2007 年 6 月 9 日 星期六 【微冷】

《千呼萬喚始出來！》 來到多倫多第三天, 梁琬婷就帶左我去見佢第一班朋友, wakakaka, 千呼萬喚始出來！一直都只聞其人不見其身的陳俊峰, 終於出現於眾人面前！我好緊張啊！ 唔知會打破佢地一直以來既幻想, 定係會俾佢地耳目一新既感覺？ 今朝一早我地系屋企 hea下 hea下 (其實都唔早, 成下晝兩三點), 梁琬婷一邊用電腦, 一邊用筷子夾粟一燒食... 呢個簡直係一個奇景, 點解會有人懶成咁..sosad.. 之後我地出發去同梁琬婷既朋友仔唱卡啦永遠 OK, 再一次坐梁琬婷的車, 睇下佢渣車既英姿, 戴埋黑超驚死太陽會哂盲佢咁款...= =" 我第一個見到既梁琬婷朋友就係 jenny wong, 嘩嘩嘩！ jenny wong勁似唐寧！真係想介紹 D囡囡俾我既朋友仔識, 加拿大女仔既質素真係高, 求其執一件都正過香港 sosad... 睇下我幾好, 自己上左岸仲幫身邊既朋友仔謀大事, 我呢個朋友真係唔話得....... 之後 Jennifer, Jacky chen, jennifer既男朋友 Terence同埋 Hale都陸陸續續黎到, 佢地全部都係講中文, 第二, 佢地係梁琬婷大學既朋友, 相處左一陣, 眾人都感到非常驚訝！因為梁琬婷既男朋友真係好搞笑, 睇相以為我係好正經, 唔玩得, 唔講野, 唔出聲既人, 但原來 winnie男朋友表面上好斯文, 但其實係個痴線人, 佢地都話唔怪得之梁琬婷會同我一齊, 因為我同 win都係痴線既... 不過我發現, 原來佢地全部都係癲癲地既, 我地玩左一陣就熟落哂, 好好玩！估唔到佢地都陪我地癲, haymama同我一齊合唱《教我如何去小便》, win估唔到 hale竟然識唱 kai歌, 我地又唱古天樂既《今期流行》, 全部人一齊做同一個姿勢！ 我地全部人都癲左, 狂唱《皇后大道東》、《我至叻》、《忘情森巴舞》.. wakakkaka~仲全部人扮阿叻跳舞, 超正！！！ jacky仲教我地睇掌紋, 佢話：「你將來會有個泳池...」 之後就吐啖口水落手掌, 笑鬼死！ 之後唱《眼睛想旅行》時, 全部人系卡啦 OK房圍住張台轉黎轉去, 大唱「如果想開心為什麼需要等」, 簡直係 high爆！ 唱完之後 win仲大聲咁問：「冇左食得招積o個段既！？」 我地話佢知, 已經過左 la！win：「>O<！點解我唔知既..好唔開心..」 「將敵意將身份都放低些吧！於今晚將一起探討他！」 hale solo一曲草蜢既《失戀》！唔單止 haymama既舞姿笑爆！ 我地眾人仲系佢身邊幫佢伴舞！wkaka~全部人都傻傻地 ga！！ 原來我唱歌真係好難聽 sosad~不過算, 來吧三分鐘放縱！ UT四小花, 梁琬婷, haymama, jennifer, jenny wong... 我地有幸請到唐寧同我地合照.. yeah！我至叻！我地餐餐都做阿 head！ 今期流行, 流行猛人條裙... 唱完之後好滿足, 好耐都未試過咁樣癲過, 我地去左隔離間機鋪影大頭貼, wakaka~每次影大頭貼都有一個問題... 就係拍攝每張相之間既時間實在太少 la！只係得五秒時間俾我地換位！ 睇下我地開始前 plan好哂之後既走位同排位, 仲有佢地既自我介紹... 影完好似打完仗咁, 好刺激好好玩！正！真係少 D心血都唔得... 睇下各人自我介紹, haymama仲好積極咁入鏡介紹自己, 不過我話佢知會擺上 youtube時, 佢地先知自己賴左野... haymama仲同我講, 乖細路係唔可以入呢 D地方 ga！ 我地就問呢度有冇人唔夠秤, 咁岩 terence換完散紙入黎, 我地全部人指住佢問佢夠唔夠秤 ar！？佢好似俾我地嚇呆左咁, 好驚咁話夠 ar夠 ar, 笑死我！jenny仲話要「爆缸」！ 我地問佢咩野「爆缸」ar！？原來佢話「爆缸」就會美白 wo！ 我地等緊出相時, 見到隔離有部用 keyboard打喪屍既遊戲機, 好搞笑, 個個人都揹住個 keyboard, 見到喪屍就打字, 好柒... wakaka~終於有相 la, 不過好貴, 過膠都要十蚊加紙... terence俾人 cut左一隻眼 sosad... haymama扁咀好搞笑！笑死我... 終於輪到我做主角！ 我地影完大頭貼, 就趕下一場去會一會第二班朋友仔！ 雖然 haymama佢地叫我地一齊去佢屋企打 wii, 但係我地實在太紅 la, 全世界都想見到梁琬婷男朋友既廬山真面目, 我地唯有忍痛拒絕左 hale, 依家天色岩岩昏暗入黑, 其實已經係夜晚九點, 好唔慣咁夜先入黑 tim... 今日下晝 win仲話要溫書不如唔好去唱卡啦 OK, 嘩！好彩有去到姐, 真係超級好玩！玩到好熱 ar！！ 我地去左 168飲野, 有兩年前見過既 HP, 有 kathy, cindy, vivian, kelvin仔, jess, jess男朋友, 酷似錢嘉樂的 hymen, stephanie.. 嘩！佢地既感覺同頭先o個班嘩鬼好唔同, 佢地係 win系大學另一批朋友, 而佢地特徵就係...多數唔識中文, 就算識講都唔識睇, 唔識寫... 講真, 我恨有竹昇朋友好耐 ga la！最正係第一次見既 jess, 之前已經系長途電話同過 jess傾過兩句, 因為有晚梁琬婷好夜都未返屋企, 但佢又熄左電話, 我搵左好耐都搵佢唔到, 結果我要打電話俾 jess, 結果 jess同我講 win系佢身邊訓左, 不過佢冇飲酒, 叫我可以放心... 岩岩黎到 168, 等各人自我介紹, kathy真係好似小朋友, 佢同 vivian, cindy三個都係「竹昇」, 所以唔識講廣東話, 不過當佢地講廣東話時就好搞笑, win稱呼佢地為「英文人」... 之後 kelvin仔把聲好磁性, 好似壓低左把聲咁, HP唔駛講 la wakaka~ jess個男朋友 edwin好似 D保險推銷員咁, 一黎到就同我講： 「你一定係 jason勒！」之後仲伸隻手俾我同我握手, 我呆左... kelvin仔話以前叫開 win做師傅, 依家要改口叫佢師母, 我先係師傅 wo... 見到 jess真人, 真係...sosad, 香港既女仔真係望塵莫及, 唔係話我崇洋, 但人地真係勁, 係好勁, 唔知係地理因素定係先天優勢, 定還是飲食問題？ 我敢講將我識得既香港女仔加埋哂都冇 jess咁勁, 可能大過我個頭 tim... jess見到我同我講既第一句就係：「呀 jason ar, 你隻唔隻揪 ga？」 當然聽到我地呆左, 而佢既意思其實係問我飲唔飲酒...= =" win話佢詞不達意已經唔係第一次, 唔識中文但又好鍾意講中文, 梁琬婷話有一次佢地成班人打算上其中一個屋企, jess就話： 「不如買 D野食上去供奉佢...」梁琬婷聽到之後當然石化左...

>>February 21, 2008 at 8:35:21 PM GMT+8

2007 年 6 月 8 日 星期五 【乍寒還暖】

《向地球的另一邊出發！》 來到多倫多第二天, 基本上完全冇 jetlag, 根本連一 D時差都冇, 我果然係天賦異稟, wakakakkakaka！！！ 其實只不過係我系香港時, 係日頭訓覺, 凌晨活動, 所以來到加拿大岩岩好同平時既作息時間一模一樣 sosad... 今日梁琬婷帶我去搭巴士同地鐵, 去左多倫多的 downtown, 落左唐人街, 梁琬婷問我感覺如何, 我話好唔鍾意 downtown, downtown俾我既印象好差, 因為好多人好污糟, 唐人街仲同大陸係冇分別既, 我都係鍾意 uptown多 D, 因為少人之餘, 又多花草樹木, winnie仲話佢十世都唔會落唐人街, 之後我地去左 tim holton食我期待已久的 dounut！ 有幾十種唔同既味道, 梁琬婷仲應承我每次試一款, 直到試哂為止, wakaka, 食極都唔肥既體質真係好, 某人唔恨得咁多... 不過依家某人都唔理咁多, 食左先算, 某人系康熙字典中解作「梁琬婷」..... 之後我地去左 city hall前面既水池, 見到好多海鷗, 不過佢地個樣好賤格, 所以我同梁琬婷都忍唔住要衝過去踢佢地... 我地去左行商場, 呢個商場好特別, 因為入面有好多加拿大雁飛緊, 唔好以為佢地唔郁, 只不過佢地夏眠緊, 一到冬天佢地就會飛走... 梁琬婷 D朋友已經急不及待想見見我既廬山真面目, 梁琬婷身邊所有朋友都等了足足兩年, 想盡快見到聞名不如見面既我, 佢地打電話俾梁琬婷, 約我地聽日去唱卡啦永遠 OK！ 我地行左一陣, 食左少少野, 就因為累所以決定回家... 我地去左間鋪頭試衫, 玩左一陣就搭返地鐵回家, 搭完地鐵上巴士, 見到個窗濕哂, 先知原來頭先落好大雨, 我地真係好彩, 落大雨既時候我地岩岩系商場行緊, 行完就停雨, 真係好彩, 不過曾經有位住系多倫多十年既朋友同我講, 多倫多係唔會落雨既, 一年都只不過落三四次, 估唔到我落機第二日就即刻見到落雨呢個奇景, 而呢個朋友, 佢個名都係叫做梁琬婷.... 呢架就係多倫多既巴士, 所有都是單層的, 不過好落後, 落車要拉條繩通知司機, 香港是「禁」制的唷, 之後竟然連自動門都冇, 要自己推開度門落車...= =" 我地返到梁琬婷間屋前面時, 竟然俾我見到有松鼠！！ 嘩嘩嘩！！好得意呀！我平生都未見過野生松鼠, 佢地仲會爬樹, 走得超快, 我想走埋去捉佢地都唔得, 梁琬婷話好普遍架咋, 通街都係, 我問梁琬婷, 點解唔去捉佢地, 佢竟然答我： 「你估我冇試過咩？我梗係細細個試過好多次都捉唔到, 之後就放棄 la！」 佢仲話, 我去到加拿大見到松鼠仲興奮過見到佢, 咁梗係 la, 你有冇 D松鼠仔咁可愛先！？

>>February 21, 2008 at 8:36:11 PM GMT+8

2007 年 6 月 7 日 星期四 【晴】

《「加拿大一千五百小時 --- 前章」展開！》 經過十八個小時的飛行, 橫跨足足半個地球, 到達地球另一邊的加拿大, 呼吸到這個國度的空氣, 看見不同種族的人, 聽到不同的方言, 帶點緊張, 亦帶點興奮... 自己一個人踏上飛機, 獨自去到一個完全陌生的地方, 雖然有點害怕, 但憑著一個信念, 將這份不安轉化為能量, 不但成功在溫哥華機場找到轉機的地方 (不知為何機票上沒有寫..= ="), 還成功在候機室打到長途電話回香港及身在多倫多的梁琬婷, 先打電話回香港, 當時是香港時間凌晨兩點, 我細佬打緊機, 我叫佢幫我叫醒阿媽... 之前買左張 $98漫遊咭, 可以系世界各地打去任何地方, 不過打返香港就 $8一分鐘, 打去其他地方就 $25一分鐘！！ 結果同阿媽傾左五分鐘, 就打電話俾梁琬婷, 佢都好驚訝接到我電話, 不過傾左兩分鐘就 cut左, 因為張咭冇哂錢 la！ 在溫哥華機場落機, 入境, 清關, 拎行李, 寄倉去多倫多, 因為唔知係咪呢條隊, 所以我另轉頭問後面既女仔, 點知原來佢唔識中文既, 佢聽到我用中文問佢, 佢就即刻叫佢阿爸, 真搞笑.. 溫哥華機場真係好大, 我以為轉機, 只不過係落機, 之後上另一班機, 原來唔係咁簡單！係要從機場的一端走往另一端, 足足行了三十分鐘, 好彩當中我都有時間入去鋪頭睇下雜誌, 不過因為太多手提行李, 所以我都係入一入去就出返黎, 繼續問人究竟我應該系幾多號閘口登機..sosad.. 上到飛機, 坐在身邊的是一位與我一同轉機的男生, 亦是由香港經溫哥華去多倫多, 佢話佢因為阿哥結婚, 所以要去多倫多觀禮, 八月十二日先返香港, 我心諗唔會咁岩得咁橋掛大佬, 唔通係 winnie未來姐夫個細佬！ 因為我今次去多倫多既另一個目的, 係 winnie家姐結婚, 而我就係八月十日回港, 唔通....難道.... 尋晚八點鐘落機, 到達多倫多的第一個印象就是... 「啊！夜晚八點都仲好猛太陽！？」 然後等行李足足等左成個鐘, 唔單止咁, 我諗住去拎架行李車, 因為我實在太多行李 la, 單單手提行李已經拎到我死下死下, 除左一個大背囊之外, 左手拎住一幅一米長既畫, 右手拎住一個 laptop袋 (當然裡面有一部 laptop同電子 item)... 唔單止咁, 仲有兩個寄倉既大 gip, 每個 20磅！ 根本冇可能徒手將所有行李搬出機場, 但係估唔到行李車都要錢！仲係唔可以 refund！！ 估唔到兩年前系香港國際機場送別梁琬婷時, 梁琬婷給了我幾個不同的加拿大硬幣, 現在竟可以大派用場！！ 不過它們全部都俾我拎去五金鋪鑽左個窿, 因為我想好似古代人咁將 D銅錢穿起哂佢, 好彩我有將佢地全部帶哂黎, 而一架行李車係需要一個 $2加拿大硬幣, 而梁琬婷俾我o個抽銅錢當中, 亦都有一個 $2加拿大硬幣！ 梁琬婷竟然洞悉先機, 兩年前已經給了我一個 $2加拿大硬幣旁身, 雖然鑽左個窿, 但入落機依然可以推到架行李車出黎, 如果冇呢個 $2加拿大硬幣, 我都唔知點樣出到呢個門口, 不過最驚訝既係竟然冇得 refund, 即係租用一架行李車, 係需要 $14 HKD！！ 我同那位不知名的男生一同推著行李車出閘, 那時已經是晚上九時, 足足等了一小時的梁琬婷, 看見我出閘便大叫「傻丙」, 之後我來不及反應, 她便已經衝上前繞著我, 我向那個在我生命中佔了五個多鐘頭的男生 say goodbye後, 便與梁琬婷一同推著行李車往停車場, 梁琬婷問我： 「o個個人你識 ga？」我話唔係, 只不過係頭先坐埋一齊, 佢撩我傾偈, 最好笑既係, 呢個人去到溫哥華, 就將手錶時間「較」成溫哥華時間, 到達多倫多時, 又將手錶「較」回多倫多時間, 而香港時間與多倫多是一模一樣的, 只是香港快了十二個鐘, 所以跟本唔駛「較」, 我同梁琬婷講呢個人真係好冇腦...wakaka.. 我們搵左好耐先去到停車場, 梁琬婷仲問我, 第一次坐佢車有咩感覺, 而我直言：「好驚..」 佢就話佢已經渣左四年車, 都唔知有咩好驚...= =" 隨著《跑腿奇遇記》的完結,《加拿大一千五百小時 --- 前章》強勢展開！

>>October 30, 2007 at 1:06:58 AM GMT+8

2007 年 6 月 7 日 星期四 【晴】

《飛越太平洋》 我依家系飛機上面, 時間為 7:30 pm, 亦即是已經飛了差不多七小時, 隻腳屈住左七個鐘, 好累啊！現在我正在太平洋的上空, 四小時後才在溫哥華轉機往多倫多, 亦即係話, 我仲有十二個小時就見到梁琬婷 la！係咪好開心呢？ 好慘 ar！我要拎勁多野過黎！唔知點解變左跑腿一號, 頭先 check in時, 佢仲話梁琬婷家姐幅畫 oversize, 加上我已經有一個大背囊同埋一個 laptop袋, 所以唔俾我上機, 我話怕寄倉會打爛, 佢就話我個 handcarry太多太大, 減 D落行李 gip就俾我帶幅畫上機, 咁我就要「就地」pack背囊, 將 D野 pack入 gip寄倉, 即場開 gip塞野...= =" 頂！背囊 D野係梁琬婷家姐個朋友俾佢地既結婚禮物！ 仲係會易爛既, 佔左我背囊三分之一... 依家係香港時間 6月 7日夜晚 10:00, 多倫多時間 6月 7日早上 10:00, 飛了差不多九個鐘, 就快落機去轉另一班, 係 wo,《跑腿奇遇記》結果我要系機場大樓開 gip, 再將 hand carry既野 pack落 gip, 真係好麻煩！ 之後諗住登機 la, 點知唔俾我入閘！因為行李過長 (即係幅畫), 佢要我去返航空公司個櫃位辦一個「行李過長」手續, 你話勒, 幅結婚畫都唔係好長姐, 小陳俊峰仲長 la！ 唔通我要 show出黎俾佢睇, 我件 hand carry過長咩.... 之後過海關, 部 laptop要拎出黎重新過過 scanner, 我又要花幾重功夫去 pack返好佢, 最後我竟然過左登機時間, 個 gate仲要係 47！我跑到氣囉氣喘！口水都乾哂, 個背囊又重, 幅畫又重, 部 laptop又重, 好彩有無人架駛列車車我去, 30-88 gate, 不過都仲要行好長既路, 去到時已經見到條龍好長, 仲長過幅畫.... 上到機, 我真係好大朦, 又唔記得帶筆 (問空爺拎既), 擺行李上架時, 放低左本《勇氣之書》系求其一個位, 之後放完行李, 竟然唔記得拎返本書！ 坐低左一陣諗住聽歌等起飛時, 就聽到有人大叫： 「做咩有本書系我個位上面！？」我先醒起原來我頭先放低左本書！ 即刻同o個個人講本書係我既, 幾尷尬 ar！ 所以你地仲叫我拎呢樣o個樣...= =" 真係好慘呀！頭先系溫哥華清關, 超麻煩！要自己拎行李, 再去第二條 line寄過去 toronto, 都算勒, check hand carry先囉命, 梁琬婷家姐個朋友份禮物唔知咩黎, 個海關不停問我, 之後我話係 easy break item, 佢話即係咩 ar！勁煩 law！laptop又要拎哂出黎, 連錢包既 coins, USB sticker都要過 scanner, 我就要好似被釘十字架咁俾人用金屬探測器 scan, 佢仲要搜我銀包, 係逐格逐格 check, 勁嚴！你知 la, 我銀包有勁多相, 俾佢睇蝕哂, 不過都好, 我個銀包唔似得梁琬婷o個個, 如果唔係, 個海關一打開就嚇死佢, 咁多垃圾既, 搞到個銀包漲哂, 一定要逐格逐格睇過係咩黎, 咁就死得 la！之後又要我執返好... 依家仲有半小時就落機 la！好緊張！ 多倫多！我黎 la！

>>October 21, 2007 at 1:23:49 PM GMT+8

2007 年 6 月 3 日 星期日 【酷熱】

《照相本子 --- 第八輯》 我母校既真名係聖伯多「祿」中學... 第一年與梁琬婷去了山頂, 佢竟然扭計扭到落山, 話突然間好想食咕嚕肉, 結果終於在灣仔街市找到咕嚕肉, 人家仲要係未開市, 成個街市熟食檔得我地兩個... 代客等 friend (攝於天水圍戲院) 陳俊峰處女下海, 親手整情人節朱古力, 再寄往加拿大... 我阿妹竟然話係牛排上有隻蛋！梁琬婷食左一半之後竟然丟左！ [續] 三英戰呂布, 呂布的下場... 家燕媽媽 (攝於濕地公園觀鳥屋) 小學四年班, 李華蚊再送我一張聖誕咭, 他的技術已比兩年前更爐火純青... 李華蚊聖誕咭之打開門後...(素材還是用小學數學科的小格仔簿呢...) 左起阿郭...葛民輝, 阿峰...林海峰, 右邊的是...彭羚... panda'Z神像之肚腩仔 你柒少陣啦！ 你柒少陣啦！(攝於天水圍頌富商場) 兩口子

>>June 9, 2011 at 11:53:18 PM GMT+8

2007 年 6 月 1 日 星期五 【酷熱】

《照相本子 --- 第七輯》 與梁琬婷共進晚餐, 有燒墨魚丸, 蘋果批, 雞蛋仔個朋友格仔餅, 薯蓉批, 奶撻... 三英戰呂布, 紅箭咀者呂布也... 陳俊峰處女下海, 織左三個月的頸巾, 梁琬婷竟然唔帶！ 模範市民集中地 英文科 presentation, 英文人梁琬婷幫我整的講稿... 陳俊峰極盡浮誇之帽 (art appreciate最後一堂的 assignment, 每人設計一頂帽) 第二年與梁琬婷及 Amy大姐在長洲宿營所食的炒蜆... (今次溫敬良勁好客, 我地一致認為係有 Amy大姐的關係..) 每月之星 薰衣草香袋, 有次梁琬婷訓系我張床上面扭計喊, 我用緊電腦冇理佢, 然後佢一路喊, 隻手就無意識地將個香袋拎起左搖右擺, 又語無倫次, 好似唔知自己做緊咩野咁... 最後仲「攝」個香袋入上面, 當我發現時面露驚訝之色, 佢梗係大笑, 自始, 極度百厭的梁琬婷每次都會「攝」個香袋入上面, 而當我準備就寢, 訓上床時, 才發覺梁琬婷又系不知不覺間玩野...= =" 06世界盃晚上, 阿郭整的什果賓治... (將罐頭什果, 雪碧同芬達汽水, 一齊倒入湯煲, 一開始好似番皂水...) University of Toronto 不知在做甚麼的二弟...(攝於杭州與蘇州之間的烏鎮)

>>June 9, 2011 at 11:51:39 PM GMT+8

2007 年 5 月 26 日 星期六 【微雨】

《照相本子 --- 第四輯》 梁琬婷的頸鍊 海洋公園之人像畫 場內嚴禁性侵犯！送官必究！(攝於會展魔術展門外) 楊千嬅與林一峰的 CD 梁琬婷渴求了, 尋覓了三年的雞泡魚公仔, 就是《海底奇兵》中的雞泡魚, 在未跟我相識前已經想要, 結果給我找到, 寄了給她, 可惜現已被梁琬婷打入冷宮... 中六 bio field trip, 呢個石灘好靚！知唔知邊個係我？ 梁琬婷的生日蛋糕 (我自己在香港慶祝) 梁琬婷的生日蛋糕 (拜託她的朋友在加拿大買) 小學二年班, 李華蚊送贈的聖誕咭, 七歲已經有這麼的搞笑才華... 西門 (為 art appreciation拍攝個人照) 叉腰側身的復活蛋雞 梁琬婷之千千萬萬個我

>>June 10, 2011 at 12:22:26 AM GMT+8

2007 年 5 月 20 日 星期日 【雨】

《照相本子 --- 第一輯》 第一年與梁琬婷在海洋公園金魚館看見的 >O<咀魚, 就好似發現自己俾人偷拍, >O<著咀說：「發生咩事！？」 邪惡的姑媽仔, 就好似黑蜘蛛俠一樣... 阿郭送的生日禮物, 我初初以為, 係佢故意揀下面有字既杯, 梁琬婷話咪傻啦, 係阿郭自己系報紙剪兩個字出黎貼上去架咋... 我的至愛, 紅白藍筆袋, 今年返學好多人拎過黎睇, 型... AA堂玩麻鷹捉雞仔, 阿喱係母雞, 我地成班小雞痞哂系度等阿喱救, 夜晚同阿喱 msn, 我扮返我地成班雞仔呼叫媽媽既淒厲叫聲.. 梁琬婷織俾我既頸巾, 奶白色是第一年, 銀灰色是第二年... 世界盃後遺症, 兇手包括莫康名, 胡民新, 阿郭, 梁琬婷同陳俊峰... 梁琬婷同我阿媽整既芒果糯米慈... 何東...獅吼... 莫康名之海棠春睡...(中六 bio field trip)

>>June 11, 2011 at 2:44:03 AM GMT+8

2007 年 5 月 11 日 星期五 【酷熱】

《永恆的一瞬間》 Art appreciation堂終於都完左 lu, 好唔捨得 ar！！！ AA堂係我兩年既太空生活中, 最好玩的一科！每次上堂都好開心！ 經過一星期的勞累, AA堂就好似甜品咁, 為一星期既辛苦輕鬆一下.... 每次上堂之前, 都好期待今堂 oliver會玩 D咩, 而每一次 oliver都冇令我地失望, 每次都有新奇、好玩、又刺激既事發生, 真係好感激 oliver帶左咁多歡樂與回憶俾我地... 連半年所發生既事, 我永遠都唔會忘記, 雖然有好多 workshop要做, drama, 排戲, 頂帽, washing day,「黃」, 敲擊樂, 但係每一件事, 就係一種回憶, 同時遇著一班志同道合, 一齊無聊, 一齊發癲既組員, 真係好開心！ 真係好幸運, 可以與他們一起共事, 他們帶給我太多歡樂與回憶... 我很喜歡自己那組, 我們組是最無聊最白痴, 但最開心, 最多歡笑聲的一組... 我們五個就像有化學作用般, 一走在一起便會有意想不到的反應, 五個人都身懷絕技, 五個人的能力都是搞笑, 五個人走在一起, 所產生的力量可以大過五, 很榮幸可以與他們一組共事, 我想如果自己身處另外兩組, 一定不會好像現在般, 有這麼強烈的化學作用, 一定不會發生這麼多難忘的白痴行為, 謝謝余俊庭, 謝謝林浩賢, 謝謝楊婷芝, 謝謝鄧鳳妮, 與你們一起很開心, 很榮幸可以一起經營一件事, 很難得可以遇上一班... 與自己完全心靈配合 (即係話你地四個都係無聊兼白痴) 的伙伴, 謝謝你們！ 開心過後, 歡樂過後的失落, 真的很大... 好像幾星期前, 完成了一個畫劇, 任何故事, 任何形式, 隨意發揮, 我們一組人, 由甚麼都沒有, 一點一點地把作品製作完成, 由劇本, 混音, 投射片, 服裝, 道具, 我們都一手包辦, 排了整整一個月的戲, 去過婷芝的家很多次, 去過真實場地練習很多次, 我們五個走在一起的化學作用, 真的每分每秒都帶來歡笑, 狂爆肚, 狂講白痴野, 狂做無聊事, 當中發生了很多有趣的事, 想起都覺得好笑.... 現在完了, 感覺很失落, 雖然演出成功, 很開心, 每個觀眾給我們的評價都很好, 導師 oliver亦很喜歡, 很 surprise, 但自己的心情就好失落, 加上, 我們的 AA課完了, 真的好唔捨得, 每星期期待這課, 期待今堂會玩甚麼, 期待當中的同學仔, 期待 oliver會說甚麼, 期待當中的火花, 當中會發生的有趣事, 而每一次, 都沒有令我們失望... 現在回想, 其實每一個時代, 都有一些人, 一些事, 一些物... 很想留住每一刻的感覺, 很想留住那些人, 那些事, 那些物, 很想時光倒流, 讓我再去經歷一次, 感受多一次... 為了經營一種事, 我們才走在一起, 當完成後, 各人又再墮進人海中, 有些以往非常投契的人, 就像消失了在這個時空一樣, 永不復見... 就算在街上偶遇, 都只是點個頭, 寒暄兩句, 雖則說得閒約出黎食飯, 但其實每個人都知道, 這只是一句對白, 而沒有實質意義, 實際行動... 想起每個時代遇過的人事物, 每個時代發生過的事, 再想想應該不會再有機會, 讓我經歷多一次的時候, 就感到很失落, 很惋惜... 人就是這樣離離合合, 其他人就像是生命中的過客, 時間過去, 好久沒有聯絡, 沒有重遇, 那些人是我回憶的一部份, 代表了某個時間, 某個年代的自己.... 淡出以後, 我也只是別人生命中的其中一個過客, 可幸的是, 他們在我生命中刻劃了不少色彩, 感謝各位在我的生命中, 給予我這些難忘的回憶, 很高興認識你們, 很高興我當初選擇了 art appreciation, 多謝 oliver...

>>July 14, 2011 at 3:19:01 PM GMT+8

2007 年 5 月 10 日 星期四 【酷熱】

《最後一課》 今日係 art appreciate的最後一堂, 要交兩份 assignment, 第一份就係 my story, 將全班分為三組, 然後 present出來, 當我 present完之後, step問我係咪真架？Ibe就話肉麻到震... 第二份 assignment就係各自設計一頂帽去代表自己, 結果每個人都整得巧令令！每個人都好有心機去整... oliver竟然叫我地每人戴上自己既帽, 然後環繞成層一周, 仲要入埋 common room！行唔係問題, 最大問題係我頂帽太大, 太重, 行到我喘哂氣, 每次過門時都要痞低過, 仲要其他人護航, 因為頂帽太高會撞到頂, 其實我係用紅白藍膠袋拎返去, 其他人仲以為我藏屍, 成功出位！ 　 我地重新分三組, 再與每個人 present自己頂帽, 我自己頂帽既意思就係, 受到道德、物理與生物法則珈鎖的鳥, 不但不能自由飛翔, 還要受到生活的煎熬, 就好像被烈焰燃燒著... 但傳說中的神鳥「鳳凰」就是從火焰中重生, 就好像是因為痛苦而迫出潛能, 壓力而磨練出意志與鬥志, 究竟這些生活的煎熬, 會令我成為鳳凰, 還是燒成乳鴒, 咁就要睇個人既造化同將來既際遇.... 看看見他人的作品... 呢頂帽幾特別, 吊住好多人面... 我隻「鳳凰」... 整個身架, 包報紙, 噴油, 癡羽毛, 上水塘執樹枝, 整左我成個星期... 「用十倍苦心, 做突出一個, 正常人夠我富議論性麼！？」 魚毛毛毛毛毛毛毛帽帽帽帽帽帽帽 樂文之面具帽 西門...真的太強了, 完完全全貫徹佢詼諧中帶著深黃的性格... ♂閪閪閪閪閪閪閪閪閪之帽♀ 西門的自白：「底部係用十二個女性 symbol造成, 分別用左四種唔同顏色, 黃 (黃種女人), 白 (白種女人), 黑 (黑種女人), 藍 (歐洲貴族中體內流藍血既女人).... 象徵全世界的女人, 而十二個女人托住既紅色男性 symbol 就代表我.. 吊住既紅色箭咀仔, 係代表我既種子, 用紅色係突出我既熱情同決心！ 成頂帽其實代表左我既一個理想： 將我既種子, 散播到全世界每一角落！」 陳法拉的玫瑰帽 cyrus的魔術師帽, 裡面可能有隻兔仔... 楊婷芝芝芝芝芝之之之之之寶箱帽 每隻蛋都寫滿字... 原來婷芝著條咁靚既裙返黎係為左影相...我終於明 la...= = 鄧鳳妮的太陽花帽, 睇真 D, 鐵線係自己蹺, 布係自己縫... AA之 kai鄧鳳...喱.... 　 AA之花與 AA之 kai... 婷芝, 魚毛, step, 陳法拉 落堂之後, 每個人都交換帽戴, 最後一堂 art appreciate... 就在眾人的歡笑聲中完結, 好唔捨得啊！ AA雙小花 --- 婷芝與魚毛 魚毛毛戴帽帽帽帽帽帽帽帽帽帽帽帽 婷芝之之之芝之之之芝之之之戴帽 魚毛毛毛毛毛毛毛毛毛毛毛毛戴帽帽 Ibe戴我頂帽, 好似贏左冠軍捧盃咁...= ="

>>July 14, 2011 at 3:17:56 PM GMT+8