2004 年 11 月 5 日 星期五 【晴】

老豆~生日快樂！

琴日返左去陪老豆睇醫生加慶祝，原來連佢自己都唔記得左自己生日，阿媽又唔記得，不過唔緊要，仲有我記得嘛！我地一家人去左酒樓食飯，真係好難得架，因為我地係好少會出街食飯，一年都唔知有冇一次囉！食完飯就返屋企切蛋榚同影相，成家人都好開心！
今日又要去醫院，由朝早八點幾一直留到下晝四點先走得，結果又走左全日堂！今個星期都冇乜點上過堂，就連留o係hall既時間都唔多，隔日就返屯門，我諗之後幾個星期都會係咁！老豆個手術已經決定左15號做，希望到時一切順利！

>>November 5, 2004 at 6:44:11 PM GMT+8

2004 年 10 月 21 日 星期四 【晴】

EXAM TIMETABLE:


11/12(sat) 1400-1700 PRINCIPLES OF PROGRAMMING
13/12(mon) 1400-1600 INTRODUCTION TO CALCULUS AND LINEAR ALGEBRA
14/12(tue) 1830-2130 BUSINESS ACCOUNTING
16/12(thu) 930-1130 DATA AND SYSTEM MODELING (PROB/STAT)
22/12(wed) 930-1230 COMPUTER SYSTEM ARCHITECTURES

Target: 一定要pass comp 201!!!

>>October 25, 2004 at 12:24:33 PM GMT+8

2004 年 10 月 20 日 星期三 【晴】

呢個禮拜真係好辛苦，三個mid-term加三份201 assignment！第一份交唔到我已經好唔開心，不過都即刻收拾心情做第二份，我連續兩晚同雕鳳去搵tutor幫手，由十一點傾到三點都搞唔惦，個tutor都做到爆粗！我唔介意冇得訓，如果廿個鐘可以做完咪做囉，但而家唔係囉，花左時間都未必有結果，真係灰到爆！從未試過做assignment做到咁燥，我唔想捱病呀！

雞雞~我都好掛住你架~~~1121嘛，我記得架！人梗係會大個既，我知道你都比以前識諗左啦，俾心機考埋過試，返黎同你玩餐飽啦！到時你就可以見到我個殘樣喇... >_<

>>October 20, 2004 at 6:38:09 PM GMT+8

2004 年 10 月 16 日 星期六 【晴】

今日係阿哥結婚既大喜日子，我朝早補完習之後就去教堂觀禮。一直都覺得o係教堂舉行婚禮係特別莊嚴、溫馨同浪漫，今日我又再一次感受到！由於cat姐係幼稚園老師，所以教堂入面除左雙方既親朋好友外，亦坐滿佢既一大班學生，非常之熱鬧！交換介指過後，佢地十指緊扣向大家致謝，首先係阿哥講，聽到我眼濕濕，跟住到cat姐，佢一路都忍住唔喊，仲好搞笑咁講左句「個妝好貴架」，不過佢最後都係忍唔到，結果阿哥幫佢講落去，佢講左幾句說話令我感受好深，好有共鳴！
禮成之後，我地就坐旅遊巴去酒店，老豆知我想打牌，於是佢就陪我打。第一次同大人打牌，原來佢地好鍾意食「雞糊」，密密咁食，搞到平時玩開「三番起糊」既我好唔慣，好彩最後都有錢贏，因為我成日做大牌，哈哈~~~婚宴o係九點正式開始，首先播返今朝接新娘既片段，仲有佢地兩個既photo slide show！之後阿哥表演自彈自唱，佢仲將D歌詞重新填過添，cat姐話好lum喎，真係估唔到阿哥會咁有心思，hehee~呢個婚禮並冇玩新人既環節，取而代之既係sharing，雙方既父母同朋友逐一上台祝福一對新人，又講下彼此認識多年黎既點滴，我覺得咁樣比玩遊戲更有意義，相信今晚既回憶會一生一世咁留o係佢地心入面！
阿哥話想所有蒞臨參加佢婚禮既賓客都能夠感受到愛，結果佢真係做得到！成個婚禮真係有好多感動位，全部都黎得真摰、自然~我覺得佢地兩個真係好襯，唔係講佢地既外形，而係佢地既內心，兩個都係非常有情有義既人。我衷心祝福佢地永遠都幸福快樂！

送一首我好鍾意既歌俾大家︰

《愛是不保留》

常聽說世界愛沒長久, 哪裡會有愛無盡頭?
塵俗的愛只在乎曾擁有, 一刻燦爛便要走!
而我卻確信愛是恆久, 碰到了您已無別求;
無從解釋不可說明的愛, 千秋過後仍長存不朽!!

誰人受痛苦被懸掛在木頭？
至高的愛盡見於刺穿的手；
看！血在流反映愛沒保留，
持續不死的愛到萬世不休！

惟求奉上生命全歸主所有，
要將一切盡獻於我主的手；
我已決定今生再沒所求，
惟望得主稱讚已足夠！

>>October 19, 2004 at 7:30:55 PM GMT+8

2004 年 10 月 14 日 星期四 【晴】

我個日記一歲喇~~~亦即係話阿拔已經走左一年！
1116~非常期待呀！！！

>>October 14, 2004 at 1:03:00 AM GMT+8

2004 年 10 月 12 日 星期二 【晴】

今集《青出於藍》最尾果幕好sweet sweet呀，睇到我都鬼死咁開心~~~

>>October 13, 2004 at 3:09:23 AM GMT+8

2004 年 10 月 2 日 星期六 【微冷】

天氣開始轉涼，一年入面我就最鍾意呢兩三個月，秋風吹埋黎既感覺真係好舒服，心情都特別靚！

老豆話飲埋阿哥果餐先做手術，雖然我想佢快D去睇，不過我都尊重佢既意願，總之一切以佢開心行先！而家佢每日既活動就係留o係屋企睇vcd，我果幾十隻《刑偵》已經差唔多比佢睇晒，等我再買多D俾佢睇先！

給所有關心過我既人~我已經好返好多喇，唔開心仍然會有，但至少我唔會再喊！我roommate話我好冷靜，其實我都冇諗過自己可以咁堅強，今次既事令我明白到~"Nothing is impossible!" 得同唔得都係睇你自己！邊個唔想有人依靠，但冇既時候就要靠自己！今次真係要多謝好多人，有幫我周圍問人搵資料既，有幫我同我屋企人祈禱既，仲有成日陪o係我身邊開解我既，有你地既支持，我相信我一定可以撐落去！

>>October 2, 2004 at 11:59:46 PM GMT+8

2004 年 9 月 24 日 星期五 【晴】

老豆終於返左黎，佢仲未知發生咩事，我真係唔忍心同佢講.........
我從來都冇見過佢好似而家咁開心、咁relax，因為佢終於可以放低一直揹住既沉重包袱，真真正正咁享受退休生活！只要佢可以繼續開開心心，健健康康咁生活落去，其餘既野由就我黎承擔！

>>September 26, 2004 at 2:22:42 AM GMT+8

2004 年 9 月 23 日 星期四 【晴】

今朝一早收到阿媽既電話，佢話個心好亂，完全諗唔到野，所以叫我黎做決定！一時間我都唔知點好，最後選擇左返黎香港醫，因為始終都想陪佢多D！聽日就出詳細報告，希望可以有奇蹟出現.........
利生真係充滿人情味，好多謝大家既關心同支持！

>>September 24, 2004 at 1:58:00 PM GMT+8

2004 年 9 月 22 日 星期三 【陰】

我只係想一家人可以平平安安、開開心心咁生活，阿爸阿媽已經辛苦左大半世，點解唔可以俾佢地享下福？自從我考到大學之後，全家都充滿住歡樂既氣氛，所有怨氣同怒氣都消失晒，我仲以為我地一家人捱左咁多年，終於可以轉運，點知原來惡夢而家先開始！發生左既野已經改變唔到，我知道佢地兩個會比我更傷心難過，所以我一定要堅強，佢地得我一個女，有好多野都要由我黎做，無論之後發生咩事，我都要一直撐落去！o係佢地面前，我會盡量抑制內心既情緒，但一個人既時候，我又係咪可以咁冷靜呢？

>>September 22, 2004 at 1:13:20 PM GMT+8