2007 年 1 月 11 日 星期四 【颳風】

語言真係一種好難處理既野。

我記得有一年既a-level練習中文科口試個人短講既題目係「聽和講﹐哪個比較難？」（大概）﹐當時呢樣野好考起我﹐因為對我黎講﹐兩樣都咁難﹐不過當時我都係揀左講﹐因為講仲要組織好每一句句子﹐以求聽既人一聽就可以知道我想表達既意思﹐而聽果方面﹐只需要聽得清楚每一個字就可以明白講果個人既意思。當然宜家既我知道﹐其實聽同講﹐都可以好高層次啦！點樣用最少既字去表達最準確﹑最豐富既意思係講既難題﹐而由人地講既野當中理解人地既思維﹑或者知道人地字裡行間所隱藏既意義﹐就係聽既智慧。

而宜家人與人溝通間既問題﹐在於有人唔願意講﹐有人唔願意聽。

我仲記得細個既時候睇過一本「兒周」﹐入面有一個漫畫故事﹐講一個細路比父母誤會﹐老屈佢打爛屋企d野﹐又冇聽佢講佢係學校既野﹐最後到夜晚個細路個肚係咁漲大﹐卒之入左醫院﹐醫生幫佢係個肚度拎左好多個字出黎﹐砌番出黎其實就係講緊佢係冤枉既﹐同埋係學校發生既事。呢個故事既意思好清楚﹐就係話d大人應該聽下細路講咩。不過呢個問題已經唔止存在於父母子女之間﹐就算係朋輩﹐我都唔覺得所有人都願意聽﹑願意講。

究竟係對話入面﹐有幾多人係真正聽緊人地講野？又或者應該講﹐有幾多人係真正聽得明人地講野？好多都係知道左個表面就算﹐唔會去發掘一下人地講野既深層意義﹐又或者去關心下人講野既出發點。總之唔理好醜﹐是但求其知道佢講果d咁既野就算﹐唔理佢開心唔開心﹐同埋點解咁講。又有幾多人真正講得出佢自己既感受？對話其實需要真誠﹐但好多時人會基於某d原因而將自己既真實情感隱藏又或者係作假﹐不過又唔明「你唔講人地點會知」呢個道理﹐反而因為一d無聊既原因而寧可唔講自己既感受。「顧全大局」？你果個「大局」又有幾多人關顧？「顧全面子」？同自私應該差唔多解釋啦可？

可能我都有d以偏蓋全﹐因為我都只不過take自己或者自己身邊既人做reference。我自己就非常同意我係一個語言能力非常弱既人﹐我永遠都聽人講野聽得唔清唔楚﹐只會靠關聯感應去猜度人地既意思﹐叫我表達自己更加係難上加難﹐因為我經常假設人地會聽得明我講既野﹐而其實唔係囉！

唔講咁多lu﹐可能都冇乜人睇得明我呢篇野講乜。

>>January 12, 2007 at 3:13:13 PM GMT+8

2007 年 1 月 11 日 星期四 【颳風】

我要收番我幾日前講既野。個問題可能唔係出係佢度﹐而係我度。

如果唔係一早就話比佢知所有野都有限期既話﹐佢就冇一個咁好既下台階。

又或者﹐呢個下台階係比我自己rather than比佢？

>>January 12, 2007 at 2:41:35 PM GMT+8

2007 年 1 月 9 日 星期二 【乍雨乍晴】

係網上日記寫既野﹐其實都係想人睇﹐如果唔想比人知既﹐寫係自己本簿仔度咪算囉﹐做咩要寫出黎？

如果係咁﹐寫得越多既人﹐究竟係鍾意同人分享自己野丫﹐定係因為感受唔到人既關心而要將所有野寫出黎希望引起人注意？我諗都係後者居多...

之但係我寫係呢度﹐係貪呢度冇乜人睇。我個人係咪好矛盾呢？

不過我知道﹐睇得呢個版既人﹐一定係我識左好耐既朋友﹐因為呢個版已經生存左四年有多喇~~

>>January 10, 2007 at 6:29:42 AM GMT+8

2007 年 1 月 8 日 星期一 【乍雨乍晴】

尋日既一個電話﹐令我覺得自己工作上真係有進步過﹐最起碼自己既telephone manner都算唔錯﹐而且總算handle得令自己滿意﹐再加上﹐原本覺得好乞人憎果個人﹐原來都唔係咁衰丫﹐只係佢太緊張之嘛~

又一次證明工作態度唔一樣係幾咁容易產生誤會。其實我明白佢地有幾緊張間clinic﹐只不過我只係small potato﹐想幫都話唔到事架嘛。我就係咁懶懶閒架喇﹐唔係話我唔做野﹐但我覺得做野唔係衝衝衝就得﹐我會選擇係deadline前做妥d野既同時又唔係push得自己太大壓力﹐就係咁之嘛。我唔覺得唔同既工作態度有咩岩同唔岩﹐只要每個人都係人地set既deadline之前完成到件野﹐then it's fine~

>>January 10, 2007 at 6:29:26 AM GMT+8

2007 年 1 月 8 日 星期一 【乍雨乍晴】

Paris Je t'aime

忍唔住手去左睇paris je t'aime﹐果然冇揀錯戲﹐同埋真係值得睇。套戲由十幾個小故事組成﹐每段都由唔同既人﹑唔同既導演﹐係同一樣既天空下（巴黎）拍攝。每段既主題都唔同﹐有d講愛情﹑有d講緣份﹑有d講親情﹑有d講頓悟。巴黎真係city of love﹐套戲係巴黎唔同地方拍攝﹐但都令人感覺到filled with love and passion﹐生於果一個地方既人﹐會唔會只係為愛而活？只可惜自己法文完全唔到家﹐睇唔明d topics﹐亦都唔可以聽得清楚d對白。我記唔清楚每一段故事既內容﹐但最印象深刻要算全段一個鏡頭由遠至近﹑由上而下﹑帶領觀眾透過兩個角色動作對話逐步揭開兩人關係的那個故事﹐故事雖短﹐但鏡頭營造的氣氛和對白的運用的確令全場觀眾於末段嘩然﹐亦因此令人難忘。

睇完套戲之後成個人都好passionate~~

開場前仲睇左盛夏光年個trailer﹐我應該會入場睇！

>>January 10, 2007 at 6:25:20 AM GMT+8

2007 年 1 月 7 日 星期日 【乍雨乍晴】

仲有野想講就係...我覺得我地果度有個人幾charm~~

>>January 8, 2007 at 3:24:24 PM GMT+8

2007 年 1 月 7 日 星期日 【乍雨乍晴】

因為一個地震﹐屋企連上「國際線路」好唔穩定﹐load極都load唔到xanga﹐造就左我又番黎寫下野。

開場白講完﹐其實我想講﹐呢期真係好唔知點。我都可以用「暗湧」黎形容既。原本以為會有d野﹐就連d同事都覺得有d野﹐但就係唔知點解it didn't work out！某程度上我都覺得同佢唔係溝通得好好﹐但即使係咁﹐我唔信一個機會都唔應該比。或者我真係太想有個人係身邊﹐想到即使明知我同佢唔係咁夾﹐明知兩個人都係被動﹐明知兩個人都係唔識表達自己﹐都依然想「中」個頭埋去。

我唔係iris媽﹐我冇處理得好高明既手段﹐我只係想清清楚楚明明白白﹐不過佢連一個答案都比唔到我。我唔明﹐點解就係唔肯比個response我？一個係咁兩個係咁﹐我知唔應該浪費時間係d咁既人身上﹐但有時唔係自己想控制就控制到。係咪就因為係一個「罐頭」所以就放棄？如果係咁﹐佢只係一個膽小鬼。定還是﹐連佢自己都唔知想點？仲無用...

我會說服自己放手。

>>January 8, 2007 at 3:24:17 PM GMT+8

2006 年 11 月 23 日 星期四 【微冷】

如果可以理智的﹐就不是感情了...

但我又真係可以用理智去控制架喎...

究竟要咩條件兩個人先應該走埋一齊？

>>November 24, 2006 at 3:04:48 PM GMT+8

2006 年 10 月 22 日 星期日 【晴】

一年喇...

一周年既果一日﹐我番左去uc﹐一個唔再有我存在價值既地方。因為千人宴﹐我番到去﹐又見到佢。果日朝早甚至果日之前﹐我都好記得20號呢個日子既意義﹐不過番到去uc﹐我已經忘記左﹐事後先再醒起﹐原來同佢真正有番d正常對話既今日﹐已經係一年之後既事。

我見到佢既時候﹐都有dd覺得尷尬﹐一黎唔知開口講咩好﹐二黎﹐我依然覺得佢都想避我﹐但我冇理﹐係適當距離同時間﹐我就衝左過去用上次組聚過橋等我打開話題﹐turn out個進度都唔錯﹐起碼佢都會主動講d野比我知﹐等我覺得呢個係對話﹑交流﹐而唔係問答遊戲。

其實我地之間﹐應該冇我想像中陌生。當然﹐我明白點都唔會番番去之前﹐甚至再之前的狀態﹐亦似乎唔再重要。

估唔到我需要既時間接近一年﹐真係始料不及。由20號開始﹐我唔再需要計算日子﹐生活既重心﹐亦係時候返番去我自己度。

>>October 22, 2006 at 5:40:41 PM GMT+8

2006 年 6 月 17 日 星期六 【晴】

如果我放唔低﹐係咪代表我輸？

過左咁耐（其實我唔數﹐自己都唔知過左幾耐...）﹐唔放低既都唔得喇﹐我都開始慢慢咁投入我現時既生活同工作（真係好慢）﹐開始﹐個思考模式都有d轉變﹐已經接受到有d人唔再出現係我生活之中﹑有d人淡出﹑有d變得越黎越重要﹑有d人岩岩走入我既生活；有人會走有人會黎。生命係咪就好似一間屋咁﹐有d人入過黎就走﹐有d人會留係度一段時間﹐有人人擺明入錯屋...來來往往﹐好不熱鬧。有時d人會入黎放低一d野﹐走既時候會拎番走；有d黎既時候搬埋家私電器諗住長住﹐點知坐左冇耐又要走﹐家私電器帶唔走；有d空手入黎﹐反而帶埋手信走...真係咩人都有...

唔講唔覺﹐最吊詭既係﹐第八個月既果一日﹐竟然係要見面既一日。係咪為左慶祝一切告一段落？還是另一個故事既序幕？無論如何﹐我知道自己硬要自己認為「仲有d野」既話﹐我同佢永遠都唔會再有任何正常溝通。frankly speaking﹐佢係一個好好既朋友呢~只可惜自己都明白﹐有d野過左界唔係話咁易番轉頭﹐起碼我自己就唔係一個可以若無其事既人。一切就只可以順其自然﹐一如其他人一樣。

>>June 18, 2006 at 11:33:11 AM GMT+8