2003 年 1 月 29 日 星期三 【晴】

今日返工, .......郭可盈同林文龍來買野呀! 終於比我見到郭可盈! 真係好靚呀! 好like佢! 而林文龍唔認得我, 哈哈哈!

●靜兒 生日快樂●

>>January 31, 2003 at 2:54:33 PM GMT+8

2003 年 1 月 27 日 星期一 【晴】

今日行返工, 特別慢...隻腳依然痛, 返工做野仲痛...唉! ...
* * * * * *
呀May, 我昨晚都好似冇唔該你同你個fd, 唔好意思ya, 我實在太失落.......同埋我都冇比返錢你tim呀~ 下次我要記得......
* * *
娛樂大搜查!~

>>January 28, 2003 at 2:26:24 PM GMT+8

2003 年 1 月 26 日 星期日 【晴】

今日簡直係一個災難之日! (除左見到天明外...)
今日過馬路, 一來趕時間, 二來冇耐性, 見到好似冇車...咪過law, 點知過到一半, 有架ben士衝緊過來...佢見到我完全冇意識踩break...我都好快咁跑...卒之, 我隻腳都係比佢撞到...當時, 只有痛...好痛...死忍...行去搭車, 我隻腳仲係好痛...再睇, 我條褲竟然黑左一韃...比車轆過?...諗返都一額汗! 我總算仲行得到去搭車...我諗冇事掛, 唔會內使傷掛......真係唔敢話比人知我比車撞......
去到電視城見到天明都叫做好D啦, [大家年初一記住睇佢呀!] 不過坐到邊邊咁遠~ 之後, 佢比賀年卡我地, 仲寫埋我個名~好正太好喇! (盡管笑我低能啦, 我介意都冇用)
但係, 我竟然聽呀細講一齊將袋禮物放在地上, 我都估唔到呀大同呀細佢地取回自己的野的時侯唔提我取埋!! 唉, 都唔怪得人, 都怪我自己...咁重要都放在地上, 自己又大意又冇記性...嗚! 真係好唔開心...幾多錢都買唔返! :".": 唉...
隻腳已經好痛, 估唔到個心仲痛~ 仲要踩多幾腳呀~
---日值歲破 大事不宜---

>>January 29, 2003 at 11:07:26 AM GMT+8

2003 年 1 月 25 日 星期六 【晴】

最後一堂lu~ 上完堂, 又係唔知去邊好...又唔想回家, 又唔想自己一個人行街.......唉~ 無奈!
返到屋企, 一開電視就見到我偶像! 哈哈!~ 好攪笑呀!
* * *

>>January 28, 2003 at 8:57:20 AM GMT+8

2003 年 1 月 22 日 星期三 【晴】

今日我呀媽又發作...無端端一早, 見到我就鬧! 話我好唔搵野讀, 好做埋D咁o既工! 跟住當然係不停重復又重復係咁講...唉, 冇工做又鬧, 有工做又鬧...你估我真係好想做lee份工咩, 做到我指甲都崩晒, 手又損晒...我都唔敢出聲, 怕比我呀媽又有野話......不過我知我根本做乜都係篤眼篤鼻...成日叫我搵野讀, 搵份好工...點解乜野在佢眼中都係咁容易, 話點就點...佢有個咁好的老公, 過住幸福的生活, 成日都係要人聽晒佢講......哼, 我依家冇書讀我想ga? 我一路都係極度唔想去英國! 卒之我要上機, 點知又攪到比人困住, 又返來...返到來又要我再攪過簽証, 簽唔到又係我錯! 搵唔到野做又冇用, 搵到又話冇前途...我都唔想咁呀! 我夠想好似人地咁......我自己都好驚呀...我真係唔知可以點做.........當我一個人, 在好靜的地方, 就會係咁諗野, 越想越怕, 然後想哭.......成日好怕未來都係一個人咁生活...朋友? 個個一雙一對罷! ...更何況我唔知我在你地心目中係乜.......我以前以為對人好就得...我冇諗過原來我睇得別人太重......我唔想再比人當係傻仔...係都唔好比我知道...please...
對不起~容許我咁講.........可能, 你睇左會更憎我~ 如果你有睇, 都証明你care我, 多謝!
* * *
死不到心 盲目令自尊解體 恨不到心 又怎會這樣撤底 只想相戀 前時後事都不計 這般堅忍 大家說我有沒有問題 難道附托一切 得不到些安慰 無話再講 ... 一張通告都有半句多謝合作 我愛得失去了自覺 來換你像獵人對白兔 那樣兇惡 有沒有人也為我難過 愛護我?
# # #

>>January 23, 2003 at 4:41:26 PM GMT+8

2003 年 1 月 20 日 星期一 【晴】

返十一點,again累~
返工時,電話同銀包都唔跟身, 好唔自在, 有人搵我都要放工先知~ 不過又幾like見到有好多個未接來電, 好似好多人搵我咁~ 哈, 真傻...
* * *
今日見到個未接來電, 好驚訝係你! 不過, 我都知咩事......
其實, 我唔知你鍾唔鍾意, 又唔知你會唔會介意我"煩"你......點都好,我唔send都send左~
* * *
你唔鍾意都唔好丟呀,係丟都丟返比我ya...我都覺得佢幾靚ga
###
唔知自己講乜~算啦

>>January 21, 2003 at 4:45:16 PM GMT+8

2003 年 1 月 19 日 星期日 【晴】

今日返十點, 時間ok, 不過就要更加做到死死下, 返早又要我散貨, 搬搬抬抬, "琴"高"琴"低, 多人又要做埋收銀~ 好累呀! 仲要做到我D指甲崩晒,隻手更粗糙...嗚~十指痛歸心呀!~ 得雞碎咁多...真係想唔做呀, 但係又驚搵唔到第二份wor!
* * *
放左工真係成個人散晒, 不過, 有街去散左都照出去~ 又係去黃大仙中心...哈~ 當然係有目的la...
# # #

>>January 21, 2003 at 4:19:54 PM GMT+8

2003 年 1 月 18 日 星期六 【晴】

尾二一堂lu~ 上完堂冇地方去.
到三點幾四點又走左去騰龍墟睇...蕭正楠~ :)
有我表姐同我一齊顛~
之後去左有好多張第一偶像個樣的poster...的黃大仙中心~
* * *
其實, 真係好咩...咁鬼大個人仲走去見偶像...都覺得自己好低能咁...不過, 我又得閒咪去睇下law!
至於第一偶像又唔同, 雖然都係見明星, 不過佢咁好,咁nice.......
~ 我真係傻左喇 ~ 成日等住佢有funtion的日子....
# # #

>>January 21, 2003 at 4:01:13 PM GMT+8

2003 年 1 月 17 日 星期五 【晴】

又係去飲茶, 今次唔係觀塘, 去左黃大仙, 又可以見到程程一面!~
* * *
本來出去轉台, 點知變左出電話! 好正呀! 好鍾意部手機呀!!!
* * *
夜晚去姑媽家食飯, 無端端打牌, 本來我好好運, 係咁食胡~ 又自摸! 開頭贏左都有成二百幾元, 點知到最後一圈, 係咁出"聰", 唉, 結果要輸成七十幾元~ 真係越窮越見鬼呀! 比姑媽lee個高手贏晒! 嗚~ "乞衣兜拿飯食"呀!
* * * * * *
●Canice 生日快樂●
周杰倫 happy birthday

>>January 21, 2003 at 10:35:45 AM GMT+8

2003 年 1 月 15 日 星期三 【陰】

今日又係返六點...自己駕車返工. 這幾日夜晚放工都係自己駕車回家, 一個人駕車的感覺好正,好free ! 冇呀媽在旁"指指點點"係唔同D!~ 而佢肯比架車我駕, 都好過冇!
* * *
今日有人問我"珍寶珠"響邊, 佢笑住咁問, 我都感得又D野, 我又感得佢好面善...後尾我醒起佢係邊個,跟住又見到呀may~ 哈,哈! :)
* * *
雖然有工返, 但係仲係冇錢洗~ 佢地見我返工就以為我好多錢洗, 更加唔比錢我~ 唉! 乜做要做, 做到指甲都崩晒, 都係得咁少錢, 買部電話都唔夠! 仲要放工回家全部訓晒...冇人埋我 :/
# # #

>>January 16, 2003 at 5:11:29 PM GMT+8