2007 年 12 月 5 日 星期三 【晴】

Title：迪士尼一日遊

　　今日係呢個假期既重頭戲，因為玲兒、阿然、美子同我一齊去迪士尼．我地九點幾就係大快活食早餐，之後就搭巴士去迪士尼．跟住就入到去美國小鎮大街，本來諗住去搵聖誕版米奇米妮影相既，不過好多人排隊，所以我地去左搵 Chip & Dale 影相先．



　　之後就繼續向幻想世界進發，幻想世界既大門就係睡公主城堡，當然要係度影番張相先啦！



　　跟住我地就去左睇 "米奇幻想曲" ，我地戴起眼鏡去睇 3D 電影， D 卡通人物真係會飛到眼前面呢，好好睇！

　　之後就去左 "小飛象旋轉世界" ，有得 Tum Tum 轉咁飛呢．

　　隔離有 D 懷舊既棉花糖，我地都買左一大支黎食呢！



　　跟住就去左 "明日世界" ，我地一去到就挑戰 "飛越太空山" ．我因為驚呢個遊戲太刺激，所以都係嗌左先，好嘈吵！而身旁既美美就驚到縮埋左，好可愛呢！跟住玩完由於太好玩，所以都係要玩多一次，今次要美美擘開眼玩呢，應該無咁驚喇嘛．

　　之後就去左玩 "巴斯光年星際歷險" ，我地四個各自去殺敵，但係結果係相當極端，阿然攞到 27 萬幾分，玲兒攞到 3 萬幾分，美子攞到 2 萬幾分，而我竟然係 1600 分 >.< 跟住我地就去左間禮品店睇精品，仲攞 D 帽黎戴呢！



　　跟住就去左食野，食美式漢堡包，35 蚊一個餐，有個包 + 一包薯條 / 飯，價錢都算 OK 啦，但係如果要飲野就貴 D lu ，要 20 蚊一杯汽水．

　　之後食完野，我地就去排隊等玩 "馳車天地" ，等左半個鐘頭先到呢，算係排得最耐既遊戲啦！跟住型仔既美美就做司機車我 lu ！



　　而身後既玲兒都做司機，令阿然不期然露出驚恐既表情：



　　之後我地玩完就過番去幻想世界，去左 "夢想花園" 同卡通公仔影相，有米妮啦，Pooh Pooh啦，高飛同布魯圖呢，不過米奇同埋唐老鴨就影唔到 lu ，有 D 失望啦！


美美與米妮


花木蘭入面既龍呢，個樣好得意


我地四個與拉長版 Pooh Pooh

　　然後睇完就去番中心等睇巡遊，之後身後既 "幸會史迪仔" 無咩人排隊，我地就入左去睇．裡面有隻好得意既史迪仔係螢幕上講野，仲會同某 D 觀眾對話，又會搵觀眾做女朋友啦，總之就好得意啦！

　　跟住睇完出番去就開始巡遊，有好多花車經過呢，上面企左好多卡通人物係度，基本上全部卡通人物都係呢個時候集中晒係花車上面：



　　之後睇完巡遊，我地四個就兵分兩路，玲兒同阿然就去左美國小鎮大街睇飄雪，而我同美美就去探險世界．之後我地搭左木筏去泰山樹屋參觀，之後再搭番木筏返番黎．跟住我地就 Join 番，去左買紀念品，結果我地買左一對鎖匙扣呢，好靚靚呢！



　　夜晚八點鐘就開始煙花表演，未開始時城堡都著起燈，好似落緊雪既城堡呢！跟住就有煙花表演，雖然規模唔夠新年既煙花好睇，不過唔要求得咁多，總之好睇就得啦！



　　睇完煙花表演，代表我地既迪士尼之旅完結 lu ！我地之後搭地鐵番旺角，跟住去左同美美買新電話，買完就去左廟街食煲仔飯，我地好肚餓呢，一人叫左一煲飯黎食，仲有炒花甲同埋白菜仔，最後我地食完就各自返屋企 lu ！

>>December 12, 2007 at 4:58:10 PM GMT+8

2007 年 12 月 4 日 星期二 【晴】

Title：休假第一天

　　今日終於都開始六日假期既第一日喇 ^o^

　　美美黎左大圍搵我，跟住我地就去左吉野家食飯，食完就上去我屋企．之後就睇左陣 "味分高下" ，然後就研究下點樣將 Nokia 電話 D Message 過番去電腦做 Back Up ，幸好最後都搞掂！

　　夜晚係屋企食完飯，就同美美出左去新城市行街街，本來諗住去買 W580 既粉紅色版，但係竟然賣晒．之後去左西田，終於係 Levis 買到牛仔褲，不過就幾貴呢，都未著過咁貴既牛仔褲呢！

>>December 8, 2007 at 11:31:33 AM GMT+8

2007 年 12 月 3 日 星期一 【晴】

Title：副收哥哥

　　今日懷住開心既心情返工，因為返埋今日就有六日假放．今日好多野做呢，首先朝早同美美去左 KFC 食早餐，之後就要開早會，仲要幫 Canny 客串 "優質服務" 既短劇，唔知點解好緊張既我都唔記得晒要做 D 咩，不過仍然大放笑彈， D 同事都聽到好開心，可以話係 "沙商有笑彈" ^o^

　　跟住就要拆貨，有四箱 Consignment 既大專書到境呢，本本書都要包，因為驚整殘左無得退番俾出版社．仲有就係久唔久要望下收銀處，因為今日係副收，如果多人排隊就要幫手開機收錢，幸好都唔咪好多人．

　　收收下錢黎左個怪客，本來佢初初行埋黎無咩野架．佢行埋黎俾錢，跟住就問我地其他地方有無商務，身旁既阿珊就拎左張 Shop List 俾佢．之後佢就問佢住黃大仙，邊間最近，我地就話德福最近．跟住佢就問咁係咪星期日休息，我地就話 "大學店先星期日休息，其他都開" ！

　　黎到呢度都無事，好正常既一個客丫，跟住佢就開始好奇怪，因為佢 Repeat 我地既答案，仲越講越大聲："商務城市大學與科技大學分店星期日休息，平日照常營業 ... " 嚇到我眼都突埋，之後佢諗住走，行左兩步突然行番轉頭，問有無 Hello Kitty 扮狗既鎖匙扣，我地話無，之後佢話要留名，我就俾左張紙，佢就寫左個名同埋電話，之後就走左．

　　跟住我對住張紙諗緊點好，阿珊話不如丟左佢，我話："我都咁諗！" 之後我坐言起行，諗住丟，但係阿珊又話："會唔會唔咪咁好??" 我就話："唔會！" 跟住就丟左張紙．

　　晏晝係 Counter 包緊書既時候，Davis 拆緊貨， Canny 就點緊雜誌，Ivan 就踎低填緊盤差表．之後我地又搞爛 Gag ，話說當時 Davis 係對 PML 既盒攞左本 Position of the Day Playbook 出黎：

Canny：又返喇！
Wui：係啦，又返呢 D 書既，之前先返左兩本 Jor Wor !
Davis：賣左啦嘛，咪入番囉！
Canny：阿叔，你係咪想做 The King of Sex ??
Davis微笑左一下．
Wui：簡稱係 Sex King ...
Canny：不如我地以後叫你 (Davis) 做 The King 啦！
Wui：(隔左兩秒) 可唔可以就咁叫 King ，唔用 The ??
Canny：點解呀??
Wui：The 喎，Dur (下垂) 喎！
Canny 都係唔明．
Wui：Dur 喎，Dur King !!

之後 Canny 終於 Get 到，笑到踎左係地下，連身邊踎緊係到寫野既 Ivan 都係度笑，仲話："果然係搞開爛 Gag ，小弟甘拜下風！"
而我都立即話： "始祖請起！"

　　跟住好快就食飯，食完就去左電腦到 Load 埋 D 數，因為要返屋企寫 Sales Report ．之後出去收埋錢，等收工．最後好快就清埋機收工 lu ！

>>December 8, 2007 at 11:06:13 AM GMT+8

2007 年 12 月 2 日 星期日 【晴】

Title：美美廚房

好味の豉椒排骨飯 ^O^



>>December 8, 2007 at 11:10:21 AM GMT+8

2007 年 12 月 1 日 星期六 【晴】

Title：美美廚房

　　要努力克服食菜既滙滙，今晚又有美美特製既營養餐：椰菜粟米仔火腿飯



>>December 5, 2007 at 3:46:28 AM GMT+8

2007 年 11 月 29 日 星期四 【晴】

Title：大嶼山一日遊

　　今朝 9 點幾就起身，之後整埋野就出門口．去到大埔，美子已經睇完牙，之後我地就 Join 埋，行左去太湖花園既巴士站搭 E41 ，因為我地既節目就係去東涌行街街．

　　一落車就行左去富東先，跟住見到好得意既聖誕佈置，有兩隻熊仔係度演奏音樂呢，其中一隻有對 "火柴眼" 望著另一隻熊仔呢，超得意！佢地中間仲有個大皇冠添！而美美今日就著左先前買既獅子仔衛衣， Kwaii 呢！！



　　跟住我地就行左去東薈城，輾轉下終於搵到 Food Court ．而經過翻新後既 Food Court 多左好多野食，差唔多世界各地既野食都有得食，不過價錢都係翻新埋，成 30 幾蚊一個 Lunch ，相信係呢個新市鎮算係好好好好好貴架喇！仲有，就係佢地既 Lunch Set 有一個共通點，就係全部無野飲既，頂多都係得碗湯既嗟．

　　食完就去行下呢個 "東薈城名店倉" ，佢標榜呢度好多名店既 Outlet 以低價賣名牌，基本上好多大眾化既名牌都有，連眼鏡 88 都有 outlet ．不過雖然係 Outlet ，但係 D 野都唔算係好平，有少少覺得唔咪好值得山長水遠入黎行囉．

　　之後行完就搭巴士去大澳，係行去巴士站既途中，竟然俾我地撞到 "東涌商務" ，原來係係 "昂坪 360" 隔離呢！跟住搭左大約半個鐘頭巴士入去，容易暈車浪既美美今次又暈車 lu ，慘！！

　　跟住我地就係大澳行左一個圈，不過都無咩行，如果想買蝦醬同咸魚都 OK 既，但係我地就無買囉．


大澳橋

　　之後本來諗住搭船返屯門既，不過原來 D 船班次好疏既呢，要等成個幾鐘先有船，所以都係要搭巴士返去東涌，搞到美美又暈車浪 lu ！


大澳海濱公園 + 碼頭

　　跟住就返到東涌，再搭地鐵去荃灣行街．我地去左愉景新城既 Food Court 食飯，好平呢！我地一人一個煲仔飯，再加多五隻煎餃子，都係 50 蚊有找．食完就行左陣愉景新城，之後本來諗住去荃灣吉之島，但係驚去到太夜會閂門，所以都係去番千色店行．

　　之後行完千色店，我就同美美返屋企 lu ！



>>December 8, 2007 at 10:12:37 AM GMT+8

2007 年 11 月 27 日 星期二 【晴】

Title：沙商盤點日

　　籌備左成個月既盤點今日終於都黎到，由於之前兩日我地已經極速盤晒所有櫃筒，所以今日淨係要盤 Canny D VCD 櫃筒，因為佢 D 存貨係晒櫃筒入面，而且又久不久會有客買，所以要到最後一刻先盤得．而由於盤左既櫃筒都唔郁得，所以基本上我地都係非常之得閒，D 客都唔知係咪知道我地要盤點，所以無咩客黎，搞到我地連想幫下人解悶都無．

　　而由於小弟之前成日都掃錯書，所以琪琪就話如果我攞到一個 "P" (完全無誤) 就會請我食薯片，結果奇蹟今日終於發生！竟然係一大堆計數機既櫃筒攞到 P ，搞到我鬼咁開心，即刻走去搵琪琪 Show 下張 P 既紙仔，之後最尾盤左 8 個櫃筒，都有兩三個 P ，成績都算 OK ! ^o^

　　夜晚個餐雖然係食第四班，已經係最後一班食飯，但係都係 6:15 要食飯，今晚有美美既 "蓮藕火腿飯" 做晚餐：



　　食完出去 Toilet ，見到黎幫手既同事已經結集係舖頭門口，當中仲有久違既 Crystal 同埋 Andrew 哥，同佢地傾左陣計呢！之後返黎就差唔多開始盤點，我地封左語言 + 歷史書 + 文具部黎盤， Davis 話不如去玩下盤文具，所以我地開始就去左盤文具，第一個挑戰就係蟬卿姨既郵票簿架，但係我盤左兩行已經唔想再盤文具，因為太麻煩，又唔熟文具，於是盤左一個架就走番去盤中文書．

　　之後就落埋閘繼續盤點，又有小食供應，有豬肉乾 + 朱古力 + 糖，由於優之良品既豬肉乾好好味，而我地又早食飯，9 點鐘已經開始肚餓，於是我每次 Upload Data 既時候，就去勁食豬肉乾，每次食 1-4 小塊不等，呵呵！而 Davis 盤點真係盤得好準，每次都係我掃錯書，連累到我地無 P ．經過完 Fiction 既洗禮之後，我地亦都漸入佳境，攞到幾個 P ，連 Ivan 都話我地係男子組既 P 冠軍．

　　最後我地盤到 11:30 就走得，剩番 D 外援同事同部份沙商同事繼續努力！

　　ps. 之後知道 Andrew 同 Crystal 原來係混合組 P 冠軍，好似最犀利連攞到 10 個 P ，好勁呀你地！！

>>December 5, 2007 at 3:36:52 AM GMT+8

2007 年 11 月 27 日 星期二 【晴】

Title：三個月快樂

三個月了！！

要更錫可愛的美美 ^o^

叻叻人上

>>November 27, 2007 at 4:51:11 PM GMT+8

2007 年 11 月 27 日 星期二 【晴】

Title：精選遊覽團

有時候

有時候，你偷偷看著我，我裝作不知道，
我，試著控制雙眼，繼續不對焦地凝視著自己在鍵盤上舞動的指尖

有時候，你故意碰我的手臂，我在心裡笑了。
我，怕那為你而擴張的瞳孔給發現，
望著地上的木紋，試著控制心臟跳動的頻率，不好讓那血液為你流得太快。

有時候，在回家的路上，很想喊出你名字
有時候，望出窗外，好想你在我家附近
有時候，我安慰自己，我們活在同一的夜空下，
有時候，我感嘆著，你我雖在同一的夜空下，卻被一個茫茫大海相隔著

有時候．．．．有時候．．．
因為你，我沒有一刻是自己。

轉載自 "[email protected]" 〔http://e.blog.my903.com〕
"感性之夜之後現代感性新詩王大賞選舉"

>>November 27, 2007 at 4:49:32 PM GMT+8

2007 年 11 月 26 日 星期一 【微冷】

Title：為食美美 @ 和民

　　盤點聽日殺到黎喇！我今日負責幫恩慧姐姐將 D "走得" 既外聯書開單，務求走得幾多得幾多！

　　今晚放工同左美美去左和民食雪糕，美美話要食 "香蕉朱古力芭菲" ，以下就係為食既美美呢：



>>December 5, 2007 at 3:48:53 AM GMT+8