2003 年 5 月 4 日 星期日 【雨】

平時d夢會唔會記住架? 我多數醒左就唔記得晒...
琴晚有個夢我記得少少啦, 因為有d離奇...話說我返左以前間中學, 見到P.K. Lam, (相信st. paul同學知我講緊邊個), 佢讀緊一個人名list, 但唔記得個list係關於咩啦, 重點係個list冇我個名0既...但我記得當時我好緊張聽P.K.宣讀每一個名...
跟住杰倫唔知點解無端端出現(唔准笑呀~), 我地仲一齊跳舞, 其中有一個位係我地拉住對方雙手, 不停轉圈, 轉到咁上下, 佢好大力fing我上天, 於是醒左~
我以前只試過0係夢中因為跌樓梯或碌落山坡而醒, 聽聞呢種夢代表你長高緊, (唔怪得好耐都冇試過跌樓梯或碌山坡啦...)...但係俾人fing上天都係第一次, 識解夢0既人唔該解解俾我聽...
其實我琴晚訓得唔係幾好, 一來d雨落得好勁好嘈, 二來我不停發夢, 同埋睡姿唔好, 有幾次醒, 唔係對腳翹到麻痺, 就係對手舉起左, 或者個身扎住隻手, 搞到麻痺...my god

唉...琴日我做左一件好內疚0既事, 就係逃工啦....本來琴日長週, 要返半日, 但大陸&台北同事都放假, 所以我諗一來公司冇乜野跟, 二來返工唔返工都冇人知啦...於是好勇咁逃工...當我好心安理得之際, 朝早有一個電話, 我直覺認為係公司D人打來, 我冇聽...於是啦啦聲開yahoo messenger, 睇下有冇同事online, 好死唔死, 台北有人返工, 我估我0既直覺冇9成都有8成中架啦...
而家好驚呀, 聽日我第一件事要認星期六冇返工, 第二就係想一個漂亮0既理由, 諗來諗去, 咒自己病係最"合理"架啦, 但我怕我講大話時好假...
唉...大家祝我聽日順順利利啦, 我以後都唔敢架啦

>>May 4, 2003 at 1:30:31 PM GMT+8

2003 年 5 月 3 日 星期六 【晴】

前晚翻睇幾米0既"向左走向右走"
每次睇呢本書, 都有好多啟發...覺得人與人之間有好多巧遇, 我唔識你, 但會同你搭半個鐘頭車返工...陰差陽錯, 令一對可以發展0既男女分開左...
人生好多巧遇, 可能讓人幸福, 也可能讓人無奈...
嗯.....我唔記得幾時開始睇幾米的書了, 最初鐘意睇佢0既書, 係因為字少, 插圖多...同埋明星效應囉...(千嬅好似係幾米fans嘛)...
對於我呢d懶人, 又唔鐘意睇書( i mean好多字0個d書) 的人來說, 真係好好的選擇...後來當我遇上幾米之後, 覺得佢0既書話不多, 但好有深度...
嗯.

>>May 3, 2003 at 10:50:38 AM GMT+8

2003 年 4 月 30 日 星期三 【晴】

琴晚失眠呀...訓到3:00起左身....
後來4:00上番床訓...奇怪0既事發生了...
你地有冇俾鬼"扎"的經驗呀?
我唔知琴晚係咪俾鬼"扎"...呢個經驗好似第三次啦...琴晚朦朧之間記得自己郁唔到, 猛掙扎....我印象中自己有叫救命,同埋叫阿媽...不過,無論我點努力大叫...都出唔到聲...睜大對眼乜都睇唔到(不過好過睇到d唔乾淨0既野)好驚好驚...
後來我聽到d杯聲...0個刻我有番知覺...d杯聲係阿爸/阿媽半夜起身飲水...呢件事唔敢講俾屋企人睇...驚嚇死佢地.......
好驚...我唔想再有呢種感覺呀.................

>>April 30, 2003 at 8:54:12 PM GMT+8

2003 年 4 月 30 日 星期三 【晴】

熱死我啦~~
我講緊公司好熱呀~事關我係同一位年長0既伯伯share一個office...而家天時暑熱,當然要開下冷氣先掂架啦...但係個伯伯好死怕凍...次次我朝早開完冷氣, 到lunch出去返來, 佢一定會熄冷氣....(佢唔駛食飯架...)我又唔好意思開番...好想佢快d返屋企呀........

>>April 30, 2003 at 2:00:18 PM GMT+8

2003 年 4 月 29 日 星期二 【晴】

今晚0既主題係回到校園
自從畢業之後,每次經過poly都有好多感觸...d building越來越多,越來越靚,好驚有一日返去唔識路..."lor"到要問路...
有時放工落尖咀, 搭完火車之後, 會專登穿過poly...今日又經過poly啦~每次經過母校, 都覺得自己忽然後生左, 混水摸魚, 掹車邊仲可以扮下poly人, (可能只係一廂情願...)
有時會諗,我仲可以扮多幾多年呢? 可能好快, 人地仲當我係polyu student 0既, but, mature student囉...講到呢到, 有d sad 添...
我好開心, 亦好懷念曾經0係poly渡過快樂0既4年...我記得以前會去7-11門口睇danso跳舞, 覺得d人好型, 暗地裡好想好似佢地咁 :p...不過我天生四肢唔協調, 得個"想"字囉...跟住試過走堂去唱lunch k...考試前死仆爛仆問人借notes影印...haha
講到尾, 最開心係識左一班好同學, 好朋友...poly 0既回憶, 永遠都會0係我心裡面

>>May 3, 2003 at 10:54:34 AM GMT+8

2003 年 4 月 28 日 星期一 【晴】

hi, 今晚開0既題目又係同我工作有關, sorry, 係悶左d...不過容許我晒你少少時間
你地大部份都知我0既工作係n合一, 即係乜都做, 總之上至??, 下至倉務都係我
咁多野做, 我真係好辛苦, 成日發脾氣...
今日老闆終於都問起我0既工作量問題, 事關上海經理同老闆提起我0既工作好多...
我等左呢個機會好耐, 終於可以將我呢兩個月0既感受講左出來
其實我仲有好多野未同老闆講, 不過我覺得留番條底線好...因為我講0既已經夠多了
雖然老闆冇乜實際行動可以幫到我, 因為公司冇位俾新同事, 冇可能請人了...[我得一張桌的工作範圍 :(( ]
不過feel到佢有正視我0既問題, 希望唔係做戲啦...
唉...正視還正視, 始終我都係要面對過量0既工作量...我已經頂唔順...好想轉工, 但而家咁0既時勢, 真係好難......
唉........

>>April 28, 2003 at 10:22:26 PM GMT+8

2003 年 4 月 27 日 星期日 【晴】

喂,琴日出街呀~
好耐未試過唔戴口罩行街啦~好free...(係咪好勇呢?! hehe...)
琴日買左d無謂野啦...係傷荷包...不過開心喎...
好啦,下次再講,拜拜~~~~~~~


>>April 27, 2003 at 10:35:36 AM GMT+8

2003 年 4 月 24 日 星期四 【晴】

今天超累的...
做了一天咕喱...
唉...每次搬貨,我腦裡面0既辭職指數就會飉升
真係唔知頂到幾耐呢...

>>April 24, 2003 at 9:02:23 PM GMT+8

2003 年 4 月 23 日 星期三 【晴】

呢兩日都好忙...一開工,個個都掉野俾我做,方死你得閒過頭
聽日又做咕喱啦~十幾板貨0黎...諗起都恐怖...
唉.....
本來琴日老闆話五一0個幾日請我去台北,後來今日又話唔好喎,因為我有野做,咁我day day都有野做架啦,五一係影響最少0既時間,因為日本,大陸都放假,係我最能夠行開的時間...
唉...真係唔識做~累我空歡喜一場...又失望多一次....
我好似同台灣冇乜緣份,唉...........疊埋心水做啦...

>>April 23, 2003 at 8:21:00 PM GMT+8

2003 年 4 月 21 日 星期一 【晴】

"嘿"左幾日...easter holiday淨番last一天...
唉...雖然easter過得悶d,都唔想假期過得咁快...
下次long weekend假期好似要到中秋節啦
係咪呀?

>>April 21, 2003 at 12:20:10 PM GMT+8