2003 年 4 月 15 日 星期二 【晴】

今日晏晝去哂我會考要去o既咁多個考場「探路」，報番o係自己住o個區考始終好o的，起碼可以遲少少出門口！

九工：3分鐘(行路)
銘賢：5-12分鐘(搭車)
黃隸珊：8-14分鐘(搭車)
瑪利諾神父：10-20分鐘(搭車+行路)
彩虹天主教：25-30分鐘(搭車)

Re蚊：捉到冇問題o架～

>>April 16, 2003 at 1:37:41 PM GMT+8

2003 年 4 月 14 日 星期一 【晴】

今日o係平時睇開o既《東方龍門陣》度發現o左個title叫「醫護人員成犧牲品」o既專欄，想同大家分享下，唔使問當然又係我最鍾意o既陶傑所寫o架啦！

　　醫管局行政總裁何兆煒醫生終於康復。瘟疫蔓延，醫生護士最辛苦，每天多十個八個醫護人員染病，就如士兵衝上火線，敵方一陣槍響，就倒下幾個，後面的士兵再衝上去，又倒下一排。
　　憑毛澤東式的「人海戰術」來對抗非典型肺炎，憑一腔熱血、滿懷愛心，顯然不是辦法。口罩不足、防毒護袍不夠，醫護人員八小時一更，密集近距離對準肺炎病人，憑這點「小米加步槍」的配備，怎能不傷亡慘重？
　　眼見董夫人與疫區隔得遠遠的，還全副好似登陸火星的超級太空裝，一面向義工與師奶大喝：記住要「洗手、洗手、洗手」，想想政府醫院裡多少前線工作人員，要四人輪一件防病毒護袍，難怪這幾天，民間流傳的一句話，看見何兆煒染上肺炎病倒，人人都認為：「最應該中招的那個人，偏偏沒有中，何兆煒卻居然中招了，上天何其殘酷！」
　　全港醫護人員為了一個無能政府遲緩的反應，賠上了生命，犧牲了安全，眼見每天都有拚搏捨身的醫護人員倒下去，特區政府卻無一人為「一月廣東爆發疫症，三月特區仍然毫無準備」的決策遲鈍而「問責」，行政會議成員仍然七嘴八舌，高談闊論，這是哪一門的「高官問責制」，哪一科的「團隊精神」？
　　有人還在繼續愚民，呼喊「大難當前，不要批評政府，要團結一致」，笑話。今日的大難，政府就是始作俑者，瘟疫醞釀多時，「粵港合作委員會」、「粵港聯席會議」，空有其殼，無人做事，粵省當局拒不遞交病疫資料，董某與特府畏縮，此一關鍵責任，必須追究，醫護人員在災後可考慮向特區政府興訟索償。

o的醫護人員真係慘，董班子搞出o黎o的o野一鑊大過一鑊，鑊鑊都有人無辜受害。依家輪到o的前線醫護人員為佢o地o個班無能o既上司代罪，可憐可憐！我對佢o地唔單止係尊敬，仲有同情！

Re蚊：你都有曬我o既相o丫嘛，o係o個度扣番o羅。
Re Cafu:好似係～

>>April 15, 2003 at 1:28:22 PM GMT+8

2003 年 4 月 13 日 星期日 【晴】

依家Exam連載緊一篇叫《Eye Shield 21》o既運動漫畫，內容好特別，講o既係冇乜香港人玩o既美式足球。睇o左差唔多10期，覺得美式足球又好似幾正喎，只係o的球例複雜o左少少，o的器材多o左少少。如果俾我打美式足球，我諗我可以做「四分衛」，傳波俾人跑陣；做「線鋒」o係最前面掩護隊友跑陣或者都可以；「跑衛」應該唔得，我唔夠快，一定俾人擒低！不過正如我之前所講，o係香港根本冇人玩美式足球！

Re蚊：盛惠9蚊～

>>April 14, 2003 at 1:29:31 PM GMT+8

2003 年 4 月 12 日 星期六 【晴】

今日拎o左o的相去翻哂，要俾98張相26個人，其中子建同阿聰已經佔o左差唔多一半。係咁意收番你o地1蚊1張回本唔過份o掛？

>>April 13, 2003 at 1:26:28 PM GMT+8

2003 年 4 月 11 日 星期五 【晴】

美英聯軍一路都話自己係「解放」緊伊拉克，推翻獨裁o既侯賽因政權。呢幾日都o係電視睇到巴格達o既情況，政權就真係推翻o左，o的人亦都「解放」o左 — 完全冇王管，想點就點、想搶o野就搶o野、想放火就放火、想打侯賽因o的畫就打，真係「自由」！美英聯軍講得話要「解放」伊拉克，就唔該負埋維持社會秩序呢個責任啦！仲有，布殊口口聲聲話要解除伊拉克o既武裝，銷毀大殺傷力武器；依家打o左三個幾禮拜，o的大殺傷力武器o係邊？
冇計啦，呢個世界拳頭大o既話事，拳頭大o既就做「世界警察」。差人大哂咩？

2003年Eric好歌流行榜(第15週)：

1)下一站…天后(Twins)
2)我代你哭(鄭中基)
3)優先訂座(關心妍)
4)我找到了(何韻詩)
5)甚麼都不怕(楊千嬅)
6)抗戰二十年(Beyond)new
7)第二世(謝霆鋒)
8)發奮(趙頌茹)new
9)兄妹(陳奕迅)new
10)半成年(Shine)re

>>April 12, 2003 at 2:28:54 PM GMT+8

2003 年 4 月 10 日 星期四 【晴】

今日冇乜特別o野好講，都係做平時做開o既o野，又係做到死…

>>April 11, 2003 at 1:44:17 PM GMT+8

2003 年 4 月 9 日 星期三 【雨】

心情好矛盾…
當初美國以「解放者」(liberator)o既姿態郁手打伊拉克，我認為美國係「入侵者」(invader)，就算伊拉克人點憎侯賽因呢個「獨裁者」(dictator)，都會為o左保衛自己o既家園而對抗美國，即係好似八年抗戰o個陣中國人齊心抗日咁。點知聯軍沿途都冇乜遇到好大o既抵抗就打到入巴格達，o的伊拉克人仲當佢o地係神咁拜。我一直都認為呢場仗係「不義之戰」，不過睇到呢o的情景之後，我係咪應該改變立場，其實呢場就好似二次大戰同波斯灣戰爭咁越早打越好呢？

Re Cafu:我有172cm高。我o既意思係指o的人o既答案多數話我對手冇166cm咁長，所以咪話「唔算短」o羅！同埋…我頭先再度過…原來唔止166cm…

>>April 10, 2003 at 1:09:37 PM GMT+8

2003 年 4 月 8 日 星期二 【晴】

o尋半夜睇皇馬對曼聯，曼聯輸o左3比1。明顯皇馬中前場o既級數高曼聯一班有多，曼聯打歐冠盃真係唔可以冇o左華朗，好彩依家搶番個作客入球，番奧脫福再鍊過啦！
「休息」o左一日之後，今日繼續博殺。先做o的History MC輕鬆下，之後一路刨Econ一路放蚊，其實Demand & Supply好難o架！
聽到子建講o左個幾壞o既消息…不過好多謝你o地仲係咁諗計呀！

大部份人都已經做o左我個test喇喎，不過o的成績就…都係因為我o的題目出得深o者，我相信大家都好了解我o既，依家開估啦！
第一題：最淺應該係呢題，大家覺得我似唔似典型o既獅子座？(16個答o岩)
第二題：又考起人o既，我對手唔算短，伸長有Juno咁高(166cm)o架！(4個答o岩)
第三題：《Shall We Dance? Shall We Talk!》呢隻碟做得好出色，我都好想要番隻，不過《The Easy Ride》先係我第一隻Eason碟。(兩個答o岩)
第四題：各位俾我個名誤導喇，巴夫斯o既踢法的確係深深咁吸引住我，而我打龍門亦都打到好似巴夫斯咁，不過我最鍾意o既龍門係「90年代世界第一鋼門」奧脫福門神舒米高o羅！(冇人答o岩)
第五題：冇計，呢間學校除o左肥鵬同豬紅之外都應該冇人知我媽咪姓何！(兩個撞o岩)
第六題：我絕對係標準o既曼聯迷，不過95年我初初睇波o個陣，最鍾意有齊迪保亞兄弟、雲達沙、古華特、列馬倫同簡奴呢o的新星，兼且贏埋o個年歐洲冠軍球會盃冠軍o既阿積士！(兩個答o岩)
第七題：我成日話唔揀飲擇食，其實我覺得芒果陣味怪怪地o羅！同埋我好鍾意食蔥o架！(冇人答o岩)
第八題：我o既公民意識係好強，不過咁耐以o黎我只係去過o個次「反23條大遊行」！(8個答o岩)
第九題：1B(35), 2C(39), 3C(37), 4B(35), 5B(36)(兩個答o岩)
第十題：講你o地聽都唔信，我依家最勁o個科o係F.1下學期係最廢o架！(4個答o岩)

Re蚊：有一次放學講過俾你聽o架！

>>April 9, 2003 at 1:34:23 PM GMT+8

2003 年 4 月 7 日 星期一 【雨】

個mock完o左，我決定relax下—唔溫咁耐書。睇番份Econ，MC錯得比預期多，有好多大意o既失望原來我都o既表現都唔係想像中咁理想，要再加把勁！

Re蚊：我記得我講過俾你聽我邊個星座o架！
Re Rivaldo:完o左喇，不過好似考得唔係咁好。

>>April 8, 2003 at 1:36:17 PM GMT+8

2003 年 4 月 6 日 星期日 【雨】

今日考埋最後一科Maths，睇落就好淺，其實暗藏殺機，我俾佢trap完一鑊又一鑊，死得！之後派Geog卷，死埋！做o個陣唔覺得深，點知Paper 1勁低分，如果唔係MC癲o左，D都唔知有冇！見到佢知道o左自己o既成績之後好似好失望咁，有o的躁。唔好唔開心啦！一次衰o左咪下次努力過o羅！最緊要係知道自己錯o係邊，下次唔會再犯。

Re蚊：我o的題目出得難o者～不過有一條你冇乜理由答錯喎！

>>April 7, 2003 at 2:40:26 PM GMT+8