2004 年 12 月 26 日 星期日 【晴】

今日係Boxing Day，雖然我冇禮物拆，但就買左一份好有心意既禮物俾人，一樣咁開心，因為我知道佢一定會鍾意！送禮物俾人，最想就係見到收禮物既人開心！
年年收到聖誕禮物就會即刻拆，如果出年有人送聖誕禮物俾我既話，我希望可以等到Boxing Day先拆，應下節嘛~
今日影左好多相，唔知影得靚唔靚呢？諗返起原來我呢一年入面影左好多獨照，因為成日同慧根出街，佢差唔多日日都會帶住部相機，我地去到邊影到邊，不過合照就真係好少喇！所以而家要影返夠本，以後睇返都會好開心！我許左個願，呢個願已經許過無數次，真係好希望可以成真！





>>December 28, 2004 at 1:36:52 AM GMT+8

2004 年 12 月 25 日 星期六 【晴】

~MERRY CHRISTMAS~

平安夜晚去左招嘉樂屋企打牌，第一次搭馬鐵，都唔錯喎，幾方便快捷！

今晚出左去尖沙咀睇燈飾，雖然周圍都好迫人，但我仍然好享受呢種節日氣氛！

慧根~唉...我今年都冇得食聖誕大餐呀，有人陪你喇！我地繼續等啦，終有一年可以食到既！我都買左個皇冠呀，不過係「迷你版」，哈哈~~~都好靚架！

>>December 26, 2004 at 2:09:33 AM GMT+8

2004 年 12 月 22 日 星期三 【晴】

我考完試喇！三個星期既sem break正式開始！
呢個假期入面想做既野實在太多喇，可以做得晒就梗係好啦，能夠實現到部份都已經好滿足！

今晚同成班friends出旺角食飯順便提早慶祝聖誕，我地仲玩交換禮物添，好似小學生咁呀，哈哈~~~不過我就好唔好彩喇，抽到我最驚既野...>_<"我地食完飯之後又去樓上cafe飲野，呢個幾月內已經去左四五次，不過我都幾鍾意，因為可以坐好耐，又有得玩，最o岩一大班人！今晚又學識左玩個新game，要勁用腦，但幾好玩，以後唔駛淨係玩大富翁喇，哈哈~~~

>>December 23, 2004 at 2:57:17 AM GMT+8

2004 年 12 月 15 日 星期三 【晴】

一口氣考完三科，聽日考第四科，跟住到下個禮拜先考埋最後一科！今次考試真係勁hea，只係希望唔駛retake！

12月11日
考完programming既感覺就好似考完試咁，成個人鬆晒！夜晚出左去同慧根行街食飯，周圍都好有聖誕氣氛，真係好想快D考完試，快D過聖誕！我要count down，我要食聖誕大餐，我要睇燈飾，我要影好多好多相......
慧根~你要發洩可以隨時搵我，我隻耳仔幾時都available架！

12月12日
今個sem第一次去library溫書，不過好似唔係咁有效率，個心始終都係好散！今晚食左一餐好豐富既飯，有我至愛既魚香茄子同埋超級好味既炸玉子豆腐，仲有香檳飲添，哈哈~食得好飽好飽！

12月14日
收到一個好朋友既電話，聽到佢好傷心咁喊緊，真係好擔心佢，都已經唔係第一次，我都唔知可以點幫佢。要講既說話我都講晒，希望佢自己識諗啦！Girls~Be tough!!!

>>December 17, 2004 at 12:16:29 AM GMT+8

2004 年 12 月 10 日 星期五 【晴】

當一個人感到絕望同心灰意冷既時候，係會不知不覺咁喊出黎......
繼續撐落去既動力係來自眼前幾幅相，AL果陣都係靠佢咋！
諗到呢度，咩都開心返晒啦！

一齊食個飯盒都好架，就係咁簡單~

>>December 10, 2004 at 3:35:32 AM GMT+8

2004 年 12 月 8 日 星期三 【颳風】

今日去左杏花村，冇記錯應該係第一次去，原來果度既環境都幾靚架，俾人一種好舒服既感覺，唔錯唔錯~~
終於見到阿拔o係澳洲既housemate(阿fau)同佢男朋友，可能我冇咁大個既朋友啦，所以同佢地一齊覺得好得意，嘻嘻~~~我傻傻地:p

決定上hall莊！

>>December 9, 2004 at 12:46:15 AM GMT+8

2004 年 12 月 6 日 星期一 【颳風】

已經係week 15，點解仲有咁多野做？
1個present+5份assignment，做完都考試啦！

豁出去喇~~~
期待之後既Christmas同sem break!
享受今年難得的相聚！

>>December 6, 2004 at 7:04:29 PM GMT+8

2004 年 12 月 2 日 星期四 【晴】

好耐都冇寫日記添，等我黎一個總結啦！呢半個月既心情都可算係悲喜交集......

11月15日 老豆做手術+High Table Dinner
本來都諗住去唔到high table，但之後發覺留o係醫院都冇用，因為我地唔入得去睇佢，淨係可以坐o係走廊出面度等，於是阿媽就叫我返hall先，第二日再去過睇老豆。返到hall已經五點幾，仲有唔夠一個鐘就開始high table，我即刻換衫同化妝，跟住就落去幫手喇！今晚個個都著得好grand，個場又佈置得靚，成個run down都好順利，之前既辛苦總算值得！唔係做左sub com都唔知原來搞一個high table要做咁多野，不斷地開會、不斷地做「庇護」，大家都做到燥晒，不過都已經過去，今次係一個好寶貴既經驗！



11月16日 阿拔返黎
終於等到呢一日喇~~~~~~
2003年10月14日，我o係船上面喊到收唔到聲，周圍好黑，感覺好絕望同無助。今日，我懷著期待既心情再次坐呢隻船，同樣係夜晚，但當我望出窗外，好似睇返晒呢一年發生既所有野咁，百般滋味，回憶總係美好既~o係機場相遇既一刻，無聲勝有聲，果種感覺並唔係用說話可以形容，只有用心才感受到！我地跟住出左旺角食宵夜，佢食左碗好耐冇食過既魚蛋米，之後就搭的士返佢屋企。我地今晚傾左好多野，好多以前唔會講出口既野，嘻嘻......真係好開心！^_^

11月17日 飲早茶
哈哈~如佢所願！

11月18日 感動的一天
多謝您呀~

11月20日 見家長
阿拔同我一齊去醫院探老豆，今次係佢地第一次見面，估唔到要o係醫院！之後阿媽、姨媽同姨丈都黎埋，突然變得好熱鬧！

11月21日 煮飯仔
咖哩薯仔雞翼+麻婆豆腐
yeah~兩樣都係我既至愛呀！

11月22日 擔心
阿拔返左黎之後，成日都咳同流鼻血，今日又係咁。佢流鼻血好似流到麻木晒咁，次次流完都當冇野，但我真係好驚佢有事，所以不停叫佢睇醫生。

11月23日 睇醫生+打通宵牌
補完習之後入左將軍澳陪阿拔睇醫生，真係好好彩囉，拎到最後一個籌，如果唔係就明天請早喇！點知佢入到去竟然同個醫生傾埋D冇謂野，結果睇完等於冇睇，激死我！夜晚出左去打牌，佢本來已經好唔舒服，我知佢係因為陪我先去，結果仲搞到發燒添，對唔住呀~ >_<

呢個禮拜真係超級開心，因為日日都可以見到阿拔！嘻嘻~~~好耐都冇過呢種生活喇！

11月27日
maggie返黎後既第一個gathering，今次見返佢都冇乜大改變，係比以前女人左啦，哈哈~我地食完飯之後去左cafe飲野，五個大細路一齊玩大富翁，一玩就玩左四個鐘，嗌到聲都沙，我地幾個每次走埋一齊都係咁顛，唔知十年後仲會唔會係咁呢？哈哈~~~

>>December 3, 2004 at 6:49:50 PM GMT+8

2004 年 11 月 14 日 星期日 【晴】

今朝一早起身陪老豆入院，可惜果陣唔係探病時間，所以冇得留低陪佢。離開醫院既時候，我個心真係好難過，不過我都忍住冇表露出黎。其實今次最叻果個係老豆，佢一直都好勇敢同樂觀，我都要好似佢一樣！

>>November 15, 2004 at 1:25:17 AM GMT+8

2004 年 11 月 9 日 星期二 【晴】

仲有一個禮拜咋~~~
為左之後可以玩，我要開始溫書喇！

To Koala and Chick: it's so warm to receive your messages! i don't know what to say, but i can feel that! thank you so much~~~ we will have gathering soon and can have a great talk at that time! see u!

>>November 9, 2004 at 8:26:07 PM GMT+8