2003 年 7 月 7 日 星期一 【晴】

今日好有可能係我o係荃官生涯o既最後一個活動－謝師宴。
如果我o係呢日魂歸天國，我相信我只會有一個死因－死於失血過多！
應承o左Mina做receptionist，1700就去到會展，搞呢樣搞o個樣，1900過外先番入席。全F.5聚首一堂，仲有全校教師，當然唔少得校長啦！會展紫荊廳o的o野老實講都唔係咁好食，少少就已經食唔落。不過我o地今晚o既主題都唔係食o野，大會搞o左抽獎、遊戲俾我o地玩，我o地個個都玩得好癲，又周圍影相，加埋個重要因素，$350超值啦！多謝徐浩文佢o地搞o左個咁成功o既grad. din.！
拎埋本同學錄番屋企，一睇就見到有o野錯o左，校對失職喎。
不過…完埋呢日，下次見到大家就會係放榜日喇，呢5年o係荃官發生o既一切一切，我呢一世都唔好忘記o架！

>>July 9, 2003 at 7:11:29 AM GMT+8

2003 年 7 月 4 日 星期五 【晴】

徹底o既失望…
原來50萬人上街都唔足以令佢醒覺，佢游係識講「早晨」，要自由黨宣佈倒戈，佢先敷衍一下，修訂「國安條例草案」幾條最具爭議性o既條文，不過就堅持唔會押後，七月九號將草案提交俾立法會二讀同三讀。
我再冇o野好講，修改三條「最具爭議性」o既條文，咁其他一樣「具爭議性」o既呢？我最唔明點解政府到呢個地步仲要死守七月九號呢條「死線」？老懵董由此至終根本完全冇真心聽取民意，為o左討好我o地先俾少少甜頭出o黎。既然政府不知悔改，漠視民意，我o地都無謂再忍佢。各位，七月九號立法會見！話之中區係咪只係容納到一萬人！

2003年Eric好歌流行榜(第27週)：

1)十面埋伏(陳奕迅)
2)我太強(關心妍)
3)邊走邊愛(謝霆鋒)
4)高手(鄭中基)
5)窮風流(黃耀明)re
6)簡單而隆重(Shine)
7)心淡(容祖兒)new
8)龍爭虎鬥(楊千嬅)
9)明日有明天(陳慧嫻)new
10)如果有一天(劉德華)

>>July 6, 2003 at 2:53:31 AM GMT+8

2003 年 7 月 3 日 星期四 【晴】

空歡喜一場…

Re魚：冇錯！香港人就係有呢種精神！

>>July 4, 2003 at 9:26:16 AM GMT+8

2003 年 6 月 30 日 星期一 【晴】

香港人，今日為自己爭一口氣！


當天空手空臂我們就上街
沒甚麼聲勢浩大
但被不安養大　不足養大
哪裡怕表態

當中一起經過了時代瓦解
十大執位再十大
路上風急雨大　一起嚇大
聽慣了警誡

應該珍惜的　即使犧牲了
激起的火花　仍然照耀

Woo…你我霎眼抗戰二十年
世界怎變　我答應你那一點　不會變

幾響槍火敲破了沉默領土
剩下燒焦的味道
現在少點憤怒　多些厚道
偶爾也很燥

不管這種爭拗有型或老土
未做好的繼續做
活著必須革命　心高氣傲
哪裡去不到

他雖走得早　他青春不老
灰色的軌跡　磨成血路

Woo…你我霎眼抗戰二十年
世界怎變　永遠企你這一邊
Woo…哪怕再去抗戰二十年
去到多遠　我也銘記我起點　不會變

最令人為之一振o既唔係50萬人、50萬件黑衫，而係社會唔同階層，法律界、醫護界、勞工界、教育界、甚至中學生都一齊上街遊行。人多但係有秩序，反映香港人絕對有素質，遇到危機更加會團結一致，不畏強權，更不畏惡法！
我約o左子建佢o地一班人一齊去遊行兼做義工，不過佢o地臨時又話唔做，遲o的先到，最後佢o地join唔到我o地，仲o係1730就晨早o係維園起點走人！結果得番我，仲有蚊同魚去中央圖書館，「中學生關注基本法23條立法聯盟」o既集合地點幫手。原定出發時間係1500，不過我o地要到1700過外先出到高士威路o既大隊，1910仲未到銅鑼灣sogo，最後因為人太多我o地上唔到總部，只可以o係皇后大道中解散，o個陣已經係2005，對腳行到軟哂，件衫俾o的汗整濕哂，不過可以參與遊行表達自己o既意見，絕對值得！蚊同魚其實好快已經開始冇力，不過都堅持到底，佩服佩服佩服！
香港人追求民主自由o既抗爭仲未完結，約定大家，七月九日，一齊包圍立法會大樓！
打倒23惡法！打倒董建華！打倒庸官！打倒保皇黨！

>>July 2, 2003 at 5:04:47 AM GMT+8

2003 年 6 月 29 日 星期日 【晴】

過o左好充實o既一日，總之就係好正好正啦！

P.S.再次呼籲各位，聽日參加「七一大遊行」，齊心反廿三！大家想join我o地可以o係聽日1145銅鑼灣地鐵站F出口等！多謝！

>>June 30, 2003 at 10:37:14 AM GMT+8

2003 年 6 月 28 日 星期六 【晴】

今日去o左買去謝師宴o既衫。好彩我mock考得好，媽咪肯開大o的budget俾我揀衫。恤衫、西褲都幾滿意，不過媽咪點都要我淨係可以揀「番學鞋」，呢樣我最唔滿意，最後全身買o左$550唔使，比起某o的人，好似唔算大手筆！

>>June 29, 2003 at 10:52:03 AM GMT+8

2003 年 6 月 27 日 星期五 【晴】

今日去o左睇《千機變》，好耐冇入戲院，更加好耐未見過全場坐爆哂！套戲講真都幾唔錯，題材新，o的特技好精彩，搞笑位又多，仲有Twins同Edison第一次拍動作片算好好o架喇！劇情講乜？有o的人未睇o架，無謂講啦。
之後同子建一齊出旺角陪Fan同蚊行街，聽子建同Fan講o左o的荃官秘史，簡直唔敢相信！

2003年Eric好歌流行榜(第26週)：

1)邊走邊愛(謝霆鋒)
2)我太強(關心妍)
3)十面埋伏(陳奕迅)
4)簡單而隆重(Shine)
5)千金(Twins)
6)高手(鄭中基)new
7)如果有一天(劉德華)
8)六樓后座(林嘉欣)
9)落錯車(鄭秀文)
10)龍爭虎鬥(楊千嬅)new

Re邪：當乜鬼飯食o丫？衰o左喇，有線仲未覆我！

>>June 29, 2003 at 4:21:48 AM GMT+8

2003 年 6 月 26 日 星期四 【晴】

o尋晚發生一宗球場慘劇…
州際國家盃四強，喀麥隆對哥倫比亞o個場波，打到72分鐘，效力曼城o既喀麥隆中場科爾突然o係中圈附近趴低o左。佢當場冇o左心跳，搶救45分鐘之後宣佈不治，終年28歲。
我唔算係佢o既球迷，不過知道(而且係親眼目睹)佢得28歲，正值球員生涯最當打o既時候離開，不期然都會有o的心酸。
科爾o既離開帶俾我一個啟示：一個職業足球員，仲要係以體力驚人見稱非洲球員，都可以o係球場突然間game over，何況係普通內真係唔知自己會幾時突然間同各位講bye bye。生命無常，呢分鐘唔知下分鐘會發生咩事，所以更加應該趁自己仲健康o既時候，珍惜眼前擁有o既一切！

祝科爾早日安息，喀麥隆全隊上下可以克服哀痛，打低法國，將冠軍獎盃獻俾佢！

>>June 27, 2003 at 12:00:58 PM GMT+8

2003 年 6 月 25 日 星期三 【晴】

今日番學校拎mock成績表，本來我已經預期自己會有進步，不過我點都估唔到自己可以去到呢個地步，太驚喜喇！原來我真係得o架，我真係做到o架！不過雖然係咁，我多數都應該唔會番荃官，o的o岩我o既科未必留到俾我！
其實仲有個升學講座，聯招o既程序太複雜，聽極都唔多明。不過算啦，我有信心我唔使去聯招搵位！

P.S.呢樣咁高難度o既o野我都做到，另一樣我遲早都一定會做到！

>>June 26, 2003 at 10:59:35 AM GMT+8

2003 年 6 月 23 日 星期一 【晴】

阿聰約我去佢名逸居o既clubhouse打桌球。其實我已經有超過一年冇打桌球，依家再落番波檯o既感覺好正。打o左三場，一勝兩負，復出o既第一次已經算係咁，打番起條癮，以後暑假又多項節目！

>>June 24, 2003 at 10:59:57 AM GMT+8