2025 年 8 月 21 日 星期四 【晴】

新大阪站同酒店中間無乜野好食, 得一間松屋, 快平靚正, ~400yen一個set, 所以每朝食一次, 還有兒童meal送禮物, 很容易已經儲齊全套卡通狗手帕. 好在話係比邊個邊個同學仔, 唔係我屋企又多一堆野.
今日去全程的主菜, 天王寺動物園看北極熊, 三十幾度, 隻熊真是在露天活動, 看到都辛苦. 不過阿女就好開心. 行了大部份日間時間都看不完, 因為又要扭蛋又要買衫, 這些才是最賺錢的副業呢.

>>October 10, 2025 at 4:11:13 PM GMT+8

2025 年 8 月 20 日 星期三 【晴】

除左酒店平D, 另一個住新大阪的原因, 是大阪站無新幹線, 不夠方便.
今日繼續想用盡個Pass, 所以沿新幹線續個站看有甚麼景點, 全部都係xx城, 同昨天看完的長屋差不多. 就坐到包到最遠的岡山站, 再睇個pass話包hello kitty列車, 其實都無乜興趣, 不過當多一個景點比d女, 慢車就慢車. 原來每日來回福岡和新大阪一次, 恕我福岡早上07:04開車真是無能為力了, 無理由人在新大阪又唔知去邊都唔坐一趟11:37開的. 就咁啦.
日本d野唔到你唔服, 天花板到地下, 窗簾到厠所都係hello kitty野, 仲有一卡車打卡和賣紀念品, 結果未到目的地就已經有戰利品了.
岡山不是目的地, 坐多三個站的倉敷才是, 這裏有個古老的美觀地區, 車站隔離又有兩個大商場, 商場中間有兒童遊樂場. 這個算是適合小朋友玩, 日本好多公園都無兒童遊樂場.
美觀地區講到尾就是大陸的水鄉, 又食刨冰甜品, 整鎖匙扣, 坐埋人力車滿足埋小朋友, 來得遲所以無船仔坐, 買了一大堆膠紙算吧.
遊覽完就去倉敷個商場晚飯, 點知個商場是特賣場, 大鑊, 除左我以外每人一對鞋以上, 仲有其他其他, 真是搬無可搬了, 超重.
商場的好處是有美食廣場, 每人都選擇自己喜歡食的, 同埋夠闊落入到BB車.

>>October 10, 2025 at 4:01:50 PM GMT+8

2025 年 8 月 19 日 星期二 【晴】

今日金澤市內，行到去近江町市場，市場不是很大，舖頭不是很多。
另一邊的出口，行兩個街口就到金澤城公園，入面的五十間和三十間長屋可以入去參觀，個觀光案內有大玻璃對住個長屋有冷氣可以坐好耐。有好大個草地可以打根斗。
順住去過條石川橋就是兼六園，園外有條街好多間restaurant 食埋午飯。
兼六園入面的13個景都很人工，要加想像力，在無櫻花無紅葉的熱天，好快就看完。
另一個出口過條馬路就是金澤21美術館，個個網頁都推薦，但真係無興趣呢。最特別果幾件野，不用入場都看到。
坐巴士返酒店取回行李，今日玩換酒店。
先坐新幹線去敦賀，再轉特急雷鳥去新大阪。
我完全無留意到雷鳥特急是無自由席，全車指定席。大家有位就坐。更加唔知第三卡門口頭三排是女士專用，只知到近住門口方便睇住行李箱。結果隔離女士用google translate告訴我這事，我都未拿得出我的google translate來回應就有職員來找我了。我一句英文他就知道我做緊乜同埋唔駛再講, 找了其他乘客跟我們換了個位坐.
延誤了幾個字, 但總算來到了新大阪. 這個站不夠大阪站旺, 站外無商場適合晚飯, 站內的restaurant都比較細間難坐. 最後入返閘食閘內的, 入閘職員問我們目的地是哪裏, 都唔知點答, 我話入閘食野. 阿妹一路扭計唔食, 我一路抱住她食拉麵, 辛苦到我都唔想食.
原來日本人不會搭枱, 明明一個人坐兩個位, 我咪坐落吉個位度, 店員阻止, 果位客人好快爬埋兩啖就走左.

>>October 10, 2025 at 3:33:43 PM GMT+8

2025 年 8 月 18 日 星期一 【晴】

有人講左好多次能登半島，亦真係睇過遠些的新幹線站無乜好看，跟住個pass去了七尾和和倉溫泉這半個能登半島。
年多前的地震影響仍然見到，有些路上的斷層和裂痕，能登半島和北陸都好少人，遊客更加絕無僅有。
在七尾的商店街，商店無開，行人沒有，行到海旁的能登食祭市場食了午飯行了附近藥店，就返火車站坐車去和倉溫泉。
日本成條街都無垃圾筒，分類垃圾桶都未必有其他類垃圾，多數是膠樽和鋁罐，我食完條蕉皮都唔知掉邊好。連厠所都無垃圾桶呢。
和倉溫泉站想去個足湯，行到去圍起左無得浸，就在隔離海邊草地和椅食超級市場食物以減輕負重。一路上有些大廈在清拆中，應該是捱唔過上次地震。
之後行到最旺的總湯，都係無乜人，溫泉廣場又係無人，碼頭圍住維修不用去，坐返巴士去火車站特急回程。

>>August 25, 2025 at 12:08:44 PM GMT+8

2025 年 8 月 17 日 星期日 【晴】

預訂了關西加北陸的七日JR pass。今日第一個任務就是去金澤站兌換JRpass.
由於要盡用張pass的關係，今日去了坐新幹線，都是玩了遠的地方先。
一個站就到新高崗，高岡是叮噹作者個故鄉，有個室外叮噹人物人像的公園，室內有彈床有琴彈。
之後坐兩個local站JR到高岡，在JR站影了叮噹郵筒，在商場食了拉麵，再到地下坐叮噹電車。坐左半程就轉JR去雨晴看雨晴海岸，向日本海這邊的海應該無咁怕海嘯掛。由於是夏天，同去年河口湖看富士山一樣，對面白山都係無雪。最好是觀景台客務中心杯抹茶雪糕。
回返高岡站，家姐寫了明信片，寄埋。唔等夾時間轉車坐新幹線，坐localJR返酒店，仲趕得切去埋超級市場。

>>August 25, 2025 at 11:44:23 AM GMT+8

2025 年 8 月 16 日 星期六 【晴】

原本是想去韓國legoland， 再去首爾動物園看北極熊和熊貓，最後發現北極熊幾年前已經移民英國，計埋機票，最後改了8月16日至24日到日本北陸和關西旅行。
香港飛小松，未聽過這地方，不過既然有得飛即是有景點，睇見地圖近大阪，可以去天王寺動物園睇北極熊，所以就這樣了。
個機場細到，要有飛機才有一班跟航班時間的巴士離開，即是你唔好走去唱錢，唔好唔見行李，唔好突然去買野飲同開大，否則無巴士走。同埋架巴士唔收西瓜卡，收現金和信用卡。
訂酒店的時候，有睇過能否住溫泉酒店。發現溫泉酒店都不近市區也不近JR附近兩個温泉站，所以訂了金澤站附近唯一這間有溫泉的酒店，真假都好，有得浸到算。
金澤站附近商場的restaurant 好早就收，八點幾唔夠九點就冇乜好食，求其食了拉麵就算。

>>August 25, 2025 at 11:27:15 AM GMT+8

2024 年 5 月 6 日 星期一 【晴】

經過第一次考路試, 陳師傅完全無講過唔可以溜前後, 同埋無點捉我擰頭望鏡後, 第二次考快期轉了師傅, 藍師傅.

第二次學泊車, 其實第一個陳師傅教的吊極力子方法唔係唔得, 一係你要吊一下到尾就泊到S位, 一係你吊住再加要停或扭車太盤時再踏剎掣. 在平路的泊位是無問題的, 可是油塘和很多其他泊位都不是平的, 是外平入去就斜, 我估個斜是為了流走雨水免漬水. 這樣設計都正確的, 但就令吊極力子要越吊越高比多些油才入到去, 一下吊多左就會縮腳收油, 在內斜位收油就溜前了, 所以對於考試所有人都想最穩陣最容易地泊到卻成為了障礙.
(待續)

>>October 21, 2024 at 11:36:15 AM GMT+8

2024 年 3 月 14 日 星期四 【晴】

今年考了四次棍波輕型貨車, 三月五月七月和九月, 9月23日終於過埋丙部. 鬆一口氣, 總算了左件事, 可是我從來都不喜歡做司機, 只喜歡做乘客.
第一三四次是陳師傅, 第二次是藍師傅.

第一堂學車, 我除了提款之外就甚麼都無預備到. 完全不知道甚麼是極力子, 聽完師傅講解好似明但又覺得好繁, 整咁多個波都唔知為乜, 同埋唔係好接受到明明我無比到油, 入左波架車就會郁, 總之好想整停架車, 令架車受我控制.
返去睇youtube睇左一輪, 明白左是機械上的局限導致有咁多個波. 洗濕左個頭都要學埋.
還有我個師傅好老, 心裡面想住如果他教教下車arrest 左我要點救他...
一堂叫45分鐘, 一學學兩堂即一個半鐘, 點知師傅話個半鐘學唔到d乜, 他的學生都學兩個鐘, 唯有照跟, 每次學完都好累, 仲累過返成日工.
我都明白要賺盡開工時間, 所以個師傅成日在教車時食飯壺, 不過多數都在燈位和等泊車等掉頭的時候食.
繼續在九龍塘兜圈兜左幾堂, 之後學斜路開車, 學泊S位, 學左幾堂, 堂堂都話我唔記得之前學過的野.
第一次考在油塘, 我本身住慣油塘, 路就好簡單, 行左幾十年, 每次學最累就是要我由九龍塘開去油塘. 同埋係考試個泊位禁學, 兩個掉頭位又係禁學, 要星期日公眾假期才學得.
我一直都覺得自己識開車, 連marking scheme 都無睇就去考. 結果乙丙部都一take肥. 我覺得我做得咁好, 我考試係來表演的, 唔係好接受.
乙部泊位泊得好靚, 無出界, 四平八穩, 標準位置. 考官話同學你溜前左四次. 我話無呀, 完全唔覺. 完左試後, 我問師傅, 他說無呀睇不到溜前. 旁觀另一位人兄, 應該都是師傅掛, 說有呀, 有溜前. 我信考官加第三者的說法.
回家在群組問人點解泊位考官和第三者都話我有溜前, 但我不覺得有? 原來溜前的意思是架車泊位時只能向後唔可以前郁! 我就覺得, 個泊位是暗斜, 吊住極力子一下一下泊, 向前搖/溜有幾唔正常呀? 泊到就得啦, 咁都肥! 無奈第14點marking scheme 真係話溜前溜後都唔得. 我師傅完全無講過, 同埋之前多數練九龍塘和彩雲, 都是平地泊車為多, 完全無理過這個要求. Ok, 下次再表演過.
丙部考四山街路線, 考官話我過障礙物無擰頭望鏡, 我記得有望鏡, 但無cut線就無擰頭, 似乎這個考試不接受呢.
我考完這四次可以話比大家知, 要擰頭擰到好誇張, 盲的都知才過, 唔係你識開車就得.

>>October 21, 2024 at 11:22:40 AM GMT+8

2024 年 2 月 5 日 星期一 【晴】

半年未寫過野, 好忙
今日的新聞仲講緊前兩日阿根廷足球隊來香港踢友誼賽, 但主角無落場, 香港明顯做水魚的事.
我個人無乜好, 只是對足球/運動, 車, 打機, 卡通人物等玩樂野都無乜興趣.
足球, 我覺得似一班人把個波踢來踢去, 好悶, 又易受傷, 除非要落場踢埋一份, 否則咪搞我.
車又係, 近半年我老婆去了學車, 結果我又學埋一份, 我學棍波輕型貨車, 第一次接觸極力子的概念, 覺得有些麻煩. 學一堂兩小時的車, 仲累過我返個通宵. 都是做乘客可以休息下好過, 做乜要拿屎上身買架車來駕駛, 又要買車 入油 入電 租車位 交人和車的牌費 交牛肉乾 出街交停車場費 出街找位泊車 保險費 撞車賠錢費 撞車惹官非 坐來坐去同一架車... 最重要是要我做司機累死人. 頂多去旅行玩下好了. 講完.

>>February 6, 2024 at 10:59:53 AM GMT+8

2023 年 8 月 8 日 星期二 【晴】

有中學同學Grace移民, 所以她把工人姐姐介紹了給我. 之前做了一輪手續, 原本今天是工人姐姐來香港的日期. 可是姐姐未開工已經兩次開口想提早要花紅, 不能接受, 早前到入境處取消了她的簽證, 也電郵航空公司取消了她的機票, 通知了她不用來了. 所以預備給她的房間也改變了用途.

太太的朋友割愛把一座鋼琴送給小女, 今早就搬來了. 由於怕座琴太長入不到房間, 我昨晚預備了廳的位置比這座琴, 執到4點幾. 我最想就是這座琴放在原本工人姐姐的房間, 無咁近隔離屋, 練習時無咁嘈. 今早返工前度下個位是剛好的, 也執走了幾件野, 但要出門上班了. 留下了訊息給太太, 叫她問搬運師傅可否放到入房. 結果她訓醒用了15分鐘執房, 搬運師傅說可以放到, 原來座琴是好似個人般企住搬到來的, 不是平時看的長訓住放, 太好了, 位置剛剛好, 連個衣櫃都不用搬開, 只餘半厘米空間. 這個就是我要的野.

>>August 19, 2023 at 8:19:50 AM GMT+8