2006 年 3 月 10 日 星期五 【陰】

意想不到既事永遠都係你一d心理準備都冇既時候出現。

我真係估唔到我番到中大第一個見到識既人會係佢﹐仲要搭埋同一架校巴上山。而我﹐只可以扮睇唔到佢。我已經唔識得面對﹐果d屬於「以前」既人﹐因為再唔可能用「以前」既感覺同方式去對待佢地。

感覺好差﹐心情﹐都好差。我唔係時時刻刻都可以呃到自己叫自己唔好諗。未完全放低既野又點可能叫自己唔care？仲未識得處理係咪我太幼稚？

>>March 11, 2006 at 5:09:44 PM GMT+8

2006 年 3 月 4 日 星期六 【暴雨】

尋日ucism聚﹐無啦啦玩左「truth & truth」﹐都好既﹐令我知道原來有一題問題既答案係咁唔肯定。講黎講去﹐我咁唔開心都只不過係因為冇左個人同我分擔所有既野﹑冇人照顧﹑冇人always available比我「恰」之嘛﹐相信我再過多一排﹐真正愛上自己一個既生活時﹐呢種感覺就唔會存在。

我覺得﹐我比以前更加孤僻﹐甚至比初中時代更甚。如果冇需要﹐其實我係office係一句野都唔想講﹐更加唔想同d唔識既人講野（靚仔例外﹐不過﹐我唔會識得撩人講野囉...）﹐得閒既時候最鍾意自己一個人係屋企hea﹐係全間屋得番我一個人﹐唔使講野﹐亦都唔使留意自己既存在對其他人有咩影響﹐鍾意做咩都得：訓覺得﹑睇書得﹑打機得﹑練習得﹑乜都唔做坐係度都得﹐冇人會黎煩我﹑問我呢樣問我果樣﹐自己一個過既生活好自在。

當然﹐我都會好tresure同一班好朋友聚會既時間﹐交換下近況﹑講下笑﹐都係另一種快樂黎既。

>>March 5, 2006 at 7:00:03 AM GMT+8

2006 年 2 月 26 日 星期日 【暴雨】

一日之間情緒有咁大起伏真係好辛苦。我最憎落雨﹐一落雨我就唔開心﹐尤其係宜家。

一個人心入面有兩種聲音﹐好煩﹐覺得自己一時一樣。呢一刻可以好冷靜﹐好清醒﹐但上一刻原來係一路行一路喊﹐有種精神分裂既感覺。

我諗都係記番d平靜時候既野好d﹐遲d睇番都唔會咁激動。

呢個困局只有我自己行出去先可以解﹐但同時﹐我覺得我自己愛上左呢個迷宮。唔沉溺係悲痛入面我就覺得自己唔存在一樣。

-------------------------------

流水　像清得沒帶半顆沙
前身　被擱在上游風化
但那天經過那條提壩
斜陽又返照閃一下　遇上一朵　落花

相遇　就此擁著最愛歸家
生活　別過份地童話化
故事　假使短過這　五月落霞
沒有需要　驚詫

流水很清楚　惜花這個責任
真的身份不過送運
這趟旅行若算開心
亦是無負這一生
水點　蒸發變做白雲
花瓣　飄落下游生根
淡淡交會過　各不留下印

流水　在山谷下再次分岔
情感　漸化做淡然優雅
自覺心境已有如明鏡
為何為天降的稀客　泛過一點　浪花

天下　並非只是有這朵花
不用　為故事下文牽掛
要是　彼此都有些　既定路程
學會灑脫　好嗎

流水很清楚　惜花這個責任
真的身份不過送運
這趟旅行若算開心
亦是無負這一生
水點　蒸發變做白雲
花瓣　飄落下游生根
命運敲定了　要這麼發生

講分開　可否不再　用憾事的口吻
習慣無常　才會慶幸
講真　天涯途上　誰是客
散席時　怎麼分

流水很清楚　惜花這個責任
真的身份不過送運
這趟旅行若算開心
亦是無負這一生
水點　蒸發變做白雲
花瓣　飄落下游生根
淡淡交會過　各不留下印
但是經歷過　最溫柔共震

>>February 27, 2006 at 3:21:23 PM GMT+8

2006 年 2 月 18 日 星期六 【寒冷】

有工作﹐係穩定左﹐但原來唔代表我冇事。

我以為情人節時份﹐我會好唔開心﹐不過我冇﹐起碼當時冇﹐我依然係嘻嘻哈哈又一天。我曾經以為之前果半個月我會唔開心﹐但都冇﹐因為我有野keep住做緊﹐根本唔得閒去諗﹐亦都冇心情諗。

我唔知道係因為套劇既情節影響我﹑定係套劇個男主角太靚仔﹐果種難受既感覺又番黎。

聽日係第四個月﹐我知道咁樣數住對我一d幫助都冇﹐只不過呢個日子又突然間浮現。我知道一切既野唔會番轉頭﹐我知道問題係邊度﹐我都知道我地既世界唔會再相連﹐我更加知道自己要振作起黎﹐不過﹐事質歸事實﹐如果我係一個咁容易比理性戰勝「後悔感覺」既人﹐我就唔會一次又一次咁情緒低落。

果日番到uc﹐我已經冇左鍾意uc﹑渴望番去玩既感覺﹐取而代之既係不安。我將所有可以associate既野都連繫左﹐我想狠狠地同呢個圈子斷絕關係﹐將所有會令我唔開心既都完全離棄。我只係想令自己好過d﹐某程度上係因為﹐當我諗起佢﹐我只可以諗到d佢對我好好既野﹐但完全諗唔起d我對佢好好既野。事實﹐我知道﹐但係我接受唔到。

>>February 19, 2006 at 3:29:31 PM GMT+8

2006 年 2 月 4 日 星期六 【寒冷】

過左年喇﹐初四就開工。每日都keep住有d野做﹐自己都開始投入d喇﹐都有比心機睇file。有份穩定既工點都令自己安心d﹐不過﹐如果有段穩定既relationship就更加錦上添花。不過我知道冇可能。

就黎情人節喇﹐接住落黎呢半個月可能會過得好痛苦。可能就係因為咁﹐呢幾日既情緒又開始有dd唔穩定。我會再努力嘗試tune tune自己既思考方法﹐同埋keep住distract自己﹐唔好令自己有self pity。我唔想project比人睇一個可憐虫既image﹐因為我根本就唔係。

>>February 5, 2006 at 11:19:51 AM GMT+8

2006 年 1 月 24 日 星期二 【寒冷】

我唔可以相信...我竟然係office喊左出黎...

我諗﹐我真係好恨佢。

>>January 25, 2006 at 9:14:40 AM GMT+8

2006 年 1 月 21 日 星期六 【寒冷】

我終於知道點解尋日會咁唔開心﹐因為...尋日係20號...

我唔去組聚喇﹐可能...以後都唔去。我搵唔到任何樂趣﹐根本﹐我要既唔係呢d野。我唔想見到佢﹐見到一個心入面冇我既人一d意思都冇﹐我唔覺得應該要為難自己去做任何野。唔想見到佢地﹐唔想諗番起以前。我唔知咁算係逃避定係搵到一條新既路﹐但我知道以後要自己一個人行落去﹐我唔再需要虛情假意﹑唔需要d自以為明白我既說話﹑同一d其實冇共鳴既同理心。我要為自己交代﹑為自己而活﹐要令自己開開心心﹐唔要再靠人去比一d短暫﹑冇保障﹑好似幻象一樣既快樂我﹐我要既野我會靠自己去拎番黎。

>>January 21, 2006 at 5:37:29 PM GMT+8

2006 年 1 月 13 日 星期五 【颳風】

感覺天氣冷了　就加件毛衣　而不是急著躲進　某個人的懷裡
這麼簡單的常識　我竟然忘記　直到你離去　才恢復記憶

還可以呼吸　心跳也還規律　只除了寂寞　它還不肯馬上就平息
相戀和失戀　如果說都需要練習　一次學會兩種也算好事情

謝謝你教會我　愛需要兩顆心　謝謝你示範了　什麼人該放棄
謝謝你提醒我　痛會喚醒勇氣　謝謝你曾讓我　這樣的　愛過你

只要睜開眼睛　就有好風景　再不用苦苦等你　偶爾的好心情
這種簡單的快樂　比玫瑰美麗　我相信傷心　會慢慢痊癒


----- 謝謝你讓我愛過你

>>January 14, 2006 at 3:41:12 PM GMT+8

2006 年 1 月 10 日 星期二 【寒冷】

呢兩日得閒既時候依然好多野諗﹐不過今日又好似好左。我覺得突然間﹐自己好似有少少開竅。今朝番工忽然諗起d野﹐諗起左合桃糊﹐果時個感覺都冇咁強烈﹐之後放工﹐angie突然間約我去食糖水﹐去到落order我卒之都係叫左碗杏仁茶﹐而佢就叫左碗合桃糊﹐真係好巧合﹐而係果一刻﹐我好肯定咁覺得﹐我其實唔鍾意食合桃糊...

>>January 11, 2006 at 3:03:32 PM GMT+8

2006 年 1 月 8 日 星期日 【乍雨乍晴】

尋日iris媽擺酒﹐個場面可以用「浮誇」黎形容﹐真係兩個noble class既結合﹐聽佢地講佢地拍拖時候既「情趣」就知道喇﹐全部都係有錢人既玩意...

究竟用咩黎衡量結婚既時機呢？我會覺得結婚真係一個好大既承擔﹐甚至係「負擔」﹐原本一個人既生活﹐以後就要照顧多一個人﹐由自己生活開既家庭變成去問拓自己既家庭。結婚既果個時刻我都會好認同係好sweet﹑係一種可以不顧一切既感動﹐但感動過後既現實又係咪結婚前心目中所想既野呢？或者就好似我同angie所講既一樣﹐我真係一個唔鍾意負責任既人啦﹐甚至可能係因為咁﹐所以先會...又諗多左喇﹐冇法啦﹐見到d咁既感人場面﹐除左祝福人地之外都會調轉頭望望自己既身世既...

究竟我應該點樣去總結之前發生既野呢？宜家諗番﹐佢都可以叫做係我最需要人支持﹑最需要佢既時候離開左我﹐咁究竟算係發生過d咩呢？突然間又好似抽離左...我以為我可以再豁達d架﹐可惜我仲未做得到。呢期成日問自己﹐係因為冇左佢又而唔開心呢？還是因為身邊冇左個人而唔開心？我都唔敢答。

>>January 9, 2006 at 3:03:36 PM GMT+8