2004 年 11 月 10 日 星期三 【微冷】

距離寶寶既生日仲有90天, 越來越近,
我和寶寶卻越來越遠。

>>November 11, 2004 at 1:19:20 AM GMT+8

2004 年 8 月 31 日 星期二 【酷熱】

今日實在好熱, 所以我食完飯, 冇去散步。

check email 其實多左, 要在公司,web, university加埋有成三個account, 每天有大量email, 你都咪話唔煩......

買左一張BoBo既新相, 好開心!!! 寶寶都曾經話過我, 鍾意埋d BoBo咁低b, 但係我冇理佢, 我仍然好愛BoBo, 吹咩!!!

嘩! 原來二點, 又要開工, bye!

>>September 1, 2004 at 6:11:32 AM GMT+8

2004 年 8 月 30 日 星期一 【微雨】

今天終於覆了astor既email, 完全感受到她的不快與不滿, 希望她不會傷得太深, 在事奉中受傷害, 我知道後很不快。

阿wing的問題好像沒完沒了, 今次受害既係louis, 那個四十個以上回覆既留言, 都沒有人可以令阿wing明白她的問題, 一句:我錯在那裡就算, 可能很多人都失望了......我對阿wing仍很關心, 不過我不會再那麼主動了。很清楚既事實係, 上帝很愛她也很愛我們, 所以我們要彼此相愛。

九月十八日要負責的週會, 令我很頭痛......要更多的禱告......小明, 你要祈禱啊!!!

呢排好疲累, 好疲累, 原因係睇:芧B, 捱左好多個晚上。其中,有很多感人的場面, 最難忘係女排既決賽, 看著中國敗了頭兩局, 很緊張, 也不開心, 接著一場一場的勝利, 令我在半夜都大叫,也很感動!!! 我要向她們的堅持多多學習! 敗中也不會亂, 好勁!

昨天開始了第一天的master課程, 放工後返學真的很辛苦, 小明, 你要努力呀!!!

早前工作上聯系了加拿大的公司, 老細又話, 如果做的話, 派阿ming去溫哥華看看啦, 心裡寒一寒, 嘩!!!又去, 上次去韓國後, 好在唔洗再去, 唔係我既master課程就好大鑊, 我唔想miss class 呀, 作為一個a++++既學生, 當然係做到足, 點會走堂(講住先, 實在有所保留)......去溫哥華實在很好, 工幹拿經驗, 又有o野學, 實在好, 只係時間唔對路, 天父, 只有你可以為我安排一切, 求你時常與我同在。

和寶寶分手以很久, 真係唔知點解我仲咁掛住佢, 我都唔知自己係咁長情, 希望她每天都快樂啦。有時同momo玩, 都有想起摩西, 佢o個時最鍾意講:摩西!摩西!摩西西! 摩西既幼年真係由病開始, 今天能活著, 真好! 唔知摩西變到幾大隻呢?

話時話, 有時食完飯, 會去散步, 好多時都會行到敎育學院, 唔知會唔會撞到寶寶呢?不過1點幾呢d時間, 咁熱, 都好少人會出去行, 又或者佢巳經畢左業呢!

打完日記, 我要工作了!

>>August 31, 2004 at 7:38:29 AM GMT+8

2004 年 7 月 19 日 星期一 【雷雨】

今天是7月20日, 有乜特別, 要計算既話, 就係2004年行左一半有多, 我總覺得要更努力, 以致年尾回顧時, 有更大的滿足, 亦不會浪費了2004年, 因為2004年只得一次。

上星期我真的很忙, 星期二同星期三, 我都做到晚上11:45pm先離開公司, 感謝主, 雖然時間長, 但我都做得好開心。星期四, 我地既部門進行ISO 9001:2000版既認証, 並且順利取得, 感謝主!!!
其中, 我有參與認証既interview, 並且得到同事既認同, 主耶穌, 多謝你!
我越來越覺得我要在職場中榮耀你!!!
願意別人看到既唔係我既努力, 而是我是一個基督徒!
主啊! 你要得著一切既榮耀, 不要讓我貪功呀!!!

為到職場仍然要祈禱, 除了要有好既見証外, 就係傳福音既情況。前星期我邀請三位同事回教會既打邊爐活動, 我覺得是一個好機會, 但最後他們選擇不來, 真有點可惜!!!
仲有一點係好有問題, 我有時覺得讓自己工作圈子既人, 進入教會生活裡面, 總係有d冒險, 係覺得好似自己俾人知得太多野。其實知道自己既想法係有問題, 不過係真的存在著......

呢個星期仲有d野, 令我好慚愧, 就係我忘記通知組員要領詩, 完全唔惦, 都唔想再解釋...... dear組員, 你地原諒我啦!!!

回想去讚美之泉, 實在好正!!! 其中有兩句說話好好好好惦, 如下!!!
"祂的愛深觸我心
我深知我的救贖者活著"

"如我今天說:我不能更加愛神
就求神說:我更加愛你"

就係咁, 巳經足夠。

作天係我以馬忤斯第九次既重聚, 黑門山既弟兄, 多謝你地!!!
多謝主!!!

>>July 20, 2004 at 2:09:55 AM GMT+8

2004 年 6 月 1 日 星期二 【晴】

又係靜下來的時間……
呢排工作出現一種不安感, 原因其實不太明白。去韓國的事似乎一定要, 可能就係不安的原因。我對這個去韓國的實驗信心不大, 因為在產品未研究成功前去洗咁多錢, 這個實驗又多數唔會成功, 所以好困擾。開始語無倫次勒……另一個問題係如果6月尾出發, 而去40日的話, 剛好撞正註册的問題, 因為我會在九月再讀Msc, 點樣安排入學的事呢? 主耶穌應該睇到呢段野, 又應該知我諗乜野, 咁我唯有盡量安排我的時間與行程, 其他野真係只有禱告交托給主勒! 原則上經歷左咁多野, 我其實是相信佢一定有最好既安排, 只是我需要多一點信心吧!
呢段經文幾幫到我:
我的心哪, 你為何憂悶, 為何在我裡面煩躁, 應當仰望神, 因他笑臉幫助我, 我還要稱讚他。
--詩42:5


而呢排敬拜生活其實好左, 我好投入聽道同唱詩當中, 雖然不想強調感覺, 但係感覺真係回復九十年代聽道並最投入的時候, 真係好好, 好想話俾更多人聽, 但係又有d問題, 因為我係去左其他教會敬拜, 所以如果太強調, 就變左叫人唔返本會…….

其實好想同弟兄姊妹講以下的話: 我係一個幾高要求既人, 所以對於一d做得唔好既事, 我會不滿。如果你同我一樣, 我地就要一齊包容多d勒。如果你對教會, 團契, 小組不滿, 都唔出奇, 我地全部都係罪人, 咁多種性格炒埋一碟, 實有問題啦, 我地要學習包容同愛。如果只係未能投入當中, 就俾d時間啦!!!

依家寫日記都幾有意義, 因為除左記低自己既生活, 感覺, 仲可以同人一齊分享自己既睇法, 因為這個日記綱都有少少讀者, 有時我又同自己團契既弟兄姊妹分享, 起碼多個空間大家溝通啦!

>>June 2, 2004 at 5:51:54 AM GMT+8

2004 年 5 月 7 日 星期五 【陰】

在十架下......


今天參加了一個祈禱訓練, 我其實初時帶著一個不太願意的心情, 但因為我的組員大部份都會出席, 所以我覺自己都應該出席。後來又有人找我回去幫手預備, 咁就唔返都唔得啦!

我在唱詩時哭了多次, 是神的靈感動我, 腦裡其實好多雜念, 有d事件真的不知是來自神的, 還是自己想出來的......我想起自己的罪, 自己是個罪人, 但我又同時想起一個故事......
故事係講一個坐完監的男人, 回家時記了封信回家, 說如果妻子原諒他, 就在家外的樹上掛上紅手巾, 讓他知道自己被原諒, 好讓他夠膽回家......我和那男人都看見樹上都滿是那紅手巾, 不只是饒恕, 赦免, 而是"很多的"赦免......

我真的分不出是我的思想, 還是來自神的, 但無論如何, 我是相信我的罪被赦免了, 我又再哭了, 很久沒有哭得咁感動!

接著, 我思想十架, 好想見到耶穌, 但是精神好難集中, 好難專心, 後來看見的十架, 不再是以前看到的大和光, 而是有點模楜和暗, 上面有受苦的耶穌, 耶穌好像流血或流淚, 我看不清楚......

之後, 精神亦不能再集中, 我只有繼續等候......

>>May 14, 2004 at 2:58:45 AM GMT+8

2004 年 5 月 5 日 星期三 【晴】

也不記起上一次靜下來寫日記是幾時了, 現在的我到底變成怎樣......

上帝聽禱告
在三月時, 當我不知會不會有"花紅"時, 就只有禱告。
以往很少為d咁"大路"或"低層次"的事件禱告, 因為成日都話要先求祂的國......
但後來覺得, 既然好想得到, 就求啦!
其他人我唔知, 但我和我team的同事是值得收這份花紅, 因為我們真的很努力, 收之無愧。
三月尾, 我們收了雙糧。

上帝再聽禱告
在三月時, 我又為到大學會否收我讀MSc而禱告, 我去interview時, 都交俾神......
三月尾時, city unviersity收了我讀MSc.。

上帝再三聽禱告
在四月時, 公司傳出會加很少人工, 零點幾至2%等等, 我又禱告,
最後, 公司加人工係0%至7.8%, 有人0%, 有人2%或3%, 5%.......
而我是7.8%......
一切來自神!!!

上帝不聽禱告?
四月before加人工時, 同事們說我好大機會升職, 說我的表現很好, 上師亦很看好我, 原先我沒有想過升職, 被他們講一講, 令我都好想, 咁又禱告。
結果是沒有升職, 好似被HR告吹咗......
有沒有失望?
有!
但我對神的心不變, 祂仍然是那位聽禱告的神, 我不能給任何一個人一個合理解釋, 為何禱告不被應允, 我也沒有問祂, 或許我巳學習了"些微的順服"。
並且祂也說過, 我的意念高過你的意念呢!
但神聽了一個更大的禱告, 同事和上師認同了我工作上的努力, 這是我常常求的,
天父啊! 你要因此得榮耀!!!

我現在繼續求升職, 就看看怎樣吧? 我想, 我要在我的工作裡榮耀神。

上帝仍然聽禱告
我為我三天前的presentation禱告......
結果, 我拿了最高分!

我相信還有更多更多......更多禱告神應允......
所以我們有時要靜下來, 並多想想, 我們才不會忘記我們的神為我們做的一切!!!

以馬內利

>>May 6, 2004 at 7:30:39 AM GMT+8

2004 年 2 月 22 日 星期日 【微冷】

因為神賜給我們, 不是膽怯的心, 乃是剛強, 仁愛, 謹守的心。
-- 提後1:7-8

>>February 23, 2004 at 1:41:38 AM GMT+8

2004 年 2 月 20 日 星期五 【微冷】

大山可以挪開, 小山可以遷移。但我的慈愛必不離開你, 我平安的約也不遷移。
這是憐恤你的耶和華說的。
-- 賽54:10

>>February 21, 2004 at 1:26:24 AM GMT+8

2004 年 2 月 19 日 星期四 【晴】

因為他的怒氣不過是轉眼之間。他的恩典乃是一生之久。
一宿雖然有哭泣, 早晨便必歡呼。
-- 詩30:5

>>February 20, 2004 at 1:19:59 AM GMT+8