2003 年 5 月 29 日 星期四 【陰】

琴晚放工返屋企時, 接到一個朋友0既電話, 佢好喊得好厲害, 好傷心, 原來佢知道以前個男朋友追緊另一個女仔, 佢覺得好hurt…雖然佢地已經分開左, 個男仔追另一個女仔好正常, 但係女仔天生就係比較長情, 就算分開左, 仍然會好著緊對方

愛情方面, 我冇乜經驗, 通常都係偷偷咁愛人, 所以我知道當一個自己鐘意0既人唔鐘意自己, 或者唔再在乎自己, 0個種滋味真係極度難受, 好hurt好hurt................

好多時, 我會諗得好灰, 以後係咪要自己一個人過活? 點解再肥再醜的人都有人要? 到底我做錯d乜? 我真係唔明, 解釋唔到...

但我相信好多野係整定, 一切隨緣, 唔再強求, 希望終有一日, 會搵到0個個人...可能呢個係自欺欺人0既想法, 嗯…就俾個空間我自我安慰吧


>>May 29, 2003 at 7:11:29 AM GMT+8

2003 年 5 月 27 日 星期二 【晴】

今天好不在狀態喔...

整日0既productivity好低...本來有d野要做, 但唔想做, 既然暫時冇人催, 就放埋一邊先囉...
其實咁樣真係唔好, 我好想積極d做野, 但總係"的"唔起心肝做, 狀態不在, sorry...
如果俾老闆發現就死, 希望呢個問題快d解決啦

我要充電呀~~~好想搵日去踩單車, 放風箏, 曬太陽, 如果呢個夏天擁有一身古銅色皮膚就好啦, (因為望落會瘦d :p)




>>May 27, 2003 at 5:26:32 PM GMT+8

2003 年 5 月 26 日 星期一 【晴】

琴晚臨訓之前, 諗左好多野, 好低落
跟住狂喊, 其實唔係為d咩傷心事喊, 只係發洩下
而家冇乜野, 因為要做野,
不過對眼好腫, 好核突


>>May 26, 2003 at 9:33:07 AM GMT+8

2003 年 5 月 25 日 星期日 【陰】

琴晚睇1:99音樂會, 學友0個part, 真係好正!!!!
之後佢同eason合唱頭髮亂了, 學友真係學友, 雖然好耐冇公開表演, 但功架十足, 我覺得佢比eason高好多班呀~~學友, 幾時出番碟呀? 好miss你0既歌~~~~~~~

而家出街, 少左好多人戴口罩, 終於見番d笑容, 成個香港開心番, 真係好呀! sars已經受到控制啦, 希望經濟快d復甦, 整個氣候都轉好...呢幾年, 香港人好辛苦, 有人失業, 畢業生冇人請 (我曾經都係受害者之一), lay off, 負資產...唉, 愈數愈多...祝福各位香港人勇敢面對逆境


>>May 27, 2003 at 5:27:37 PM GMT+8

2003 年 5 月 24 日 星期六 【晴】

今日短週呀, 好開心...

呢個禮拜初都幾清閒, 到禮拜四, 五就好忙啦, 不過我覺得忙0既時候, 時間會容易d過...所以都係有野忙好d...(犯賤呀黃珊雅~~~)

琴日好頻撲呀, 都怪自己大懵啦, 唉....

話說琴日返工換了包包, 返到公司先發現唔記得帶櫃桶鎖匙, 條鎖匙留左係前晚個包包度.......於是好急咁撲返屋企攞鎖匙...跟住12:30左右又出門, 送d urgent 野去深圳關口再返公司...

琴日來來回回之際, 我足足追左三次巴士, 最後一次係放工, 臨走一刻都要追巴士...激死!!!!!!!!
點解d巴士總係襯人地冇心理準備之下, 突然從後面殺出來...我好日都唔做運動, 或者跑步, 突然要我九秒九追巴士, 好乂累架嘛, 又狼狽...總之....糗死了.................................

琴晚訓得唔好呀, 對手好痕呀~~~痕到發紅, 好核突, 跟住蔓延到全身, 全晚碌來碌去訓唔到, 今朝起身冇事啦, 不過就好早起身戇居居......

前晚發夢, 自己去左hku, 夢裡面我係返緊學, 但係條路好斜好斜, 行極都返唔到學...後來搵過d解夢web site, 話如果已出來做野的人, 夢到返學代表需要進修, 或者想逃避一d野...我諗後者解釋比較0岩我.........出來做野之後, 成日都發夢返學, 考試呀... (好奇怪, 夢中考試時多數都出貓 :p)...大概係工作壓力太大, 好想逃避一下吧...才有呢d夢

喂, 介紹個解夢web site俾大家, 內容幾詳細的...http://drive.to/dreamworld


>>May 26, 2003 at 9:35:02 AM GMT+8

2003 年 5 月 19 日 星期一 【陰】

今日睇報紙, 見到社區沙士零感染, 太棒了~
相信香港0既疫情開始受到控制, 應該慢慢復原...
不過沙士0係台灣好肆虐, 台北同事話疫情愈來愈嚴重, 令到人心惶惶...
我好希望台灣唔好重蹈覆轍, 做香港翻版...希望呢個病快d消失, 醫生, 科學家快d搵到疫苗就好啦~

>>May 19, 2003 at 5:56:34 PM GMT+8

2003 年 5 月 18 日 星期日 【陰】

忙左一個禮拜之後, 今日得到一個小休, 感覺真好~

而家d/l緊mp3, 我發覺自己好唔update, 好多新歌淨係識chorus 0個段...而家一邊聽一邊跟住唱...好鐘意edmond 0既"七友", 好好聽, 好有feel

今日阿爸阿媽去左淺水灣呀~ 佢地平時好少出去玩架, 香港咁細, 我諗佢地只行過四分一.
最近咪好興0個d本地遊0既, 佢地兩位老人家好想參加呀~ 仲叫我同細佬一齊去, 不過佢地見我地冇乜興趣, 好似有d失望...後來我都自己有少少衰, 講真我冇請佢地去, 而家佢地請都唔去, 真係幾衰...

記得細個0個時成日扭計要阿爸阿媽帶我地出去玩, 大個左之後, 調番轉係佢地叫我地陪佢地去玩...其實自己得閒的話, 應該陪下佢地

屋企人對自己係最冇計較, 唔駛花錢, 只要陪下佢地, 多d 0係屋企食飯, 佢地已經好開心...

>>May 18, 2003 at 3:14:30 PM GMT+8

2003 年 5 月 17 日 星期六 【陰】

早上好~

自從呢個站只准我地呢d非VIP朝五晚七login寫日記之後, 真係好唔方便...偷雞0係office時間寫日記唔緊要, 最大問題係朝五晚七呢段時間冇乜mood寫野架嘛~~到我有mood時又唔俾我寫...

算啦, 勞嘈完啦...

而家0係office開緊工...呢排工作清閒左少少, 出少左貨, 多得SARS所賜啦:(...而家有時間check番以前做0既report.

唉...唔知大家有冇大陸同事0既呢? 我第一份工同埋而家呢份工都有架. 憑以往經驗, 我覺得大陸同事可以分兩種, 一種係踢唔郁, 另一種係搏出位...我而家有一個非常之麻煩0既深圳同事, 佢係屬於第二種, 搏出位, 見高拜見低踩, 我當然係被踩架啦...忍左佢好耐...

佢往往將問題放大, 但係冇suggestion, 只會叫你無論如何, 都要死出個方法來, 如果我辦唔到, 就係我0既錯, 辦得到佢就邀功. 佢只會將責任推卸俾我, 頂~~~~~~~~~如果佢做錯野, 又唔會認, 講野大聲過你, 講一大串藉口, 你想反駁都唔得, 呢d簡直人渣, 都唔係做野0既...

其實我唔係覺得香港人好清高, 故意扁低大陸人, 我只覺得咁樣落去, 中國點會富強呢, 點會被人睇得起呢...我地係要做實幹0既人, 唔要做吹噓0既人.


>>May 17, 2003 at 9:46:11 AM GMT+8

2003 年 5 月 13 日 星期二 【晴】

今日好熱呀~

黎緊禮拜六有個中學同學註冊啦~佢係我第一個結婚0既同學, 恭喜sandy!
身邊0既同學開始結婚啦, 有d唔慣, 因為我0既思想好似仲停留0係十八廿二0既年代, 總覺得結婚係大人的事(明明自己已是大人), 成件事離我好遠~ 我而家冇結婚0既衝動, 亦冇憧憬

唉...呢舖唔認老都唔得啦....當我人生踏入"2"字頭開始, 已經怕老...有時會刻意打扮得細個d, 企圖掩飾自己0既真實年齡, 其實咁係好駝鳥, 而且未必扮得起....但我真係有d怕老

而家廿五歲lu, 廿五歲係一個好重要的關口, 廿五歲之後, 新陳代謝開始減慢, 生理上已事先踏入新階段...雖然年齡只係一個數字遊戲, 但始終身邊0既人, 包括家人, 同事, 老闆, 朋友都唔再當你係一個0靚妹, 亦即係話, 人地對你有寄望, 唔可以隨便扮低能, 因為咁係好幼稚0架...呢個就係成長0既心理包袱...

眨下眼, 三張野都黎緊, 唔知到時諗番今日0既說話會有咩感想...





>>May 13, 2003 at 2:11:19 PM GMT+8

2003 年 5 月 5 日 星期一 【雨】

今日落狗屎呀.........成身濕晒...
今日返工第一件事就係向同事認衰女, 認自己星期六冇返工, 因為"病"......好彩d同事信...
不過我都係好內疚, 以後都唔再做呢d虧心事啦....

係呀, 琴日下奏好悶, 心血來潮去左百老匯電影中心隔離的kubrick買左一set幾米figure, 好肉痛呀, 但好開心, 因為我恨買好耐, 但唔捨得, 琴日屎忽痕, 終於買了

跟住又落左銅鑼灣人民書店買簡體版幸福兒、月亮忘記了、地下鐵, 平一半呀~好抵呀...

唉...今個月又洗左好多冇謂錢...要節衣縮食啦....:((

>>May 18, 2003 at 6:51:27 PM GMT+8