2015 年 8 月 30 日 星期日 【晴】

傳媒的力量很大, 近日有位進行換肝的病人, 因為突然發現移植的病人有癌症而被叫停, 此事廣被傳媒報導. 結果連續兩晚, 本茶餐廳有有心人士來話要捐肝救這病人, 要求協助, 半夜三更比你會點搞呢?

因為無人能夠抹殺有心人可以捐肝救人的可能性, 假若有心人不是在胡言亂語, 此事一定要立即處理. 誰知道垂危的病人能等多久呢? 所以連等天光才搞都不能.
結果部長問過樓上深切治療部, 也找過負責移植的主任. 經過一輪溝通, 最後的官方答案是: 多謝你的熱心, 請留下聯絡資料, 病人聯絡主任/器官移植主任會稍後聯絡你.

>>September 1, 2015 at 5:23:41 PM GMT+8

2015 年 8 月 29 日 星期六 【晴】

好耐無睇過選香港小姐, 今屆好似把焦點放回智慧, 比較少著重美貎.
材藝表演跟現在幼稚園小學入學試有點相似, 總要學到周身刀才顯得與眾不同, 又要跳舞又要唱歌. 如果自細無培養甚麼表演, 就只能表演速成的魔術, 跳些簡單的舞來充斥下. 看節目令人對現代社會的價值觀有點心寒.
我感覺傳媒宣傳時較多講佳麗以前的中學背景, 尤其學歷. 標榜會考十優, 算得係乜呢, 皇后酒店周圍都係這些人啦. 你又唔講下人地點解得二級榮譽而不是一級榮譽畢業? 又不講下其他佳麗來自邊間中學? 這間中學被名牌化得好緊要.

>>September 1, 2015 at 5:37:50 PM GMT+8

2015 年 8 月 22 日 星期六 【晴】

今日A N, 但中間去不到上兒科堂. 因為去了一年兩次的景賢里開放日參觀, 位於司徒拔道半山之上. 景賢里是政府用官地重金由業主手上換過來的, 即是話我都有份換返來的, 可是未來用途至今還未決定. 其實邊駛想甚麼用途, 應該把佢打造成香港歷史建築一個景點, 放埋相片和前往方法於香港旅遊指南之上, 連同山頂和纜車組成一條旅遊路線.

參觀完後無坐車走, 行落少少就有樓梯落下面寶雲道健身徑, 在山腰上是平坦的, 很易行, 去到中間仲可以上一百六十幾級樓梯看埋姻緣石. 繼續行有路口經灣仔峽道落舊灣仔郵局.

晚飯去了大榮華食圍村菜, 又見到肥老闆, 佢個肚大到要用腰封撐住...我最怕他突然暈低要急救...

今晚N之前都無訓過覺.

>>August 23, 2015 at 2:04:42 PM GMT+8

2015 年 8 月 21 日 星期五 【晴】

今天下午去了小學同學天沛的婚禮, 在旺角某教堂舉行, 見到好久沒見的老師和同學, 連以前校長都請埋, 我完全無想過.
晚上婚宴前我先回家換衫, 實在太熱, 濕晒要沖埋涼, 而且要拿利是封做人情. 不過亞皆老街和舊機場對面巴士站都撞車, 塞左好耐.
晚宴在土瓜灣某不是半山扮半山的酒樓舉行, 真是覺得好嘈, 室內環境太密封. 天沛請了更多我完全無想過會請的小學老師們出席.

>>August 23, 2015 at 1:44:19 PM GMT+8

2015 年 7 月 28 日 星期二 【晴】

昨天和今天都去了夫人茶餐廳教ACLS書, 要教了兩次每次兩日即是共四日的義工後, 才能正式成為導師. 最不好的是用自己時間, 昨天O, 今日教完全日書仲要返下午六點放半夜兩點.

辛苦也得要教, 一方面保留住個instructor status就不用每兩年續一次provider, 另一方面要做靚自己個招牌, 寫履歷才有野寫. 試想下每日無論看幾多個傷風咳都不能寫得出來見人, 對病人好但對自己無乜用, 好像同人租屋住一樣租金月月清剩下無野是自己的. 相反教下書, 出下紙才有野寫下履歷見得人, 好似供樓一樣, 供了的錢扣除利息後點都有些野是自己的.

放學從東區地庫行落地鐵站, 望見對面山上的柴灣墳場, 不肯定望不望見爸爸的位置. 半年前的今日他離開了, 我仍然掛念他. 他不喜歡我上班時間顛倒, 時常問點解不是三八制, 教書也是為了擺脫返工時間顛倒的努力的一部份.

>>August 2, 2015 at 4:24:10 PM GMT+8

2015 年 7 月 23 日 星期四 【晴】

有些事情真是敢怒不敢言
話說小弟幫茶餐廳學會近日出版的書寫了其中一篇, 此書在書展中商務攤位鎖量排行第一, 實在替學會高興. 學會為答謝各位作者支持, 每位作者送書兩本. 我已經盤算定有甚麼朋友要送, 有甚麼朋友自己有不用送, 最後自己多買了六本, 總共八本.
上星期收到作者獲贈的兩本, 回家看到主篇在第一頁簽左自己個大名和日期, 甚為不悅, 點送比人呀大佬. 都算了, 始終是送的.
到今日, 自己買的六本送貨了, 主篇又一次無問過我就同我全部簽晒佢個名和日期在第一頁, 真是豈有此理.
主篇為人較為高調, 喜歡武文弄墨, 時有在報章副刋撰文, 故此覺得佢親筆簽了名的書是寶一樣. 有人心高氣傲我也阻不了, 只是返工時時見, 實在不想因為這些好心做的壞事而同佢反面. 如果你收到這本書見到主篇簽名, 小弟實在非常唔好意思.

>>August 2, 2015 at 3:47:19 PM GMT+8

2015 年 7 月 21 日 星期二 【晴】

今日又用了大半日在間屋身上, 晨早去監工換鋁窗, 換完咪照漏水, 黃雨都頂不住, 浪費了五千幾蚊. 最後還是買多支玻璃膠, 見滲水就擠.
拆出來的窗花我想加裝一隻到厠所, 不想加錢叫人整, 就去宜家買了件電鑽當玩具玩下. 我完全不明白點解聲稱鑽混凝土的電鑽會鑽不到鋁窗框, 鑽來鑽去得個坑. 咁麻煩下次找條鐵線扎住就算數好過.

>>July 22, 2015 at 5:13:13 PM GMT+8

2015 年 7 月 15 日 星期三 【晴】

今日返工, 幫茶客拔了個肛門外物, 外物用途不解釋, 好核突.
平時發現外物多數留醫, 今次能在手指尖碰到, 而且形狀有突邊位, 找了個婦科用的夾, 圓滑頭, 最終成支夾返出來, 是一look長20厘米, 直徑4厘米的塑膠, 佢就舒服晒兼避免了一次手術, 不幸中之大幸.

>>July 16, 2015 at 5:37:23 AM GMT+8

2015 年 7 月 14 日 星期二 【晴】

這三日很累, 忙住轉租客的事情.

昨日上午去收回單位, 簽退租協議, 退按金, 然後做一大輪清潔, 好似做了一年要做的打掃一樣. 冷氣隔塵網是厚厚的塵, 牆上有小孩子貼上的貼紙要剷走, 廚房有厚厚的油漬, 地磚上接駁位的黑坑要用曾sir哥士的清洗, 又拆去廚櫃板預備換煤氣熱水爐. 下午吃了樓下海皇粥店, 然後買了一罐五合一防霉白油漆, 把牆上小孩子的蠟筆塗鴉塗去, 再重新油一次, 窗邊滲水批盪剷走再油過. 出了好多汗.

今日上午返工, 放三點連毒理堂都無上, 去了單位看煤氣師傅換爐, 之後再清潔, 再到樓下找收買佬把壞洗衣樓和雪櫃搬走, 原來洗衣機仲有一機水在入面, 搞到成條走廊濕晒要清潔.

明日放工又要上去, 簽新約, 洗衣機去水位也要修短.

所以話, 現在的包租公不易做, 支出有管理費 地租 差餉 銀行利息 經紀佣金 免租期 驗窗驗樓 換壞電器 仲有我的時間...收入只得一個租金, 還要好多時不肯自動轉帳會遲交.
其實穩穩陣陣買隻收息股票收下息也是個好選擇, 至少落得清閒.

>>July 16, 2015 at 5:24:12 AM GMT+8

2015 年 7 月 7 日 星期二 【晴】

今天是連返十二日的第十一日, 好累.
由於本部門得兩間call房, 昨晚其實不夠房訓, 要返通宵的蓓珞把房讓出給我, 我今早返七點接她更時還給她. 所以昨晚和今早我都要換床單, 橫單, 枕頭袋. 我真是覺得自己舖得好靚.

今日上午老細的我埋另一間房, 說第三四季會開位, 說我這幾個月做project表現不錯, 但臨床判斷有可以改善的地方, 佢執左上晚通宵的創傷病人例子來說, 說我比個創傷病人血壓未正常時去照掃瞄頭頸是不對, 加埋套trauma series拖了五十分鐘才找創傷隊, 令病人由一次過照全身, 變成分頭頸和胸腹兩次照慢左, 之後創傷隊又插不到chest drain前後拖左三個鐘才入到院.
我覺得他說一開始見血壓未正常不要去掃瞄, 應該留返比創傷隊一次過照全身是對的. 但就算我一開始就找創傷隊應該也快不了多少入院, 可能也要兩個半鐘. 你估這班人落到來不用吊水抽血照腹部超聲波做全套trauma series 咩? 這些步驟我果五十分鐘都做左, 無這班人礙手礙腳我仲做得快, 早找人某程度上只是lead time bias.
簡單點說, 半夜不要做好心幫創傷隊做咁D檢查才找人, 應該晨早拖人落水, 自己甩手.
其實不升我也無所謂, 一來人工不是差太多, 二來放假日子少左, 三來不要比人覺得有得升就是甚麼恩賜, 好似我欠左佢咁成日比人屈做這樣做果樣.

從新來的蔡高級身上看到, 去不同的茶餐廳做下可以吸收不同地方的工作經驗, 他之前做過幾年北區, 之後將軍澳和現在的皇后茶餐廳. 我也慶幸自己去過親王做三個月, 有機會我也想去下另外的茶餐廳做下.

今天同IT同事在茶餐廳實地做電子藥單計劃的user acceptance test 回顧, 把我發現的問題一一說出來, 有人聽我發現的問題真好.
我想把手上的project儘快完成, 如果要轉工也心安理得一點. 我喜歡做project 和學術這條路多些, 不想成世睇傷風咳.

>>July 8, 2015 at 6:11:07 PM GMT+8