2004 年 7 月 22 日 星期四 【晴】

好開心~終於有得打波喇！

今日返左poly同nicola打波，真係好耐冇打過喇，所以開頭都打得唔係太順，以後要打多D先得！之後去左hall，讀左poly成年都係第一次去佢個hall咋，非常嚮往住hall既生活哩~~~

Nicola~好期待同你做roommate and teammate呀！

>>July 25, 2004 at 6:22:30 PM GMT+8

2004 年 7 月 20 日 星期二 【溫暖】

呢排既生活好頹廢，做乜都好似提唔起勁咁！
老豆下個月開始就會失業，今次將會係永久性！本來老豆咁既年紀都應該退休享福架喇，可惜屋企環境唔好，所以收到呢個消息之後，全家人都冇晒心機.........見到屋企咁，我就更加想讀到大學，因為我知道只有呢個好消息先可以令佢地開心返！
自從放榜之後，我既心情變得好複雜！個個都話我既成績一定入到U，只係去邊間既問題，我當然希望係咁啦！但另一方面，我又好擔心，一日未到八月十號，所有野都係未知之數，我真係唔敢諗！有好多野都唔到我控制，我不嬲都唔係一個迷信既人，但無疑運氣係決定我今次生死既因素之一！

>>July 20, 2004 at 3:00:07 AM GMT+8

2004 年 7 月 9 日 星期五 【晴】

終於等到呢一日！本來八點可以上網睇成績，但我七點半就出左門口，諗住返到poly先睇！o係搭巴士既途中，我緊張到連呼吸都有困難，個心跳得勁快...>_<"
八點過D收到既第一個電話，竟然係一個auntie打俾我，真係估唔到佢會咁關心我，不過我當時都未知道成績！跟住阿拔就打黎，原來佢已經幫我睇左，果一刻我既緊張程度到達頂點，聽完之後即刻喊到收唔到聲，我既眼淚包含左好多野——開心，三科全部upgrade到，一年既心血冇白廢；失望，pure既成績唔理想，始終都刻服唔到佢；憂慮，擔心讀唔到學位，怕承受多一次挫敗！今日收到好多電話，小學同學、上智既同學、馬會同副學士既同學，全部都齊晒，有D仲特登出黎陪我，真係好多謝大家！你地每一個既支持都對我好重要！！！

>>July 13, 2004 at 12:50:26 AM GMT+8

2004 年 7 月 8 日 星期四 【晴】

呢一刻既心情好沉重，個心跳得好亂，相信只有同我一樣等緊聽日放榜既人先會感受到！
仲有唔夠十個鐘就知道結果喇.........
今日收到好多好朋友既message，多謝你地既支持同祝福！但願聽日有好消息俾你地啦！

Nicola~希望出年真係可以同你一齊升degree，一齊打波同一齊住hall，好期待呀~~~GOD BLESS US!!!

>>July 8, 2004 at 10:41:24 PM GMT+8

2004 年 7 月 4 日 星期日 【陰】

係啦~我真係有好多朋友o係夏天生日，唔通我同夏天出世既人特別有緣？哈哈...
今日又有人二十歲喎，生日快樂呀~GLADYS！終於可以o係正日同你慶祝喇，開心嘛？我地夜晚出左旺角打邊爐，個個都食到好飽！我同jelly本來諗住俾個驚喜gladys，點知個waitress竟然一早講左俾佢知，搞到我同jelly勁無奈！咁都算啦，D人仲衰囉，未經我地同意就撕爛個盒偷睇，所以我地之後就要懲罰佢喇，哈哈！我地跟住出左尖沙咀，一到左地鐵站之後，我地就要gladys合埋眼，然後跟住我地行一段好長既路！為左防止佢偷睇，我仲落左一個好毒既咀咒添，哈哈~~~嚇死gladys呀！！！算啦，見你係無心之失，咁我就收返啦，下次唔好喇，嘻嘻！我地最後去左海旁食蛋糕同照相，玩到好夜先走，當我同gladys返到荃灣既時候已經唔係佢生日lu~哈哈！

>>July 8, 2004 at 12:06:18 AM GMT+8

2004 年 7 月 3 日 星期六 【暴雨】

今日去左參加miss chung既婚禮，見返好多舊同學，有好多都好耐冇見lu！雖然落住毛毛細雨，不過絕對影響唔到教堂入面溫馨、浪漫既氣氛！miss chung今日特別靚啦，哈哈~又再一次證明到每個女人o係結婚果日都係最靚既！見到佢甜到漏既笑容，就知佢有幾幸福，我地都替佢開心！成個婚禮最令我感動係choir既部分，因為D歌詞真係好touch、好有意思！我並唔係教徒，但無可否認o係教堂舉行婚禮係最令人刻骨銘心！

>>July 7, 2004 at 8:30:04 PM GMT+8

2004 年 6 月 29 日 星期二 【酷熱】

忙完一輪之後，終於可以抖返下喇！七月開始真真正正放假，八月又再忙過！

最近日日都三十幾度，我最怕就係熱，所以除左補習之外都唔想出街，好彩kylie早排借左一大堆vcd俾我睇，如果唔係實悶死！

星期六去左nicola屋企同佢補祝生日，佢間新屋真係好鬼靚，羨慕死我喇，我都好想可以有自己既房呀！如果將來有咁既一日，我一定會落足心機佈置佢架！好~發完夢喇，言歸正傳先！識左nicola已經有十三年喇，能夠維繫到一段friendship咁長時間真係非常難得！自從小學畢業之後，我地見面既時間雖然唔多，但每年一到對方生日或者其他節日，我地都會出黎聚下，從沒間斷過！果日見到佢D屋企人都覺得好有親切感，因為真係識左好耐，好似佢細佬咁啦，當年睇住佢出世，而家又話升中學喇，時間過得好快呢！識新朋友好容易，但要keep住D舊朋友就好難，所以我會更加珍惜呢個「老」朋友！！！

>>June 29, 2004 at 12:54:08 PM GMT+8

2004 年 6 月 18 日 星期五 【酷熱】

已經連續返左三個星期工，一日都冇抖過，真係做到筋疲力盡，成個人都散晒！雖然好辛苦，但都有D值得開心既野！最開心就係返灣仔，果度就好似一個大家庭咁，有得意聽話既，有醒目搞笑既，佢地有時都幾曳架，不過有時又會令我好開心囉！最難過反而係lunch time，一個人漫無目的咁o係條度遊蕩，悶到死！返多兩日就完喇，因為佢地差唔多考晒試，有D唔捨得添，哈哈！

asso既成績已經出左，我都係從朋友既口中得知，冇乜特別感覺，都係好似上個sem咁啦！
希望七月收到既成績會更加好！！！

>>June 19, 2004 at 2:05:23 AM GMT+8

2004 年 6 月 13 日 星期日 【晴】

今個禮拜十分疲倦，每日都返朝九晚九，仲未計搭車既時間添！不過我依然好鍾意返工，因為既可搵錢又可慳錢，最重要係可以令生活過得充實D！
星期六補完習之後，同vive行左一陣街，想不到會有意外收穫，不枉我地等左成兩個鐘，好開心呢！vive就更加唔駛講啦，哈哈~~~
下個禮拜將會超級忙碌，因為D小朋友開始考試，個個家長都話要加鐘！雖然我都好想搵多D，但奈何D時間撞到七彩，真係好難取捨！除此之外，仲要出題目俾佢地做，所以返到屋企都冇得抖，都唔知係我考試定佢地考試囉~anyway，我已經盡左力，考成點就要靠佢地自己喇！

P.S.講左出黎之後，成個人都鬆晒，我相信會越來越好！

>>June 13, 2004 at 11:32:51 PM GMT+8

2004 年 6 月 6 日 星期日 【雨】

~HAPPY BIRTHDAY TO JELLY~

好耐冇見jelly喇，尋日見佢果陣仲係一個十九歲既小女孩，今日搖身一變，換上新形象，真係令我同gladys眼前一亮，踏入二十歲果然唔同D喎，哈哈！！！

我地尋日去左冒冒樂園玩，諗返起我都有大半年冇玩lu~由於D金幣要成兩蚊一個，再加上gladys每隔幾分鐘就會同我地講：「我D錢好辛苦賺返黎架...」，所以我地都唔敢亂玩，哈哈~~~好好彩我地最後都掟到一個小蛋糕同一隻馬騮仔，當係jelly既生日禮物啦，唔駛空手而回喇，嘻嘻！我地玩完之後去左食甜品，不過大家都唔多滿意囉，jelly叫左過"death by chocolate"，食食下竟然見到一條唔知係尼龍定蝦鬚既物體， 結果就換過另一個俾佢，呢D都唔知叫好彩定唔好彩，jelly總共食左一個半既"death by chocolate"呢~

到左今日，我地本來想帶jelly去食佢想食既蛋糕，但可惜都係搵唔到，最後既節目反而係陪gladys買衫返工，悶死我同jelly喇！哈~不過呢兩日都係開心既，我地下次再食過啦！

>>June 7, 2004 at 12:40:53 AM GMT+8