2004 年 9 月 26 日 星期日 【晴】

上星期因雷暴警告而影響到既 Level 2 班，
今朝補堂。
不過唔駛我教，
我只係負責擺 Point。
今次亦係一個好機會，
讓我試試個水袋。
個水袋唔錯，
雖然裝了 2 公升水，
都唔會好重，
背上身時又貼背。
不過今次擺 Points 時，
全程都係步行，
十月十日練習賽時，
背住個水袋跑再測試下。


之前睇 Newsgroup，
d 人話我個隻唔係用蓋拎，
而係摺袋口既，
打側時有機會會漏水。
今日擺完 Points，
用手摸一摸個水袋，
果然係濕濕地。
不過我唔知係漏出黎既水，
定係我 d 汗喇。


中午落返長享村食午飯，
之後再上過山。
雖然下午青衣有個 Level 1 既班，
不過我唔係去幫手，
而係去睇 Site。
因為十一月有個學界定向既新界區比賽，
協辦既係我母校。
係池中無魚蝦自大既情況下，
Set Course 既重責自然落係我身上。

行行吓係一段山路跌到，
因為 d 草好滑，
結果出身未捷身先死，
攪到損手爛腳，
好痛 ><

2004 年 9 月 25 日 星期六 【晴】

生還者既遊戲似乎到了尾聲，
今日再有一位參加者被 Out。
自從換了主持人之後，
五名參賽者已走了四人。
現在第一批參賽者只餘下一人。
他就是勝利者？
我看未必，
他也可能係失敗者。
七月、八月和九月各有一人出局，
或者自己提出走，
或是被取消資格。
要看看餘下的健兒能否渡過困難的十月。


不過監製似乎還未意識到問題可能出在主持人身上，
不知下一個上諫的死士，
會是「第五人」，
還是新一批的參賽者？


另一方面，
個節目可唔可以 Keep 住做落去，
唔畀人腰斬，
我都冇信心。
話晒每月製作費都至少廿幾萬，
但係收視同收入呢？
每月都入不敷支，
看來都唔守得幾耐。

2004 年 9 月 24 日 星期五 【晴】

終於明白點解補藥黨仲有巿場，
仲有人受騙，
原來師奶 d 錢真係好易賺。
話說前晚食飯，
媽媽話要去街巿買田雞先，
都成夜晚九點，
都唔明點解佢會認為街巿仲有田雞賣。
結果當然係買唔到田雞，
但係佢就買左 d 日本蕃薯。


d 日本蕃薯貴普通既作倍，
問媽媽有咩分別，
佢話唔知。
問點解買，
佢話街巿個人話好食。
照睇 d 外形，
我就覺得同普通蕃薯冇乜分別。
話係日木蕃薯就可以賣貴成倍，
你話師奶 d 錢係咪易賺丫？


今朝整左個黎做早餐，
唔知係唔識整定點丫，
味道方面我都係分唔出日本蕃薯同普通蕃薯有咩分別……
食蕃薯，
我都係覺得街邊熱騰騰既燴蕃薯好食 d ^_^

昨日畀人講到我好想食臭豆腐，
找天買返件食先。
係香港呢個美食天堂生活，
感覺真好 ^_^

2004 年 9 月 23 日 星期四 【酷熱】

持續咳嗽都未好，
結果要用到家傳治標方法，
就係飲白花油喇。
但係可能飲得多得滯，
結果嘔嘔……><


夜晚約左大同 A 君食飯，
我食左個凍食雞絲檬，
佢食凍食什錦檬。
不過原來加一蚊有野飲，
我地都唔知 tim。
食完飯之後，
大同 A 君去左打機，
我就走去 Gym 上堂。


以為要約左教練八點，
點知去到原來係約左聽日，
真係冇記性。
學大同 A 君話齋，
好彩係記早左，
記遲左就要洩畀佢。
結果自己做，
練左呢幾個動作：
Iso-Lateral High Row MTS (鍛鍊中背)
Seated Cable Rows (鍛鍊中背)
Triceps Pushdown (鍛練三頭肌)

係咁易做左半個鐘就走了，
我走既時候，
大同 A 君還未開做呢！

2004 年 9 月 22 日 星期三 【晴】

慘慘慘，
一日比一日慘。

講件事之前，
首先要簡介吓我間公司。
話說我間公司話大唔大，
話細唔細，
叫做一間中小企啦。
咁入地公司就唔同職能分唔同部份，
我地就係分開唔同姊妹公司。
好似我個間就做 R&D 同 Production，
有間就就做 Trading 咁啦。
咁現在姑且叫我個間做 A 公司，
Trading 個間叫 B 公司。


咁我早兩日咪話去杜拜參展既，
其實去展覽既係 B 公司，
咁就順手 Demo 埋 A 公司 d product
咁因為驚 B 公司 sales 未必識用 d product，
咁所以要個 A 公司 既 Engineer （即係我）去。


B 公司申請左政府既資
但係要 B 公司既員工先有資助
咁我係 A 公司既員工，
所以沒資助。
結果就唔駛我去，
換左個 B 公司既 IT 同事去。

件事有好有唔好既，
故然出埠公幹係一件好期待既事，
但係爸爸咁既情形，
似乎我又唔係咁適宜離港。
現在唔駛我去，
唔駛煩。
我相信主預備左個最好既選擇畀我。

2004 年 9 月 21 日 星期二 【晴】

慘慘慘，
今日真係好慘。
話說用用吓部 pocket pc，
突然彈左個 Message Box 出黎問我係咪要 Format 張 SD Card，
之後就讀唔返張 SD Card d Data。
不論我係用 Pocket PC 讀好，
定還是用 Card Reader 讀都好，
都係唔得。
好彩我有 Backup 過張 SD Card，
不過講緊既係兩個月前既 Backup。
點都好，
返到屋企總算將 Backup 既 Data 抄返過去，
回復到 70% 既 Data，
好過冇啦咁。

2004 年 9 月 20 日 星期一 【酷熱】

今日起身周身骨痛，
我能可能星期六拉背拉得太痛啦。
其實星期日都有少少痛，
不過昨晚推完胸後，
今日就緊加痛。
我記得教練講過痛先有效，
我就唔知真定假喇。

十點畀老闆捉左去傾計，
原來十月頭杜拜有個展覽，
老闆想我去。
呵呵，
第一次代表公司出 Trip，
不過唔知我 d 半桶水都冇既英文可唔可以應付呢？
其實都有 d 要憂慮架，
爸爸仲住係醫院，
其實我唔係咁想離開香港，
不過老闆話我唔去，
就得姊妹公司既 Sales 去，
但係佢地又唔係好識 Demo 我地 d Product，
我又未試過工幹 wor，
咪應承左 lor。


仲有兩個星期就出發喇，
去一個星期。
睇返份合約，
每日有 HK$200 零用 for 食飯咁。
2 號凌晨 00:15 起飛，
坐十個小時飛機，
經曼谷，
06:20 到步。
8 號 08:50 起飛，
都係經曼谷，
23:00 返到香港。
至於酒店方面，
應該仲未 Confirm。
如果拿得到既話，
今次我會拿齊相機鏡頭，
希望可以影多 d 相返黎。
（喂喂，你好似係去做野，唔係去玩 wor）

>>September 20, 2004 at 6:00:04 PM GMT+8

2004 年 9 月 19 日 星期日 【乍寒還暖】

今日六點幾就起左身，
因為要上山教班，
不過出面就勁落雨，
所以我盡量帶少 d 野。
上一上天文台個網頁看，
原來掛左雷暴警告，
結果個班就延遲了一個鐘。
九點五十分去到青衣，
食埋早餐之後去到集合地點。
個時都仲係雷暴警告，
唔上得山，
唯有係屋村空地做一 d 練習。
包括定向提示符號接力卡、
指南針導向練習。
整個上午間中都有雨，
到十二點時，
得知雷暴警告至少去到兩點，
所以決定取消下午既課堂，
改下星期日早上補課。

空出黎既下午，
我出左黃金。
行左幾個圈之後既結果係又購物了，
買左 CD 紙套，CD 盒（用黎裝日文書既示範 CD）
一個手制，
同埋我終於買左 Display Card，
係天揚既 9550 Extreme。

返到屋企第一時間機，
不過我攪左好耐，
好彩最尾都攪得掂。

Gym 堂改早左係七點上，
不過去到教練又話唔得閒，
真係激死我。

做完 Gym 之後，
Join 左阿 Keff 去睇紐卡素作客對修咸頓既英超賽事。
係間餐廳一路食一路睇，
我食第二餐晚餐喇，
上一餐係六點係屋企食。
班 Waiters 好新，
係嘛對 d 野唔熟。
轉套餐有沙津，
佢地唔知（我想我睇 Menu 見到有寫）
餐飲轉柑桔檸蜜加幾錢唔知，
問左四個人，
四個答案都唔同，
分別係 $4, $5, $7, 和 $8。

不過佢地其實都幾好傾。
我個枱六個人有四個穿左紐卡素波衫，
個侍應就話，
好彩佢冇穿曼聯……^_^

2004 年 9 月 18 日 星期六 【晴】

今日放左工之後，
走左去剪頭髮。
我上次幾時剪呢？
唔記得了，
即係好耐啦，
記得個剪髮師傅講過，
我一年只剪兩次，
係咁少咩？


前完髮，係屋企食完飯，
就訓左個午睡，
訓左三個鐘左右啦。
訓醒之後，
拿拿臨換衫上醫院探爸爸。
爸爸精神都仲係一般，
有部氧氣機供應氧氣，
仲吊住 d 營養水。
希望佢冇事啦，
請各位代禱。

七點半離開醫去做 Gym，
途經中華書局，
入去打個轉，
又有幾本書想買。

因為奧林版有位版友影既相登左出黎，
所以買左本 DC Photo，
買左之後好似冇乜點睇，
真浪費。

2004 年 9 月 17 日 星期五 【酷熱】

昨日睇唔到醫生，
今日再接再厲，
終於成為佢今日最後一個病人。
醫生開左三日藥畀我，
又幫我打左一技針（打針痛痛……><），
但係我竟然唔記得問佢我咩病……


講開打針，
以前我好怕打針，
但唔知點解，
可能人大左啦，
現在就覺得冇乜野。
「同你打支針，快 d 好。」
「哦，好呀」
……
「打完喇」
「咦？打完拿？」