2003 年 12 月 30 日 星期二 【晴】

真係話咁快又到左一年既最後一日。
好多人都會問一個問題，count down去邊呀？次次我都係答，返工囉，唔駛做咩！
其實呢d日子返工都幾開心丫，咁多人陪你，放工又可以同班同事唔知死去邊宵個夜先。雖然平安夜果日我自己閃走左，哈。

今日已經係我唔知第3次定第4次聽到人地話同佢條女散左，唔知今次係咪真係最後一次聽呢句說話，定還是會再聽到第5次第6次或更多次？不過都無乜所謂，慣啦。散又好復合都好，都同我無乜關係既。你睇到呢堆野唔好怪我咁諗呀，我知你對我好，放心。

新一年大家要許返個願。而我既願望通常都係最行果句，祝大家開開心心，無憂無慮。
皆因本人覺得乜都無所謂，最緊要開心。
唔係，暫時有一個願望，就係要打低壞人，哈哈！一定要令佢輸返次先得，一定得一定得。

>>December 30, 2003 at 5:19:23 PM GMT+8

2003 年 12 月 23 日 星期二 【晴】


Merry Christmas


好難可以同每一個人講Merry Christmas
所以係呢個日記祝大家隨心所欲！

>>December 23, 2003 at 5:52:14 PM GMT+8

2003 年 12 月 17 日 星期三 【晴】

話咁快又放假喇！
無錯，我都唔知點解，真係要等到放假先得閒打下日記。

今日無意中發現今年收到既第1張聖誕咭，多謝晒呀。
一路我都諗住買聖誕咭，但實在係搵唔到適當既時間去睇。時間越長，拖得越耐，聖誕就已經迫近，到最後唔知會唔會買到聖誕咭俾人呢？！
不過今日收到既聖誕咭最開心並唔係張咭，而係份小禮物，多謝多謝。

同好多朋友都好耐無見過面，但係近來放假反而唔係咁想出街。可能又到左想玩自閉既日子啦，連電話都無打俾任何人喇。

>>December 18, 2003 at 6:50:04 AM GMT+8

2003 年 12 月 12 日 星期五 【晴】

多謝家姐既傳話，更加多謝姑姐既關心。雖然而家返左工之後，好似同大家少見同少左溝通，但係我知道係唔會影響到大家既關係。我知道自己就算有乜唔開心，都只會放係心裡面，永遠只會對住大家笑笑笑，但係大家唔駛擔心架，呢個日記係一個俾我宣洩既地方。可能當大家睇住篇日記果時，會覺得我唔係咁開心。不過大家放心，因為唔開心既心情，係會隨住訓覺而消失左。當訓醒覺得無事果時，又會覺得都無事咯，就會無左件事。

可能平時係人都覺得我係一個開開心心，無憂無慮既人啦，所以當大家睇到日記覺得我有唔開心或不快既時候，就覺得我有事。其實只係乜都要發洩一下，發洩完咪無事囉。發洩左出黎之後，有時可能俾個當時人睇到，咁當事人先會知道原來我都會因為某d野而唔開心。只係好多時唔開心既事過左去我又唔想再提起，就攪到好多人以為我乜都唔介意乜都無所謂(雖然到頭來我又真係好無所謂)。

如果連呢個日記都無我既不快紀錄低，咁我根本就唔駛打日記啦。
開心既事容乜易周圍話俾人知丫，係唔開心既野先唔知點開口講之嘛。

>>December 12, 2003 at 6:25:50 PM GMT+8

2003 年 12 月 8 日 星期一 【晴】

唔覺唔覺又無打日記一個禮拜，時間真係過得快。
唔覺唔覺又放假

食宵夜既日子仍然係保持住，如果可以肥到少少，我都想，不過就唔恨肥。

將會進入第3個要係工作中渡過既聖誕。都好既，要出街既話，條街一定超多人，又唔知死去邊好，咁樣不如留係一個地方，歡度呢個聖誕。好似上年咁，返嘉年華雖然係多人多到無得行，連去個廁所都話要行幾個字先去到既，但係就真係好開心囉。忙就一定忙，不過工作於娛樂，幾忙都唔打緊啦。

有無人可以解答我，如果自己既好朋友結婚，最少應該要俾幾多錢人情呢？其實已經決定左成份tips奉獻俾佢，之但係我又怕太少，等我再問下幾他人意見先。諗起人地就快結婚就覺得好開心，終於有一個係同自己好好，識左又好耐既朋友結婚，仲可以奉獻出第1次俾佢，做姊妹，唔知到時會點。最起碼預計到既就係當日將會係一個舊同學聚會囉，哈哈！

雖然而家無睇電視劇，不過我都識得邊首歌係『西關大少』既歌黎架。相愛無夢呢一首歌真係好好聽，加上歌詞又幾好，而家日日都會聽呢首歌架，因為 MP3 裡面有嘛，可以成日聽住。另外而家聽聽下，就覺得必殺技越聽越好聽，點解？唔話你知。知我者就明白架啦。

>>December 8, 2003 at 6:37:28 PM GMT+8

2003 年 12 月 1 日 星期一 【晴】

唔覺唔覺，原來已經2年喇。
我估唔到，竟然會糾纏到咁耐。
更加估唔到自己會唔知自己想點。

曾幾何時我係好清楚知道自己想點，知道大家係點，但係近來我諗.............我又動搖左。
話雖我做人既宗旨係只要開心，其他野可以唔理。但係開心過後會有後遺症架。

做一個清醒既人好？定做一個唔清醒既人好？

>>December 1, 2003 at 5:07:36 PM GMT+8

2003 年 11 月 30 日 星期日 【晴】

好掛住澳洲牛奶公司，不過原來尖咀間榮華都好好。

今晚，利物浦贏波，好開心。但係我無睇到，返到屋企，睇到曼聯對車路士，車仔真係好勁。真係好耐無睇過波喇，一來無時間，二來興趣都減左。

今日又俾人話我唔似女仔，竟然鐘意釣魚，睇波，仲間唔中會去打波。車，好出奇咩！不過其實我都覺得自己鐘意埋既野都唔似平常女仔會鐘意既，但係我又仍然係一個女仔，鐘意去行街。好想去打壁球，唔知點解最鐘意既都係打壁球，不過唔可以打太耐，因為真係會好累，比起打羽毛球，壁球真係用多好多體力。

太好喇，完左自己一個心願。尋日去左燒野食啦，恨燒左好耐好耐，一路都未有機會。雖然我著得唔多衫，不過我又真係唔覺得好凍咋喎。只係d風係咁吹係咁吹住，先好似寒寒地咁。講返尋日，都好開心，因為唔覺唔覺，越約越多，就變成攪左一個5C活動。

>>November 30, 2003 at 6:38:29 PM GMT+8

2003 年 11 月 25 日 星期二 【晴】

多謝綿綿既到訪，仲留埋言，你真好。
我有時間都有去睇你日記架，不過無留言，下次留俾你呀！

今次我估錯左添。我以為我將會收到既係一封 email，點知原來係一個留言。呢一個留言，你想我覆你定唔覆你呢？如果要我講我睇到呢個留言既反應，都係果2個字『矛盾』。心情又好似幾開心，但係又唔係真係開心；好似有少少想嬲但又唔識嬲；心情呢家野就由佢啦，都係果句『無唔開心又點會有開心既出現丫』。我淨係想問：究竟你想我點？

呢排係公司俾我地攪到唔知點咁，好在而家暫時告一段落，希望大家之後都可以開開心心，唔會再覺得俾人狂抽啦，不過都要自己做好本份先既。
我祝福大家架！

>>November 29, 2003 at 8:05:11 AM GMT+8

2003 年 11 月 22 日 星期六 【晴】

個日記又無事喇，真係太好。

不過而家約左周公子，唔好意思。

>>November 22, 2003 at 8:07:13 PM GMT+8

2003 年 11 月 14 日 星期五 【晴】

原來唔覺唔覺，我都成十日無打過日記，無辦法啦，生活日日如是，都無乜特別。同埋又唔會日日都用電腦，用電腦最重要要做既事情只係 check email 同清 email，其他都好少理。

呢個星期明明日日放11點，但係就無乜邊日早返屋企，唔係去左食宵夜或飲野就係無啦啦要開 OT。其實我好掛住好多人，之但係我又懶得去打電話俾大家。況且自從買左部 MP3 之後，真係傾少左好多電話，搭車都唔悶咯，仲駛乜打電話俾人打發搭車既苦悶時間丫。

好邪呀，正當我一心諗住今晚放工打電話俾你既時候，最後又無打到，都係掛住聽收音機，點知再夜既時候，就收到你既電話。我記得上一次我又係想打俾你但又突登再等下你會唔會打俾我既時候，就等到你打黎喇。唔通自此之後我次次都可以咁做，呵呵。

聽聞有人有 d 好神秘既野未講出黎，唔知我幾時先會知呢？

>>November 14, 2003 at 5:06:43 PM GMT+8