2002 年 12 月 7 日 星期六 【雨】

今晚返晚堂崇拜......


本來好享受O個種寧靜感覺, 不過今晚既講道......
好......
好....
好......
好....
好悶!
真係好悶, 阿XXX, 你咁樣講道, 用呢個Tone,
我......
我....
我...
我真係會訓架!!!

我最後進入半睡眠壯態, ZZZZZZZZZZZZZZZZZZZZZZZZZZZZZZZZZZZZZZ

如果佢唔改善佢既tone, 有一天, 我一定會訓著,
不過在那半睡半醒之中, 說不定有一天會見到異象呢!

究竟講道點先可以生動D呢?

>>December 9, 2002 at 2:37:57 PM GMT+8

2002 年 12 月 6 日 星期五 【晴】

好痛呀!!!


其實牙痛左幾日, 不過有時好D, 唔係每一刻都痛,
所以我冇睇牙醫。

其實我好怕牙醫, 呢個係童年陰影, 我都唔想提......

後來食左只痛葯, 頂得住!
因為今晚Sonja臨時話佢O係中環, 要我陪佢飲野,
聽佢把聲真係好悶, 所以我冇推, 都要陪佢啦!!!
點知佢話要我送佢回家, 搞到我成一點先返到家。

不過我今晚違反左我既守則, 因為我只會送女朋友回家,
其他女性我盡量都唔送, 費事誤會啦!!!

希望牙痛快D康服番啦!!!

>>December 9, 2002 at 2:21:14 PM GMT+8

2002 年 12 月 6 日 星期五 【晴】

多謝晒......


今晚三組一齊打邊爐, 其實都係十四人左右, 不過有D人唔打,
只係來坐坐。不過就唔算有冇分享, 只係小部份人有講下佢近況。

今次週會一改再改, 真係多謝阿秋, 開放佢媽媽的家給我們, 如果唔係......

>>December 9, 2002 at 2:05:14 PM GMT+8

2002 年 12 月 5 日 星期四 【晴】

打邊爐又改地方......


其實一開始我聽到話在教會打邊爐,
我就巳經覺得唔可能,
所以即刻問佢地係唔係當真, 肯定?

佢地又答我好sure, 咁我當然信啦,
不過依家又唔得, 無話可說。

不過我真係覺得事奉唔係咁, 就算找場地, 一定要清楚,
唔係覺得就可以, 因為依家約晒人, 你話幾麻煩, 又要再聯絡......

一句嘆息, 無奈!!!

>>December 6, 2002 at 3:29:34 PM GMT+8

2002 年 12 月 1 日 星期日 【晴】

江牧師, 好開心見到你......


去左錄音室幫Jess, 我講起尋日同Ivy食飯,
我又提起影影, 佢話我又攪D咁野,
好唔惦!!! 我都知衰, 不過我真係好愛寶寶,
如果唔再開始一段愛情, 我係唔會康服。
不過, 我同影影都只係朋友, 我又唔覺得我地一定要發展。
雖然, 我覺得我有時會掛住佢......

今晚同加拿大回來既江牧師食飯, 見到D好多年冇見既弟兄姊妹,
有肥, 有瘦, 又有半肥瘦, 大家都幾好。
Sonja既移民差不多成功, Congratulation!!!

江牧師, 我也在此祝福你, 你的教導, 我永不忘記,
不是你當天的教導, 我今天可能巳經不是基督徒了。

>>December 6, 2002 at 12:31:31 PM GMT+8

2002 年 11 月 30 日 星期六 【陰】

電話響起......


今日返完崇拜, 去左圖書館, 電話響起, 唔知點解,
個心好想係影影既電話, 不過唔係, 有D失望。

不過, 竟然係Ivy打來, 約我睇燈, 我指係去尖東睇燈。
我應氶佢出街, 不過睇燈我就唔去, 因為呢家野太過浪漫,
我唔想佢誤會, 唔係巳後成日小免, 小免, 我真係唔知點算。

不過好衰唔衰, 我地食完飯, 都係去左尖咀海旁, 行下行下, 真係唔對路,
好多謝D好大既風, 吹左我地入新世界中心,
看來, 要作首歌, 叫I love the wind!
Thank You so much!
大風D啦, 好野!!! 可以死入新世界中心。

咁樣講雖然冇D禮貌, 好似好唔尊重Ivy,
不過真係唔想有任何誤會。我唔算做小免呀!!!

在海旁見到的景色, 好似冇以前咁靚,
唔知係唔係經濟差左, D景色都差埋。

>>December 6, 2002 at 12:26:17 PM GMT+8

2002 年 11 月 29 日 星期五 【陰】

今天是小朱的婚禮......


回到家中, 巳經冇時間, 換完衫就要出門。 第一次在人地婚禮唱詩, 有D驚,
不過我諗我巳經唔同以前, 任何事都可以放開, 做到最好就是了......

Be it unto me according to Your Word,
According to Your promises, I can stand secure;
Carve upon my heart, the truth that sets me free,
According to Your Word, O Lord, be it unto me......

願你的旨意成就!!!
呢首歌幾好聽,
小朱同傑仔既婚禮, 真係好好見證, 希望D聽左信息既親友,
福音的種子在他們心中發芽成長......

在這裡祝福佢地兩個, 老土都要講,
白頭到老, 主耶穌的愛充滿他們的家!!!

>>December 6, 2002 at 12:16:01 PM GMT+8

2002 年 11 月 28 日 星期四 【陰】

影影的出現......


今晚終於同影影見面, 我地去左食小菜, 影影今晚好靚。
D food 真係幾好食, 我地好多野講, 不過我今晚有D害羞。

之後我地去左行超市, 同佢行街都幾開心, 最後去左佢屋企。
佢一個人住間咁大既屋, 佈置亦好靚, 入到去覺得好舒服。

原來佢係一個零食狂, 佢個櫃好多野食, 我地談天說地,
而且不停食零食, 不過主要都係佢食, 因為我今晚真係覺得好飽!!!

D女人食野真係唔可以睇小, 唔只食野唔可以睇小, 飲野都唔可以睇小,
佢在我飲一罐可樂既時間, 佢飲左三罐啤酒, 之後佢再飲二罐, 女人真
係唔可以睇小......

不過今晚係我第一次飲雲呢拿可樂, 都係原味好飲D。
同影影傾計傾到半夜,
先知道冇車走, 大鑊, 點算? 孤男寡女, 好彩冇發生任何事。

一睡醒巳經十時, 唯有即刻走, 因為要回家打扮, 要去小朱的婚禮。
而影影亦要出門, 佢要回大學還番件畢業衫, 我就等埋佢一齊搭地鐵,
就係呢一等, 我可能會遲到。女人真係要好多時間打扮,
不過我都鍾意女人貪靚, 佢地打扮都係俾我地睇姐!!!

不過今晚無“區束”的傾談, 令我好舒服。好多心底話都可以講出來。

>>December 6, 2002 at 12:12:07 PM GMT+8

2002 年 11 月 25 日 星期一 【晴】

我好掛住摩摩咪......


剛剛睇完摩摩咪既日記, 知道佢同媽咪既關係咁好, 連我都好開心,
摩摩咪其實好需要媽咪關心, 真係好!!!

摩摩咪, 我好想你!

>>November 26, 2002 at 1:24:36 PM GMT+8

2002 年 11 月 23 日 星期六 【晴】

尋晚睇左一場波, 有冇搞錯......


話說尋晚失眠, 就開電視睇, 半夜四點, 是打皇家馬德里對巴塞羅那。
雖然場波0:0, 但係幾搞笑, 因為費高俾人用垃圾掟。

每次費高開角球, 就係最近觀眾, 或者講最近巴塞既球迷,
那時有無限咁多垃圾掟去費高o個度,
開頭係紙, 接著有生果, 可樂樽, 幾十樣垃圾飛出去,
費高都好有風度, 冇發皮氣, 不過佢一定要大家唔再掟垃圾佢先肯開角球。

工作人員要執晒d垃圾, 費高又再開波, 點知好衰唔衰, 開完又出界, 又另一邊角球,
又到o個邊d球迷可以掟垃圾, 今次仲有破璃樽, 終於暫停這場比賽......

十分鐘後, 再重開這場比賽, 不過最後都係0:0

其實大家係想掟"哨牙仔", 不過佢又無出場, 所以大家既焦點就放左在費高身上。
巴塞既球迷真係無風度, 真係冇計, 巴塞係主場, 如果尋晚有個皇馬既球迷坐錯位,
一定俾人打死。

如果講英超聯, 利物脯同紐卞素都輸左, 慘慘慘!!!
舒利亞入效力紐卞素第一百個入球都要輸, 好慘, 佢地後防好弱......

我唔打勒, 越打越傷心......

>>November 24, 2002 at 9:51:06 AM GMT+8