2005 年 1 月 3 日 星期一 【颳風】

早兩日先話儲錢，
今日又洗錢。
今朝既一通電話，
就洗左 6k。
嗯嗯，
要認真檢討下點解洗咁多錢先得。

連續幾晚夜訓遲起身，
今日終於得到惡果了，
就係唔知醒起身。
八點四十五分先出門口，
好彩去到小巴站未開車。
小巴司機又驚塞車，
唔行淘大而行新路。
結果就梗係遲到啦，
冇遲咁多而已。


中午同大衛哥哥去左味千食野。
上次去味千已經係前年既事，
某人聖誕返黎，
仲要係去返同一間味千。
因為大衛哥哥個午飯時間係我既 shift 早十五分鐘。
所以都幾趕。
一坐低就要落 Order，
我餐牌都未睇就叫左個 B 餐，
如來係鰻魚飯，
都幾好味丫。


今日亦都係公司行新制既第一日，
放工時間改左左六時十五分。
結果我六時四十分先走，
返到家都七時四十五了。


食完飯，
葉 Auntie 帶左兩隻狗過黎，
一隻叫阿 Win，
另一隻叫阿星。
睇黎媽媽好想養狗，
除了工人，
屋企有人既時間幾乎唔超過十二個鐘，
扣返睡眠時間，
得過幾個鐘，
阿媽又唔識養，
養隻狗黎做乜？

>>January 4, 2005 at 2:46:16 PM GMT+8

2005 年 1 月 2 日 星期日 【颳風】

今日真係馬拉松式踢波，
先係五點至七點係砰石村球場為紐版上陣。
是役我地大勝 7 比 3 。
我先發上陣，
司職右閘。
第一球係打開龍門既阿 Kidd 接應角球，
炮彈式破網。
之後我同隊長一個 one-two，
我右腳伸盡踢入，
將比數擴大至 2 比 零，
之後被人追返一粒，
比數開始咬得好緊，
打到 3 比 3。
之後我們開始以守為主，
我由前鋒打返落中堅位，
將對手不少攻勢瓦解。
而我地打下入一粒，
打下又入一粒，
結果大勝 7 比 1。


之後即刻趕去牛頭角，
同班中學同學踢。
竟然係踢街霸場，
即係個籠門框勁矮，
球四面圍晒，
地波唔會戔界個隻。


記得中學時代係學校踢波，
其中一邊圍左圍板，
另外一面係地盤，
我讀左七年，
有六年半都係地盤。
之前係體育館，
拆卸重建，
但因斜波問題攪唔掂，
工程一拖再拖，
最近終於落成。
而我讀書個陣個地盤雜草叢生，
好多時踢左個波都找唔返，
所以我地戲稱佢為培正郊野公園。

講返塊圍板，
因為有塊圍板係度，
所以我們可以做到真正既「撞牆」。
以前力度仲控制得好好，
過到人之餘都可以拿返過波。
記得有年學校比賽，
我打算「撞牆」過人，
結果個波擦過圍板頂，
繞過籃球架落返我腳下。
點解有個籃球架呢？
因為學校個操場係多用途，
手球係佢；
籃球係佢；（兩個 full court）
排球係佢；
足球都係佢。（其實係踢緊手球場個籠）


一路踢隻腳都唔多妥，
唔知係早幾日做 Gym 令到肌肉撕裂，
定係硬食左阿力幾次重炮，
右腳四頭肌個位好痛，
加上之前績聚既乳酸又有 d 影響，
所以表現都唔係幾好。

>>January 3, 2005 at 5:53:58 PM GMT+8

2005 年 1 月 1 日 星期六 【乍雨乍晴】

又到新既一年，
今日係四十年黎最凍既一個元旦，
（當然對某人黎講，小兒科啦）
係度各位新年進步，
平平安安，
心想事成。

係舊年年尾，
發生左件傷亡慘重既天災，
希望新既一年少 d 天災人禍。

2004 年 12 月 31 日 星期五 【颳風】

今朝九點就就要返到萬國，
因為屋企食早餐唔夠飽，
所以打算出門口先，
落街食少少野。
咁媽媽話唔識坐車，
我叫佢出門口打畀我。
等左好耐都冇電話黎，
我打返過去，
去竟然話已經上左車，
激死我。


今日有 d 昨日冇黎既黎送行，
好似黃 Auntie、葉 Auntie、郭 Auntie等，
佢地 d 仔女全部都係係培正讀，
我地都識左好耐。
葉 Uncle 以前仲成日上我屋企，
和爸爸玩十五胡 tim。


我阿嫂都黎左，
仲帶埋我侄仔黎，
即係叫我阿叔。
講開輩份，
我好細個已經畀人叫舅父，
我相信我好快都會做舅公。

中午食完英雄飯之後，
我送阿嫂去坐車。
之後返屋企換衫，
去左做 Gym，
之後去多次莫斯科，
都係買唔到我想買既野，
個老細找左好耐都找唔到。

咁落尖咀 OM Spot （Olympus Showroom）啦，
六點半去到，
點知今日除夕收六點，
白行一趟。

順手拿部機畀傻龍試玩，
佢係咁易玩兩玩，
就決定買，
真真兒戲。


返到屋企食飯，
迪哥又約出街。
坐渡輪落灣仔，
行去時代廣場，
自然多人到迫死咁啦，
倒數完就返屋企，
點知灣仔冇船，
我要行到落中環。

講起迪哥就攪笑，
又話要追人，
請人睇戲都唔敢，
咩都話要問吓班軍師團既意見。

2004 年 12 月 30 日 星期四 【晴】

今日只係返左半日工，
因為下午四點前要落到萬國。
一點離開公司，
先落信和莫斯科買個 M42 Mount，
同埋支 300mm 反射鏡，
點知冇貨。
之後個環球，
又係冇失想買個 d Pinky，
之後去左茶樓飲茶。


飲完茶返屋企食藥換衫，
之後坐姐夫車落萬國。
換上白衫白褲，
上埋麻服，
就開始預備。


媽媽真係冇乜記性，
講左好多次天蠶衣唔係用黎保暖，
佢都只係畀一件天蠶衣我著。


媽媽話畀晒我兩姊弟決定，
結果咩都要插手。
已經有長生店攪，
有道教既儀式，
佢又要加 d 佛教既打齋落去。
最攪笑係我拿住佢地本經書，
十個字有八個字唔識得讀，
自然更加唔識得解啦。


今日仲見返好多好耐冇見既親戚，
例如堂哥、阿叔、姑婆等。
睇見送黎 d 花牌，
我先知原來萬玨奇（無記刻集皆大歡喜那個）係我堂姐夫。


攪到十點，
所有儀式都完晒，
我地就坐車返屋企，
聽朝九點要再返去。

>>January 3, 2005 at 2:52:12 PM GMT+8

2004 年 12 月 29 日 星期三 【颳風】

今日下午被老細捉左去照肺，
大意係我做 d 野太零碎，
冇咩系統。
大陸出左隻類似產品可以 OEM，
佢考慮緊好唔好停左個 R&D，
潛台詞即係話可能會失業。

又話我呢排好少畀返 Progress 既 Infomation 佢，
不過我覺得，
既然你訂左個 Deadline 要出 Prototype，
我限期前畀你咪得 lor，
我 Report 一次可能用左我一個鐘，
一星期兩次，
一個月就八個鐘，
我用返係 R&D 唔係會好 d 咩。

剛開似之前，
老闆叫我 Design 個 LCD Layout，
我整左兩個，
老闆都唔滿意，
結果佢自己改左個。
現在見到大陸個產品，
又話都係我 Design 那個好 d，
又要再 Quote 會，
你話係咪拿黎攪？


會唔會我想野想得太遠？
次次交野，
我都想交過最好既，
交過 101 分既，
但似乎老闆想要既係個 50 分既，
之後先慢慢 Improve。

2004 年 12 月 28 日 星期二 【晴】

今日凍左好多，
最低得九度，
要穿多件衫。

2004 年 12 月 27 日 星期一 【微冷】

終於到左比賽既最後一日，
就係接力賽。
我負責跑第一棒，
阿迪跑第二棒，
阿棟跑第三棒。
開頭都幾順，
不過四號炒左，
一路沿路落山，
事後發覺原來係沿緊密林落山，
就係咁失左位。
上錯隔離山，
損失了十分鐘。

之後去到大樹下，
又係個林中被 Trap，
又損失了廿分鐘，
仲弄傷右腳 tim。
結果用了一個鐘頭三十一分鐘。
全隊總其用了三個半鐘頭，
只得第六，
如果我唔係犯錯，
我地就有第五，
甚至係第四。
真慘……><


夜晚係頒獎禮兼晚宴，
我地換晒童軍制服，
係入會場之前，
仲要教迪哥佢地點畀禮。
我地既結論係，
以前教佢步操那個肯定會吐血而亡。


真係頒獎喇，
勁攪笑。
有人伸右手，
之後個頒獎嘉賓話：
「童軍唔係用左手握手的嗎？」

之後完左，
又有人同佢講：
「你連帽都唔識戴」
笑到我丫。


跟住仲厲害，
但為預多左食物，
多左幾圍，
我地十二人，
分左三圍坐，
平均四個人食一圍乳鴿海鮮餐，
好飽好飽。

>>December 29, 2004 at 11:00:25 AM GMT+8

2004 年 12 月 26 日 星期日 【微冷】

今日係 ACOC 2004 既第二日賽事，
係西貢狐狸叫舉行既標準距離比賽。
專車七點十五分係烏溪沙開，
亦即係話我地要好早起身。
由大圍坐馬鐵去馬鞍山要十八分鐘，
結果我們約六點半係旺角火車站等，
我六點鐘出門口，
五點鐘就要起身。
出門口個陣，
天都仲未光！


係旺角火車站，
會合左 Dicky 同阿健，
仲有尖東坐火車黎既阿棟，
就出發喇。
去到烏溪沙七點十五分，
d 旅遊巴都仲未到。
我地齊人影左 d 隊相之後，
終於可以上車。
我地將條特長 Banner 掛左係車既右面，
而友會亦都掛左支會旗係左面。
日本精英賽員村越真先生都係坐我地架車，
不過今個學期學日文既迪哥就一句日文都講唔出口……


架車去到黃石，
我地要再轉船去高流灣，
係船上，
發生左件令我扯晒火既事。

講真，
攪到我咁嬲既，
一定係大大單。
亦因為呢件事，
同埋係賽區發生既另一件事，
我決定唔再係定向縱橫投稿。
一個唔識遵重人既人，
亦唔會得到我既遵重。


講返場比賽，
難度唔算難，
不過玩得好辛苦。
不單 d 草好長，
又多碎石，
我一號 Point 已經整親隻腳。
係冇比賽狀態既情況之下，
以兩小時十三分二十八秒位列 H21-1 第十九名，
Combine 晒兩個 Course，
係 H21 位列第三十六名，
仍然做到頭 50%。

今日全隊食白果，
男青最好成績係阿高，
排第十一名。
男成係張先生，
係 H21-2 排第十一名，
H21 排二十五名。


完左比賽，
有四架大會旅遊巴接參賽者。
其中三架去西頁戶外康樂中心，
最後一架去西頁市中心，
我地包車咁濟，
呵呵呵


係車上，
我同領隊講，
叫佢 Offically 通知隊員集合時間，
佢就猛話已經講晒。
Well，又睇下聽日點。

>>December 30, 2004 at 9:49:16 AM GMT+8

2004 年 12 月 25 日 星期六 【微冷】

今日係亞洲城市野外定向錦標賽（ACOC 2004）開幕日暨首日比賽，
地點係烏溪沙青年新村，
我地約左十二點半係馬鞍山馬鐵站等，
結果我一點先到，
認真慚愧。


一點左右，
我地一行八人，
步行往烏溪沙青年新村，
會合領隊，
準備比賽。
係簡單而隆重的開幕儀式之後，
運動員就帶到出發預備區隔離。
兩點三十五分，
第一個運動員出發。
我地隊第一個賽員係劉先生於兩點五十七分出發。
我係第二個，
出發時間係三點十七分。
係出發前既三分鐘左右，
已經調整到比賽心情。
一出發拿起圖，
距離係二千五百米，
一邊慢跑一邊頭幾段賽段，
經過第一個路口就開始加速。
今日係短距離速度賽，
講求快、狠、準，
所以一路都 Keep 住好快既速度。
頭十一個 Point 都跑得好順，
有一兩個 Point 可能偏離左少少，
損失了幾秒。
當時排名係第十四，
更曾升至第十二名。
打完十一去十二就出事喇，
可能受電視台攝影機影響，
可能受尾隨賽員影響，
總之我就唔可以再 Stay in my own box，
出 Point 方向誤差至少九十度，
用了全場最長時間兩份四十三秒，
就第十四跌到落第三十二位。
白白損失了分半鐘。
結果以十九分零七秒排第廿十九，
如果唔係錯呢個，
我應該係排頭二十的……><

最慘係輸被迪哥十幾秒，
不過計返 2.4km 測試佢快我兩分幾鐘，
今次算係我贏左，
呵呵呵。

最後成績，
男子青年組表現得唔錯，
取得一個第六，一個第七、一個第九。
而男子作年組最高排名係第十三。


比賽完後我地去左百佳買明人既麵包，
八個人，
可以裝滿一架購物車，
勁！

>>December 28, 2004 at 11:23:52 AM GMT+8