2005 年 2 月 14 日 星期一 【暴雨】

情人節能夠同自己鍾意既人一齊過就係最幸福！

>>February 21, 2005 at 12:38:04 AM GMT+8

2005 年 2 月 11 日 星期五 【晴】

今晚約左chick, eileen and koala食飯，好耐都冇見佢地喇，大家都變晒女人lu，哈哈！我地食完飯之後又去左cafe傾計，我坐到十一點幾就走先，因為之後仲有下場！我join返慧根然後一齊搭車入馬騮間新屋玩通宵！

>>February 14, 2005 at 5:19:35 PM GMT+8

2005 年 2 月 10 日 星期四 【晴】

今日好充實呀，因為我地參加左一日遊！
首先去九龍站集合，跟住就坐旅遊巴出發！我地今日既行程係去流浮山既尖鼻咀同紅樹林，不過呢D都係次要，最重要就係夜晚有得出海睇煙花！雖然每年香港都會放兩三次煙花，但我今次先係第一次o係現場睇，感覺真係正好多！頭先睇到新聞話好多市民都覺得今年既煙花特別靚，因為心情比往年好，我都好有同感！可能今年既煙花同往年差唔多，但o係我眼中一定係最靚既，因為可以同自己鍾意既人一齊睇！
今個新年真係好滿足，每一日都可以同阿拔一齊過，雖然唔係有咩特別野做，但都覺得好開心！

>>February 11, 2005 at 1:44:06 AM GMT+8

2005 年 2 月 9 日 星期三 【晴】

恭喜發財！！！
祝大家身體健康，萬事如意，笑口常開！
而我就梗係最希望心想事成啦！^_^

今朝同阿拔屋企人飲完茶之後，我地兩個好無聊咁去左行大運，首先返hall，跟住再入屯門，睇完賀歲盃之後又出返將軍澳，成日就係咁不停遊車河，好搞笑！

>>February 11, 2005 at 12:53:22 AM GMT+8

2005 年 2 月 8 日 星期二 【暴雨】

今日係年三十晚，街上面非常熱鬧，周圍都迫滿人！中午補完習之後就出左九龍灣睇戲，順便行下街！最後我買左對鞋，但就始終都買唔到衫，不過都冇乜所謂，因為往年都冇著新衫新鞋過年既習慣！
簡簡單單咁渡過左猴年既最後一個晚上，已經好夠喇！以後每一年都係咁就好lu~~~

>>February 11, 2005 at 12:22:32 AM GMT+8

2005 年 2 月 7 日 星期一 【炎熱】

今日同阿拔行維園花市，我地四點幾鐘去，所以未係太多人。因為出年係雞年關係，有八成攤檔都係買雞或蛋既野，有唔少都幾得意架！行左一陣阿拔就要返工喇，終於我就join慧根同佢D同學仔夜晚再行過！行行下令我突然諗返起中六果陣，我地又係十幾人一齊行維園，當日係年三十晚，比起今日更加迫，但我竟然一D唔耐煩都冇，反而幾enjoy添，哈哈~點解就唔講喇，要記得就會記得，雖然已經隔左三年，但對我黎講依然深刻！
行到十點幾我就走左喇，之後出左旺角同阿拔食宵夜，食完就搭尾班車返屋企！一返到去沖完涼就開始刨蘿蔔，一直刨到五點先刨完，手都軟晒，估唔到返屋企都係咁夜訓！冇計啦，係自己話要蒸糕，冇理由要阿媽做！

>>February 8, 2005 at 11:55:58 AM GMT+8

2005 年 2 月 6 日 星期日 【乍寒還暖】

今日一行十人入左西貢燒野食，我都好耐冇去過西貢喇，不過感覺上冇乜點變！我地臨走前仲去左「滿記」食糖水，想左好耐今次終於去到喇！

>>February 8, 2005 at 10:38:27 AM GMT+8

2005 年 2 月 5 日 星期六 【晴】

去完韓國返黎之後既每一日都係開會，我每一晚都唔會早過四點訓，有時仲冇得訓，不過我都慣晒lu，上莊既生活就係咁！

經過我多個月黎係咁不斷煩stephen之後，慧根終於有得住hall喇，佢將會係我既toiletmate，真係好！

今日出左旺角同尖沙咀，本來諗住去買新衫新鞋過年，點知最後都係空手而回，唔係睇唔o岩，但始終都唔捨得買！我成日都係咁，買野俾人就幾貴都捨得，買俾自己就要諗過度過，真係奇怪！

>>February 6, 2005 at 1:30:18 AM GMT+8

2005 年 1 月 31 日 星期一 【晴】

韓國之旅—「開心、滿足、難忘」

1月26日~Day 1
朝早十點半由hall出發，行去火車站坐A21直接到機場。雖然之前果晚因為要搞莊既野同執行李所以成五點先有得訓，但我竟然出奇地精神，搭左一個鐘車都冇訓過，我諗我實在太興奮喇，呢個旅程真係期待左好耐，而家終於夢想成真！去到機場之後，我地發覺成個團只係得16人，有人可能會失望啦，哈哈！上機前我地食左BurgerKing，因為全香港淨係得機場禁區入面先有得食，所以我地都想試下，點知去到韓國就發覺原來果度周圍都係BurgerKing，就好似香港既McDonald咁！食飽飽就上機喇，我同阿拔好好彩有得坐窗口位，嘻嘻~坐國泰機真係幾正，有電視睇，又有Haagen-Dazs食，不經不覺，我地就到達首爾(漢城)既仁川機場喇！我地辦完晒過關手續都已經係晚上八點幾，所以第一站就係食晚飯。今餐食韓國好出名既人參燉雞，我覺得最正就係D湯，真係好好味！食完飯之後我地去左第一個旅遊點-東大門，不過真係好失望，果度賣既野仲衰過旺中，所以個個都空手而回！返到酒店已經十二點幾，第一日既行程完結！我地住既酒店係屬於韓國五花，不過大家都覺得唔似，因為入面連熱水都冇，房既燈光又暗，每隔幾層先有一部水機，都幾唔方便，之後仲有兩晚要住呢間酒店，好無奈...

1月27日~Day 2
今朝既早餐係烏冬+餃子，都算唔錯啦，之後就出發去夢幻樂園喇！我地由十一點幾逗留到五點，玩左雪兜、動感影院、過山車、瘋狂咖啡杯等等，務求玩到唔駛蝕為止！不過阿拔玩完之後有D想嘔同暈既感覺，見到佢面都青晒，嚇到我都唔知點算，好彩最後冇事ja~離開夢幻樂園之後，我地先去食晚飯，跟住再搭兩個幾鐘車入鳳凰城。今晚間酒店比尋晚果間靚得多，咁先似係五星級架嘛，可惜只係住一晚！由於今晚好早返到酒店，所以我地就自己出去附近周圍行下，順便去supermarket買野食！

1月28日~Day 3
今朝好早morning call，整裝待發，因為今日係全個行程既高潮—滑雪+溫泉！我地o係酒店食完早餐過後就到滑雪場租鞋同ski板，原來呢兩樣野一D都唔輕，我好唔容易先能夠勉強拎起塊ski板ja！著左對滑雪鞋之後，突然感到寸步難行，好唔習慣！我地首先搭觀光吊車到山頂拍照留念，山上四周都鋪滿積雪，非常之靚！跟住我地就坐返吊車落去開始簡短既滑雪課程，主要都係學下點樣滑、跌倒點起身同停既方法等，之後就係我地自由活動時間！除左阿拔之外，我地幾個都係完全唔識滑雪，但就誤打誤撞咁走左上一條intermediate既雪道，我當時真係好驚，身邊一個熟悉既人都冇，因為佢地已經滑晒落去，得返我一個人o係山頂，我都唔知點算好，好彩阿拔返上黎幫我，不過我實在太冇用，不斷係咁跌低，每跌一次都要好多時間先企得返起身，結果用左成兩個鐘先滑到落去，比集合時間遲左半個鐘，累到其他團友要等我地食飯，真係勁唔好意思！雖然今次可以話係有驚無險，不過我都覺得滑雪好好玩，如果再有下一次，我諗我會滑得好D！之後去浸溫泉，正好幫我地消除滑雪既疲勞。韓國既溫泉分左兩種，一種係男女一齊著住泳衣浸，另一種係男女分開唔著衫浸，我兩種都有試過！唔著衫浸果陣，我地幾個女仔都勁尷尬，因為真係好唔慣，所以拎住條毛巾遮遮掩掩，D韓國人一定覺得我地好奇怪，哈哈！我地浸左好多唔同種類既溫泉，有冷有熱，最特別就係露天既，o係零度既氣溫下浸落四十幾度高溫既溫泉水入面，好有冰火交融既感覺！我地仲試左焗桑拿添呀，不過我唔係太鍾意，因為裡面實在太熱，連呼吸都有困難呢！晚上，我地又係打邊爐，食完就返第一晚果間酒店休息，今日行程已經完結！

1月29日~Day 4
今朝一起身見到出面落緊雨，本來都幾掃興，因為今日既行程係shopping同樂天世界，落雨就會好麻煩！點知落落下竟然變左落雪，真係開心死我，我咁大個女第一次親眼睇到落雪ja，原來真係好靚架，唔淨只我，全車團友都好興奮，個個都係咁瘋狂影相，我覺得我地真係好好彩！今日既早餐亦令我好驚喜，估唔到o係韓國竟然會食到白粥油炸鬼，而且D油炸鬼仲好好食添~嘻嘻！跟住就去新村同梨太園shopping，由於我地之前滑雪、租衫同買樂園入場劵已經用左好多錢，而家都冇晒錢買野，所以我地只係周圍行下影下相，唯一既收穫就係LANEIGE，不過唔係自己既！夜晚我地去左第二個樂園—樂天世界，果度就係「天國的階梯」既拍攝場地喇，我都有玩個旋轉木馬呀，哈哈~~~落完雪之後越來越凍，我地o係室外排隊既時候凍到全身發震！由於排隊既時間實在太耐，我同阿拔最終只係玩到四個遊戲，早知買BIG3算啦，蝕左添~哈哈！

1月30日~Day 5
最後一日喇！基本上今日全日都係shopping，我地去左導遊所講會令人瘋狂既明洞，可能好多女仔都好會好期待，不過對我黎講都係一樣，因為我已經冇晒錢，所以都係得個行字！阿拔買左幾件衫，加埋都係一百蚊多D，真係幾抵架，而我最大既收穫就係食左個32cm雪糕喇，簡直係凍到入心呀！去埋手信鋪之後，今次既韓國之旅就圓滿結束喇，真係好唔捨得！

雖然我滑雪果陣跌到全身瘀晒，韓國餐又唔係太o岩我食，而且仲乜都冇買到俾自己，不過今次絕對係我最開心既旅程，多謝您俾左五日咁美好既回憶我，希望我地以後都可以一齊去旅行~搭飛機返香港既時候，我突然有所感觸，我覺得機場真係好奇妙，佢令人感到又愛又恨！去旅行果陣懷著興奮既心情去機埸，返黎既時候通常都會依依不捨；接機大堂內全都係親人重逢既喜悅，離境大堂就正好相反，裡面充滿住分離既悲傷！以上所講既我都經歷過，所以機場俾我既感覺特別深刻，下次去機場係送機，唔開心就一定架喇，希望自己吸收過一次經驗之後會控制得好D！我會一直等待接機既一日來臨！

>>February 5, 2005 at 10:46:47 PM GMT+8

2005 年 1 月 18 日 星期二 【晴】

尋晚開會開到好夜，搞到我成五點幾先有得訓，今朝十點幾就要起身，因為約左呂太同陸太飲茶！我都好耐冇見佢地喇，之前果幾次我都要上堂所以去唔到，飲完茶之後我地仲返學校行左一陣，見到高佬李同其他老師添，阿拔同高佬既對話真係好好笑，哈哈！
之後出旺角交埋D團費，我下個星期去旅行喇，好期待~
今日勁俾人笑，因為我尋日做左D瘀野，唉...唔好提喇，總之就失敗啦！D人話會笑足我一世喎，雖然有D無奈，不過係好開心既！hehe~~~

>>January 22, 2005 at 1:04:27 AM GMT+8