2002 年 12 月 18 日 星期三 【晴】

親愛既天父爸爸,


你既小寶寶Ming, 小寶寶小朱, 小寶寶Paul, 小寶寶Belinda, 小寶寶Hullian, 小寶寶Carman,
小寶寶Bertha, 小寶寶天任, 小寶寶思晉, 今年都做完一年既團契職員, 唔知你覺得點樣呢?

無論如何, 我知道我地一定係你心目中既小寶寶, 因為耶穌基督既寶血巳經洗去我們一切的罪,
我地回復同天父既關係, 所以我地一定係天父既小寶寶。

求天父爸爸幫助每個小寶寶, 在新一年裡都能更加盡心, 盡性, 盡意, 盡力愛你, 更加懂得愛
身邊的人, 在不同的岡位上, 都能榮耀你的名, 又帶更多人成為你的兒女,
又一同有好的靈修生活。

天父爸爸, 多謝你聽小寶寶既祈禱, 奉主耶穌基督的聖名祈求, 阿們!!!

>>December 19, 2002 at 12:36:47 PM GMT+8

2002 年 12 月 17 日 星期二 【晴】

我愛音樂?


好耐冇認真聽歌, 以前會坐下來慢慢聽,
睇下音樂雜誌, 有時又會跟著唱,
依家好似冇左O個種感覺。
不過搬回和家人住, 唔可以"訓機",
只可以細細聲聽, 都有D影響。

行完唱片店, 年尾又係唱片公司既搶錢行動,
好多精選唱片出版, 多到你唔信。
其實一踏入秋季, 巳經不停出。

有Bjork, The Cranberries, New Order, Manic Street Preachers, Pulp, U2,
Siouxsie And The Banshees, 同埋Cabarat Voltaire 的 The Original Sound of Sheffield......
其他我唔聽開O個D我巳經冇打, 不過都有咁多, 以前經濟好, 真係照單買下,
不過New Order, Cranberries, Pulp同Bjork, 佢地既所有唱片我都差不多有齊, 實在冇必要買精選。

反而Manic Street Preachers同Cabarat Voltaire, 我就好有興趣。

但係我買左一張, 唔係上面O個D, 而係陳綺貞既精選。
好正, 好好聽!!!
佢O個種民歌校園加上英式acoustic pop, 聽得人好舒服!!!
呢期一定係我最愛既中文CD。

今日收音機話一月Suede既亞洲巡迴演唱會, 會來香港, 好野!
上次O係會展迫爆玻璃事件, 會唔會再出現呢!!!
不過今次佢地去伊館。

Suede真係好吸引, 香港都算幾多人識, 上次係盧巧音做嘉賓,
今次真係唔知邊個。不過用番盧巧音都好架, 話晒佢都係O個隊叫Black and Blue既樂隊出身。

希望2003年有多D外國concert睇啦!!!

>>December 18, 2002 at 12:52:48 PM GMT+8

2002 年 12 月 14 日 星期六 【晴】

反對基本法第二十三條立法......


有人問我第二十三條講乜, 不如就在這裡寫下吧!
內容就係咁,
"香港特別行政區應自行立法禁止任何叛國, 分裂國家, 煽動叛亂,
顛覆中央人民政府及竊取國家機密的行為, 禁止外國的政治性組
織或團體在香港特別行政區進行政治活動, 禁止香港特別行政區
的政治性組織或團體與外國的政治性組織或團體建立聯繫。"

今日有四萬多人游行, 我自己就企硬, 一定反對立法,
教會亦待政府在二十三條立法發表藍紙或白紙草案時, 會舉辦相關活動。

今次呢單野唔只係會攪到社會分化, 我諗可能收唔到料......

>>December 15, 2002 at 5:59:18 PM GMT+8

2002 年 12 月 13 日 星期五 【晴】

今日去左南丫島既北角村......


下午二十多人在碼頭集合, 但係Ophe在地鐵站暈左,
佢仲跌落一個陌生男人身上, O個個男人真係不幸.......

佢上到船都覺得好dizzy, 最後唯有Jane陪佢坐船回家, 希望Ophe快D好番啦!

今次去巴拿巴, 沒有任何感受, 不過就真係希望O個度D人感受到我地既關心......

番到灣仔, 和阿Paul坐在修頓睇人打波, 傾下計都幾好,
我地講到事奉, 大家都好想為永恆做D野, 不過現在的我們, 未有一個方向......

回家路程中, 我去Magic Pizza買左塊Pizza食, 只係personal size, 係我第一次去呢間鋪頭買野,
點知我番到屋企, 我桌子上面竟然有另一塊pizza, 發生什麼事?
原來妹妹又在幾小時前買了一塊給我, 佢又係第一次買, 諗住試下,
我地真係同感一靈,
唔係, 應該係心靈相通,
都唔係, 應該係午夜凶靈先至真, 因為我今晚食左二塊pizza(我巳經食左飯)!!!

Pizza, Pizza, 真好吃!!!

>>December 15, 2002 at 5:40:21 PM GMT+8

2002 年 12 月 12 日 星期四 【晴】

又一年......


今日開最後一次職員cell, 真係感恩的一年。
因為自己覺得今年好弱, 我指靈性方面, 但每個週會都順利渡過,
就更顯得神的幫助。

而感情方面亦因為太愛寶寶, 所以受了很大的打擊, 很辛苦,
都係因為神的安慰, 所以先能渡過, 但到現在都未能算康服,
不過靠著神, 我想終能渡過。

其實好想做回以前既自己(以前既自己係好可愛, 好有屬靈觸角, 天父好愛的寶寶),
但係依家......不過我係唔會放棄, 因為我知道一個秘密, 就係只要你不放棄,
就一定會成功。

我們分享完, 就一同祈禱, 我地祈左一粒鐘, 甚致呀Hullian都訓左, 不過都係因為佢太倦,
其實大家有機會咁樣祈禱, 真係太好......

我今晚個腦有D亂, 我諗我寫住咁多先啦!

>>December 13, 2002 at 4:22:18 PM GMT+8

2002 年 12 月 11 日 星期三 【晴】

今晚靈修分享會好多謝渣巴D雞翼,
好好味!!!

今晚雖然好多人唔得閒, 只得Isabella Yeung, Belinda, Michael and me,
但係我地都好多野講, 特別係Michael的參與, 真係開心!!!

多謝主!!!

>>December 12, 2002 at 4:38:12 PM GMT+8

2002 年 12 月 11 日 星期三 【晴】

無間地獄......


今日睇左"無間道", 有D失望。
成套戲既感覺, 就係
余文樂做3mins
+陳冠希做3mins
+鄭秀文做5mins
+陳慧琳做5mins
+黃秋生做15mins
+曾志偉做15mins
+梁朝偉做40mins
+劉德華做40mins
=就係咁!!!

可能我太過苛刻, 因為我對電影要求都幾高,
呢套戲既橋段好似某套西片一樣, 所以亦不特別。

但娛樂性還是有的, 只是不要太高期望就會好睇。

我還是期待"英雄", "貓之物語", "哈利波特"好了!!!

>>December 12, 2002 at 4:32:28 PM GMT+8

2002 年 12 月 9 日 星期一 【晴】

今日睇左一套戲, "觸目驚森"


我只可以俾70分, 其他人可能俾佢得50分。
成套戲個故事過於簡單, 只不過因為你一路都唔知隻怪物係乜,
所以你好想睇落去, 其他野冇乜特別, 恐怖氣氛亦不足,
我私人俾多十分, 係因為我喜歡呢類題材......
不過我都好享受睇呢套戲!!!

就O黎做"英雄"同"無間道", 希望唔好失望啦!!!

>>December 10, 2002 at 3:44:30 PM GMT+8

2002 年 12 月 9 日 星期一 【晴】

英格蘭超級聯賽好好睇......


我最愛既球隊係紐卞素, 其次就係利物浦。
呢期紐卞素好好, 聯賽榜排第六, 不過打少一場, 如果打多一場, 應該排第五位。
而利物浦呢幾場都輸, 排第四位, 希望思晉唔好太傷心啦!!!

紐卞素!!!
利物浦!!!
你地要努力呀!!!

>>December 10, 2002 at 3:31:26 PM GMT+8

2002 年 12 月 8 日 星期日 【晴】

當年今日......


好懷念今天, 當年今日係我第一次約會摩摩咪,
我唔記得我地當天食乜,
不過我地當日係睇左"別戀"呢套戲。

我今天約摩摩咪, 在我地第一次約會既地方等,
其實我知道佢唔會來, 不過我都一直等,
唔知點解, 我好想咁做......

我諗我每年都會咁樣等,
因為Momo豆好愛摩摩咪......

>>December 9, 2002 at 2:54:48 PM GMT+8