2004 年 11 月 5 日 星期五 【微冷】

今日下午去見客，
係九龍灣地車座大廈，
對方係一個 Engineer，
而我地就一行四人（包括老闆），
介紹我地既產品。
個 Engineer 真係好 Talk 得，
口水又多，
結果三點開始，
差唔多六點先返到公司。

2004 年 11 月 4 日 星期四 【晴】

今晚放工之後，
又要上某人家做電腦技工。
上回提要，
上回花了一個下午的時間，
都未可以令部 Notebook 上到網。
上次臨走個陣，
幫佢 set 左用 56k 上住先，
點知我剛上車，
就收到佢電話話 56k 都上唔到。
我已經唔係一走就上車，
由第一城步行去新城市廣場，
再逛了成個鐘有多。


後來佢話再試試先，
咁我就冇理住喇。

星期二上緊堂個時，
收到佢電話，
原來都係上唔到網，
就算我畀埋我個 Username 同 Password 佢，
都係上唔到。
咁結果就約左今晚上去睇睇。


昨晚又收到佢電話，
話約左寬頻公司 d 人上去睇，
時間大約係八點至十點。
咁我今晚放左工坐車去到都八點，
去 7仔增值完張八達通，
就收到佢電話話已經攪掂，
可以寬頻上網。


既然一場黎到，
都上一上去啦，
上到去，
佢借左本偵探小說我睇，
話同電腦有關 wor，
都話可以慢慢睇，
等佢個女返香港先還都未遲。


去完哈迪斯食個火雞堡，
就坐車返屋企了。

>>November 6, 2004 at 11:04:49 AM GMT+8

2004 年 11 月 3 日 星期三 【颳風】

話咁快又一年了，
每年呢個時候，
都係 IE 新莊既宣傳期。
唔知係我要求高，
有代溝，
定真係咁不堪入目呢？


有非莊員既同學仔投訊新莊個阿 P，
因為攪莊務而要 d 莊員走堂，
佢仲話係有唔止一個莊員向佢反映。
而且又話阿 P 係莊員上緊堂既時候打電話黎，
影響上堂氣氛。


我唔明既係，
既然大家組了支莊，
有咩事點解唔係圍內三口六面講清楚，
而要靠外人把口呢？


最攪笑係，
影響上堂氣氛，
歸咎於打電話那個人，
而唔係上堂唔熄電話，
上堂仲要聽電話那些莊員。

2004 年 11 月 2 日 星期二 【颳風】

係開學既時候，
原本 Prof. 定既係一個 Project，
再加一個 Final Exam。
而個 Project 呢，
就係睇份 Paper，
寫份 Report，
做個 Pesentation。
後來我地爭取改做一個 Mid-term，
加一個 Final。


早幾個星期，
唔知邊位同學仔提議改做一個 Mid-term，
加個 Project。
係小數服從多數既制度下，
表決決定再改。
但係個 Mid-term 呢，
唔係學期中考，
而係近學期尾考。
嚴格黎講，
係學期尾二個堂考。
而最尾個堂，
唔會教新野，
而係做 Project 既 Pesentation。


即係話，
改到同原本差不多一樣，
只係兩個項目既時間調轉。
咁點解第一次話改既時候，
呢班同學仔唔提出 Objection 呢？
真係唔明佢地想乜。


今晚上堂亦都派左功課，
一百分中，
我只拿到八十九分。
但竟然有同學仔話我高分。
其實份功課唔算深，
而且我 Undergrad 仲係讀過既 tim，
拿呢個分數我就唔係幾滿意喇。


之但係見到有 d 得三十幾分，
我就唔敢點出聲喇。

>>November 3, 2004 at 6:06:39 PM GMT+8

2004 年 11 月 1 日 星期一 【微冷】

激死我喇，
激死我喇。
話說我準備緊一份禮物，
咁就唔係就緊買既，
而係再加 d 手工上去。


上個星期同媽媽一齊去買材料，
一路買，佢就一路彈。
一時又話呢種唔好睇，
一時又話個種初學既好難 Handle。
結果呢，
就買左佢話好睇，
但初學唔係咁易 Handle 既。


咁學師就梗係想學全套架啦，
咁 d 材料我買左返黎就放左係房，
打算找晚得閒 d 先拿黎問媽媽。
點知星期日晚睇波個時，
佢同我講話已經起好左個頭，
咁我都算喇，
下次先學返。
咁我都估佢心思思會自己玩晒唔畀我攪，
就好似當年中年既時候，
偷左我份功課黎玩。
我已經再三叮囑佢，
叫佢唔洗幫我整，
我自己 Handle。


點知今晚放學返黎，
我就發覺佢已經攪左三份一。
即係咁，
我唔識問你係一回事，
唔等於你可以私自拿黎攪。
第一次我當我冇講清楚，
咁既然我講得清清楚楚，
咁你仲係咁算咩意思先？
我就係想親手做份禮物送畀人，
你幫我整晒，
咁我不如直接係出面買啦。
我唔係想要件完成品，
我係求當中既意義，
你明唔明呀？


咁何況你件完成品，
根本就唔係我想要既野。
就好似中二家政堂份功課咁，
我明明係係織件畀狗隻穿既衫，
你畀條頸巾我做乜？

又好似我 d 飯盒咁，
我預備個去比賽既身體，
應該多肉少飯。
我整左個四份三R，四份一飯既飯盒，
你幫我改做四份三飯，四份一R既飯盒做乜？


又例如獵腸肥膩，
我話唔好整咁多。
佢係都要成日煮。
有人話一次半次冇所謂啦，
但係佢每次一煮，
我就要食成四五日，
咁仲係唔係應該冇所謂？

>>November 2, 2004 at 1:36:04 PM GMT+8

2004 年 10 月 31 日 星期日 【晴】

今朝一早上青衣教班，
班學員上個星期都教過，
全部都係大學生。
原本約九點十五分，
不過九點半都未見人……


青衣呢個地方，
教過唔少班。
如果係教 SOC 既班，
我地通常會落返山，
係商場間快餐店食午飯。


但係今次為左節省時間，
就選擇了係山上食。
我帶了蜜糖方飽同午餐肉，
唔過結果實驗失敗了。
我把刀開唔得晒罐午餐肉，
罐午餐肉本身條匙又斷埋。
個罐開左少少，
之後用刀撩出黎。


好艱難咁食完個午餐，
下午係個模擬賽。
我負責看守個段賽程係全部最難個段，
條路又斜，
要求既技術又高。


我陪 d 學員上上落落，
行到大汗踏細汗，
仲受埋傷 tim，
好痛…… ><


完左個模擬賽，
我發覺個袋勁多螞蟻，
返到屋企，
用了好多時間洗洗洗……><

>>November 2, 2004 at 1:28:20 PM GMT+8

2004 年 10 月 30 日 星期六 【微冷】

今日放工，
走去買左個外賣意粉，
然後坐巴士時係車上食。
點解攪到咁麻煩呢？
話說母校有個新 Project，
叫做無人駕駛車，
咁每個星期六都會開會，
咁我呢 d 八八卦卦既，
梗係返去睇吓咩事啦。


但係佢地一點開始，
我最早一點先係公司走，
咁咪唯有係車上解決午餐 lor。
不過我發覺我等車既時間已經夠我食晒盒意粉，
早知就唔買外賣，
食完先去等車啦。


返到去，
發覺人唔多，
仲要大部份原來都係 IE 既，
咁開會傾左 d 野，
其實我覺得似係黃學長教 Tutorial 咁。

Anyway，
咁開始做野啦，
幫大衛同學手 Debug 個 Firmware，
一攪就攪到五點幾先走。


其間發生左 d 好恐佈既事，
如果某人見到，
實嚇死佢。
話說小食部有老鼠，
我仲要見到唔止一隻，
四五隻係度玩捉迷藏咁，
佢地既 Size 仲……
半個 Keyboard 咁大啦，
你話係咪嚇人喇？

2004 年 10 月 29 日 星期五 【颳風】

近排我興玩「番灘」。
「番灘」係咩呢？
就係有一堆東西，
四個四個數，
睇下餘數係幾多既一種賭法。


但唔好誤會我賭錢 wor。
話說我四個鐘要食一次藥，
一日總共食四次。
而我係一個幾冇記性既人，
成日都唔記得食左藥未。
結果就倒晒出黎，
數下有幾多粒，
黎計返我食左藥未。
因為一日食四粒藥丸，
結果就好似玩緊番灘咁喇。

2004 年 10 月 28 日 星期四 【晴】

好憎做 Demo，
尤其是係公司為件未完成既作品做 Demo 畀老闆睇。
老闆昨天已經話想今朝睇 Demo，
我昨天已經一早預備好，
結果成兩點先睇。


最麻煩係做親 Demo 都阻住我工作進度，
因為 Setup 好 Demo d 儀器，
我就做唔到野。
因為現在 Debug 緊既，
係 Microprocessor 上個 Firmware，
咁每次要試，
都要 Download 左落去先得。
咁 Setup 好 Demo d 野，
已經冇 Microprocessor 餘下喇。

而 Desktop 個 Software，
又唔敢大執 wor，
因為你知啦，
大執完分分鐘唔 work，
（個 Firmware 就係咁炒喇 ><）
都係不變應萬變好。


Demo 完換黎既，
係更重既擔子。
又要做多個 Project，
幾時會力竭而亡呢？
不過都好既，
做同一樣野做咁耐，
總會求變既，
希望今次會帶來新既衝擊啦。

2004 年 10 月 27 日 星期三 【晴】

正所謂蛇無頭不行，
最近要為團隊選蛇頭。
做蛇頭除了是領導之外，
其實都是一個阿四。
開事前事後會議，
拿資訊、裝備，
也是對外發言人，
尤其是需要投訴時。


一行十人，
肯自願做的冇幾多人，
難得有人肯做，
而其他成員又覺得冇問題。
至少係開會時冇人提出異議，
當然事後總有人反咬一口，
這個按下不表。


講返蛇頭，
有非屬於這十人團隊的所謂高層人士，
對我們的選舉方法，
及選出黎既人選有微言。
其實都唔叫微言，
係大力反對。
結果昨天就逐個成員問可唔可以代替。


當所有合適的成員都話唔得既時候，
結果只有維持原判，
除非有人空降做蛇頭。


我好榮幸被稱為合適的人選，
不過我決斷話唔得，
因為唔得閒，
因為要 Focus on 學業。

不過好奇怪既係，
唔得閒就唔得閒啦，
仲花咁多唇舌說我做乜 wor……