2004 年 11 月 25 日 星期四 【颳風】

星期二返母校時，
潘 Sir 話今晚想 Call 晒 Start, Finish 同成績處理既負責人開個 Meeting。
原本約七點正係銅鑼灣。
我因為 OT 既關係，
差唔多七點先離開公司。
自然遲大到啦，
我八點幾先趕到銅鑼灣。
點知…點知……
一個人都沒有！

唔係佢地開完會，
而係我被人放左飛機……><


既然一場黎到，
冇理由即刻又過返海架嘛，
所以走左上時代廣場行。
其實我目的地咪又係得一間，
就係哥倫比亞喇。
年頭比賽贏返黎個 $800 禮卷都未用，
年底就到期喇。


其實都有 d 心水既，
有個背包九百幾蚊，
即係我要補二百蚊。
但係係旺角，
畀多少少應該可以買到個大 d 既。
Target 變左係 d 褲。
但係銅鑼灣分店唔大，
冇乜款選，
結果都冇換到。


原本打算一路行落灣仔坐船過海，
順手行埋 298。
不過望一望錶，
都成九點咁滯，
無謂咁晚返屋企啦，
所以就坐左過海隧道巴士返屋企喇。

>>November 30, 2004 at 2:16:26 PM GMT+8

2004 年 11 月 24 日 星期三 【晴】

今日係上次定向挫敗後的第一次練習，
出席人數好少，
舊人得我同阿健，
其他全部新人。


因為新人多，
都好難有好深入既操練，
唯有自己調較難度。


今日既主菜係地圖記憶，
由阿健負責。
熱完身之後，
阿健去放 Points，
而係呢個空檔時間，
我地就跑一個大圈。


平時跑親大圈都起碼三個，
係有意冇意間都會留一留力。
今次既然只係需要跑一個圈，
好想知自己去到邊，
比平時谷盡 d。
結果跑一個大圈用了九分鬆 d。

記得好耐之前，
我係要用十一分鐘既。
似乎，真係似乎係進步左。
不過，仍然係唔夠。


到主菜地圖記憶喇，
Total 九個 Points，
我一次個記晒，
打算睇一次圖就玩晒佢。
結果都好好彩玩得晒。
當我玩完九個 Points，
d 新人仲玩緊第三、四個 Points。
結果等左好耐。


最後甜品係迷宮玩捉。
我自薦做捉那個。
結果捉唔晒，
只係捉到 5/7 人。
但對於我黎講係一個幾好既 Training，
因為我都谷得好盡吓。

但係 overall 黎講，
今日 Train 得唔夠。

2004 年 11 月 23 日 星期二 【微冷】

因為接下來的 Weekend 要幫手攪學界比賽，
沒有時間回母校教 OI 雞精班，
結果今天下午拿了半日假。
二時四十五回到學校，
找到潘 Sir。
先處理學界比賽事宜，
仍後到了貨倉點算物資。

三時三十分，
MK Sir 打電話來，
我即刻由操場跑上 E310。

今日的雞精班，
出席的唔少人。
我要講解今年新的規例，
解答 PCOI 三題的答案，
及 Q&A 等。


事先沒有預備，
結果講得比較差。
嘗試過畀機會佢地想，
畀機會佢地講，
我再從旁協助，
不過成效不大。


五時多開始，
讓他們自由發問，
結果問了我幾題 Pastpaper 的解。
巧合地，
有幾題都係我出既，
例如 2000 年的 Color、
2003 年的 Orienteering 等。
我仍盡量滿足佢地的要求。


結果六時三十幾分先可以下課，
七點係科大要上堂，
結果趕到入去己經七點幾，
上左一陣堂了。

>>November 29, 2004 at 2:58:52 PM GMT+8

2004 年 11 月 22 日 星期一 【微冷】

昨日跑了場地獄極長途比賽。
今日起身對腳都仍然好疲倦。

話說昨日係荃灣石龍拱，
即花山附近有場定向比賽。
由賽事中心往起點需時一個鐘，
所以賽會為每位賽員預備了一支水。
其實半個鐘已經可以行到上去，
結果有幾充足的時間熱身。

10 時 13 分出發，
第一個控制點很近，
由起點上山鞍的路交匯，
沿山咀落，
第三個墳的崖腳。
整個路段的流程很詳順，
不需兩分鐘已完成，
並且趕過幾個人，
包括早我五分鐘出發的蝙蝠。


第二段路段是長距離，
但有多條路線選擇。
單是本會的賽員，
已經有蝙蝠跑的下隔火路，
阿棟的上隔火路，
主席的落山跑車路，
及小弟中間沿等高線走。

第二個控制點雖慢，
但總算正確到達。
但小弟的「長距離路段後失常症」又再次病發，
三號控制點並不十分困難，
但原本七分鐘左右就應該找到，
我結果大迷途，
足足用了半個小時有多。


頭三個控制點，
由地圖東走到地圖西，
消耗了我個多小時的體力，
及後後勁不繼。
結果八點二公里的比賽，
冠軍所用的時間是 88 分 33 秒，
我用了二百四十分鐘也完成不到，
還欠兩個控制點。


很久沒試過完成不了賽事，
一次 DNF，
讓我認清到需改善的地方，
今次 DNF 的感覺真好！

>>November 29, 2004 at 2:58:33 PM GMT+8

2004 年 11 月 21 日 星期日 【颳風】

細細個入培正讀書時已經係度既禮堂，
終於要拆了。
今晚，
同學會就攪左個告別晚會。
我地級社有廿幾三十人去。
不過某人係外國未返黎，
冇得去，
真可憐。


今晚既司儀係黃安琪和陳敬創，
前者係無記體育節主持，
後者係港台 DJ。


首先有培小張廣德副校帶唱校歌，
之後有培正傳道關生帶祈禱。
例牌既致詞，
培中的葉校長致詞。
咁多年，
佢既致詞都係咁悶，
都係繞好大個圈都未入點。
之後有同學會會長致詞。


之後正式開始表演。
有 Band 啦、有舞蹈啦、
有話劇啦（播紅藍刻社既片，但請到鍾景煇分享）、
有粵曲啦、有 Jazz 啦、
有 Flute 啦、有拉鋸啦、
有男聲獨唱等等。


其中最深刻係見到「十號風球」既演出，
十號風球可以講係我第一隊睇既 Live Band Show，
當時係騰社社辰，
我想都有十幾年前喇。


到最後 Live Band 唱歌，
我地（啟社）仲帶頭企起身拍手打拍子，
後尾仲企埋出去，
之後佢地仲上埋台，
不過我冇上，
返左位拿相機，
係咁影，
影到電有用晒，
Memory Card 都打爆。


大家都玩到好 High，
先後拋高 Poon Sir 同葉校長，
黃安琪又先後同佢兩個跳舞，
不過原來葉校長係唔識跳既。


到最後唱校旗歌，
葉校長帶唱。
一唱就唱三次，
仲要快版慢版都有。

之後影大合照，
又帶唱左兩次。
睇黎葉校長真係好鍾意呢首歌。


大家都唔捨得走咁，
我地都攪左好耐先走。
仲同葉校長影左張相，
仲要係大會部相機，
唔知會唔會上校刊呢？


之後去左石磨坊食甜品，
今左朱古力蛋白燉鮮奶，
我覺得味道一般而已。

>>November 22, 2004 at 12:40:34 PM GMT+8

2004 年 11 月 20 日 星期六 【颳風】

正如我今日係 ICQ 個 Away Message 所寫，
今日係忙碌的一天。
忙碌的程度係，
我要係公司拿半天假，
學校校慶開放日都幾乎返唔到去。


朝早一早起身，
首先返左培正，
去左電腦室走轉。
現在個電腦室，
打通埋隔離個音樂室，
大左好多好多。
畀人貼左張相上壁報，
仲大大隻字寫「炒蛋」。
好心呢 d 就落中文名，
好過落花名啦。
見到佢地 d Demo，
仲係 Show 咸豐時代阿公個 English Angle，
唔係掛，
今多年都冇新野睇？


睇完電腦室，
本來打算睇下童軍個紮作，
不過行錯路，
結果就走左。
因為仲要趕住去青衣落 Tap。
十一點去到，
因為一點四十五分要教班，
所以得兩個鐘落 Tap。
攪左一輪，
結果都係放唔晒。
一點落大快活食 Lunch，
上返黎教班。


原本打算教完再放，
我頭燈都帶埋。
不過賽事控制員話唔好，
因為明天仲要比賽，
咁所以就落左山。

我返屋企時經過旺角，
睇背包。
有個 50L 既賣三百幾蚊，
我想夠我放野去定向掛。

>>November 22, 2004 at 12:10:08 PM GMT+8

2004 年 11 月 19 日 星期五 【颳風】

朝早終於去左新個間「至尊」食早餐。
有個設計我個得幾好，
就係卡位 d 枱下有個抽屜。
當中放晒 d 餐具，
咁 d 樓面就可以好方便咁拿，
仲可以就住個客叫唔同的食物，
立即拿相應既餐具。
講返 d 食物，
好似少過張外賣紙，
結果都係食返沙嗲牛肉麵。
用方形既器皿，
味道一般啦。


返到公司，
幾乎成日都係八樓個 Lab 做野。
八樓個 Lab 有部溫爐，
用黎模擬唔同溫度既環境。


今日將個溫度降至零度做測試，
提升到 25 度，
又要煲到 55 度。
其實都係等既時間多，
要等個爐改變溫度，
大約一分鐘一度到啦。
係等既時候，
我就做自己野。
包括預備 Tap 帶，
係 Pocket PC 睇戲等。
做完實驗，
上返十三樓個 Office 打 Lab Report，
打完都七點了。

2004 年 11 月 18 日 星期四 【颳風】

個頭再次痛，
係好痛好痛個隻，
可能係病左了。
天氣時暖時凍，
似乎很多人都生病了。


今日先發覺，
星期三唔記得係會拿舊 Control Card，
星期六點落 Tap 帶呢？
實有辦法既。


唔夠訓，
脾氣特別唔好。
夜晚終於爆發了。
我要求既，
唔係賠個一百幾十畀我。
我只係想聽到一聲道歉，
好難咩？
仲要講到自己一 d 錯都冇咁，
哼。

2004 年 11 月 17 日 星期三 【晴】

原本唔覺得存在的壓力，
因一封 E-mail，
一句 "Can you give me some update as what you are working on"
令我醒覺到，
原來壓力從未消失，
原來只係我自欺欺人。
特然間好似抽離左咁，
發覺原來我成日都游手好閒，
好逸惡勞，成日都懶懶閒咁。
好想發憤，
不過次次都唔成功。
好似係呢個現實迷失左咁，
或者又係時候思索下人生的意義。

2004 年 11 月 16 日 星期二 【颳風】

以後找卡數要係 A 銀行提錢，
再去 B 銀行入錢，
勁麻煩 ><