2003 年 6 月 20 日 星期五 【雨】

「民間人權陣線」呼籲廣大市民，七月一日參加「反對政府就基本法23條立法大遊行」！特區政府企圖以「維護國家安全」為名，藉立法打壓香港人的言論、新聞、結社自由，嚴重破壞一國兩制。
特區政府三番四次歪曲民意，指諮詢文件中，「大部分港人支持立法」，更把大量反對立法的意見書歸類為「不能分類」，欺騙市民。
特府更指使「保皇黨」在立法會內草草通過首讀、二讀及三讀程序，務求令立法工作在七月九日立法年度結束前完成，完全漠視市民要求作更長時間諮詢的意見。
為了捍衛自身基本權利和自由，「民間人權陣線」再次呼籲市民於當天穿上黑色服裝出席這次集會，以顯示給特府一個明確的訊息：香港人不會接受23條立法，亦不會懼怕惡法，更會抗爭到底！
即使未能抽空出席遊行，也可以穿上黑色服裝，對特府的惡行作無聲抗議！

如果你o地想一齊參與，請同我聯絡，多謝各位！

2003年Eric好歌流行榜(第25週)：

1)千金(Twins)
2)如果有一天(劉德華)
3)六樓后座(林嘉欣)
4)邊走邊愛(謝霆鋒)re
5)落錯車(鄭秀文)
6)簡單而隆重(Shine)
7)十面埋伏(陳奕迅)new
8)我太強(關心妍)re
9)七友(梁漢文)
10)窮風流(黃耀明)new

>>June 29, 2003 at 4:22:09 AM GMT+8

2003 年 6 月 17 日 星期二 【晴】

兜兜轉轉，初時話皇馬、後來又A米又國米又羅馬、之後巴塞好似最有機，最後始終都係皇馬。碧咸已經肯定會以2500萬鎊o既超值價離開效力o左足足12年o既母會曼聯，轉投皇馬。
碧咸1991年簽約曼聯做學徒球員；1995年第一次為A隊上陣；1996年一個半場笠射令佢成名；1997年簡東拿退休之後繼承佢o既7號波衫；1998年世界盃一次「虎尾腳」令佢成為罪人；1999年帶領曼聯贏「三冠王」；2000年第一次戴上英格蘭國家隊o既隊長臂章；2001年完場前一刻o既罰球令佢由罪人變英雄；2002年世界盃一個十二碼令佢自己報番4年前o既一箭之仇；到o左2003年，佢終於都離開曼聯，去西班牙闖一番事業。希望佢轉會之後仍然o係英格蘭國家隊有好表現！
最初傳碧咸會走o個陣，身價係4000萬，之後越壓越低，得番2500萬。本來我覺得曼聯4000萬賣碧咸係絕對賣得過o既，用番o個筆錢o黎增兵，不過依家賣得咁平，又好似幾唔抵賣喎！單計碧咸o既市場價值就應該至少3500萬啦！
碧咸o既離開己成事實，曼聯要做o既係點樣補充實力。朗拿甸奴最大機會加盟，而麥薩斯、艾斯古迪同雲貝頓都係增強後防兵源o既人選。小弟另外特別推介韋斯咸前鋒迪科爾荷蘭PSV右翼羅美度！

Re蚊：等有線真係請o左我，出埋糧先啦～

>>June 19, 2003 at 2:21:51 AM GMT+8

2003 年 6 月 14 日 星期六 【雨】

o尋日過o左第一關，今日上有線總台參加覆試。我o地班walk-in入圍o既參賽者要做面試，由李榮基或者Keyman主持，我入o左李榮基間房。先係一分鐘爆肚，我揀做自我介紹，之後係五分鐘講波。我真係好彩，我講o個場係英格蘭對巴西o既上屆世界盃8強，仲要係奧雲入波o個段，我超熟！連我都覺得自己講得好，睇o黎有機會俾有線揀中上course喇！

Re蚊：嘻～OK啦～我諗我得o掛～

>>June 16, 2003 at 3:46:34 AM GMT+8

2003 年 6 月 13 日 星期五 【雨】

今日我去o左沙田新城市廣場參加有線電視o既「第三屆新一代足球評述員大招募」，大會俾50個事前冇報名o既walk-in現場參賽，第一部份o既筆試完全冇難度，超容易就做完，之後o個part係即場o係一大班人面前講波！有線揀o左今季曼聯主場對阿仙奴o既足總盃16強(即係傑斯對住空門炒機o個場)俾我o地講，每人接力講30秒，我負責阿仙奴打開記錄之後o既一次曼聯攻勢，自問講得幾好，最後o係50揀20裡面成功過關，進入聽日o係有線總部o既覆試！

2003年Eric好歌流行榜(第24週)：

1)如果有一天(劉德華)
2)千金(Twins)
3)落錯車(鄭秀文)
4)音樂人民(盧巧音)
5)七友(梁漢文)
6)六樓后座(林嘉欣)new
7)救救我(鄭中基)
8)簡單而隆重(Shine)new
9)易愛難收(黃凱芹)new
10)愛一個人(李克勤、陳慧琳)

Re邪：算啦，影響唔大o既。我呢個暑假都唔知做乜好，依家總算seem to be有o的o野做。
Re挺：你同Richard講啦～

>>June 29, 2003 at 4:22:33 AM GMT+8

2003 年 6 月 11 日 星期三 【雨】

今日考埋最後o個科oral，我1600入考場第一組考，1700就出得番o黎，勁快手！Role Play發揮一貫o既水準，應該冇走雞；反而一直係我弱項o既Group Discussion就表現完全超出預期！o的partner個個有番少少底子，我可以打出最佳水準，英文呢科有望C到喇！

>>June 12, 2003 at 12:41:48 PM GMT+8

2003 年 6 月 10 日 星期二 【雨】

繼續o尋日o既話題。我係認為新巴同城巴合併係件好事o既，可能會有人話：「兩巴合併之後，巴士公司壟斷市場，冇o左競爭，可以隨意加價，服務質素亦會下降。」我試下逐隻字解釋先。
壟斷市場 + 冇競爭：港島區地鐵(快)、電車(平)，仲有紅綠van(靈活)，各有比巴士優勝o既地方，巴士o係港島區冇明顯優勢，競爭唔細。
隨意加價：唔似得地鐵、九鐵o個o的「獨立王國」想幾時加價就幾時加價，專利巴士公司o既所有票價變動(包括減價)都要先得到運輸署o既批准，唔存在隨意加價o既問題。
服務質素下降：首先何謂高質素服務？新巴同城巴為o左搶客，明知條線需求唔太大都加密班次，搞到架架車都得小貓三兩隻，仲要通街都係巴士，製造不必要o既空氣污染，咁樣叫優質服務？
港島區路線重疊o既問題實在嚴重得好厲害，單係東區小西灣就已經有6條線出中環、金鐘、灣仔一帶(8, 8P, 8X, 780, 788, 789)，其他地方都唔好得去邊。合併之後會有路線重組，多餘同冇生存空間o既路線會被淘汰，整體質素反而會有改善。
不過在巴士迷o既立場，合併之後可能再冇機會見到「黃老太」喇！

>>June 12, 2003 at 12:25:13 PM GMT+8

2003 年 6 月 9 日 星期一 【雨】

鄭裕彤家族旗下o既周大福本身已經全資擁有新巴，o尋日佢o地宣佈以22億港元由Stagecoach手上買起o左成間城巴，出面即刻謠言滿天飛，話新巴遲早都會同城巴合併，之後港島區o既專利巴士服務會出現番好似以前中巴咁「一巴獨大」o既局面。短期內新巴同城巴都應該唔會合併住，不過呢個只係遲早問題，所以出面就開始討論兩巴應唔應該合併係好事定壞事。我點睇？賣個關子先，聽日先慢慢講。

Re蚊：依家清醒番喇，追求未來o既彩色世界o羅！

>>June 10, 2003 at 2:37:02 PM GMT+8

2003 年 6 月 6 日 星期五 【雨】

呢掛好悶好悶，開電視睇Star Sports播緊o係馬來西亞吉隆坡o既「世界室內五人足球錦標賽」消磨時間。五人足球同我o地平時踢開o既足球好唔同，五人足球場同龍門框都好細，非常講究球員o既腳下功夫同射術；除o左龍門之外，其餘四個球員要兼顧進攻同防守(當然龍門都可以後上助攻)，每個球員都要有好高o既閱讀球賽能力，佢o地之間亦都要有高度默契。我諗我o地班應該打唔到五人足球喇，我o地大部分球員都係粗枝大葉，冇乜細膩o既技術，我o地夾硬去獻醜盞好似南非咁－俾人狂炒30比0！

2003年Eric好歌流行榜(第23週)：

1)千金(Twins)
2)七友(梁漢文)
3)落錯車(鄭秀文)
4)救救我(鄭中基)new
5)邊走邊愛(謝霆鋒)
6)如果有一天(劉德華)
7)愛一個人(李克勤、陳慧琳)
8)我太強(關心妍)re
9)舞吧舞吧(鄭希怡)new
10)音樂人民(盧巧音)new

Re蚊：多謝關心～可能係我諗得太多o者，其實我一直都好有希望，不過唔知點解呢幾日突然間灰o左咁多。

>>June 29, 2003 at 4:21:22 AM GMT+8

2003 年 6 月 5 日 星期四 【雨】

o岩o岩好3個月，亦即係92日。其實我人生已經經歷o左超過65個92日，不過最近呢92日，好似佔o左我生命中好大o既部分。由遙遙相距到慢慢越o黎越近，以為唔會再有任何距離o既時候，偏偏就要再越拉越遠，而且好似冇辦法再拉番近咁。有一種好徬徨無助o既感覺，好寂寞，好寂寞，完全幫唔到自己，更加唔知點先可以幫到自己！

Re Cafu:睇下Richard班友仲想唔想再同佢o地較量o羅。

>>June 6, 2003 at 1:52:28 PM GMT+8

2003 年 6 月 1 日 星期日 【晴】

抖o左幾日，今日又踢番波喇！蘇兄帶o左班唔知何方神聖o既人o黎球場同我o地打，同佢o地鬥落，完全係兩班波，我o地一貫o既打法完全唔係佢o地o既對手，攻唔入佢o地，更加守唔住佢o地。我總共失o左8球，其中兩球關我事。不過我o地總算上o左寶貴o既一課，學到好多技術水平以外o既o野，遲o的會有進步見到o架喇！

>>June 2, 2003 at 1:20:19 PM GMT+8