2003 年 2 月 9 日 星期日 【陰】

由於琴晚踢波o既關係，所以冇返到屋企訓。又有順風車搭喇琴晚，唔該晒米米。

琴晚襯住有時間，洗佐張被同埋張床單，仲有咕o臣同埋o的衫，洗佐兩機咁多，仲要因為o的o野難乾要畀多o的錢去乾衫…抹埋個地，執o下房，結果搞到作兩點幾先訓。

一訓訓到成點幾先起身，再洗多張被同另一個咕o臣，成房乾淨晒。但係仲差一張雙人床… @_@ 但係今日終於都畀我download晒隻"The One You Love" 有o既所有歌喇，個freind仲send埋隻"Amour"畀我，真係好。

夜晚返屋企食飯，問媽媽覺得您點，佢就答我佢未睇清楚。我估您都要上多o的o黎畀我媽媽認識o下先得喇。

>>February 11, 2003 at 9:46:11 PM GMT+8

2003 年 2 月 8 日 星期六 【晴】

呢幾日做lab都ok，希望可以做得快o的好o的啦…

今日兩家都乖乖返工返學。雖然畀您話我慢吞吞搞到您遲到，但係又好好彩咁坐倒順風車喎…mm…我做o野o既節奏就係咁慢o架喇… @_@ 唯一解決辦法我估就係早o的開始做…即係早o的起身…唉…不過好似又係好難咁喎…

下晝無端端用佐好多時間等車，之後又唔小心入佐閘去沙田。陪您去食麵，點知o的小食您都唔多食o既，搞到我又要食到好飽（連夜晚都唔駛食就去踢波…），行佐陣大家都好累，之後搵佐個死角位大家坐低訓覺… @_@ 最後陪您入馬鞍山，跟住發覺原來我唔只同您溝通有問題，同您個妹溝通一樣有問題…真係畀您兩個玩死喇…

結果遲佐去同大鴻集合，但係佢都遲喎…真係好彩。夜晚場波終於都成為我加入之後o既第二場勝仗！贏二比一。o係順利呢個球場我o地仲係不敗，對方仲連波都入唔倒，兩次都係輸own goal。不過今晚我o既表現就非常欠佳喇，因為太累囉…唉…第日踢波之前都係要乖乖o地休息多o的先好喇… @_@

呢排您心情好好，好開心咁喎！不過我都唔錯喎，要keep住先得！我愛您呀媚媚~~~~

>>February 9, 2003 at 3:10:42 PM GMT+8

2003 年 2 月 7 日 星期五 【陰】

今日終於乖返，兩家都八點九倒返工返學，咁先係嘛…我o地要乖乖一齊長大！

不過您肚痛未止喎…搞乜先？

夜晚又係starbucks o既時間。閒來o係o個度坐o下真係人生一大快事…

聽日都要乖乖做lab！

>>February 9, 2003 at 2:48:15 PM GMT+8

2003 年 2 月 6 日 星期四 【陰】

今日偷佐懶冇返工…點解會咁o架…

夜晚又去佐維苑食飯，但係您食完之後居然肚仔痛… @_@ 點解又會咁o架…

我o地… @_@ 呢兩日好曳…點解會咁o架…

>>February 8, 2003 at 12:23:06 AM GMT+8

2003 年 2 月 5 日 星期三 【晴】

冇陰公…成晚都訓得唔係幾好…係咁發埋晒o的無聊夢，惡夢都有個…一點半、五點半同七點半都發完夢之後醒埋…點解會咁o架… @_@ 我第一時間諗起碗酸辣湯…唔通太刺激受唔住？

飲佐酸辣湯，搞到冇覺好訓。七點半居然返訓到九點幾…足足訓佐成九個半鐘…好彩九點半過o的都返到lab。搵老細講佐thesis個title之後，聽日就要交abstract…

襯住仲有時間未到seminar，琴琴青set佐個reaction…之後seminar真係搞佐好耐，好彩個火警鐘及時響起，如果唔係十二點半都唔得完…下晏就過埋支column，o的result又有o的怪…而且o的product又唔生性，搞到趕唔切同老細去探坤哥…坤哥好慘呀，搞成咁… @_@

今晚您同健健都o黎佐我屋企食飯，mm…個氣氛都係咁上下o架喇…事關我爸爸媽媽佢o地o係有其他人o係度o既時候係會冇咁多o野講o架！平時或者都會講o下o的電視劇情o既。

>>February 6, 2003 at 8:34:01 PM GMT+8

2003 年 2 月 4 日 星期二 【晴】

今日超叻仔，琴晚兩點先上床訓，但係又唔係即刻訓得著，轉來轉去（硬係覺得身邊掙緊o的o野…），校佐八點三鬧鐘，扭到八點九居然肯自己乖乖o地起身，結果九點鬆o的就返到lab…一個人都冇… @_@ （係喎，坤哥整親喎…一時唔記得佐添…）

拿佐老細o既開工利是，我今年o既利是錢都仲係唔過千…好無奈…set佐兩個reactions，下晝再過埋支column，洗埋o的o野，又一day…

老細又話我唔知自己想點…mm…係，我真係唔知自己想點。我要翻身呀！老細分配佐工作畀我、Michael同埋個新o既大陸Ph. D.，要我同個大陸人o的results double check。mm…我一定要做得快過佢，好過佢先得！我要畢業！

今日發現storeroom同埋office班人o既幻想力都幾豐富，同埋發覺佢o地原來真係冗員o黎o既。得閒到o係度講事講非但係又一o的o野都做唔倒…一早B爺上o黎睇完個案發地點之後又乜都做唔倒又話乜都唔知，淨係識得話搵保安組。之後o係storeroom見倒蛇仔明，佢一見倒我就用o的輕挑o既語氣同我講︰「你個lab好似發生佐o的大鑊o野喎…」哦！講佐兩咀之後都費事啋佢，完全唔係關心o既態度。佢xy o丫！之後傳o下傳o下office個大波K居然打電話上o黎搵我，問我坤哥點，仲問我係咪要殖皮… @_@ 真係不x知所x謂…呢班咩人o黎o架？

Nothing's gonna change my love for you...

夜晚，落佐沙田，諗住偷偷o地買情人節禮物畀您，但係睇來睇去都冇乜心水，又想買o的實用o的o既o野畀您用，唔好再亂咁用錢。不如咁啦，我同您一齊去揀啦~~~

晚飯本來諗住食炸雞同埋想飲個西式湯，但係原來今日仲係假期，四圍都係人…嘩…結果就去佐食上海麵同飲佐大大碗酸辣湯…飽到呢~~~幾乎行唔郁… @_@

好累…今夜仲要洗衫添…

>>February 4, 2003 at 8:43:37 PM GMT+8

2003 年 2 月 3 日 星期一 【晴】

年初三，經過新年呢三日，共收九百七十蚊利是…一千都唔過…咩世界？

返佐屋企四日，做足四日廢人，日頭就起碼訓到中午先起身，夜晚就冇四、五點都唔訓…放假就係咁o架喇…聽日又要返工，好鬼灰…

今日您上佐大陸去睇個o岩o岩出世o既堂妹，您話佢好得意…mm…其實個個啤啤都得意o架啦…不過佢唔喊又好似係一個好處喎…咁唔該您第日生個唔會郁o的就喊o既細路啦，唔好學似您咁成日都做喊包… @_@

夜晚去踢波，趕到死…六點先離開柴灣，仲要返中大拿衫同鞋…趕到呢…約佐八點，好在今次冇遲到，如果唔係又畀人唾罵…今晚隊波打得幾好，雖然都仲係輸二比一，但係開始踢倒個form出o黎，人腳唔錯亦夾得幾好，不過下次個前鋒去佐澳洲唔踢，到時又要捱打…唉…今日有條pk成日扮跌搏罰球，頂佢個肺o丫，足足三次真係佛都有火！幾乎就要打交，佢xy！

掛住您添… @_@

>>February 4, 2003 at 1:38:47 AM GMT+8

2003 年 2 月 2 日 星期日 【陰】

今日要十點半起身沖涼妝身，因為下晝要去同您爸爸媽媽食飯。

本來返到屋企冇乜衫揀o黎著o架喇，您之前又話要著得斯文o的，怕我畀佢o地o既第一個印象唔好…mm…後尾又話隨便o的就得…mm…咁即係點呀？ @_@

真係好隨便咁著就出街喇…分別在今日gel佐個令自己都幾滿意o既頭。本來以為搭錯車o既，點知問個屯門friend佢話其實961都可以到市中心（出屯門公路之後第四個站落），您都唔知係咪住屯門o既，問您o個時您乜都話唔知…真係畀您激到奀呀…

入到屯門都成點半喇…不過都要搞佐好耐先見倒您爸爸媽媽。您話唔駛我上您屋企已經對我好好，因為上面有好多姨媽姑姐…mm…或者您o岩o既，我確係好憎面對o的咁o既場面。但係要我見您爸爸媽媽其實又係幾為難o架…尷尷尬尬咁唔知講乜好，我又從來都未見過您爸爸…好彩我覺得都算冇乜事嗟…您爸爸都幾可愛o架喎…唔知佢o地對我o既印象係點呢？尤其係您爸爸呢…

夜晚趕返落北角同婆婆食飯，見佢成日都咳唔倒o的痰出o黎我就擔心…唉…如果我老佐都係咁樣咁就不如死佐去算喇…

又一day，今日o既收入都係唔過四百…算啦…不嬲都係咁上下o架喇…

拿，我唔係同您講玩o架，我o係icq度係完全唔鐘意同o的「生保」人講o野o架，仲有你兩個轉來轉去咁我都唔知您o係度做乜。您知我係好自傲o架，唔係「立亂」同人玩o架。

>>February 3, 2003 at 2:35:25 AM GMT+8

2003 年 2 月 1 日 星期六 【晴】

新年，冇乜特別，戇居居咁過又一day。

去佐麻麻同姨婆度拜年，呢兩度收收埋埋都係得三百蚊左右…唉…錢呀…

下晝就去佐同朋友仔Joseph傾偈食tea，「打理法國」o既espresso真係好難飲…我又唔信邪飲多佐一次… @_@

我問佢會唔會請人，老實講，如果畀我搵倒工做，我係一定唔會extention o既，我唔會再o徙錢同時間落去。而家因為交佐最後一期學費，所以要拿埋呢半年糧先走。我要盡快畢業，盡快搵倒o野做，盡快還晒個無良政府借畀我o既loan…而家差成十幾萬，我唔可以再浪費時間o架喇…如果唔係我真係有排都唔可以做自己鐘意做o既事！我要用埋呢半年糧搞掂晒我手頭上現有o既債務，再搵o野做，個太專業o既master要唔要都罷就！錢同工作經驗最實際！

如果要我將事業、錢、愛情、家人、健康同朋友去排對我有幾重要o既次序，我會放愛情同健康做第一位，家人同朋友放第二位，事業同錢放第三位。毫無礙問我一定係放佐愛情o係第一位啦，我個人不嬲都係咁o既，唔知係咪心靈太過空虛呢？健康以前唔覺得緊要，原來病係會消磨人o既意志o既，所以都係健健康康、精精神神好！家人同朋友係背後支持軟弱o既我o既動力來源，唔可以少。但係事業同錢都好緊要咁喎…不過相對之下又好似對我冇咁重要咁…但係有時做人都要現實o的o既！

新年有少少願望…希望我同您可以踏實咁去相愛，個人唔好病咁多，早日畢業或者搵倒工做。三樣嗟，唔算太多呀嘛… @_@

o丫，係，我最近好睇少o個個錢放第一位，健康先係放第二位o既人。

>>February 2, 2003 at 1:57:27 AM GMT+8

2003 年 1 月 31 日 星期五 【晴】

返到屋企又冇乜o野好做…淨係打o下機咁…好悶呀…您o係度做緊乜呀？我好掛住您呀…

其實我唔係好憎小朋友，可能係唔想負起教養o既責任啦。而家講呢樣o野就實在太早喇…第日又未必會咁講o架啦…暫時唔想諗呢樣o野呀… @_@ 不過您話要o既，我又點會話唔要呢？慢慢從詳計議啦。 =)

我愛您呀，吳幗媚~~~ 啜啜啜~~~ 我要娶佐您~~~

無端端咩「人生自古誰無死」呀又…郵差係咪派錯信呀… CCC

平凡o既一日因為您變得不平凡…因為您話官塘有GD68嘛…買佐喇，您終於都識笑住過年啦~

>>January 31, 2003 at 7:02:13 PM GMT+8