不過自己都可以好平靜咁面對﹑平靜咁回憶。我真係進步左架喇...

又買左份聖誕禮物比自己﹐係一支bailey's﹐我知﹐係佢令我認識呢隻酒﹐亦都係佢最鍾意飲既﹐前日係滿記食左合桃糊﹐亦都係佢最鍾意而我之前一d都唔食既野。好多野﹐佢都影響左我﹐呢d﹐算唔算潛移默化？我諗佢之於我﹐除左回憶同令我明白咩叫愛之外﹐應該就係呢d小習慣喇...

呀﹐係喇﹐今日大出血﹐洗左好多﹐冇計﹐女人錢易賺...仲有﹐同bb食左餐豪既...thx﹐傾下笑下咁又一餐﹐有可以真正咁笑同玩既朋友真係好好。我真係要學下點好好咁珍惜身邊既每一個人﹐因為我唔肯定係咪可以再一次承受失去既痛苦...

>>December 21, 2005 at 4:23:20 PM GMT+8

2005 年 12 月 19 日 星期一 【乍雨乍晴】

我一直都冇諗過再同佢傾我同佢既事﹐由果一日開始我都再冇提過我同佢之間究竟發生過d咩事﹐可能佢唔想知﹐我知道﹐所以我都冇講...甚至﹐我冇諗過再搵佢﹐原因係我宜家都唔知道點面對佢。由佢既xanga得知﹐佢宜家既生活好好﹐既然係咁﹐有冇我已經唔重要﹐所以我都冇謂再出現﹐況且﹐我都唔知道應該用咩態度去對佢﹐要我做番開始之前咁﹐我做唔到﹐起碼宜家唔得﹐既然唔得﹐亦都無謂呃人呃自己。我覺得冇需要知道呢d野既同時﹐我都係冇勇氣去知道﹐好難想像佢只係用一個朋友既身份同語氣去同我講野而心入面已經有另一個人佔據左我原本既位置﹐我會接受唔到。就算我同佢講野﹐我又可以講d咩呢？我同佢既世界﹐我相信已經完全斷裂﹐呢種距離先至係最可怕既野﹐最可怕既地方係﹐我諗呢種距離一早就存在﹐而我一直都冇去修補...

最後﹐xanga中毒﹐而我亦都del哂d history同佢xanga既book mark...我都係決定用番果個方法：只要唔再知道佢既野﹐我就會慢慢recover。萬試萬靈。

Happy Birthday to myself, to my new life. Re-born after 2 months, hopefully.

>>December 19, 2005 at 4:28:51 PM GMT+8

2005 年 12 月 18 日 星期日 【乍雨乍晴】

xanga死左喇﹐我諗我都係時候番黎呢度喇...

尋日去左同阿剛一齊幫anna做民主黨既temp﹐我地用擅長既「庇護」手法完成哂d easy job之後就係度搞破壞同吹水﹐我地諗anna既老闆應該會係之後怪anna好請我地做野﹐又食又拎﹐哈哈！做temp﹑做part time同做義工都好開心﹐因為冇乜壓力。可能我真係一個唔係好受得壓既人﹐that's why我讀唔成一d好有壓力既科﹐呢d就叫冥冥中註定喇~~~

做完野就同阿剛去左行旺角打發時間。開頭諗住去漫畫cafe煲漫畫燒時間﹐跟住夜晚有個聚丫嘛﹐不過行左幾間都嫌佢貴﹐於是乎又去左睇玩具。開頭都冇諗住買﹐但見到有d新既disney figure﹐我又諗番起果個pinocchio﹐我知道我唔應該去搵一d已經送過比佢既野﹐但我真係好鍾意果隻玩具﹐於是捉左阿剛陪我行均成個兆萬咁滯。行到最後一間﹐都有d失望﹐心諗都係算啦﹐點知又比阿剛見到喎﹐於是我又好快手咁將佢據為己有喇。我唔知我再買佢背後會唔會有其他潛意識作祟﹐不過我將佢捧係手果刻真係好開心﹐佢真係好靚仔﹐咁就夠啦！我已經將佢變成我聖誕第一號禮物喇~~哈哈！寶麗萊其實未算﹐因為佢未達到我既目的﹐呵呵~~

夜晚就同fion﹑kennyzzz﹑sara﹑wendy﹑阿剛去左重慶大廈食咖哩﹐好刺激﹐因為我地都未去過﹐去到門口已經有好多人向我地招手﹐哈﹐好彩一早決定去邊層食﹐如果唔係一定煩到我地頭都大埋...

同佢地講左星期五簽約既事﹐走果時仲同大ken傾左陣﹐諗住唔再等cx﹐疊埋心水好好咁做我既議員助理﹐點知今朝一早cx就打黎叫我去body check...wow~~呢d係咪就叫做「你唔理佢佢又黎搵你」呢？如果人都係咁就好喇.....xp 宜家都唔知點架﹐又要諗過﹐做唔做好呢？又推唔推好呢？真係煩﹐又一次證明有選擇係一種痛苦黎既...

今日個xanga死左﹐有意無意之間﹐又睇左佢xanga...都話唔睇架喇﹐一睇又唔開心喇...好耐冇試過喊出聲...
我真係要接受一個人既喜怒哀樂已經同我無關﹐佢既生活已經同我毫無關係...
我到宜家都分唔到我係見到佢開心所以唔開心丫﹐定係因為佢開心唔係因為我而唔開心...總之﹐就係唔開心啦...
不過呢個唔開心持續唔到夜晚喇又﹐我既唔開心既持續時間越黎越短﹐應該會係一件好事...

>>December 19, 2005 at 2:35:55 PM GMT+8

2005 年 12 月 17 日 星期六 【乍雨乍晴】

今日我見到d﹐我一路都想見到而又以為我見到之後會接受唔到既野。想見到﹐可能係一種自虐既心態﹐又可能係想自己心死﹐而我需要一個證據去將我徹底擊倒。自己當時我真係唔知點做﹐下意識周圍望而唔望佢地﹐亦都唔想比佢知道我見到﹐我會盡力去逃避呢一切既尷尬。然後﹐佢地走左﹐我地入左can﹐一切好似冇發生過一樣﹐我只係有d戚戚然﹐有d唔開心﹐但係﹐我冇喊出黎﹐一滴眼淚都冇流過。我唔知咁代表我接受左﹑我冇想像之中咁唔開心﹑定只係因為今日既開心dominate左...

之後既時間﹐我都覺得「梗住梗住」﹐講唔到係咩感覺﹐只係有d唔開心﹐只係不停咁重覆今日既事﹐只係唔想講野﹐只係想靜靜地一個人...

究竟我係開心呢？定係唔開心？或者係我應該開心定係唔開心？

覺得自己好神奇﹐無論係開心定係唔開心﹐係keyboard度打出黎既句子總係唔會比人知道我真正既感覺﹐宜家就算係面對面﹐我都有能力令人唔知道我係開心定唔開心。會唔會終有一日﹐我可以連真正既自己都呃到？

>>December 17, 2005 at 5:44:08 PM GMT+8

2005 年 12 月 14 日 星期三 【乍雨乍晴】

唉...好凍呀...我最怕凍﹐我仲記得...佢都好怕...

我都係決定唔再睇同佢有關既野喇﹐佢既xanga﹑佢有上而同我完全冇關既newsgroup我都del哂喇﹐因為今朝睇左一陣已經好唔開心。係果個冇我既世界入面﹐所有人都理所當然地活得好開心﹐只有我一個﹐唔開心。曾經想過要每年都織頸巾﹐今年既果一條﹐應該係留比自己喇掛...

手指都凍到硬哂喇﹐字都唔想打﹐頸巾...仲點織？

好凍...取暖﹐都係靠自己吧啦...

>>December 15, 2005 at 10:37:55 AM GMT+8

2005 年 12 月 13 日 星期二 【乍雨乍晴】

呢幾日﹐已經冇想喊到一發不可收拾既衝動﹐可能係搵到工既安定感覺令我情緒冇咁唔穩定啦﹐又或者係自己已經開始接受到呢個事實。遲下聖誕﹐我都講唔到會唔會有咩flucuation﹐希望冇啦~~

尋日搵番d舊野出黎睇﹐個感覺已經冇咁沉重﹐望住果堆雜物﹐都可以有一個幾平靜既心境﹐甚至仲留有果份窩心既感覺。我慶幸自己冇一時衝動掉哂所有野﹐如果唔係可能連我既回憶都會掉埋。我搵番一幅相﹐然後放番入銀包﹐咁做可能冇咩意義﹐不過我覺得咁做自己會舒服d。請起回憶﹐唔單止係呢d﹐仲有好多上年暑假既事都突然間出哂黎﹐覺得好好笑﹐哈！

好想做d傻事﹐第一件係決定入番架寶麗萊﹐然後用呢件工具去搵番我既回憶﹐一一記低。好瘋狂呵？但呢件係我宜家想做既事﹐我好少會「想去做一件事」架﹐哈！唔知幾時又會唔想做呢？仲有d想做既野呀﹐想去海洋公園﹑想睇harry potter﹑想影好多好多相﹑想學番法文﹑想睇番好多書...原來我仲有好多好多野等住我去做﹐當然﹐仲有我份part time...

諗番份工﹐我諗都可以學到野既﹐雖然個老闆好煩﹑雖然人工唔高﹑雖然做既野好瑣碎﹐不過﹐都算係一份工﹐而且佢比到我好多私人時間。well﹐每件事都有兩面既﹐唔harsh唔捱過就好似唔後生咁﹐大學生又好似唔搵得幾多錢咁﹐但係﹐我有更多時間做自己想做既野﹐同埋岩哂我既生活方式﹐其實都好既...隨緣啦~~

>>December 14, 2005 at 3:10:22 PM GMT+8

2005 年 12 月 12 日 星期一 【寒冷】

我知道點解我唔想同屋企人講﹑同其他人講我唔開心﹐唔係因為驚佢地擔心我﹐而係因為我清楚我得到既唔會係了解。佢地唔會明﹐唔會明白點解我會唔開心﹐只係會叫我向好既方向諗。我知道咁係為我好﹐但我想要既唔係呢d﹐要識諗我自己都識﹐我想要既﹐係共鳴。正正就等於我同佢一齊果時我果種無助﹐佢唔明﹐亦都係我覺得有距離既地方。呢d野我全部都知道﹐好可惜﹐我搵唔到我想要既野...

呢段時間﹐有人真正totally understand既感覺真係好好。我唔係話其他人唔好﹐我知道所有朋友都會關心我﹐只不過係我自己貪心之嘛...thx buddy！we are fighting together！（not to each other...）

------------------------------

諗少左﹐不過一諗起都會心有戚戚然...或者我係唔甘心多於一切既﹐自己知自己事...

成日好想做d傻野﹐我唔知果d叫衝動定係直接﹐不過當然﹐理智既我都係打贏既。

>>December 12, 2005 at 4:50:11 PM GMT+8

2005 年 12 月 10 日 星期六 【颳風】

其實可能唔應該去睇《如果‧愛》﹐不過太想睇﹐卒之都係去左。當個個都不以為意既時候﹐竟然有幾個場景令我好想喊。[如果諗住自己會睇套戲既﹐就skip左下面果段啦﹐因為有內容關連。]

究竟愛既極端係咪恨呢？所有當初因為愛而做既野turn out原來係因為恨？好痛苦﹐可以感受到果種痛。此其一。其二係果種寬恕同釋放既請求令人震撼﹐一句「放手」真係包含左好多野。班主既死唔單止代表電影告一段落﹐亦代表左兩人既愛一樣死了﹐血就如為愛而流的淚一樣﹐瀉滿一地。電影關於回憶﹑妒恨和釋放﹐由回憶而起﹐經過恨的洗禮後﹐三人都從糾纏不清的關係中釋放。如果‧愛=平淨心境？

不過睇完套戲真係冇咩心機﹐冇心機行街又冇心情講野﹐搞到阿爸阿媽都可能有d不知所措。唔係想喊﹐唔係唔開心﹐只係咩mood都冇哂﹐可能係自己既代入感太高喇...

>>December 11, 2005 at 3:33:30 PM GMT+8

2005 年 12 月 9 日 星期五 【颳風】

宜家其中一樣令人心煩既事叫做解決左﹐起碼兩件令我唔開心既野都冇左一件﹐我覺得自己可以make progress喇。都應該多謝果個好煩好煩既議員既~~

睇番以前d相﹐原來我可以擁有咁多好開心好開心既日子﹐我會相信跟住落黎都係一樣。想自己快樂﹐可能要先學會知足。其實咁都唔係一件壞事﹐或者正如阿哥所言「經一事長一智」啦﹐如果唔跌過痛過﹐真係唔會知道咁樣做有幾痛﹐無論係我定係佢都好。雖然冇人幫我療傷﹐但我明白﹐由細到大我都係咁「天生天養」架啦﹐會自己好既。我會對自己再好d。

>>December 10, 2005 at 7:03:18 AM GMT+8

2005 年 12 月 9 日 星期五 【寒冷】

尋日一早起身仲要搞搞隻眼先見得人﹐卒之搞到遲到﹐勁唔好意思。死啦﹐呢期成日都遲到﹐好驚添...

尋日就係畢業禮﹐個感覺好奇怪﹐應該係好開心﹐但其實又好唔捨得﹐唔捨得離開呢個咁開心既地方﹐但我又知道唔走都唔得﹐連最後一個連繫都斷左喇﹐其實中大之於我﹐可能已經冇乜留戀既意義。不過見到院長都依然係咁開心既﹐雖然佢差d搞到我影唔到相...

朝中係中大畢業禮﹐悶到呢...我都明呢d野係悶d既﹐所以我都有去﹑都有乖乖地坐係度睇哂成個過程。叫起身戴帽果下好有衝動掟帽架﹐同時又好感觸﹐估唔到﹐三年咁快就過去﹐點解以前中學小學果d時間又好似過得咁慢咁既？「快活不知時日過」應該係咁既意思。完左上晝﹐就番上uc食飯﹑影相﹐睇左裝修完既uc gym﹐嘩﹐好浮誇﹐差在冇係百安秉芬裝plasma咋...之後又落番rrs行uc禮﹐有機會同d好耐冇見既同學仔傾下計﹐發現原來呢個世界真係細﹐兩個我識既人原來之前係同事﹐嘿！卒之到左上台果一刻﹐雖然我乜獎都冇﹐但係台上面見到阿爸阿媽同我揮手﹐仲有接到證書果刻﹐真係好感動同埋光榮﹐呢十幾年既學習同父母既投資﹐可能就係等呢一刻喇﹐我竟然可以finish﹐都真係幾神奇架~~

完左之後冇同佢地出去食野﹐覺得都幾衰仔﹐但我講唔出點解﹐就係覺得唔想去﹐已經換左衫﹑落左樓﹐去到樓下都係突然間調轉頭番左上樓﹐可能真係太支力喇﹐係個山度行上行落咁﹐又覺得畢業應該同屋企人慶祝下既﹐種種唔同因素之下﹐就造就左呢個結果喇。好唔好意思﹐就等下星期啦﹐等埋fion再聚啦~~

今日又去左interview﹐就係果個議員既2nd in﹐佢之前又話想了解一下個政治方向﹐搞到我好緊張又睇番d新聞﹐點知去到唔係果回事﹐去到又係聽佢吹水！今次如果唔係佢趕住有野做﹐可能都走唔到...咁又傾左成個鐘﹐其實都唔係好知發生咩事﹐淨係知佢比offer我同埋23號簽約。都幾好架﹐又近﹑車費又慳得多﹑又可以帶飯﹑做野又輕鬆咁﹐不過就係人工唔高囉。係簽約之前我都仲有得諗既﹐不過都應該冇乜得揀架喇。我明既﹐有工做已經好好﹐只係有少少質疑自己係咪淨係值呢個價﹐點解淨係得呢個價既工會比offer我？又有d confused喇...

夜晚同阿媽去左學瑜珈﹐第一次玩﹐覺得...好難﹐雖然我有運動底子﹐不過太耐冇郁動﹐d筋骨硬左好多﹐好多動作都唔係好做到﹐而且﹐瑜珈要求心靈清淨﹐但我真係做唔到...應該對我心靈上冇乜幫助﹐身體上嘛...可能有既...

>>December 9, 2005 at 5:19:49 PM GMT+8