2015 年 4 月 28 日 星期二 【晴】

訓醒食了早餐, 然後趕坐尾班37X到黃竹坑, 交今年的院士費四千元, 之後行過隔離海洋公園, 要趕在開放時間內看最多的表演, 看了雀鳥的悶劇, 騎了旋轉木馬, 看了好耐樹熊等佢活動, 看了袋鼠. 澳洲南部的樹熊大隻袋鼠細隻, 北部相反. 之後坐了吊車去山上, 吊車站的咖喱牛腩飯成一百八十元一碟, 你食埋我果份. 我把優惠劵送了給排隊的人, 算是幫了人. 之後繼續看水母館, 坐海洋摩天塔, 看海獅館, 看海洋劇場, 再向上行去坐熱帶雨林水泡船搞到濕晒, 碰碰車太多人玩不到, 再把小食劵給買野食的遊客, 再看北極和南極館, 坐海洋列車落山, 再去探熊貓, 然後太累不去海洋館了. 離開坐第二程城巴去灣仔嘟完咭食南記下午茶, 再食埋聰嫂榴槤黑糯米, 最後回家午睡.
今晚的西米露好鹹...

>>May 11, 2015 at 4:54:09 PM GMT+8

2015 年 4 月 27 日 星期一 【晴】

今晚本茶餐廳做了第一個ECMO CPR, 大大龍鳳一場.

>>April 28, 2015 at 4:35:20 PM GMT+8

2015 年 4 月 25 日 星期六 【晴】

返通宵做大仲辛苦過做細, 無break無飯鐘之餘仲要巡房衝症, 一晚五個R房, 仲忙過日間...

放工累到連早餐都不想食, 直接撻落床, 訓得三個鐘就起床沖涼, 去了柴灣男家族拜山. 在山頭和靈灰塔內拜左好多位先人, 食了燒豬和雞, 再拜了爸爸. 清明時爸爸墓地是泥頭, 今日已經封了混凝土, 墓碑未完成.
之後去了美心食下午茶, 然後我先回家午睡, 太累了, 今日下午走了兒科文憑堂. 今日下午差不多上課時間, 在兒科文憑上課附近的地方發生車房爆炸, 多人傷亡.
訓醒再過海, 到灣仔一酒家食男家拜山晚飯, 男家習俗是天地堂, 拜完山各自活動, 晚上才食飯, 公數.

>>April 26, 2015 at 6:45:13 PM GMT+8

2015 年 4 月 21 日 星期二 【晴】

通宵越來越辛苦
今日中午訓醒沖完涼, 先到旺角領取回鄉証, 再返油塘食下午茶, 之後去街市買野.
現在的橙真的很貴, 十元得三個, 有一檔賣十元四個新奇士3107已經人頭湧湧. 橙價貴的原因是加州旱災, 工人罷工, 美元升值, 而且大部份橙運了去強國賺人仔. 這令我想到, 為何香港不能種橙等生果呢? 要發展綠色地帶不是不能, 只要注重保育和不起樓就可以. 在某山頭開闢果園, 種有機生果賣給本地居民, 不比郊野公園種樹差, 年青人也不必到外國才能做摘蘋果的工作假期了. 再唔係種櫻花, 種秋天有紅葉黃葉的樹木一樣可以, 無得食都有得睇, 吸引遊客就不怕無景點, 不用依靠主題公園.
目前市花洋紫荊種得不算多, 睇得下但不太吸引遊客, 實用價值比較低.
政府真是有好多事情可以做好, 可惜官員只顧出糧, 少做少錯, 點會有進步呢?

>>April 22, 2015 at 6:16:26 PM GMT+8

2015 年 4 月 19 日 星期日 【晴】

今早食了梭羅糕做早餐, 之後去酒店泳池游水, 再退房去了烏節路ION商場行, 最後坐地鐵到機場.
到機場第一件事是退稅, 寄存行李, 然後去梭羅餅店再買過.
入閘後再食雲吞麵, 對加央多士完全無興趣呢.
忘記了樟宜機場是臨上機才安全檢查, 我在離境手續後裝果支水要即時全飲, 在機上超急尿呢.
這幾日最擔心的是天氣預測說回港時雷暴, 好在天氣無想像中咁壞, 感恩呢.

>>April 21, 2015 at 2:19:56 PM GMT+8

2015 年 4 月 18 日 星期六 【晴】

今日第二天開會.
黃昏行了Fort Canning Park到牛車水購物, 再返酒店, 晚上再同香港朋友一家晚飯, IT仔大了好多好醒目, 識七國語言...的一至十.
Papparich 的娘惹菜好味.

>>April 21, 2015 at 2:12:01 PM GMT+8

2015 年 4 月 17 日 星期五 【晴】

去年今年都來新加坡, 今年再次是為了展示海報, 地點也是去年的TTSH. 九龍皇后的何老闆也有出席講書.
晚上到了東海岸的海鮮街, 同印度朋友一家晚飯, 他的小朋友極活潑.
很想在日間行東海岸, 踏單車, 食328叻沙...

>>April 21, 2015 at 2:06:08 PM GMT+8

2015 年 4 月 16 日 星期四 【晴】

今早無早餐食, 只食了昨天帶來的蘋果和飛機麵包, 之後去了酒店天台的海天一色泳池游水, 左手面是新山, 右手面是新加坡都幾得意.
酒店有穿梭巴士到Legoland, 要訂位, 準時開車. 入場前一定要去隔離的Legoland酒店參觀, 這才是我想看的重點, 下次一定要住, 一早訂.
其實入場一日是夠玩的, 但要一早入場, 在酒店或場外商場一早食定野, 入場就不食全玩, 同埋要似我咁不玩機動遊戲. 當然撞正今日是平日咁無乜遊客就最順利. 不過如果要購物就要預多點時間, 因為紀念品店在入場內的地方, 不入場的只能在樂高酒店的小商店買, 選擇少好多. 另外要注意的是退稅(GST6%)只在新山Senai機場做到, CIQ不設退稅服務.
玩到關門才走, 坐返酒店穿梭車回程, 再執拾大量樂高入夾, 坐了全日最後一班JPO2巴士到CIQ2過關返新加坡, 即另一個關口, (類似皇崗入, 深圳灣走). 馬幤2.5元超抵坐. 在新山的CIQ2過關後就無JPO2, 見所有人排CW3就跟住上, 無人付款就跟住無付款, 過埋新加坡關口再上CW3車都係無人付款, 一直飛咁快開到Jurong East地鐵站.
在Jcity商場食了Nando才返酒店. 酒店不知為何由英式古建築hotel Fort Canning 變成了YWCA的Fort Canning Lodge, 啞掉.

>>April 21, 2015 at 1:59:14 PM GMT+8

2015 年 4 月 15 日 星期三 【晴】

今早直接由茶餐廳去機場, 食了魚蛋粉和腸粉, 還有好好味的炒滑蛋和焗豆, 飽飽. 飛機上還有難以抗拒的哈根大師雲呢嗱雪糕.
下機後, 想到機場內的旅遊巴站坐直通車到新山, 等了半小時都無車, 又無其他人等, 結果去了坐858到Woodland轉950. 點知950可以完全無車, 應該說是有吉車開而無車埋站載客, 等車人龍打了幾個蛇餅, 等左成個鐘才有車. 好在買了梭羅糕邊食邊等.

新加坡和新山有兩個關口, CIQ1 和2, 即Custom, Immigration and Quarantine簡寫. 同香港的皇崗一樣是兩地兩檢, 過完一地之後要等多次車過對面檢第二次, 很麻煩. 在CIQ1無論是人等車或是車等人的位置都不足夠. 頭尾用了四小時才由樟宜機場去到JB Sentral.

在新山吃了Thai Express 才去酒店, 因為太夜酒店區都無野食. 今次的的士司機大佬很好, 肯計錶, 車資比預計的平了一截, 馬幣35元.
酒店位於Puteri Harbour, 隔離就是完全無興趣的Hello kitty land.

>>April 21, 2015 at 1:46:28 PM GMT+8

2015 年 4 月 14 日 星期二 【晴】

16-20日將到新加坡開會展示自己做的海報, 所以要唱坡元和馬幣.
前天去百年以為日間是即時可以唱, 無錯, 但人龍由十七樓排到街上. 預訂的又要五千元以上才有交易, 實在用不到咁多錢.

昨天就到牛記唱, 算不用排隊, 不過就連續錯左兩次.
話說想唱230馬幣加300坡元, 結果單據無錯, 但兩叠銀紙錯, 變了230坡元和300馬幣, 大幅貶值了幾成. 好在我即時發現, 職員變我更換. 更換完後面已大排長龍, 看過坡元變返300就閃了.
之後發現原來銀紙有230馬幣和320坡元, 即是多了20坡元, 所以今日拖埋夾走多轉去退返20坡元. 牛記真是要看清楚.

>>April 21, 2015 at 1:13:45 PM GMT+8