2003 年 5 月 23 日 星期五 【晴】




今天既週會係查經, 我地組又多左兩個人, 係Peter既家姐同細妹, 大既叫Winnie, 細既叫Annie,
雖然帶左口罩, 但係都覺得佢地好似樣, Peter O個然好"即極"。
希望佢地三個都能溶入團契既大家庭。　

今晚亦係Betty既生日, 我地去左"大八"度食, 係日本野任食, 好好食,
有十幾人同佢慶祝生日, 係咁食, 之後又去"Inn Side Out"度飲野, 希望Betty
呢個生日成為一個難忘的生日啦!!!
Inn side out 有個特色, 就係可以除地掉花生殼, 任你食, 任你掉, 我地真係週圍掉,
由其係女主角Betty就最狂, 我同Michael後面係最多花生殼, 因為我地面對Betty坐,
不過summer露天坐, 真係有D熱, 在路上有好多看完什麼1:99演唱會既人經過, 一番熱鬧!!!






>>May 26, 2003 at 5:48:19 PM GMT+8

2003 年 5 月 22 日 星期四 【晴】




今晚靈修分享會有Ginny, Belinda, Isabella, Michael, and me,
在我們當中靈修生活仍然唔算好理想, 大部份人都唔係每天都做,
但係大家都可以互相鼓勵, 彼此提醒。

從一開始我就覺得要每個人都每天靈修, 實在唔容易。
不過我真係希望有一天可以做得到, 令每個出席既團友都每天有靈修。

有時靈修時我地都會好趕, 輕輕看過, 又沒有太多默想,
以致看過既野都唔記得, 所以分享就會有困難, 寫靈修筆記係一個好方法,
可以幫助你記下, 不過, 大部份既人都唔會做......

我會繼續努力搞好個分享會, 求主幫助我!!!



>>May 26, 2003 at 5:19:20 PM GMT+8

2003 年 5 月 21 日 星期三 【晴】




我今日行左好多音響公司, 不停"格價", 本來要成$2780既ONKYO微型HI-FI, L-N3X,
我依家用$2500就買到, 仲係行貨tim, d聲好正, 我係指和同類型既微型HI-FI 比較,
因為咁細部, 當然比唔起D大喇叭啦!!!

呢部機都好好賣, 之前斷左貨, 原因係部機身係日本做, 喇叭係馬來西亞做, 都算幾抵。
希望呢部機發揮到佢既功效, 就係令我多D在家, 聽O下歌, 洗小D錢啦!!!

Tonight...., I am a rock and roll star!......




>>May 26, 2003 at 5:00:03 PM GMT+8

2003 年 5 月 18 日 星期日 【晴】



因為知道五, 六, 日, 都會去街, 所以今日都好乖, 一放工就番屋企。
唉!!! 部音響壞左咁耐, 好想買部新, 呢排都會週圍看看, 希望快D買到部新HI-FI啦!!!




>>May 26, 2003 at 4:39:04 PM GMT+8

2003 年 5 月 17 日 星期六 【晴】




今日係門訓畢業既大日子, 不經不覺, 巳經過左九個月, 在門訓真的學了很多。
聖經知識增長了, 對神的屬性亦了解更多, 而且亦認識左一班好好既弟兄姊妹, 仲係來自不同既教會, 不同團契, 用番子民o個句, 就係認識左來自五湖四海既人。
大家屬靈上一同分享, 最後更加可以一同分享彼此的恩賜。

上到台度行畢業禮, 我都有d緊張, 真係好多人啊!!!
小朱話我個樣好木, 係呀! 我都知, 要我著到咁紅。
事緣係我地全組人一齊著紅色衫, 以代表紅色門訓同埋我地既合一。
不過我著起件紅色衫, 真係好......
紅色門訓, 我終於畢業勒!!!





>>May 26, 2003 at 6:01:12 AM GMT+8

2003 年 5 月 16 日 星期五 【晴】




呢排個日記網變得好唔方便, 因為只係VIP會員先可以登入, 其他人要在非繁忙時間先可以登入, 我又唔係VIP會員, 所以好煩, 怪不之寶寶轉左去第二個日記網。

今晚團契之後我地去左Pacific Coffee o個度飲野, 最開心就係見到新朋友Peter,
同Karen都好投入我地既對話當中, 真係好, 今次飲coffee真係有意義, 希望以後可以多d咁樣既機會, 大家彼此建立關係。

十時就離開咖啡店, 真係好健康, 聽日係崇拜, 早頭啦!!






>>May 26, 2003 at 5:49:51 AM GMT+8

2003 年 5 月 16 日 星期五 【晴】




今晚團契請左院牧來講一個題目, 就係"親友病了, 耶穌會點做?"
阿歐陽姑娘一開始就唔係講緊大家想聽既野, 佢一直都係講"如何做醫院探訪?"
所以大家都等緊佢返番去個題目度, 一等就等左差不多三分二既時間, 到佢真係講番d貼題既野, 巳經冇時間, 而且亦唔知點咁, 唔知點亦係點, 咪就係唔知點攞!!!

好多人都進入睡眠壯態, 我亦好努力强忍, 中途好多人做個唔同既野,
飲水, 去廁所, 再飲水,
釣魚, 醒番, 再釣魚......

雖然係咁, 但其實佢都講左一d好重要既point。
總結一句, 係一過好好訓既週會!!! (對不起, 要咁樣講。)





>>May 19, 2003 at 6:06:29 AM GMT+8

2003 年 5 月 15 日 星期四 【晴】




本來約左弟兄姊妹下星期五睇Matrix,
但係我又想有靈修分享會。
其實我一直都好希望每兩星期有一次靈修分享會,
但係因為自己當時讀緊門訓, 有時又懶, 又話者去左玩,
所以好耐先開一次。
不過依家門訓終於畢業, 可以有更多時間,
而且真係好想同大家在靈修中一同成長......

因為尋晚睇左"向左愛, 向右愛", 覺得好好睇,
友情同愛情都講得好真"至"動人, 令人想起好多野,
亦令你更加珍惜身邊的一切......
看完戲之後, 口快快話不如下星期睇Matrix,
但係本來係想有分享會, 經過一番掙扎(1分鐘, 通常呢d野唔拖得),
決定遲d先睇啦!!!

我地只好遲d睇Matrix, 一齊去分享會更好啦!!!




>>May 19, 2003 at 1:27:31 AM GMT+8

2003 年 5 月 14 日 星期三 【晴】





今晚去左睇戲, 係睇"向左愛, 向右愛", 未入去之前仲以為呢套係一套笑片,
或者聽個名, 會以為係講同性戀的戲, 你知啦, 什麼左左右右, 通常都係呢d戲,
張國榮都唱過啦, ".....我忘掉了右左, 如今我討厭我右手, 為何....."
對唔住, 我唔識唱。

呢套戲好好睇, 我會叫人睇。其實係一套幾傷感既片, 因為......不過唔好講勒,
因為如果你會去睇, 有d關鍵既情節係唔可以知。
裡面講既愛情同友情都好真"至"動人, 雖然傷感, 但係又令人看得好舒服。

不離開韓片的風格, 時間的倒敘, 令人要對個故事在腦海中再遍排;
間中又以讀出信件的形式, 文字的美與聲線的結合, 令人覺得更感動,
好多人都哭了出來, 完場後, 還有人哭呢!!!

我就好多情節令我想起寶寶, 我唔知點解, 但係我都會好似主角一樣, 即使不見,
我也會永遠愛著她。










>>May 17, 2003 at 4:16:52 AM GMT+8

2003 年 5 月 12 日 星期一 【晴】




尋晚看英格蘭超級聯賽精華, 都算係來一個總結, 今季作為紐卡素既球迷,
最開心係見到呢支球隊雖然季初打得唔好, 但係季中一路努力, 一直向榜首進發,
最後去到第三位, 真係幾好, 好開心, 希望呢支球隊來年可以更進步,
我最愛的球員係舒利亞, 希望佢入更多波, 佢依家係近十年來英超聯入得最多波既球員!!!

英超聯的排位:
1. 曼聯
2. 阿仙奴
3. 紐卡素
4. 車路士
5. 利物浦

最慘係韋士咸, 如果佢地入多一球波, 就唔洗降班。





>>May 16, 2003 at 6:17:48 AM GMT+8