2005 年 5 月 4 日 星期三 【晴】

為左想滿足下自己去旅行既慾望，我決定要撩人睇下有無人肯返大陸浸溫泉。
邊個有興趣既出聲啦，等我request放孖day就可以成行。
好平咋喎，都係2-3百蚊之嘛。

>>May 5, 2005 at 4:08:04 PM GMT+8

2005 年 5 月 3 日 星期二 【晴】

今日發生左2件開心事。
第1同超開心既當然係利物浦贏波入到歐聯決賽。
第2就係無乜感覺但都值得高興既.........終於加左200大元人工喇！同時都出左bonus，至於幾多唔會係日記公開，嘻。

>>May 4, 2005 at 3:58:59 PM GMT+8

2005 年 5 月 1 日 星期日 【晴】

今日晨咁早就起身，因為要去行山，恨左咁耐既事終於有機會做，當然開心。跟住行左幾個鐘之後我地就無行到轉左去塔門。塔門真係一個好地方，計南丫島後又一好地點。可惜呢一切我鐘意既地方都未同過自己鐘意既人去，不過就同過我鐘意既一大班朋友一齊去，好在大家都熱愛呢類活動，唔係我就真係悶到發瘟，想做既野永遠都做唔到。

好多人都話早熟好睇，但係我更加想睇另一套戲呢。

>>May 2, 2005 at 3:42:51 PM GMT+8

2005 年 4 月 28 日 星期四 【晴】

今日竟然發生左一件我認為無可能發生既事就係我唔記得帶電話返工喇。以前我會以為自己無左個電話會好似想死咁，好怕其他人搵我搵唔到，又怕會miss左某d約會，不過當件事發生緊，我估計既都錯。又或者曾經覺得好重要既野到頭來原來無左都影響唔到我，我諗都應該值得高興既。

4月得返聽日，好在放假咋，我真係覺得好累，好耐未試過會返工覺得累。返到去好似唔想再行但係又唔到你停低，希望5月1日真係會平靜返晒啦。呢2日都未做到過6萬，都係得5萬幾，唔知聽日會唔會有6呢，有就真係呵呵呵咯！

自從某日send左個sms出去之後，而家成日俾班同事話我變態添，但係我只係send左俾1個同事，係佢forward出黎咋。班同事話我黎左之後攪到大家好似疏遠左，因為以前會好親切叫大家個名，但係而家連名都無埋，個個淨係識得叫其他人『同事』或『經理』，唔係咁樣都關我事呀？？咁我係鐘意咁樣稱呼大家嘛。

>>April 29, 2005 at 5:59:30 PM GMT+8

2005 年 4 月 26 日 星期二 【晴】

尋日搭小巴要俾100蚊佢找點知司機找9張10蚊俾我喎，真係吹脹。
放工搭車仲可以聽到最後果part架勢堂，真係好好笑，係架車唔小心不停地笑，真係怕俾人歧視。今晚請左班護士上去，我同事仲特登打黎叫我返屋企一定要上網聽返添。

雖然一向我都話唔鐘意食buffet，不過點都會有某幾間想試下架。今個星期六終於有機會去試美麗華樓下果個叫做Todai既日式海鮮自助餐。呢間野一開檔果時好貴架，成3舊水一個人，所以唔捨得食。不過而家平左好多喇，2百幾就食到，仲要係當母親節即係唔駛用自己錢啦，哈哈......太好喇！

>>April 27, 2005 at 6:00:19 PM GMT+8

2005 年 4 月 25 日 星期一 【晴】

近來聽到太多人呻唔公平，無論係公司定係朋友。不嬲對於我黎講都唔覺得呢個世界係公平既，如果要公平既話除非全世界既人都無感情。付出唔等於有回報，付出既目的只為對得住自己，做人對得起自己先會開心，如果連自己都過唔到自己，又點會開心。

心理測驗要遇到個準既真係好少好少，但係一年前做過既一個童話人物既測驗，真係準到不得了。我都post左係日記架，不過係一年前。
我係『勇敢的小美人魚』

夏天又到喇，又係我最鐘意既日子，可能會有好多人覺得變態，夏天咁熱都鐘意，不過我都唔怕熱既，汗我又唔多。但夏天可以去玩，享受陽光海灘，出海，又可以開冷氣訓返覺好既。希望今年乜都可以做下啦，我唔要年年想做既野都做唔到無人陪，不過今年當然唔會打出黎究竟我想做乜啦，呢d係我既宿命，打左出黎既就做唔成。

>>April 26, 2005 at 6:50:19 AM GMT+8

2005 年 4 月 21 日 星期四 【晴】

今晚食飯食得好開心，果然有周小姐在場既地方係唔會悶，就好似帶住左個收音機出街咁。其實多數我地都係話當年，講返當年讀書有乜好笑野，不過真係講極都唔厭。

個心總係心掛掛................

>>April 22, 2005 at 5:17:42 PM GMT+8

2005 年 4 月 21 日 星期四 【晴】

由第1次係人地口中得知黃伊汶有首歌叫殘忍開始，就日日都聽住呢首歌，因為真係好好聽。
本身都遺忘左呢首歌，但係今日係街行過又聽到呢首歌喎，好一首殘忍。

『為你花光所有心機徒勞白費　你竟不睬不理

原來你沒有做到刻骨銘記　夜半跟那位入戲
若你卑鄙我都堅決留住你
明白愛你就會令我辛苦自己

寧願我殘忍　拋低這男人
睇穿你　你以為你優先收尾
我這樣離去　你總會難堪
難度要看著我　被你拋低的那種結尾』

>>April 22, 2005 at 7:32:04 AM GMT+8

2005 年 4 月 20 日 星期三 【晴】

係某年某月某日某人留左個言俾我，曾經我認為我條路已經明朗化，可能間唔中會有石仔阻住，但係原來條路中間既唔係石仔咁細，而係一座山。至於我會唔會去跨過呢座山，我諗我自己一個絕對係唔會去行山，行山無人陪係座山上面有乜事發生都無人理，所以我寧願停或者行過第二條路。

細個讀書我唔會同同學爭寵；出黎做野我唔會去討好上司而希望得寵；對住長輩我都唔識點樣去討好佢地；從來我都係一個唔識得去討好人既人，所以一有乜野你爭我鬥既情形出現我係會第一個退出，令到件事與我無關。無論我有幾恨幾希望得到都好，我都只會選擇退出。

>>April 21, 2005 at 7:11:19 PM GMT+8

2005 年 4 月 18 日 星期一 【晴】

劉潔瑩生日快樂！祝你既朋友(即係我)永遠都快快樂樂！
因為你都有條好長好明朗同好幸福既路去行啦，所以你既生日願望應該幫我許願。

今日終於買左小飛俠隻錶，出左都幾個月都未買，不過就竟然俾我好抵咁買左返黎。至於點解我會等左咁耐都未買就自然有個人知點解啦，唔通我真係等隻錶跌價咩.............同埋終於俾我見到恨左好耐既野出現喇，但係都未決定買，可能而家愛小飛俠多D，所以見到得piglet一個既砌圖無即刻買左佢，但係我明明等左好耐架。

今日亦都好勁，好日都唔出旺角，一出就撞到好多人。一開始係新世紀見到小錦，不過佢見唔到我，我地刷身而過；跟住又見到西欣同佢男朋友；再行行下見到小宏同阿峰；到臨走去搭車再見到西欣+佢男朋友仲有溫家碧；點知最後同西欣坐同一架車添。

>>April 19, 2005 at 4:22:36 PM GMT+8