2004 年 1 月 18 日 星期日 【乍寒還暖】

今晚o係添馬艦個嘉年華入面竟然俾我睇到煙花,真係好開心呀!!!雖然只係放左短短既幾十秒,d煙花亦好普通,但我已經覺得好靚好靚,因為今次係我咁大個女第一次o係現場睇煙花,原來真係靚過o係電視睇好多好多倍架,我終於明白點解每年既大年初二,回歸同國慶都有咁多人迫o係維港睇煙花喇~其實我都唔知點解會無端端放煙花,又唔知係由邊度放出黎,不過咁都俾我見到,真係好好彩,可能係好兆頭添呀,哈哈~~~最重要就係了左我一個心願,已經好滿足喇,都唔知再有冇機會睇lu!!!

>>January 20, 2004 at 3:35:14 AM GMT+8

2004 年 1 月 17 日 星期六 【乍雨乍晴】

雖然仲有幾日先係農曆新年,但我已經收到第一封利是喇,多謝老公!!!

今日出左副學士既成績,GPA 3.5,比預期中仲要好,真係有D意外~望住個result,俾左我好大感觸......自從F.4開始,我D成績都未好過,會考衰左一次之後,我以為自己會發奮啦,點知又係咁,結果AL再衰多次,入唔到大學,令好多錫我既人失望!有時侯真係好憎自己,屋企環境已經唔好,阿爸阿媽都唔知可以捱到幾耐,但我仲唔生性,淨係顧住玩!!!我唔敢再有任何既承諾,因為之前兩次都兌現唔到,我只可以講今次一定會盡全力,唔會再俾自己後悔!!!今次係我五年黎考得最滿意既一次,雖然呢次成績幫唔到我入大學,但就俾左我好大既鼓舞作用!坦白講,呢幾個月花o係副學士上面既時間真係好少,能夠有咁既成績係喜出望外,就好似幫我打左支強心針咁,令我D信心返晒黎!!!其實當初選擇retake AL呢條路都考慮左好耐,既然決定左就冇得返轉頭,我知道AL冇副學士咁容易,所以我要更加俾心機!!!新一年有個好開始,希望可以一直好到考AL啦!!!

>>January 17, 2004 at 3:48:37 AM GMT+8

2004 年 1 月 14 日 星期三 【晴】

搞左成晚,終於整靚左個diary,冇以前咁plain,仲有歌仔聽添,都幾滿意啦,我得閒就會轉下background同歌仔架喇~多謝gladys教我呀,嘻嘻~希望你可以實現你既理想啦,我支持你呀!!!

今日收到慧根o係英國寄俾我既post card,真係嚇左我一跳,估唔到佢去緊旅行仲記得我,真係好開心同感動,多謝晒呀!!!我都記得你聽日生日架,等你返黎再同你慶祝啦,哈哈~

>>January 15, 2004 at 2:06:08 PM GMT+8

2004 年 1 月 11 日 星期日 【颳風】

今晚出左去同cicx慶祝生日,我地G5一行五人首先去左「大久保」食野,雖然之前都食過日本野,但從來都未試過坐房,今次係第一次,原來要除鞋先可以入去架,我都唔知添,嘻嘻~有間房真係好正囉,我地好似o係屋企咁,想做乜都得,可以玩得好放,又有電視睇喎,kylie好惦呀!!!生日又點少得生日蛋糕呢,唔好睇小個蛋糕仔呀,一樣有刀切架!!!除左個靚靚銀包之外,我地仲每人送左一個香吻俾cicx,真係艷福不淺啦,哈哈!!!食飽飽之後,cicx帶左我地去玩塔羅,見到佢地個個都問感情,其實自己都心思思想問下既,但始終都唔夠膽,雖然話玩下冇乜所謂,不過都係唔敢博,因為如果唔好既話,我知自己會好唔開心,唔可以當冇野,所以寧願乜都唔知,順其自然啦~雖然唔敢問感情,但就問左學業,佢話我今年入到大學喎,我梗係希望佢準啦,不過講到尾都係要靠自己既,我會繼續努力!!!

>>January 12, 2004 at 3:26:06 AM GMT+8

2004 年 1 月 1 日 星期四 【晴】

HAPPY NEW YEAR~
過去一年有好多人離世,希望今年大家都身體健康!!!
生離死別真係好可怕,所以記住要好好珍惜身邊既人,唔好令自己有遺憾!!!

>>January 1, 2004 at 10:01:16 PM GMT+8

2003 年 12 月 31 日 星期三 【晴】

今日係大除夕,街上面好多人,四周圍都舉行倒數活動,非常熱鬧!我都好想可以出去同朋友一齊倒數,但係唔得,真係好唔開心,再加埋一d其他既因素,終於忍唔住喊左出黎......今年對我黎講係好難捱既一年,不過都已經捱過左,希望出年順順利利啦!!!
今晚雖然好唔開心,但都繼續溫書,因為唔想出年重蹈覆轍,傷心一次已經夠,為左令依家既犧牲變得值得,我要更加努力!!!

>>January 1, 2004 at 2:39:38 AM GMT+8

2003 年 12 月 29 日 星期一 【颳風】

今日返左poly溫書,順便睇醫生,哈哈~平呀嘛!!!我足足病左一個星期喇,食左藥都唔好,希望今次d藥會有效啦!!!原來o係poly溫書好正架,可能依家係sem break既關係啦,成個library都冇乜人,真係好靜,好過出面公共圖書館果d自修室好多,可惜唔近屋企啦~
終於都過左Christmas喇,原來我已經有好多年冇出去睇過燈飾,雖然年年既燈飾都係大同小異,但都仍然想睇下,希望下年Christmas可以盡情咁玩一次啦!!!
阿拔已經走左兩個幾月,我開始習慣一個人既生活,冇再好似之前咁唔開心,大個女啦嘛~我會識諗架喇!!!

>>December 31, 2003 at 12:53:31 AM GMT+8

2003 年 12 月 27 日 星期六 【乍雨乍晴】

今日同poly d朋友仔去左睇<金雞2>,真係好正呀,成套戲都冇悶埸,我覺得好睇過上一集添,可能因為今集係回顧返2003年發生既野,所以比較有共鳴,尤其係SARS,呢個咁慘痛既經歷真係一世都唔會忘記!!!套戲最正既地方就係加插左好多經典金曲,全部都好match架,睇起上黎更加有feel~我都好希望香港將來可以做到"劉"特首講既終身免費教育,1港元兌換7.8美元,庫房d錢多到用唔完,最緊要係零失業率呀!!!
今日好開心呀,有得行街睇戲,又有禮物收,多謝kylie同阿愉!!!

>>December 29, 2003 at 12:25:44 AM GMT+8

2003 年 12 月 22 日 星期一 【乍雨乍晴】

終於都考完試喇,我依家放緊假呀!
講返今次考試啦,可能冇期望既關係,反而考得唔錯,近幾年最好都係今次喇,原來冇壓力真係會令人表現得好d架,如果AL都有咁順利就好lu!!!考完試之後同maggie去左睇<地下鐵>,套戲都唔差,好有聖誕氣氛,有d位仲勁爆笑,不過好似同地下鐵冇乜關係!maggie下個月就要走,我睇得出佢好唔開心,但我又唔知點幫佢!我好明白佢依家既感受,因為當阿拔話要走果陣,我都有過同樣既憂慮,不過既然改變唔到,就唯有接受!你永遠都係我最好既朋友呀,唔好諗咁多喇,好好珍惜呢一個月既時間,我好得閒呀,你想去邊我都可以陪你架,希望你開心d啦!!!
今日收到阿拔既聖誕禮物,多謝晒呀!!!佢話好好食喎,不過我喉嚨唔舒服,所以仲未試,遲d試左話你知啦!!!

>>December 23, 2003 at 2:30:13 AM GMT+8

2003 年 12 月 15 日 星期一 【乍雨乍晴】

最近心情唔係咁好,可能講左d令人唔開心既說話,真係好對唔住!!!
下個星期就係聖誕節,由細到大我都好期待呢個節日,因為佢俾到人喜悅,浪漫,溫馨同熱鬧既感覺!!!不過今年就好唔同,阿拔唔o係我身邊,所有節日都變得冇晒意義!考完試就開始放一個月假,大家都plan定去邊度玩,真係好羨慕~而我既節目就係留o係屋企溫書喇,希望一個月之後我可以好有信心咁同大家講︰「今年一定入到U！」講真,我都唔係太想出街,因為四周圍都充滿住好濃厚既聖誕氣氛,令我更加唔開心......我知道未來幾個星期都會好難過,希望可以盡快收拾番心情!依家最期待係出年既聖誕節,一年時間好快就過!!!

>>December 15, 2003 at 3:43:34 AM GMT+8