2004 年 6 月 4 日 星期五 【晴】

呢個禮拜過得好充實，每日都幫人補習，星期一至五一日走三場，先去灣仔再返屯門，食飯時間都冇，餓到手軟腳軟，所以返到屋企之後第一件事就係要剿野食！星期六日就好D，淨係補西環，雖然路程好遠，不過我都幾enjoy，因為有得搭「叮叮」！講真，唔係去果邊補習，都冇乜幾何會搭到呢種交通工具，慢就慢左D，但確實有另一種感覺，我諗o係夜晚搭會更加正呢！

不經不覺就過左兩個禮拜補習生活，暫時都還可以，冇其他人講得咁辛苦！我發覺同小朋友相處真係幾開心，因為佢地係最真同最冇私心既，有時鬧佢地果陣都擔心佢地會唔鍾意我，但原來佢地係唔會記o係心入面，轉個頭又對住我傻笑，哈哈~~~

>>June 6, 2004 at 11:41:46 AM GMT+8

2004 年 5 月 28 日 星期五 【雨】

26/5~今晚開始同個仔仔補習，估唔到小五都要讀history and geography，仲要係全英，真係好難怪佢唔識！我都放低左history好多年喇，要睇返下先得，不過我都係全力補maths and eng，希望佢唔好問我咁多history啦，嘻嘻！
其實小學生係咪真係有需要補習呢？好似呢個仔仔咁，佢阿媽同佢請左兩個補習老師，一放學就開始補，佢根本都冇心機聽，成日諗住去玩，搞到D成績好差，因為差所以再要補多D，唉...又係一個惡性循環！不如一開始等佢自己讀仲好啦！

27/5~今日好開心，因為約左poly班friends去蝴蝶灣燒野食，我發覺原來我大部份朋友都入過黎燒野食，呢度仲比左我好多美好既回憶添~~~
講返今日啦，好耐都冇試過咁多人一齊燒野食喇，對上一次都好似係成年前lu~(我要澄清，雖然我住得近，但我絕對唔會一條友走去沙灘燒野食架！)由於今日好遲先開始燒，所以得返好少時間玩，如果可以玩耐D就更加好喇！阿愉成為左今日既犧牲者，james,eric and kenny係都要掟佢落水，雖然最後都唔成功，但阿愉結果都係全身濕晒，哈哈！之後我地一齊玩game，第一次合埋眼玩"killer"，勁爆笑囉！kenny鋪鋪都好早死，因為佢靚仔喎；casey演技超好，個個都唔信佢係killer，不知不覺咁殺晒所有人；我就慘喇，次次都俾人屈，一百個無奈囉！
成班人一齊玩真係好開心呀，我終於有放假既感覺，可惜都唔知幾時先有得再玩lu~突然間好想打波，因為實在太耐冇打，仲有去camp同打牌，希望呢個假期可以做到啦！

28/5~今朝一早起身返灣仔，雖然好眼訓，但總好過o係屋企冇野做！今日同D細路熟左好多，一得閒就同佢地傾計，佢地聽話果陣真係幾可愛~哈哈！夜晚又去同仔仔補習，佢今次都乖左，仲識同我講笑添，不過D數就仍需努力喇！
我做左「補習天后」呀，YEAH~~~

>>May 29, 2004 at 10:25:19 PM GMT+8

2004 年 5 月 25 日 星期二 【晴】

第一日返補習社，朝早七點鐘起身，為左慳錢所以搭巴士轉地鐵過海，令我感受到朝九晚五既中環白領生活，香港真係太多人喇！我既工作主要係同D細路對下功課同默書，都幾空閒架！

lunch time去左hku幫gladys交資料，今次係我第二次去hku，第一次去係三年級既時候，果次之後我就鍾意左呢間大學，一直都好希望可以入去讀書，但而家已經冇可能，所以今日去到果度或多或少都有D失落感......

>>May 26, 2004 at 4:25:56 PM GMT+8

2004 年 5 月 20 日 星期四 【晴】

今日又去左行街，今次仲同埋好耐冇見既俊俊一齊行添！我地去左好多地方，先去又一城再去銅鑼灣，最後返尖沙咀！chris終於鼓起勇氣去著geoffrey送俾佢既工人裙，但結果俾某人勁彈囉，搞到佢話以後都唔再著，我地個個都覺得好可惜，因為條裙真係幾靚，而且都唔平架，所以geoffrey就好努力咁幫chris搵衫襯，不過始終都係怪怪地，哈哈~等我行開街都留意下啦！

我今日出街既其中一個目的就係為左買對birkenstock，之前行左幾次都搵唔到我想要既款，終於俾我o係銅鑼灣搵到，真係好開心呀！正當我煩惱緊要黃色定紫色既時候，vive竟然已經決定買對花花鞋（佢o係大概兩個鐘前先話過唔再買野囉=.="），而我就依然猶豫不決，不過佢地都一致認為紫色靚，我信大家既眼光，所以我最後都揀左紫色，嘻嘻~~~我地買左成千蚊野，結果............又多張VIP card喇！
vive~你真係唔好再買野喇，停下先啦！

我地返尖沙咀之後展開左一場跟蹤行動，對象係兩位好怕醜既「小朋友」，開頭都幾緊張刺激，但我地跟左一陣就決定放棄lu，因為天氣實在太熱喇！兩位「小朋友」應該大方D喎，哈哈~~~

>>May 21, 2004 at 3:12:07 AM GMT+8

2004 年 5 月 18 日 星期二 【晴】

今日同cicx, kylie and yu唱K，全程都爆笑連場囉，先有kylie and yu既「不男不女版"目黑"」，再黎「嚴重走音版"多得他"」，最精彩既壓軸就係「一SA三嬌大戰」，仲有cicx既「和音」(唔識點形容=.=")，兩個喉嚨唔舒服既人鬥唱高音歌等等，不過開心既代價就係我地四個把聲都擦晒，哈哈~~~

忽然愛上birkenstock，可惜遲左一步，俾人買晒lu！

>>May 19, 2004 at 4:48:08 PM GMT+8

2004 年 5 月 16 日 星期日 【晴】

終於都考完晒所有試喇，唔駛再日日攬住D書做人！！！
其實自從AL之後都冇認真咁溫過書，科科都係到最後果刻先睇下D重點，結果就梗係唔識啦！我相信付出幾多就會收返幾多既，只要all pass我都心滿意足喇~~~都係果句啦：「冇期望，冇失望！」

考完試即刻出左去同chris and vive一齊食tea buffet，因為我好少有得食buffet既關係，所以每一次都好期待架，嘻嘻...我發覺原來自己有好多野都唔食，但偏偏對朱古力就情有獨鍾，如果食到全部用朱古力做既甜品buffet就好lu~~~

>>May 19, 2004 at 1:48:31 AM GMT+8

2004 年 5 月 11 日 星期二 【酷熱】

睇左vive既日記之後，令我覺得好開心！我一直都認為自己o係別人既心目中唔係咁重要，甚至係可有冇無！我今日先知道原來我都可以令人開心，我既說話都可以令人感到幸福！多謝你呀~vive!!!
其實要得到別人既讚美同肯定真係好難，因為依家好少人會將內心既感受講出黎，更加少講逗人開心既說話！如果大家都可以慷慨D，咁呢個世界咪會多D歡笑囉！

>>May 12, 2004 at 1:33:38 AM GMT+8

2004 年 5 月 10 日 星期一 【酷熱】

樣樣都係錢，我真係要努力搵工先得喇！

>>May 11, 2004 at 1:38:30 AM GMT+8

2004 年 5 月 9 日 星期日 【晴】

母親節快樂！

今日考完第一科~hotel，完全冇考試既感覺，坐o係入面三個鐘，真正做野就得個幾鐘，其餘既時間都唔知做緊乜，東張西望同發夢，個心好散好多野諗......我覺得自己係EQ零蛋，唔識點控制情緒！要提升個人既EQ其實係好難，我可以做既就係不斷學習同反思，雖然付出左都未必會有回報，我要花既時間可能係一世，但我仍然願意去做，因為我想令自己開心，令身邊既人開心！

夜晚同阿媽出街食飯，周圍都迫滿人，等左個幾鐘先有位，仲要食唔到我地想食果間！邊個話香港經濟差架？我地食完飯去左搵老豆，點知竟然見到一個勁似老豆既人(又係咁矮)，我同阿媽都認錯左，唉...老豆心淡lu~哈哈！

恆生指數係由33隻成份股所組成............
發夢都記得,哈哈~

P.S.我終於得到"菠蘿油王子"喇！thx eileen~~~

>>May 10, 2004 at 3:13:04 AM GMT+8

2004 年 5 月 8 日 星期六 【颱風】

由於黑色暴雨既關係，今日既考試取消！yeah~~~
個天好似想幫我咁，唔知係咪呢排做得好事多呢？哈哈......
不過就算多幾日都冇用，結果都係一樣，因為我根本集中唔到溫書，成日心不在焉！
今日突然靈機一觸，諗到一個個好好既idea，等我考完試之後慢慢plan下先，希望會做得好啦！

>>May 8, 2004 at 8:36:42 PM GMT+8