2003 年 7 月 24 日 星期四 【雨】

非常極度超級享受今日！多謝蚊，因為係佢發起o既！
朝早同Fan、蝦、六叔同Kampo睇《戀上你的床》，套戲o既意識好大膽，挑戰三級極限，全場笑爆咀，除o左六叔！
之後一大班人入沙田踩單車，o係平日租一日都係$20，抵！因為有o的人，唔多識踩，花o左唔少時間教佢o地，雖然有o的最後都未掌握得到，不過唔緊要啦！真係臥虎藏龍，Lo一招「90度旋身凌空飛車」令全場嘆為觀止，而我都唔執輸，所有上斜位都難唔到我！
我o地只係踩到麗豪酒店對面(隔住城門河)就掉頭番歸，雖然唔算踩得好耐，不過都足以令我腎上腺素直線上升！呢個暑假點都要踩多次！

>>July 26, 2003 at 5:55:37 PM GMT+8

2003 年 7 月 23 日 星期三 【陰】

「伊布都」終於走o左，聽日求神拜佛唔好落雨…
今日晏晝出尖咀，聽專上教育學院搞o既talk。之前我一直都只係諗住直升中六，考A-Level，再入大學。不過因為大學遲o的會「三改四」，CE同A-Level會合併，我o地可能會係最後o個幾批人考A-Level，如果考唔上，讀o黎都蹝氣。依家有另一個選擇，有幾間有水準o既外國大學會o係香港辦課程，CE有5分就可以報讀，避開唔使考唔知仲有冇用o既A-Level，而且最後3年就可以有學士學位，慳番唔少時間。
我直頭企o左o係米字路口上面，升中六問題應該唔大，不過入唔入到大學就好難講。如果入唔到，讀預科都係冇意義；讀遙距課程，好多國家都認可，而且仲有機會申請綠咭去美國打工。點算好呢？

Re聰：你唔知「伊布都」係乜咩？
Re邪：睇o左，不過唔多明…

>>July 24, 2003 at 1:35:29 PM GMT+8

2003 年 7 月 22 日 星期二 【雨】

雲尼斯達萊、傑斯、蘇斯克查，仲有新加盟o既貝利安各建一功，曼聯o係季前「歐聯挑戰之旅」o既第一場，4比0掃低蘇格蘭些路迪，曼聯全場佔盡優勢，完全睇唔出碧咸離隊o係球場上對曼聯有乜影響！
o尋日報導o左曼聯季前o既人腳變動，今日就徹底分析曼聯今季o既陣容，展望今季o既形勢。
最佳陣容(4-2-3-1)：

　　　　　　　　　巴夫斯
加利仔　　李奧費迪南　施維斯達　　奧沙
　　　　　　　堅尼　　迪贊巴
　　　　史高斯　　　華朗　　傑斯
　　　　　　　　雲尼斯達萊

重要後備：侯活　布朗　畢特　科東尼　蘇斯克查　貝利安

費格遜表明會o係歐聯用防守性多o的o既4-2-3-1陣式，上季已經睇得出堅尼已經開始走下坡，唔會再好似以前咁「自己禁區頂打到去人o地禁區頂」，所以喀麥隆中場迪贊巴會o係中場分擔堅尼o既掃蕩工作。
雲尼斯達萊上季季尾o既演出已經唔使再多講，今季仍然係單箭頭o既佢唔單止會繼續做「入球機器」，仲會利用佢o既控球能力牽制對手兩三個守衛，製造空位俾隊友後上攻門。
史高斯呢個後上前鋒位置上會稍為偏右，不過主要都係cut番入禁區，o係雲尼斯達萊附近捕捉射門機會。
傑斯以輔鋒o既姿態後上支援雲尼斯達萊同史高斯，或者自己硬闖攻門。
華朗o係碧咸離隊、堅尼淡出之後o既分波責任會更加重大，而且佢要負責串連起前後場球員，希望佢真係可以安頓落o黎。
蘇斯克查、科蘭、貝利安，仲有唔一定可以成功加盟o既基巴遜(仲搞緊工作證)都會係前場o既重要後備力量，當然唔可以數漏「皇牌7號」費列查啦。
碧咸離隊、傑斯移入中路，左右兩閘o既出擊能力會係曼聯可唔可以拉開對手密集防線o既關鍵。已經見到加利仔冇o左碧咸o係佢前面，更加放膽後上助攻，而奧沙同施維斯達都唔使多講啦！
最後一關其實應該繼續重用巴夫斯，上季佢再冇嚴重犯錯，曼聯o係上季英超失波最少都係靠佢；侯活、卡路爾同列卡度都只可以等機會。
其實曼聯唔係完全冇隱憂，雲尼斯達萊上季包辦o左曼聯三份之一o既入球，如果雲尼斯達萊有乜冬瓜豆腐，曼聯o既進攻好可能會陷於癱瘓。不過睇番對些路迪場波，其他曼聯中前場球員表現都相當對辦，貝利安睇o黎冇入錯貨。
另外中堅布朗會養傷到年尾，曼聯o係季初只係得5個後衛(加利仔、菲臘仔、李奧費迪南、施維斯達、奧沙)可以調動，或者勉強將堅尼移後打中堅都得，不過要長遠解決後防兵源嚴重不足o既問題，費格遜有必要o係歐聯註冊期限之前收購一個有份量o既後防球員補充兵源。之前傳過o既麥薩斯，甚至o係AC米蘭失寵o既馬田拿臣都係唔錯o既選舉。
以實力同球員o係重要關頭o既心理質素，曼聯要衛冕聯賽冠軍絕對唔難。不過可唔可以重奪失落o左4年o既歐聯冠軍仍然相當有保留，始終曼聯o係歐洲o既實力仲未算最頂班，同皇馬仲有一段距離，就算抽籤有利，曼聯最多只可以打入四強。
不過身為曼聯球迷，當然希望曼聯可以再次成為「三冠王」啦！

Re邪：……

>>July 23, 2003 at 8:49:01 AM GMT+8

2003 年 7 月 21 日 星期一 【晴】

聽日曼聯會o係美國西雅圖對同些路迪踢今季第一場季前熱身賽，正式開始2003-2004球季。今日先回顧番呢個暑假曼聯o係轉會市場o既動作，下次再詳細分析曼聯今季o既形勢。

加盟：
基巴遜(巴西中場)　　from巴蘭尼斯　　　　680萬鎊
迪贊巴(喀麥隆中場)　from南特　　　　　　350萬鎊
侯活(美國門將)　　　from紐約大都會明星　230萬鎊
紐美亞(德國中場)　　from法蘭克福 　　　　不詳
貝利安(法國翼鋒)　　from新特蘭 　　　　　自由轉會

離隊：
碧咸(中場)　to皇家馬德里　2500萬鎊
洛查(後衛)　to般尼　　　　自由轉會
韋伯(前鋒)　to屈福特　　　自由轉會

傳聞交易：
朗拿甸奴(巴西輔鋒)　　from巴黎聖日耳門　(轉投巴塞隆拿)
昆利斯馬(葡萄牙右翼)　from士砵亭　　　　(同上)
杜夫(愛爾蘭左翼)　　　from布力般流浪　　(轉投車路士)
謝列美(喀麥隆中場)　　from皇家馬德里　　(同上)
基維爾(澳洲左翼)　　　from列斯聯　　　　(轉投利物浦)
古華特(荷蘭前鋒)　　　from巴塞隆拿　　　(續約)
祖亞昆(西班牙右翼)　　from貝迪斯　　　　(告吹)
雲貝頓(比利時中堅)　　from馬賽　　　　　(不了了之)
麥薩斯(法國中堅)　　　from歐塞爾　　　　(同上)
華朗(中場)　　　　　　to車路士　　　　　(未證實)
傑斯(左翼)　　　　　　to國際米蘭　　　　(曼聯拒絕出售)
奧沙(後衛)　　　　　　to皇家馬德里　　　(天方夜譚)
雲尼斯達萊(前鋒)　　　to巴塞隆拿　　　　(同上)
科蘭(前鋒)　　　　　　to貝迪斯　　　　　(告吹)

P.S.超乞人憎o既「伊布都」，識趣就即刻同我消失！

>>July 27, 2003 at 8:40:27 AM GMT+8

2003 年 7 月 20 日 星期日 【陰】

為小抹香鯨默哀…

>>July 22, 2003 at 3:04:48 AM GMT+8

2003 年 7 月 19 日 星期六 【晴】

原來我一直都令到你咁唔開心，好對唔住…
真係好對唔住…

Re聰：篤下波囉，o的數我會儘快追番o架喇。

>>July 20, 2003 at 3:28:33 AM GMT+8

2003 年 7 月 18 日 星期五 【晴】

今日係子建o既正日17歲生日，Happy Birthday!o尋晚BBQ，今朝再去唱K，老實講我唔太鍾意去Neway唱，7個人都係唱得3粒鐘，下次都係去番加洲紅！都唱o左好多歌，《與我常在》、《簡易而隆重》同《高手》都係第一唱，下次要再唱！
之後幫人曬番o係Grad Din影o既相，因為我呢排好手緊，麻煩各位$1一張！

2003年Eric好歌流行榜(第29週)：

1)龍爭虎鬥(楊千嬅)
2)窮風流(黃耀明)
3)十面埋伏(陳奕迅)
4)高手(鄭中基)
5)同班同學(梁詠琪)
6)三千零一夜(李克勤)
7)多謝失戀(Twins)new
8)大暴走(鄭秀文)new
9)心淡(容祖兒)
10)披頭四(梁漢文)new

>>July 19, 2003 at 9:26:42 AM GMT+8

2003 年 7 月 17 日 星期四 【晴】

聽日係子建17歲生日，今晚佢約我o地10個人一齊殺上佢屋企BBQ慶祝。我o地都唔多識透爐，要子建daddy幫手先搞得掂，麻煩哂！不過有o的人上o左去都唔多燒，淨係o係佢間房同人chat ICQ，2130就走！我o地坐下傾下燒下，玩到成0045先走，冇的士肯上o黎載我o地，結果我、聰、蚊同魚要o係油柑頭村行落麗城截的士出荃灣，最後我要0200先番到屋企！今晚玩得好開心，好多謝有排都唔會洗枕頭先床褥o既子建！

P.S.我冇錢買禮物俾子建，唯有送住張《進攻足球》隨書附送o既皇馬碧咸poster俾佢頂住檔先啦！

>>July 19, 2003 at 7:58:21 AM GMT+8

2003 年 7 月 13 日 星期日 【晴】

正到爆啦～
今日社際drama，我番o左學校睇，順便去staff room幫手執呢樣執o個樣。晏晝食完飯又番去幫手，之後o係好突然o既情況下去o左red box唱K，呢排食o左好多煎炸o野(尤其o係長洲)，把聲麻麻，唱得唔係太好，最失望都係遲o左唱《一句到尾》同《徒然》！
Drama全場總冠軍係松社，不過我絕對開心過松社上下100倍！

P.S.原來我兩年o黎都食住隻死貓，依家沉冤喇！幾時得雪呢？

>>July 15, 2003 at 3:27:55 AM GMT+8

2003 年 7 月 12 日 星期六 【晴】

今日o係中環遮打花園有個2003民主大會，有至少20000人參加，迫爆成個會場。
大會o既主題係「啟動民主改革，重建香港社會」，好多嘉賓都有上台講o野，連平時例牌唔去集會o既陳日君主教都上埋，好！李鵬飛呢句最精警：「話推行民主係唔愛國唔愛港，o個o的人先係說三道四、胡說八道！」而伍展邦亦都話：「我o地年青人唔係好似所諗咁淨係識玩、識讀書，我o地都會關心呢個社會，為自己o既未來出一分力！」民主鬥爭唔係一朝一夕就可以成功，要薪火相傳，依家香港有咁多對社會有承擔o既年青人(包括我)，有救喇！
今日香港人o既訴求係：政府要立即推行民主政制改革，令2007年行政長官同2008年立法會所有議席都要由全民直選產生！

2003年Eric好歌流行榜(第28週)：

1)高手(鄭中基)
2)十面埋伏(陳奕迅)
3)窮風流(黃耀明)
4)龍爭虎鬥(楊千嬅)
5)心淡(容祖兒)
6)同班同學(梁詠琪)new
7)我太強(關心妍)
8)蛋炒飯(庚澄慶)new
9)三千零一夜(李克勤)new
10)明日有明天(陳慧嫻)

>>July 15, 2003 at 3:26:56 AM GMT+8