2008 年 2 月 8 日 星期五 【乍雨乍晴】

Title：年初三，返工日

　　今日係年初三，公司開 12 – 7 點，我同美美都報左名返工．由於無得放 Lunch ，所以要食完野先返去．於是我同美美約埋去食肯德基早餐，當係 Lunch ．食完野就返公司，收到 Ivan 派既開工利是同埋 Ling 姐既利是，之後就開門 lu ！

　　今日雖然係星期六，而我地公司都基本上得一半同事開工，諗住會好忙．點知成日都好悶，同 Davis 企係 Counter 包書，之後又睇 Catalog ，完全係得閒得無得再得閒．

　　跟住臨收工，繼續做 “播音王子” ，今年有祝讀者新年進步，身體健康呢！收左工先係 7 點幾，之前 Plan 左去 Pizza Hut 食新 Pizza ，但係見沙田咁多人，都係返大埔食．點知大埔既 Pizza Hut 都係差唔多，都幾多人排隊等食野．於是同美美去行左個大運先返，返黎等左一陣就有得食喇！

　　由於 Citibank 信用卡有套餐優惠，所以我地就叫左呢個新出既 Pizza ：海鮮鮑汁片三重芝心批


至尊大蝦意粉


金粟芝士釀雞翼


海鮮鮑汁片三重芝心批

　　食完飯都差唔多 10 點，之後就同美美返屋企 lu ！

>>February 16, 2008 at 4:06:08 AM GMT+8

2008 年 2 月 7 日 星期四 【晴】

Title：年初二，放煙花

　　今日係年初二，都有假放．美美一大朝早就上左黎屋企，之後同媽咪 + 細佬一齊打麻雀．打到三點幾，我地就要預備出去，最後結果係媽咪 "一家贏三家" ，勁！

　　跟住我地就搭火車出去尖東，然後行去文化中心海旁．今次我地好犀利，帶埋沙灘蓆去舖係地下坐，等睇煙花．跟住我地係度玩 Uno ，仲教埋老豆 + 媽咪一齊玩．之後玩到七點幾就企番起身等睇煙花，八點鐘就開始放煙花 lu ！

　　今年既煙花都幾靚，有奧運五個環既圖案，2008 字樣，又有 "北京" 既字樣，而後段既煙花更加有 "霹靂啪勒" 既聲音，好似燒炮仗咁，所以都幾好睇！

　　睇完之後，我地就搵地方食晚飯，本來諗住去應該無咩人知既佐敦 "沙嗲王" 食飯，諗住唔駛等位．點知原來佢地要年初五先開工，我地唯有搵其他地方．之後係佐敦搵左一陣，最後去左 "御香雞" 食飯．食完飯我就同美美返大埔 lu ！

>>February 16, 2008 at 3:08:18 AM GMT+8

2008 年 2 月 6 日 星期三 【晴】

Title：年初一

　　今朝差唔多 11 點先起身，一朝早同媽咪 + 老豆拜年，收到利是．之後晏 D 美美上左黎拜年，跟住細佬既女朋友都上埋黎拜年．夜晚我地成家係屋企食開年飯．

>>February 16, 2008 at 2:54:55 AM GMT+8

2008 年 2 月 6 日 星期三 【晴】

Title：鼠年快樂！

精選遊覽團

TVB賀歲：勁舞福祿壽、魅力財神、月老 + 仙子

TVB 2008賀年歌

齊搵錢　“恭喜你”變口頭禪
任我嗌　全世界　就發晒
齊俾面　日日笑住見

新一年換電視用高清
新一年你我要去春茗
你要老友要女友都有
愛侶永遠甜甜甜到漏

新一年任食食大個胃
駛乜擔心駛乜去纖體
要你永遠再瘦瘦幾吋
靚過靚靚你要去參選

齊恭喜　香港個個叻到痺
望吓佢　望吓我　望吓你
喂　初幾
利是你都未派
個個等緊你

http://www.youtube.com/watch?v=XUshPuA_43g

>>February 12, 2008 at 5:01:32 PM GMT+8

2008 年 2 月 5 日 星期二 【乍雨乍晴】

Title：年三十晚

　　今日係年三十晚，但係都係要返工．今日既工作主要係清理埋 D 未完成既工作，結果同恩慧姐姐整埋少少執齊晒書既 Order ，就 Pack 埋 D 書運走．

晏晝有美美煮既午餐：咖哩薯仔雞翼飯，好味！！


　　夜晚幸好有得收七點，我都係繼續做 “播音王子” ，真人發聲係個 Mic 話俾 D 客聽我地早收工．

　　之後就返屋企食團年飯，有位 Uncle 都黎埋團年．我地今年叫左大家樂既盤菜，5　個人食 10 個人份量既盤菜，當然係食唔晒啦！所以留番遲兩日食．

　　跟住 Join 埋返左屋企食團年飯既美美，之後我地就搭火車地鐵出去銅鑼灣行花市．今年既花市超多人，我地雖然係 10 點幾去到，但係都幾多人，基本上企多過行．行行下就倒數，踏入鼠年 lu ！新年既第一份禮物好搞笑，話說我當時箍住美美行，當人們倒數完之後，突然有包野從天而降，插左係我對手上．之後因為太迫人拆唔到黎睇，當行完一行舖之後去到無咁多人既地方先拆黎睇，本來諗住如果無用就掉左佢，點知原來係一支吹氣既 NDS 筆，於是我地即刻吹漲佢，之後就揸住黎行 lu ！

　　然後諗住行第二行舖，點知都係勁多人，仲試過 5 分鐘行唔夠 10 步，結果行左半行就頂唔住要走先．行到去門口都一點幾，仲有好多人排緊隊入花市，但係 D 警察叔叔都 Block 住左佢地 lu ！

　　之後因為美美肚餓，所以我地去搵野食，結果輾轉地去左翠華食野．個度雖然平時已經幾貴，但係新年期間仲貴，仲要收加一，結果我地食左一個豬扒麵餐同埋叉燒粉餐，都要 95 蚊！

　　跟住我地本來諗住搵通宵小巴諗住直接返大埔，點知出到軒尼詩道搵唔到個站，於是我地都係選擇搭小巴返旺角，之後搭小巴返大埔．送完美美之後，我就搭番小巴出去旺角，跟住搭小巴返屋企，返到屋企差唔多五點 lu ！

>>February 19, 2008 at 4:36:45 PM GMT+8

2008 年 2 月 1 日 星期五 【乍雨乍晴】

Title：美美廚房

　　今晚既晚餐：薯仔雞翼牛丸飯



>>February 16, 2008 at 2:40:05 AM GMT+8

2008 年 1 月 30 日 星期三 【乍雨乍晴】

Title：美美廚房

今晚の晚餐：翠玉瓜豆豉鯪魚飯



>>February 12, 2008 at 5:08:28 PM GMT+8

2008 年 1 月 29 日 星期二 【晴】

Title：精選遊覽團

陳奕迅 --- 時代巨輪

停不低地計劃　停不低地建立
BB 班便每日疑惑
驚心動魄　背影給踐踏

流水式做馬達　流水式唸對白
零空間為歲月留白
一天路程　太多的抉擇

長袖或背心　零食或正餐
護理跟拆爛　娛樂或上班
前行還是轉彎　猶豫停頓瞬間
明日已經到站

常期望安定　還期望即興
無崖地唱唱唱唱　我恐怕畢竟這是我的宿命
無能力修正　無能力嗌嗌嗌嗌嗌停

一開始誕下已經蒼老
一開始拍翼已追不到
當骨牌瀉下已知道
天天迫我上路　天天迫我進步
難避免捲入時代太恐怖

離別或結婚　和睦或競爭
問我怎去辦　停下或轉彎
無奈驟眼間　城門便已關
時代快反應慢

無止境地角逐　無止境換節目
肥皂劇日與夜延續
參演下去　哪一天結局

我　想好好抉擇
好想嗌暫停　想一想哪樣過
怕　想一想以後
身邊觀眾便離座

常期望安定　還期望即興
無崖地唱唱唱唱　我恐怕畢竟這是我的宿命
無能力修正　無能力嗌嗌嗌嗌嗌停

一開始誕下已經蒼老
一開始拍翼已追不到
當骨牌瀉下已知道
天天迫我上路　天天迫我進步
難避免捲入時代太恐怖

一開始誕下已經蒼老
一開始拍翼已追不到
當骨牌瀉下已知道
天天迫我上路　天天迫我進步
難避免捲入時代太恐怖

>>February 9, 2008 at 4:34:23 PM GMT+8

2008 年 1 月 28 日 星期一 【乍雨乍晴】

Title：澳門之旅 Day 2

皇冠小館 -> 禮記雪糕 -> 二龍喉公園 -> 東望洋燈塔 -> 大三巴 -> 大砲台 -> 福龍新街 (買手信) -> 福龍葡國餐 -> 港澳碼頭

　　今朝起身落左去酒店既餐廳食早餐，不過唔咪好岩美美既口味，所以食左少少就走 lu ．之後上番房執野，跟住就落去 Check-Out ，同埋留番 D 行李寄存係酒店．然後我地就去搵野食，係地圖見到有間舖頭叫 "皇冠小館" ，我地搵左一陣就搵到間舖，之後我地就叫左佢地既招牌菜：蝦籽雲吞撈竹昇麵 + 豬扒包



　　我地影完上面幅相之後，唔記得擺番部相機落袋，走又唔記得拎埋部相機走．好彩個度既姐姐追番出黎俾番部相機我地，勁好服務呢！

　　之後我地就向住 "二龍喉公園" 進發，行行下美美記得好出名既 "禮記雪糕" 就係附近，於是我地就去左搵雪糕食．可能由於係食飯時間既關係，去到舖頭既時間都無人，結果我同美美就好似包場咁 lu ！


傳統包裝既三文治三色雪糕，不過無得揀味道既


三色雪糕 --- 都係無得揀味道，不過就係好味啦

　　食完我地就繼續向 "二龍喉公園" 進發，行左無幾耐就到喇，當然要係地標既 "二龍喉" 影相啦！


滙滙 + 美美＠二龍喉公園


仲有搭全亞洲最短既纜車添

　　上到去見到氣溫只係得 9 度，凍死人喇！

　　之後我地就沿住山路行去東望洋燈塔，行左無幾耐就到 lu ！


東望洋燈塔 + 小教堂

　　去完燈塔之後，我地就沿原路返去纜車站搭纜車落山．跟住就搭巴士去葡京，再行過去大三巴．去到大三巴當然少不免要係呢個澳門地標影番幅合照啦！



　　跟住我地就跟住樓梯行上去上面，原來牌坊既後面有個小型展覽館，於是就入左去睇．之後就向大砲台進發，行左好多級樓梯先去到上面．跟住發現原來隔離既澳門博物館有扶手電梯一樣可以上到去上面既 =_=

　　去完大三巴，我同美美就決定去賭場觀摩一下．由於新葡京又新又外型特別，所以我地決定去個度參觀一下．去到老虎機既場，所有既老虎機都係電腦控制，所以無咁想玩．但係我地都賭左五蚊，結果當然係輸左啦！跟住我地去左舊葡京睇下，又係差唔多咁上下既老虎機，無玩就走 lu ．

　　跟住諗住去番福隆新街食葡國餐，點知原來要六點先開門，於是我地去左買手信．經過大約半個鐘頭，我地兩個都 "滿載而歸" ．之後就去左 "福隆葡國餐" 食飯，旅遊書話佢地既咖哩蟹係最出名既呢！我地結果叫左一個套餐黎食，都幾好味架！


葡式薯蓉湯 + 葡國香腸炒椰菜


好似肉醬意粉味既蕃茄豬扒


咖哩味幾特別既招牌咖哩蟹

　　最後食飽飽，我地就趕住返去酒店拎番 D 行李．之後就搭酒店既接駁巴士返去港澳碼頭，等左一陣，我地就搭船返香港 lu ！


滙滙 + 美美 @ 新渡輪

>>February 7, 2008 at 3:25:57 PM GMT+8

2008 年 1 月 27 日 星期日 【乍雨乍晴】

Title：澳門之旅 Day 1

港澳碼頭 -> 酒店 -> 福隆新街 -> 添發碗仔翅 -> 頤德行 -> 漁人碼頭 -> 新八佰伴 -> 旅遊塔

　　今日因為補元旦，再計埋聽日既例休，所以有得放 “孖Day” ．我同美美去左澳門黎一個第一次既二人 Short Trip ，再慶祝埋五個月紀念．

　　朝早九點半就約埋美美係大圍火車站等，之後就一齊搭火車去尖東，跟住就行去中港城．然後拎左船飛之後就去肯德基食早餐，食完就上船 lu ！

　　經過個幾鐘頭既船程之後，我地就去到澳門既港澳碼頭，之後就搭接駁巴士去酒店 Check-In．點知未上得去攞房住，我地擺得左 D 行李就行去食野先．期間見到好 Mini 既澳門巴士：



　　之後我地就繼續行，經過葡京同埋好似蓮花既新葡京，最後去到旅遊書寫既福隆新街，搵 "添發碗仔翅" ，據聞有真魚翅既碗仔翅．最後... 當然搵到啦！


有點古式既福隆新街


足料既碗仔翅，連魚肚都有少少，價值 $45，都幾好味架 ^o^

　　我同美美兩份食一煲翅，當然唔夠飽啦，於是去搵附近既新步頭街食豆腐花．我地雖然手執一份地圖同一本旅遊書，而小弟亦都自問幾有方向感，但係唔知點解點都 Locate 唔到，又唔知要向邊邊行先岩，最後搞左一大輪，係 D 內街行來行去，先搵到食豆腐花同飲豆漿好出名既 "頤德行" ．


滑不留口既豆腐花同埋好香豆味既豆漿

　　跟住食完野就返去酒店攞房，之後就擺番 D 行李上去．跟住我地就去漁人碼頭，行左一個圈，而我亦都用左個 "好勁" 既方法黎同美美自拍，唔駛搵人幫手架！



　　行完漁人碼頭，又未駛咁早去旅遊塔住，所以我地行番去新八佰伴行左一陣，原來澳門既物價同香港一樣，所以無咩好買．之後我地就搭巴士去旅遊塔，望見咁高既旅遊塔，勁畏高既我未咁夠膽上去住，於是我地係旅遊塔下面行左一陣先．


LEGO 做既小旅遊塔


旅遊塔既華納禮品店：美美 + 賓尼兔


仲有一個兒童樂園，不過我地就係度影相： 滙滙 + 小電車

　　之後我地就向旅遊塔上面進發，搭個部一秒鐘一層兼前面透明玻璃既 Lift ，已經嚇死我　>w< 上到去之後，又 Feel 到個塔有少少搖搖下，搞到我暈暈地．不過周圍都好大霧，睇唔到周圍既風景，有 D 可惜囉．跟住我地搭 Lift 上多三層，去到人地跳 Bungy Jump 同玩 Sky Walk 既地方，其實個度係戶外走廊．地面既溫度只係得八九度，相信當時上面只係得五六度，我地行左一半就返轉頭 lu ．

　　跟住我地就落番去下面，等食 Buffet ．之後又再次搭 Lift 上 60 樓，去左一間旋轉餐廳食 Buffet ，不過呢間餐廳既旋轉速度都幾快，快到有 D 唔慣．而食既野都 OK 啦，最緊要係同美美食嗟：



　　食完就等巴士返酒店 lu ，外面又凍又落住微風，凍死我地咁滯，好彩無幾耐就有巴士黎到 lu ！

>>February 4, 2008 at 3:35:30 PM GMT+8