2008 年 5 月 1 日 星期四 【晴】

Title：大埔超級城一日遊

　　琴晚好夜先訓覺，今朝 9 點幾就起身．但係都仲係好累，所以都係繼續休息下．晏晝同左美美返大埔，因為約左恩慧姐姐 + Ivan 大佬食下午茶．我地 3 點鐘先去到酒樓，恩慧姐姐 、Ivan 大佬同富惠姐姐都已經坐左係度．之後到我地食，食完之後，我地就係大埔超級城入面周圍行，由 CD 舖，到吉之島，到時裝店，咩都行一餐，難為 Ivan 企係各間店門口呆等，其間仲見到拎部 PSP 出黎打機，亦都係大開眼界！

　　不知不覺行到 7 點幾，我地就去左 Neway 唱 K ，因為有得唱又有得食 Buffet ．坐低左之後，恩慧姐姐既 Honey --- X 偉傑（我地通常都係叫佢全名，但係係度開全名又唔咪咁好）都黎埋．之後我地就開始我地既唱 K 之夜，我地除左唱 K 之外，仲開埋 Concert 添，全部人都好 High ！其中 X偉傑同我合唱既 "北京一夜" ，可以講話係掀開全晚既高潮！


恩慧姐姐伉儷

　　我同美美唱到 11 點幾就返屋企先 lu !

>>May 6, 2008 at 4:39:51 PM GMT+8

2008 年 4 月 30 日 星期三 【雨】

Title：沙巴之旅Day 5

酒店一遊 --> 泳池 --> 味雅海南雞飯店 --> 機場 --> 澳門

　　今日係沙巴之旅既最後一日，都係咁早起身．起身之後，就沖涼食早餐．講左咁多日，都無講過我地朝朝早係食咩既添，當然要介紹下：

美美之早餐：

蛋奄列（內含煙肉、洋蔥同埋芝士，好似麥當勞叔叔既煙蔥蛋早餐，不過呢個奄列係絕對無鹽！）、雞肉腸、自己烘既多士（加埋牛油好好味）



滙滙之早餐：

咖哩飯（食足四日）、日日不能少既橙汁（第一日食試過連飲 6 杯）、麵豉湯（鹹到似海水，好彩最後今日飲）



　　食完早餐之後，我地就去左酒店入面既 Souvenir Shop ，見到咁得意既海龜公仔，梗係要同佢地（靜雞雞）合照啦！


海龜仔：Hello！


海龜仔：仲影?? 快 D 放番低我啦！

　　跟住返番去房執埋 D 行李，見仲有 D 時間，個泳池又咁靚，當然要游多次．但係可能琴晚場雨仲未落晒，今日既天氣都唔咪好好，成個天都係黑雲，又好大風，仲有 D 凍添！於是，我同美美都係快 D 上水，返番去房間．返到上去，出面竟然出番太陽，真係激死！

　　之後，我地就上房拎埋 D 行李 Check Out ，然後搭 Shuttle Bus 出去市區食 Lunch ，橫掂未夠鐘上車，係大堂影下相先：


美美 Featuring 沙巴傳統樂器

　　然後，我地去番我地行程第 2 日既 "味雅海南雞飯茶餐廳" ，一來 D 海南雞好好味，要再 Encore ，二來我地帶去既盤川都用得七七八八，身上只得番 11/12 馬幣，另外有 RM20 係不動產，要留番黎搭的士去機場．

　　去到茶餐廳，由於係食飯時間，成個下層都坐滿人，迫住我地要上上層，但係原來上層係冷氣房，每位要收 RM0.5 ，兩個人要收 RM1 ．本來我地諗住兩碟飯都係 RM9 ，仲有 RM2 黎叫野飲，點知上層要收 RM1 ，變左得番 RM1 ，連飲品都無得叫 >o< 好彩我地第 1 日買左罐可樂，一直都無飲，依家終於可以大派用場！得番 RM1 ，結果我地叫多個飯，可以食飽 D ．

　　食完飯之後，我地又要趕搭 Shuttle Bus 番酒店．之後仲有大把時間，我地就係酒店大堂 Hea 左成個鐘，等到 3 點鐘就搭的士去機場 lu ！

　　然後我地去到機場，見到有好多人拎住 D 行李去過 X 光機，我地就照排隊，唔記得左要去 Counter Check In 先．等到海關職員問我地張 Boarding Pass 係邊，先至去番 Check In ．之後係候機室等左一個鐘先上機．

　　飛機離開沙巴，我同美美都向沙巴講拜拜，仲約埋第時要帶埋我地既小朋友返黎沙巴玩！坐左 3 個鐘頭飛機，我地就返到澳門喇．跟住搭巴士去港澳碼頭，攞左船飛食埋 Dinner 就搭船番香港 lu ！

>>May 11, 2008 at 3:12:37 PM GMT+8

2008 年 4 月 29 日 星期二 【晴】

Title：沙巴之旅Day 4

市立回教寺 --> 沙巴博物館 --> Beryl’s Chocolate --> Wawasan Mall --> Centre Point Sabah (大眾書局) --> 双天海鮮酒家

　　今朝都係好早起身（其實日日都係咁早），之後都係沖涼食早餐．跟住就準備出門口，我同美美今日要自由行．於是我地按照旅遊書既地圖，就一路行出去，第一站當然係酒店既正門啦！


呢個名就係我地住既酒店喇 ^o^

　　之後繼續行，但係未去到第二個景點，我地已經真正 “汗流浹背” ，連件底衫都可以扭出水！之後經過一個有蓋嘅巴士站，我地就坐左一陣乘涼．路經嘅司機經過我地身邊嘅時候，應該覺得好奇怪，點解有兩個遊客會大熱天時行到呢 D 地方呢?? 而係行緊嘅時候，發現一部好得意既車：車頭睇 100% 係跑車，但係原來係一部農夫車：


跑車頭，農夫車尾，型爆！！

　　繼續行，終於去到第二個景點 --- 市立回教寺 (State Mosque)．由於呢度係宗教地方，門口嘅鐵閘又高，所以我地都無諗住入去（應該唔入得去參觀），只係係門口影左相就走：


金碧輝煌嘅市立回教寺

　　之後又繼續行程，去到第三個景點 --- 沙巴博物館 (Muzium Sabah)．望上去，一級又一級令人望而卻步嘅樓梯．但係更令人卻步嘅係，佢地嘅外牆裝緊修！我地諗左一陣，諗緊行唔行上去好，因為驚行到上去，會無開門；但係咁辛苦行到黎，唔上去又唔死心．終於都決定行上去，但係行到門口，去到未上樓梯嘅售票處，竟然無人，於是都係無行上去，連相都無影就走lu！

　　跟住再跟住旅遊書行，要去搵賣朱古力嘅 Beryl’s ．我地一路行，頭上面既太陽就一路曬，而更加奇怪嘅係身邊既景物慢慢開始減少，好似去左鄉下地方．路經嘅司機應該又再覺得奇怪，點解有遊客會大熱天時行到呢 D 鄉下地方呢?? 正當行好累嘅時候，眼前見到好熟悉嘅標誌，可以話係黑暗中嘅明燈，就係 Seven Eleven！！而呢間 7 仔身處嘅位置，亦應該係一個華人集處嘅社區，因為好多中文字．於是我地飛快地入左去 7 仔買野飲，順便抖陣嘆冷氣．

　　然後我地見行咁耐都未到，就問下店員，點知店員嘅答案，竟然唔咪係我地前面，而係係我地後面．之後我地睇下地圖，明明係前面，於是都係繼續向前行．但係越行越唔對路，因為我地真係去左鄉下地方！跟住我地終於放棄行去，等的士．點知等左一陣都係無的士，幾驚鄉下地方有排都無的士！

　　正當差唔多要放棄搵的士嘅時候，突然有一部的士係我地眼前出現，之後的士停低左，我地諗住問下司機叔叔識唔識去，好彩司機叔叔係華人，識講廣東話，咁都好 D ．之後我地就上車，輾轉地去到呢間 “山卡啦” 嘅朱古力店（而輾轉既程度係連司機叔叔都唔知係邊，要打電話去間舖頭問路）．

　　去到嘅時候，啱啱見到 “不見即散” 嘅 Jackie 伉儷，咁辛苦黎到，當然要叫佢地幫我地影番張靚相先啦！


被曬爆既滙滙+美美 @ 山卡啦 Beryl’s

　　跟住佢地等埋我地，可以坐返的士出去市區，我地就去左 Wawasan Mall 搵沙巴嘅大眾書店，同 Jackie 伉儷分別．點知原來大眾唔咪係呢個商場，我地就係 Warisan Mall 嘅 Burger King 食左個 Lunch lu ！要講一講沙巴嘅 Burger King ，因為價錢都幾抵，最平既餐只係 RM8.5 ，大概係港幣22蚊，最貴都係 RM11.5 ，即係HKD30都唔駛．

　　食飽飽差足電之後，我地就向 Centre Point Sabah 既大眾進發，幾經辛苦之下，我地終於搵到，係裡面行左個圈：


美美 @ 沙巴大眾書店


如果下次見到有人連舖頭招牌都要影相留念，千祈唔好大驚小怪，因為佢地係遊客！

　　裡面嘅裝修同香港既大眾差唔多，不過佢地嘅 English Corner 就大好多．而佢地亦都有中文部，賣嘅都係港台版圖書，不過價錢就貴好多，仲有極少馬來西亞出版既書．

　　之後因為我地驚 D 朱古力捱唔住，所以都係決定返酒店．返到酒店，抖左一陣，就去左泳池浸水，今日無水泡，所以美美都無得學游水．

　　然後我地 6 點鐘諗住搭 Shuttle Bus 出去市區，點知係巴士站見番 Jackie 同阿偉，於是我地又 Join 埋去食 Dinner ．今次我地終於去到 “双天” 食飯，原來我地先前去到閂左門嘅係分店，因為無咁好生意而休息，而我地今次去嘅先係總店．我地去到都好雀躍，即刻去左魚缸揀海鮮：


連魚缸都影一餐?? 都係遊客！！

我地嘅食譜：


濕忌廉炒老虎蝦　RM80


蒜蓉蒸象拔蚌 RM35


清蒸星班 RM72 + 白蘿蔔炆沙白 RM20 + 蒜蓉蒸象拔蚌 RM35

　　每個餸都好好味，連汁都撈埋，之後好滿足咁離開．係市區嘅商場中間穿穿插插，行行下發現落雨，仲要係好大雨又大風，幸好我隨身都有縮骨遮．唔記得講旅遊書話呢度日日都會有一兩場雨，不過我地黎到都無落過雨，真係天公造美！

　　返到酒店房間，美美攞晒呢幾日買左嘅手信出黎影大合照，笑一笑：


手信戰利品

>>May 25, 2008 at 3:54:41 PM GMT+8

2008 年 4 月 28 日 星期一 【晴】

Title：沙巴之旅Day 3

沙比島 --> 馬奴干島 --> Kohinoor North Indian Restaurant

　　我同美美今朝都係好早起身，之後就去左食早餐．跟住本來我地要搭 9 點半既船，但係預得太遲，所以趕唔到班船．於是我地 10 點半先出發！


準備出發！！

　　經過大約 10 分鐘既船程，我地就去到沙比島．原來沙比島就係我地酒店對開個個島呢！


滙滙 & 美美 @ Sapi

　　然後我地就著好裝備，落水玩浮潛．呢度 D 水都幾清，身邊好多好多好多魚呢！


睇下我地身邊有幾多魚 ^o^

　　跟住玩左大約個幾鐘，我地就搭船去沙比島既對面 --- Manukan 島．


滙滙 & 美美 @ Manukan


碼頭下既魚群

　　落左船之後，我地係島上面食番個 Lunch Buffet 先．不過由於 D 食物都唔咪係島上面整，所以基本上都係唔熱既．另外，郊野地方，都幾多烏蠅，所以都係但求醫下個肚就算 lu ！


我地既 Lunch Buffet

　　食飽飽之後，我地就落水 lu ．雖然呢度聽講話係乾淨 D ，但係反而無沙比島咁多魚．



　　我地玩到五點鐘，就搭番船番去酒店 lu ！之後返房間沖涼，然後又搭車出去市中心食飯喇！我地本來諗住去睇下 "双天" 有無開門，點知都係無開門．於是我地係海邊既食肆行來行去，最後去左旅遊書都有介紹既Kohinoor North Indian Restaurant 落腳喇！




傳統既北印度咖哩菜

>>May 25, 2008 at 3:49:43 PM GMT+8

2008 年 4 月 27 日 星期日 【晴】

Title：沙巴之旅Day 2 Featuring 8個月快樂

酒店海邊遊 --> 味雅海南雞飯茶餐廳 --> Weston Nature Tour (長鼻猴 + 螢火蟲之旅)

　　今日除左係係沙巴既第 2 日之外，仲係我地 8 個月既大日子！！

　　今朝勁早就起身，早既程度係朝早 7 點鐘都未夠．我地決定係酒店露台影下相，而旁邊有得 "晾腳" 既凳都幾靚，所以都影左既張相．


坐得好舒服既美美


仲有好優雅既露台，有泳池景既呢 ^o^

　　跟住落去食早餐，好豐富既一餐，食左好多野（大概係因為琴日餓左好耐）．呢度食野地方既風景又係一絕，因為對住一個無敵海景，遠處仲有小島配襯，好舒服悠閒既感覺，正！


樹影婆娑既海邊小徑


真正既 "海天一色" ，就在這裡


極有度假 Feel 既 Resort


仲有用黎曬太陽既沙灘椅


酒店既私人沙灘 （雖然細左 D）

　　食完早餐之後，我地就係酒店既 Counter 報 Local Tour ，本來我地諗住今日就去小島，聽日去睇長鼻猴同埋螢火蟲．點知原來有個團岩岩有兩個遊客，而仲爭四個人．Counter 職員話如果我地今日去，可以俾 9 折我地，於是我地就報左晏晝去睇長鼻猴同埋螢火蟲 lu ！

　　然後我地就換衫，係酒店既靚靚泳池游左陣水．個泳池 D 水好清既呢，又少人游水，當然要游番個背泳先啦！



　　之後我地一行四人就去左市中心，去左旅遊書介紹既味雅海南雞飯茶餐廳．個度既海南雞飯勁好食，D 雞皮做到真正既 "入口即溶" ，連平時唔食雞皮既我，都全部雞皮食晒，然後裝到好似金字塔既飯亦都好好味！

　　要引用蔡san既一句： "呢啲就係我要搵既野喇！"


入口即溶既海南雞，最後下場：一件不留！ RM 18


金字塔型既雞油飯，一碟都係RM 1 ，當然要食多碟！

　　食飽飽之後，我地就返番酒店，因為我地 Join 左 Local Tour ，要去一個叫 Weston 既地方睇長鼻猴同埋螢火蟲．我地個 Tour 除左我地之外，仲有一對澳洲黎既夫婦，然後加埋司機同導遊，就係 2:30 準時一齊出發！


好有自然風味既酒店大堂

　　我地坐左兩個幾鐘頭車，去到 Weston ，然後就轉搭小艇係河中間 "暢遊" ．但係係我地既河流之旅開始之前，我地去左一間河邊小屋食番個 Tea 先，先飽飽先起程！



　　食飽飽之後，我地就坐船係條河中間兜來兜去，一路係度搵長鼻猴既蹤影．導遊話如果我地好彩，仲可能會見到鱷魚添，因為呢條河有好多鱷魚出沒．係我地周圍搵緊長鼻猴同埋鱷魚既時候，竟然見到有蝙蝠係頭頂飛過，同埋有水蛇係度表演 "水上飄" ，而最大開眼界既，莫過於見到 "塘鵝寓飛行於痾屎" 既奇景．經過大概半個鐘既搜索，我地終於遇到：


長鼻猴

　　而我地其間亦到多次停低睇長鼻猴， D 長鼻猴又係樹上面離遠咁望住我地．之後我地就離開窄既航道，去左一個比較寬闊既河面，呢個時候已經係黃昏，於是我地係呢個咁靚既日落之下，當然要留番幅倩影啦！


滙滙 & 美美 Featuring 沙巴日落

　　睇完咁靚既日落之後，我地就去番食 Tea 既小屋食 Dinner ．食完 Dinner 之後，我地就坐船返番碼頭，係小屋既對面，原來就係欣賞螢火蟲既地點．於是我地部船熄左摩打，靠埋左去樹林既旁邊．我地見到好多螢火蟲係樹上面閃呀閃，有 D 仲會係身邊飛來飛去．而當地揸船既人，亦都攞對手捉左一 D 螢火蟲，擺係我地手中，我地差 D 整死佢地，好彩佢地都無事！

　　見完咁靚既螢火蟲之後，我地就搭番 2 個幾鐘頭車返酒店休息 lu ！

>>May 25, 2008 at 3:25:13 PM GMT+8

2008 年 4 月 26 日 星期六 【晴】

Title：沙巴之旅 Day 1

深圳寶安機場 --> 沙巴 --> 絲綢灣麥哲倫酒店 --> 亞庇市中心 --> 不夜天海鮮樓

　　今日係期待已久既沙巴之旅大日子！今朝 9 點就出門口，之後就搭火車去大埔．等左一陣，Join 埋美美同 Jackie 就繼續北上，去到上水，Jackie 既男友阿偉都上埋車．跟住我地就過關搭小巴去寶安機場．

　　去到機場好早我地就 Check 左 In ，之後就係候機室等上機．


美美 & 滙滙 @ 深圳寶安機場候機室

　　然後終於等到上機，我地坐既係 Air Asia ，佢地無安排劃位，所以搵位係先到先得，結果因為我地早上機，所以都有窗口位坐．


我地搭既 Air Asia 班機


第一次搭飛機既美美

　　經過差唔多 3 個鐘頭既航程，終於見到有陸地既蹤影係我地既眼前，就係沙巴省 (Sabah) 既首府 --- 亞庇 (Kota Kinabalu) 喇！（註：好多人都話去沙巴旅行，其實沙巴係一個省，佢地既首府係亞庇，通常香港人除左去參觀小島同埋神山 (Mount Kinabalu) 之外，都會留係亞庇，所以正確黎講應該係話去亞庇旅行先岩！）


飛機降落前影到既亞庇市郊


我地落地既情景

　　之後落左機，攞埋行李，就去搵的士 (Teksi) 去酒店．呢度 D 的士好得意架，除左車頂有個 Teksi 既小燈箱之外，基本上同普通私家車係無分別（連計程錶都無），所以車價係司機自己講，上車一定要問清楚．幸好機場至市區劃一係 RM20 ，所以我地就搭的士去酒店 lu ！

　　跟住就去左我地住既酒店 --- 絲綢灣麥哲倫酒店 (Sutera Magellan Hotel) ，呢間 Sutera 酒店分開兩邊，分別係 Pacific 同 Magellan ：Pacific 比較似係一間普通酒店，而 Magellan 就類似度假村，所以我地既 "酒店大堂" 係無冷氣，全自然開放既大堂，好有度假 Feel 呢！


我地住左 5 日既房間

　　然後我地擺好 D 野 + 休息左一陣，就馬不停蹄要出去市中心，幸好酒店有 Shuttle Bus 去市區，唔駛下下都搭的士，因為沙巴既的士都既貴下，短短去市區 10-15 分鐘既車程，就要 RM 20，即係 HKD 50-60 ．

　　跟住我地就沿住市中心既海邊行，呢度 D 樓都係矮矮的．而係落機到依家，發現出現得最多既國際連鎖店，竟然係亞庇 "梗有一間係左近" ，同香港既 Seven Eleven 差唔多，大家快 D 估下啦！（答案於本文終結處）


亞庇的新樓宇

　　然後我地去搵野食，因為基本上朝早食完早餐之後，就無咩食過野，飛機上面亦都無飛機餐，所以都幾肚餓！本來我地諗住去 Jackie 同事介紹既 "双天" 食飯，點知去到竟然無開工，於是我地唯有去返海邊既貴價海鮮飯店 --- 不夜天海鮮樓，食晚飯喇！

　　呢度既食物質素都好 OK ，其中以 "濕忌廉" 最好食，攞黎撈飯可以話係一絕！


魚鰾粟米羹 RM 25


招牌炒飯 RM 15


馬拉盞炒樹仔菜 RM 8


濕忌廉炒青龍蝦 RM 171

　　食完飯之後，我地就行番去搭 Shuttle Bus 返酒店休息 lu ！而第一日係沙巴，已經感受到呢 度既居民，都係非常非常友善：例如佢地見到你係遊客，見到你過馬路，佢地要停低部車等你過左馬路先，非常 Nice 呢！

　　問題の解答：

　　係亞庇究竟有咩國際連鎖店係 "梗有一間係左近" 呢?

　　由於馬來西亞係回教國家，所以好多人都係唔食豬肉既，因此呢度最有商機就係佢：


肯德基叔叔

>>May 25, 2008 at 3:20:11 PM GMT+8

2008 年 4 月 25 日 星期五 【晴】

Title：精選遊覽團

洪卓立 --- 香片咖啡

最初是　陪伴我慢跑
但終於　陪著你去買衫
我穿著　紅白間睡衣
妳討厭　然後全扔掉了

說好了　明夏到布吉
但終於　陪著你去札幌
在一起　忘掉了自己
我不再懂如何來迎合你

黑咖啡的苦澀　其實我最鍾意
無奈你喝香片　陪著你喝千遍
相愛不懂相處　難道自我欺騙
永遠沒有主見　方可稱得上體貼

我享受　紅日與藍天
卻跟你　遙望長夜月照
看一齣　沉悶愛情片
妳哭了　無奈我沉睡了

我只聽　藍調爵士曲
但偏偏　陪著你聽無味 K 歌
在一起　再沒有自己
我跟你　如若正反在兩極

黑咖啡的苦澀　其實我最鍾意
無奈你喝香片　陪著你喝千遍
相愛不懂相處　難道自我欺騙
永遠沒有主見　方可稱得上體貼

黑咖啡的苦澀　其實我最鍾意
無奈你喝香片　陪著你喝千遍
相愛不懂相處　難道自我欺騙
永遠沒有主見　方可稱得上體貼

黑咖啡的苦澀　其實我最鍾意
陪著你喝香片　難受到我想笑
相愛不懂相處　難道自我欺騙
永遠沒有主見　方可稱得上體貼

>>May 5, 2008 at 1:19:17 PM GMT+8

2008 年 4 月 25 日 星期五 【晴】

Title：大假開始了

今日開始放大假喇！ ^o^

>>April 26, 2008 at 3:24:17 PM GMT+8

2008 年 4 月 24 日 星期四 【雨】

Title：美美廚房

　　今日嘅午餐：茄汁豆薯仔排骨 + 蒜蓉白菜 + 蝦仁炒蛋 + 豆豉鯪魚飯（好豐富嘅一餐呢 ^o^ ）



>>April 26, 2008 at 2:06:09 PM GMT+8

2008 年 4 月 23 日 星期三 【晴】

Title：美美廚房

　　今日嘅午餐：茄汁豆 + 薯仔排骨飯



　　今晚嘅晚餐：栗子炆鴨 + 梅菜肉餅飯



>>April 26, 2008 at 1:05:01 PM GMT+8