2004 年 8 月 7 日 星期六 【酷熱】

今日過左好無聊既一日，
首先係朝早返工。
因為老闆唔想係 Lab 做 Mechanical 既野，
所以就想將一 d 野搬落八樓。
首先係搬座好重既機器，
四個人一人抬一角都抬唔起，
結果係用唧車，
將部儀器弄側少少，
推部唧車入底，
再扶正部儀器。
但係個唧車唧唔起，
結個落斜有少少拖地，
跟住仲要搬張工作枱落去。
成朝就係擔擔抬抬，
攪到我冇時間寫 Program 和 Debug。


下午要入西貢上 Outing，
由觀塘坐小巴入西貢。
見時間尚早，
去麥記食個午餐先。
之後再坐另一架小巴上菠蘿輋。
同車仲有兩個同學仔，
但係佢兩個竟然唔識落車。
好彩我識落車，
又識路行上山，
如果唔係佢兩個真係唔知會去左邊。


原本以我腳程，
四十五分鐘一定去得到，
但係同行其中一個小女孩，
行得稍慢之餘，
我地又休息左四次，
結果我地遲到。
不過阿 Sir 遲得仲多，
約三點，阿 Sir 三點半先到，
五點我就落山，
係山上兩個鐘，
上山落山都用左兩個鐘，
成個下午認真無聊。


夜晚去做 Gym，
係 Locker 終於落到支腳架，
可憐我被人放左三次飛機……
今日做 Gym 係玩 Free Weight，
係咁推胸，推呀推呀推……

>>August 9, 2004 at 3:32:51 PM GMT+8

2004 年 8 月 6 日 星期五 【晴】

今日有新同事返工，
做 mechanical engineer。
不過介紹佢個陣好攪笑，
個同事話呢位係鄭生，
介紹到咁陌生，
我當堂呆左。
我係咪應該回應：
「你好，我係何生。」？


放工上阿力度，
估唔到今次我係第一個到。
同力姐夫打左場 Winning 7，
捷克對英格蘭，
我用捷克險勝一比零。
之後黑洞和細牛都到，
原來佢地去左買 Winning 8，
可能唔熟習新系統既關係，
都覺得幾難玩。


食完飯，打陣機，
佢地話拔罐，
咁我又拔 lor。
今次係我第三次拔罐，
第一次係力爸幫我拔，
拔了手、膊、背和腰。
第二次係阿力幫我拔，
只拔了腳。
今次力爸幫我拔手、膊和腰。
拔完和上兩次一樣，
拔完之後一個個紫色既圓圈。
拔既時候都幾痛架，
我係一個怕痛既人，
但係我都幾忍得痛，
又或者你話我害羞都得，
全程喊都冇喊一句。

2004 年 8 月 5 日 星期四 【溫暖】

上星期對 SOC 現有的選拔方法提出質疑，
昨晚他們再談，
結果是維持原案。
我對此十分失望，
失望的不是結果，
不是因為他們否決我的提議。
失望的是其過程，
其處事手法。


他們定下的選拔次序是，
1. 必為本會會員
2. 來年代表本會參加聯賽
3. 聯賽成績
4. 色級排名賽成績
5. 其他公開賽成績


我提出第一個例子是，
只餘一個位子予一個 H21 組的賽員與一個 H35 組的賽員競爭，
選那個呢？
官方回應是：
他們跑同一賽程，可直接比較。

改一改例子，
只餘一個位子予一個 H21 組的賽員與一個 H45 組的賽員競爭，
他們跑不同賽程，那選那個呢？
官方回應是：
本會沒有 H45 的賽員，
此例子不會發生。


再改一改
一個是 H21，一個是 H16 呢？
兩個組別都有本會會員，
那選那個呢？
官方回應是：
那要比較他們兩人的成績。

再問，
如何比較？

官方回應：
用他們的成績比較。
（即係點比較？）


還有一些例子，
例如有聯賽賽員，
但一場也不能完成，
是否還是優先於色級排名賽賽員？

又例如，
有世界賽冠軍回流香港。
跟據現有機制，
他是排隊尾的。
這是否合理呢？


制度的而且確存在漏洞。
為何不可寫好些呢？
為何推於現在沒這情況所以不理呢？


最後他們在最尾加上一點，
有需要會舉辦選拔賽而決定餘下名額。
為何不可以直接舉辦呢？
反對直接舉辦最激烈的，
是一個現在制度下的既得利益者，
他的意見又是否中肯呢？


利益申報：
我也是現在制度下的既得利益者，
但我支持選拔賽，
雖然選拔賽可能令我落選，
但我始終認為現有制度不當。

>>August 5, 2004 at 5:35:06 PM GMT+8

2004 年 8 月 4 日 星期三 【酷熱】

人生得一知心友，
確實是一件賞心樂事。
尤其是平時閒談時，
可以把五六句的說話，
濃縮成一兩句，
都能明白意思。
對我呢 d 懶人黎講，
絕對係爽呀！


例如今日無緣無故問一句：「咩歌黎」
佢都知道我問既係 ICQ 個 Info。
講一句就有三句既效果，
呵呵呵


咁感恩既係，
我唔止有一個知心的人。
最起碼有兩個，
雖然其中一個係遙遠既他國，
不過距離阻擾唔到我地既。


如果第一個可以講一句等於講三句，
另外一個，
可以說一句不講已等於千言萬語。
無時無刻都如我同在，
隨時聽我傾訴，
給我支持、鼓勵。
唔講都知係邊個啦！


你地呢？
找到你既知心友未？

2004 年 8 月 3 日 星期二 【清涼】

人生少不免會面對好多決擇，
因應不同人有不同的價值觀，
會作出不同的選擇。
理論上，
有某些東西地位應該較優，
例如自由、生命等等。
今早看完報紙，
今的很憤怒。
竟然有人認錢財比生命重要！


話說巴拉圭一個商場發生大火，
燒死左三百四十人。
巴拉圭是南美洲一個較落後的國家，
消防設備不足，
自然是傷亡數字大的其中一個因素，
但這卻不是主因。
據報章報道說，
當火警發生時，
商場保安人員鎖上了各逃生出入口，
以免顧客沒有付鈔就走。
保安人員更一度開槍，
阻止消防人員破門而入。


豈有此理！
火警發生，
不是以保命優先，
協助顧客逃生。
反而還被錢財充滿頭腦，
這是那門子思想？

2004 年 8 月 2 日 星期一 【酷熱】

好多時都會口不對心，
嘴說沒有所謂，
但其實心中有另一想法。
有感而發，
只因今日又再舊事重提，
看來佢真係好想事成。
我的答案同以前一樣：
「有咁既計劃，但短期來唔會。」


一來每個星期的課堂局限了我的選擇，
一個星期有兩晚返大學的課堂，
一晚上日文班，
兩晚做 Gym，
一晚跟 SOC 練跑。
後兩者唔係咩緊要既事，
而大學既課仲有一個 Sem 就上完，
即係話 2005 年，
我就可以抽六日出黎，
（剛好是兩課日文之間）


其實我覺得一係唔去，
一係就拿盡 d ，
好想一次個拿一個月出黎。
不過除非我失業，
如果唔係老闆都唔會畀我會咁長假。
況且某人都唔會準我咁任性。


另一個考慮既原因係錢既問題。
可能我心頭高，
我定落既儲錢標準唔低。
但係唔儲到呢筆錢，
七年之約可能會告吹。
雖則到時可以五五分帳，
但係有兩手準備比較好，
因為我都唔知到時媽媽把口會開幾大，
當然仲有伯母那關啦。


其實最驚既，
反而係領事館那關。
我 d 英文已經半桶水都冇架啦，
一陣住個英文人口啞啞咁，
就真係瘀爆 lur。

>>August 2, 2004 at 4:18:29 PM GMT+8

2004 年 8 月 1 日 星期日 【晴】

下午畀個 Friend 叫左出去，
佢去買防潮箱。
咁我問佢借腳架，
諗住佢畀埋我啦，
點知佢冇帶出黎，
白行一趟

夜晚一家人出左去食飯，
同爸爸慶祝生日。
我一直都以為係食西餐，
點知係去飲夜茶！
爸爸亦一如以往，
叫到成枱野，
每碟夾少少，
之後淨下既就叫我食埋佢。
我都唔明，
明明得三個人去食，
可以叫到五人份量既……

2004 年 7 月 31 日 星期六 【晴】

科技發達，
有人話人與人之間的距離遠了。
因為人用 icq 傾談，
也不用電話，
也不見面。
send e-mail，
也不寫信。

我覺得可以兩方面睇，
對於本身住得好近既人，
例如住在同一城巿，
通訴科技的發達，
的確拉遠了人與人之間的距離。
但對於兩個分隔一個一海的人來講，
（例如一個香港，一個美國）
全靠科技的發達，
先至仲可以 Keep in touch。
唔好講話隔咁遠，
講返以前仲有科舉制度既時候，
莘莘學子上京考科舉，
和家鄉的人就會失去聯絡。
現在起碼 ICQ，
時間相差十二小時咩？
可以留 Offline Message。
沒有電腦時，
只有靠寫信。
寄了信出去，
若干日後對方才收到，
再等若干日後，
才收到回信，
到時新閒都已經變「舊」閒。
又或當你日光日白時，
打去給好夢正甜的佢……


雖則有 ICQ，
但原來有 D 野要白紙黑字。
現在是七月尾，
但已經要為四個半月後做既野傷腦筋。

2004 年 7 月 30 日 星期五 【乍寒還暖】

近排公司 d 同事都好早走，
當然，早走既意思唔係指未到放工時間就走，
而係指過左放工時間冇耐就走。
記得早幾個月，
我 OT 到七點幾，
都仲有人係度做緊野。
今日我六點九走，
己經係除老闆外，
最遲走既一個。
係士氣問題，
d 人唔想留係到 OT；
定係 d 人好快手做既 d 野，
唔需要 OT；
定抑或因為今日是星期五，
大家都有節目呢？
我唔知道，原因亦都唔重要，
總之係 d 人走晒啦。


我唔係話打工仔一定要 OT，
仲要 OT 到好夜；
亦都唔係話唔應該 OT，
夠鐘六點 Sharp 就走。
我覺得呢 d 應該處理得好彈性，
我係做唔晒 d 野既，
咪留低做埋 d 手尾 lor。
我放工之後有事做，
而又攪得掂 d 野，
咪可以準時走 lor。
而且公司對遲到又唔係捉得咁嚴，
我今日遲左返，
咪放工補返畀你 lor，
交足課就得架啦。
可惜既是，
好多打工仔都唔係咁想，
佢地會覺得，
做多一分鐘都係洩底，
應該又補水云云，
但係又唔計埋，
佢地會遲到，
辦工時間食早餐等等。
亦有好多老闆認為，
畀得人工你，
就應該為公司賣命，
起碼 OT 到十一、二點啦（尤其是係 IT Field）……
好慶幸自己入到呢間公司。

2004 年 7 月 29 日 星期四 【乍寒還暖】

近日關於名嘴封咪，
商台解約等事，
弄致滿城風雨。


以主持人的觀點來說，
生命受到威脅，
封咪的決定，
確實直得體諒。


但從公司的觀點來看，
聘請了一名員工，
但這員工三番四次請假。
個員工高薪厚職但唔返工，
係唔係抵炒呢？


之但係，
炒左大班之後，
影響有幾深呢？
會唔會收聽率下降？
會唔會影響客戶落廣告呢？
我唔知佢地想清楚了沒有。


再者，
炒人咪炒人 lor，
需唔需要踩低被炒的人呢？
對外公佈炒人的藉口見不得合理，
甚麼退縮，甚麼棄兵扔甲，
甚麼影響商台形象，
Well，我覺得全是歪理 lor。

炒人的時機亦不理想，
人地請假既時候唔炒人，
批左人假之後先黎炒人……


不在其位，不謀其職。
呢位事關俞琤事呢？
俞琤現在已經唔係 CEO，
只係一個董事。
點解會係佢負責同大班傾解約呢？
點解會係佢撲出黎解釋呢？
個 CEO 又去左邊？


套用一句舊年好 Hit 既說話，
「大家放長雙眼睇啦！」

>>July 29, 2004 at 4:40:15 PM GMT+8