2003 年 2 月 14 日 星期五 【晴】

睇o左23條o既具體條文，一如所料當然係問題多多啦！
1)如果將來兩岸開戰，我寫信去白宮要求美國派兵幫中華民國，咁我會唔會因為「鼓動外來武裝部隊以武力入侵中華人民共和國」而犯o左叛國罪？
2)有個從屬於香港o既內地組織俾中共取締o左，咁o係香港o既「母會」會點？因為草案只係講過「香港從屬於內地」，冇講過「內地從屬於香港」，更加冇講過「內地同香港都同時從屬於一個外國組織」！
3)「泄露國家機密罪」唔可以以「公眾利益」做抗辯理由，咁即係就算有o的o野市民有必要知道(例如o的高官犯o既錯)，政府都可以唔俾呢o的消息出街？

2003年Eric好歌流行榜(第7週)：

1)特別鳴謝(蕭正楠、關心妍)
2)身體健康(張衛健)
3)第一類接觸(陳奕迅)
4)我的驕傲(容祖兒)
5)兄弟(何韻詩)new
6)活在當下(許志安)new
7)唔該行開(陳冠希、趙頌茹)
8)雪糕車(林一峰)
9)喜歡憎你(鄭秀文)
10)最後一塊(Cookies)new

Re Richard:身同感受？有時o係鍾意o既人面前真係好難開口o架！
Re蚊：總算吸取教訓o羅。
Re Cafu:問題係如果我唔行埋去，佢根本唔會望我一眼，我又點笑？
Re方頂寶：唔好溝溝聲咁難聽好喎！咁兩樣o野唔同o丫嘛！
Re Rivaldo:你又諗o左去邊？用「追」唔得o既咩？點解係都要用「溝」？

P.S.傑斯…做唔做得哂敗家仔呢？依家睇緊Wild Day Out音樂會，朴志胤跳《I Am A Man》超型！不過睇唔到少爺占掟水樽落台o個part！

>>February 15, 2003 at 4:56:53 PM GMT+8

2003 年 2 月 13 日 星期四 【晴】

情人節，祝有情人終成眷屬，冇情人早日成為有情人！

唔知係咪心理作用，o尋晚開始有o的唔舒服，仲失眠添！搞到今朝仲好唔舒服，落sick room抖o左一陣之後好番好多，各位有心！振作振作！
放學去o左政務處拎o左「共黨安全條例」o既詳細條文，即管睇下政府想點！

Re Cafu:？？？
Re Rivaldo:關你鬼事？你理得我！

>>February 14, 2003 at 1:17:26 PM GMT+8

2003 年 2 月 12 日 星期三 【雨】

講就天下無敵，做…真係有心無力…

平時咁多人o係佢身邊，我冇乜機會單對單講o野；依家得兩個人喇，我都係唔夠膽走埋去出聲！其實我o地兩個o個陣企得都算幾近，不過我竟然連行多兩步o既膽量都冇！錯過o左呢個千載難逢o既機會，真係唔知以後仲有冇！返到屋企，浸個頭落盆凍水度，o個陣我真係好想鬧自己一句：「除褲你搞乜鬼？講兩句o者，有乜好驚喎？都已經o係正隔離啦，仲要等幾時？咁簡單o既o野都冇膽做，正廢物！」
就是開不了口讓她知道，就是那麼簡單幾句我辦不到…
今日o既天氣只係我o既心情…

>>February 13, 2003 at 1:38:20 PM GMT+8

2003 年 2 月 11 日 星期二 【陰】

Octopus處男/女大碟依家好似又有機會翻生咁喎，禮拜日會上子建屋企用佢部機錄，不過就肯定冇o係K房度咁多歌揀。如果俾我唱陳奕迅o既歌，我諗我會揀《大開眼戒》或者《綿綿》。
放學o個陣子建仲問我考完CE之後上唔上獅子星號鬆番下，我就梗係想啦！我想上郵輪玩好耐o架喇！多謝哂呀子建！

俾條IQ題大家諗下先：反戰團體o既立場(猜一亞洲國家)

P.S.中巴大戰最後0比0完場！

>>February 12, 2003 at 1:46:14 PM GMT+8

2003 年 2 月 10 日 星期一 【晴】

冇公德心o既見證！Lunch竟然有人o係沙咀道球場度放狗，隻狗仲要放低o的朱古力雪糕o係左翼位近底線度！你唔好o係十二碼點度屙？
今日有個關於愛滋病o既講座，想o係度補充番o的當時我諗緊o既o野。想唔中招唔係話用安全套就得o既，其實最重要o既應該係要對性抱有一個正確o既態度o羅。性，唔係一個羞恥、唔係一個核突、甚至唔係一個鹹濕o既話題，所以我o係度都唔怕講。o係我眼中，性唔係一件隨便o既事，性係一種男女互相表達對對方o既愛意o既行為。如果一對男女o既愛未去到一個互信o既境界，我唔覺得佢o地有乜需要。有人話玩one night stand或者間中「換人」先夠high、先夠刺激，我又唔信，正如我所講，冇愛o既backup，性有乜意義？講o左咁多廢話(其實我已經盡量縮短我想講o既o野o架喇)，其實都係想講一點o者：如果人人都正確咁對待性，愛滋病同其他性病根本冇可能有機會散播！

Re邪：你話呢？

>>February 11, 2003 at 2:21:36 PM GMT+8

2003 年 2 月 9 日 星期日 【晴】

又要再返學，完全處於昏睡狀態，係lunch踢完波之後至有番o的精神，睇o黎又要慢慢操fit番自己！
紮番起條辮又俾到人另一種感覺，老實講我都冇乜idea話鍾意邊款，反正唔同o既look有唔同o既feel，紮起同放落o黎都係咁靚，up to her！

Re聰：我唔係好鍾意太靜o既環境，o尋日荃灣公共圖書館o個個最OK！

>>February 10, 2003 at 12:47:45 PM GMT+8

2003 年 2 月 8 日 星期六 【晴】

o尋晚應承o左阿聰，今日o係佢去獎勵補習o個陣霸住自修室個位。我順便帶埋o的一o的都冇做過咁滯o既功課去做，結果我做哂History，不過maths仲爭大把，我依家決定課課都做少少就算！
其實自修室o既環境都OK喎，唔算靜到離哂譜，都o岩我喎！去得過！

外流南韓球員一覽：
朴智星(荷蘭PSV)
李榮杓(荷蘭PSV)
宋宗國(荷蘭菲燕諾)
車斗利(德國比勒費爾德)
李乙容(土耳其特拉布宗)
黃善洪(土耳其?)
薛琦鉉(比利時安德烈治)
安貞煥(日本清水心跳)
洪明甫(日本廣島三箭)
柳相鐵(日本浦和紅鑽)
崔龍洙(日本古河市原)
崔成勇(奧地利維也納迅速)
金判坤(香港澎溤流浪)

Yeah!仲多過得9個o既日本o架！仲有o的有實力出國o既球員：
李天秀(超級快馬，南韓奧雲)
李東國(朝鮮核彈頭，南韓舒夫真高)
金南一(fans多過F4，南韓碧咸)
李雲在(亞洲第一鋼門，南韓舒米高)

>>February 12, 2003 at 1:28:32 PM GMT+8

2003 年 2 月 7 日 星期五 【晴】

話都冇咁快又完o左個長假，呢個假期成日都要出街，冇乜時間做到o野，所以依家反而好想快o的番學，一o黎有個正常o既時間表讀書、二o黎我其實好掛住o的同學o架！

2003年Eric好歌流行榜(第6週)：

1)第一類接觸(陳奕迅)
2)特別鳴謝(蕭正楠、關心妍)
3)雪糕車(林一峰)
4)我的驕傲(容祖兒)new
5)唔該行開(陳冠希、趙頌茹)
6)可惜我是水瓶座(楊千嬅)
7)神奇(孫燕姿)new
8)身體健康(張衛健)
9)喜歡憎你(鄭秀文)new
10)有種(鄭中基)

Re Richard:好！加油！Try our best!
Re蚊：我從來冇諗過做得哂o的功課喎，maths我一早就唔打算題題都做！
Re邪：中文剪報實掂，maths點可能做得哂？
Re黑金鋼：帝王我就驚o者，馬刺憑乜o野打低湖人？保雲mark得掂Kobe先算啦！去唔去影相？去o掛，不過仲未知得唔得閒去。

P.S.o岩o岩o係有線電影台睇完《大佬鬥和尚》，雖然之前睇過，但係都覺得o的韓片拍得好有深度，幾好笑！快o的上埋《我的野蠻女友》同《我老婆係大佬》啦！

>>February 8, 2003 at 3:01:51 PM GMT+8

2003 年 2 月 6 日 星期四 【晴】

今朝睇o左湖人對紐約o既波，真係心血少o的都俾佢o地嚇瓜！打完3節湖人lead住30分，Kobe仲要射到著哂火添！諗住第4節都會係垃圾時間啦，點知一開波湖人好似魂遊太空咁，俾紐約狂炸3分波，一追追到爭10分！雖然最後湖人都係贏o左兼夾今季第一次贏多過輸，但係我真係好驚佢o地咁o既集中力遲早再出事！而我都係一樣，再係咁成日發白日夢，出事o個個就會係我！

Re Richard:使乜講？你估我呢個比巴夫斯更巴夫斯o既巴夫斯浪得虛名o架？
Re蚊：你好過我，我成個假都o係香港過，不過同你一樣都係乜都冇做！
Re聰：人死唔一定要落地獄o既，我諗我身邊o既人個個都應該可以上天堂(大吉利是)。
Re挺：輝哥唔知你番o左o黎o丫嘛！

>>February 7, 2003 at 12:11:14 PM GMT+8

2003 年 2 月 5 日 星期三 【晴】

好耐冇踢波，今日踢番o既感覺真係high到震呀！輝哥買o左個新o既歐冠盃波，個波比一般o既輕好多，好難食得應成日炒起！我發覺自己絕對係一個比巴夫斯更巴夫斯o既巴夫斯，超多搞笑o野show哂出o黎！

Re Richard:其實史譚只係轉身慢，佢奔跑o既速度冇白蘭斯咁易俾奧雲放甩o架！白蘭斯只係包波準同企位好o者，次次直播我都見到佢剷唔應個波o既！你咪即管減o羅，反而點減都係一樣o者！
Re蚊：你真係俾人捉o左番大陸？慘情慘情！咁我都知拜神都係求心安o者，我冇話討厭拜神喎。
Re聰：何解？

>>February 6, 2003 at 12:42:06 PM GMT+8