2003 年 1 月 20 日 星期一 【晴】

今日過得都算ok，但係搵老細o個時佢又要走，佢又話我做乜咁遲先搵佢呀，咩你唔緊我都唔會理你o架之類o個o的廢話，我都費事啋佢。

今日好好彩又問倒人借NMR時間，做佐o的NMR之後咁又一day喇…唉…

學費同宿費都仲未有錢交，已經開始籌款行動，所以都未係好擔心。

經過年半o既觀察，我發現中大真係冇乜靚女，鄉下地方即係鄉下地方，一流學府不愧為一流學府。如果用bio. o既「二分法」o黎分中大o的女仔o既質素，可以咁分︰
1）肥同埋唔肥（前者佔佐60%左右，通通都被out出局。）；
2）唔肥o既又點呢？再可以分為個面花o黎花碌o既同白白淨o既（再有80%被out…）；
3）白淨之餘，但係佢o地又會有o的著衫著到好老土或者太突出喎（再out50%），正常o既再入下一round；
嘩…得番4個巴仙咋！
4）不過著衫正常之後仲可以再二分為成個化妝樣同埋清新樣（再out20%）；
5）清新樣又點呢？又可以分為個feel似中學生（成個讀書格）或者係成年人（又out 70%）；
搞搞o下得番唔夠1%…其實…中大邊有靚女o丫…唉…

平凡便是美。

>>January 20, 2003 at 11:04:02 PM GMT+8

2003 年 1 月 19 日 星期日 【晴】

琴晚為佐要打NMR，加上亞辛今日就要走，所以夜晚同佢出佐去玩。但係條友居然要我o係佢樓下等佐佢成三個字…頂…

我o地又去佐太安樓打機，o個度其實係我細個成日都去o既地方，基本上我係o係o個度大o既，我讀o個間幼稚園亦都係o係o個度，雖然已經執佐，但係總有好多回憶。太安樓係西灣河區一個罪惡o既瘟藏o係o架！之後我o地再去佐（魚則）魚涌公園海旁傾偈，好耐好耐冇去過喇，以前我o地成日都會去…o個度有好多我o地o既回憶…之後又返番太安樓食o野，結果我三點先返到lab。

原來琴晚畀人搞亂佐o個個NMR冇事照run倒，但係個pattern總係有問題…都唔知點解。打完NMR，返到宿都五點，打佐陣機，七點先訓。但係訓到十二點半又醒佐，食o的o野之後又訓過。訓到四點半媽媽打電話嘈醒佐我。之後就沖涼返屋企食飯。好平凡o既一day。

睇完電視又返宿，但係突然又想搏o下有冇得打NMR，所以返佐lab先。原來琴晚打o個個NMR唔知做乜冇data…結果要再打過，好彩又問倒人借喎。打完carbon就返宿抹地，個地板好污糟呢…而家乾淨晒，您可以放心踩喇！

>>January 20, 2003 at 1:51:35 AM GMT+8

2003 年 1 月 18 日 星期六 【晴】

星期六，今朝大家都冇遲到。琴晚我都訓得唔錯，但係我知您一定訓得唔夠我好，如果唔係您點會o係返屋企o個程車訓到隻豬豬咁o丫~~~

今日約佐您下晝去行o下之後先返屋企，但係唔知做乜條column咁唔生性，搞到要您千萬個唔願意之下落o黎lab度等我一齊走。其實我都係想見多您幾面嗟…您又硬係話要自己返屯門算…sorry呀，係我o的做lab時間預計得唔好，係我錯。

走o個時我又大懞佐唔記得拿銀包，搞到去到火車站又要走番去lab拿…畀您傳染晒o的大懞性格喇！之後就去佐Italian Tomato食cheesecake，我就覺得個口感麻麻o地，質感唔多夠咁。其實大家都好累呢，一上到車冇幾耐大家都訓到豬豬咁，如果您琴晚都係咁樣乖乖o地訓今日個樣就唔會顯得咁累啦…我一訓就訓到市中心先醒，您就訓到連銀包都跌埋都唔知，您睇您懞到呢~~~好彩有個好心人咋…

返屋企o既搭車中途突然覺得好肚痛…其實今朝都有先兆o架喇，不過下晝冇乜事就冇理佢，其實我除佐呼吸系統係弱項之外，腸胃不嬲都好易唔舒服，唉…我就係咁「咋」。好彩我都叫做熟地形嗟，以前成日都會去信德中心附近玩，o個度我又有車返柴灣，所以就o係o個度搞掂佐先繼續返屋企，唉…今日大家都真係黑仔，不過都算大步過佐…

>>January 20, 2003 at 1:38:21 AM GMT+8

2003 年 1 月 17 日 星期五 【晴】

篇日記又係寫完upload唔倒上網…頂…呢個網真係廢。

今日又係差唔多時間返到lab，但係上晝有grad. sem.，下晝又要帶lab，o的時間好唔見駛。今日個lab o的人雖然冇星期二o個組部分o既人咁top，但係總算聽教聽話，唔駛五點就收lab。之後再返去做埋o的自己o野。

本來您約佐您o的朋友仔夜晚出去食飯，但係最後您又改變佐主意陪我。因為想同您出去玩，所以特登問佐H. K.李o個組人借佐佢o地o既NMR時間。點知個新o黎o既大陸Ph. D.又話要run，咁咪畀佢用先囉…頂…點知條友原來教佐佢用機咁多次都仲係唔多識用，我上上落落NMR房好多次佢都仲未做完，仲要次次都問我下一步點做…我頂…我走佐再返o黎佢居然仲係做緊上一part我教佢做o既o野，我教佐佢佢居然都可以唔抄低…大佬呀，好趕時間o架！七點半，您都落佐o黎搵我，滿以為條友搞掂，點知佢話我知佢仲有一個sample未做…%y@^)&^(@)&$#() 我仲約佐超人拿notes落火車站畀佢，遲晒大到喇…頂…

結果要搞到八點二先走得，之後我o地去佐沙田食飯。雖然我唔知您唔多鐘意食T骨扒，但係我都怕您會後悔o架喇，所以我特登叫佐肉眼扒加磨姑汁畀自己。哈哈，點知您真係反悔都得o既…不過冇所謂啦，就晒您。因為見倒您我就開心喇！抱著您，多好。

>>January 20, 2003 at 1:21:22 AM GMT+8

2003 年 1 月 16 日 星期四 【晴】

真係慘…頭先o岩o岩寫完o個篇又唔知個網痴乜線upload唔倒上去，搞到我又要從新打過…頂…

今日校佐八點鬧鐘起身，諗住上老細o個科，不過諗諗o下都係訓多陣好過，結果搞到九點三先起身，之後又磨到差唔多十點先返到lab。雖然o的傷風去得七七八八，但係我今日又發現自己有咳…吹脹…

今日o既工作好平淡，run佐支column，collect倒以前做過但係分佐去o黎oxidize晒o個隻product，不過我好憎佢係一隻liquid，好麻煩。下晝再set佐個carbene，四點半聽埋個法國人o既seminar，咁又一day。食完飯，洗埋o的玻璃，又返宿抖，好累。

下晝同夜晚都想搵您食飯，點知您要傾PBL，之後又話好累好眼訓…唉…好似好耐冇見您咁喇…

>>January 16, 2003 at 9:37:52 PM GMT+8

2003 年 1 月 15 日 星期三 【晴】

今日想早o的返工，八點就醒佐喇，打電話叫醒您之後又再訓過，點知原來您都返訓佐，搞到九點先出門口遲大到，我就好似平時咁o既鐘數返到lab。

今日o既工作唔算好順利，因為column o個三點太近，我一開始又用佐太polar o既solvent system，結果要再分過。再分o既結果都仲係有兩點分唔開，是但啦，聽日再分多次。今日都仲係諗唔倒我仲有乜好做，我估都係要快o的搵老細傾傾。

夜晚同米米過佐Shaw院慶諗住有免費o野食，點知全部都要錢，除佐爆谷，最後都係落佐美心搞掂，吹脹。食完之後收到郵差亞辛電話，叫我出旺角。但係我正在行落山o既時候佢又話屋企急call，仲sor晒ry咁…算罷啦，橫掂我都累累o地想早o的返宿訓。不過郵差始終都係郵差…

郵差亞辛之所以叫呢個名，係有典故o既。話說當佢o係美國o既時候我好多時都會寄o的郵包畀佢，有一次我寄空郵包裹畀佢o既時候，我問郵局o的人佢會幾時收倒，條友就答我大約一個禮拜。點知亞辛就要成兩個禮拜先收倒我o的o野，於是我就覺得班郵差講大話，呃我佢o地速度之快。之後亞辛又好多時都o係icq度呃我話會陪我玩網上戰棋但係最終都冇佐件事（講大話也。），於是乎我就用郵差o黎比喻佢喇，個名亦都係因為佢o地雙方都有一個共通點——講大話，而扯上關係。（您明未呀？）

「我要今年行禮！」

好掛住您呀~~~ =P

----------------------------------------------------------------------------------------------------------------------------

您說過︰「我不敢奢望一生一世的承諾，只希望每一個明天都是快樂的過，希望受到你的寵愛，不會受到傷害。」

是的，是我做得不夠好，我會努力的，不要為您帶來傷害。

>>November 10, 2005 at 8:41:57 PM GMT+8

2003 年 1 月 14 日 星期二 【晴】

今朝雖然您八點半morning call我，但係我都係要攤到九點三先起身…鬼咩，琴晚成三點幾先訓，終於都搞掂佐o的OC lab.o既reports。

琴晚做o個個reaction o既observation同以前做有o的唔同，顏色深o的，今日返去做recry.又好似有o的料到喎…希望syn.倒隻死人carbene啦…

上晝您搵我食早餐，原來係您要去學跳舞…但係我run緊column喎，叫您畀五分鐘我諗o下o架啦，您係都要行返宿先。不過下晝都可以見倒您，真係好。但係畀您見倒我個又殘又頹o既樣添…

今日老細問我做乜唔搵佢，我話自己大傷風，怕傳染佢，哈，咁又過倒骨，等我快o的補埋o的spectra畀佢先。下晝個lab.都ok啦，班友仔都算聽教聽話，用極速完成，唔駛五點就可以鬆人，咁至係波o架嘛！之後再返lab. run埋支column，o的product怪怪o地，都唔知係咪liquid o黎o既…黃黃o地，唔多好…

琴晚幾乎鬧得成分手喇…我知道要您陪我一齊唔開心係我唔o岩，我都唔想o架…我都想日日開開心心咁去做lab.，唉…但係要做到咁又談何容易呢…您o既世界一向都係複雜簡單化，而我就o岩o岩相反，會簡單複雜化，係有唔同o既，希望我o地可以做到「和而不同」啦…要您負擔起我o既失敗同唔開心，又的確係唔公平o既，我說過要您快樂嘛。我愛您的快樂，我要您快樂多些！

米米話︰「我要畢業！」我就改成︰「我要準時畢業！」不過我覺得咁都係未夠，應該係︰「我要今年行禮！」先至o岩聽！

>>January 14, 2003 at 10:44:33 PM GMT+8

2003 年 1 月 13 日 星期一 【晴】

今朝訓醒都仲係好唔掂，雖然校佐八點起身，但係都要訓到九點三先起得身。個人唔係好累，但係成個呼吸系統都唔係好舒服。結果又o徙佐一個鐘去輪clinic o的免費藥…我估都係時候開始買定醫療保險喇。

我真係好憎自己咁樣…成個冬天都冇乜邊日係好過，o的呼吸系統毛病完全冇斷過尾…clinic o的醫生全部都係廢蛋…再係咁都唔係辦法，日日病，日日都冇乜心機、冇精神做lab，您話咁點算？

琴晚您無端端話我將o的工作情緒發洩o係您身上，講真o丫，我o個時真係都幾嬲o下，不過唔想同您嗌交。其實我又有幾何同您講我o的工作上o既o野o丫。我真係冇發您脾氣喎，只係覺得好唔舒服嗟，加上您個電話又沙沙聲同好大echo，所以咪提議收線訓囉。您又成日叫我做o野做得開心o的，我又唔係您，點可能話每件事都開開心心咁面對呢…您o既優點就係傻，我o既缺點就係冇您咁傻囉…

今日老細send email叫我每個星期都要去見佢，係好事定係壞事呢？您估我唔想交貨畢業o既咩…之但係我做lab o既手勢唔好，又冇乜運仔，又日日keep住病，您估我想係唔想做咩…唉…我終於明白o個o的長期病患者o既感受喇，原來長期病真係會令個人有心無力去做自己想做好o既事，吹脹…天意？命運？際遇？報應？

我要健康o的，我要唔食煙，我要做多o的運動，我要食多o的有益o既o野！脂溶性維他命C，救救我呀！

>>January 13, 2003 at 9:11:20 PM GMT+8

2003 年 1 月 12 日 星期日 【晴】

我o地半年喇！我愛您！

琴晚十點訓，今日兩點半先起身…今日依然好病，個鼻同喉嚨都好唔舒服…

食完o野，就同亞辛去佐打機。打完機再落彩虹踢波。

今日踢得幾好，有個前鋒o係前面走位，我o地隊波就係要呢o的o野，而唔係o係中場度死扭。結果我o係右邊交佐個輕力波畀個前鋒，佢就咁就loop死佐個龍門，我o地就係咁領先上半埸。下半埸雖然大部分時間畀人壓住o黎打，但係佢o地都係靠一個own goal打和我o地。

今日真係踢得唔錯，幾乎踢足全場個半鐘，我估呢o的波走動多o的o既波先o岩我踢。不過今晚又好似琴日咁，又有球單刀唔入，今次用左腳o架喇，但係右邊又畀人逼住，個龍門又封晒位…如果唔係今次就一定贏得。我都係唔好再打左閘位好喇，運用我o既追度改打左翼好似好玩o的…但係我移佐上前又有邊個可以補我個位呢？

今日又唔係好開心，因為聽日又要返去見倒老細…唉…好大壓力呀…

>>January 13, 2003 at 8:28:20 PM GMT+8

2003 年 1 月 11 日 星期六 【晴】

星期六，八點半鬧鐘響，返訓到九點三…好彩九點半有車，如果唔係又遲大到喇…

返到lab，x o下x o下就半day，除佐洗玻璃，都冇乜做過o的乜…琴日過o個支column個yield又唔好，一定係我o既技術有問題啦…o的o野九成食死晒o係支column裡面…唉…我都唔係食呢行飯o既材料o架喇…

今日老細冇返，咁都好o的…最近好憎見倒佢，佢又唔理我…唉…死路一條喇…我幾時先可以畢業？

一點鐘烈日當空之後無端端又會去佐踢波，postgrad.對year 1，班友仔踢極都仲有氣，我o地點都係老喇…我就得廿分鐘貨仔，真係慘。不過踢草埸都幾過癮，個埸又大o的，而且個波又流得慢o的等我仲有大把時間大力推完再落底。不過六個真係走到死狗咁款…最後仲有球單刀搞到我幾乎抽筋…帶到入去臨射先作抽筋，交返畀右腳射又射中龍…真失敗。不過班友都好狼o下，打到我爆晒肛…頂…好痛…

沖個涼之後返屋企。今晚打邊爐，食佐好多o野，好飽。不過食完又好眼訓，又鼻塞又傷風咁，而且又冇電腦用，結果又去佐訓…

>>January 13, 2003 at 6:36:25 PM GMT+8