2005 年 4 月 14 日 星期四 【酷熱】

真係唔多想打日記，不過今日真係好開心，今日唔單止出奇地拎到好成積，
支火箭仲飛到一半有多！開心死！放左學，同阿瑩去左電視台坐左陣，好好玩！
之後去左同彭、叻整火箭，整左好多支都失敗，最後連個波都爆埋，番屋企...
不過真係玩得好開心！之後同彭去左元朗廣場，睇下買咩比叻，嘰嘰......已經
睇中目標啦！我仲買左個筆袋！哈哈！好可愛的豬！夜晚係度做pe project，copy
到眼花！！寶，唔舒服唔好番學嘛 ~ 咁辛苦.......
完

>>April 14, 2005 at 9:00:21 PM GMT+8

2005 年 4 月 10 日 星期日 【酷熱】

今日好早出左門口，太早去到，兜左成個圈先上去，點知我對上個男人今日
absent，我足足上左９個幾字！好緊張 ~ 因為今日彈〔寒舍〕！！開始彈前奏...
超順！但一開始彈唱個度有d疾下疾下.......因為好多clock嘛！＞＜今日新學左
〔小城大事〕，MISS話下堂學〔你知道我在等你嗎？〕！！Wow ~ 畫畫，
超唔想畫個幅咁既爛鬼畫！好想完左佢，畫漫畫呀！！畫完，番左屋企，
玩電腦.........沖完涼，阿琪好多野煩呢......好擔心佢呀！聽日又番學啦 ~

完

>>April 10, 2005 at 7:27:15 PM GMT+8

2005 年 4 月 7 日 星期四 【酷熱】

今日超熱！！起身個陣好辛苦！！對眼撐唔開！番到學校，已經覺得好累，
好似要上戰場咁！頭兩堂，中文，無做隨筆 ~ 哈哈.....好慘呀個d狐狸 ~
比人剝皮！＞＜個d大陸人仲o係度笑！！好殘忍呀 ~ 小息，同紅寶去左廁所
Gel頭 ~ 好長呀d頭髮 ~ 兩堂IS，調位！！！！阿彭好慘呀 ~ 同姣婆楠坐 ~
紅寶仲慘！！！同黑人東菇坐！！！唉 ~ 我就同番肥婆同組 ~ 要做火箭呀！！
點算呀？？好多功課呀！想死！加上又就黎test啦！！ERS，傾計.......
音樂......LUNCH，去左麥記 ~ Wow ~ 原來肥婆o係d咁既人 ~~ 去左７仔買左
樽香口膠 ~ 數學......唔記得帶計數機 ~ 英文.....放學！紅寶要去開會，
我、彭同叻去左漫畫班，紅寶番左屋企喔....要幫細佬溫書 ~ 真係好家姐 ~
唔似得阿彭嚕 ~ 哈哈︿ ︿畫到４點半，走左，之後睇下隻火箭，再去埋
書局拎份中史釘裝！番到屋企，睇哈爾移動城堡！！不過係漫畫！＞＜

完

>>April 7, 2005 at 8:36:43 PM GMT+8

2005 年 4 月 6 日 星期三 【微冷】

今日好開心呢 ~ 同紅寶、小彭、叻去唱K！＞v＜９點鐘打比紅寶，傾左陣......
梳洗......出門口！搭輕鐵出左去，我地三個去到Neway，叻已經到左啦 ~
我地拎左房，一開始唱左好多歌！點左成板Joey！！呵呵* 本身唱到１２點９，
但因為冇人黎，我地唱多左粒幾鐘！！！！不過超級凍，一路唱一路震！
紅寶就唔好彩啦 ~ 又差一隻先唱到佢想唱o個隻！！唉 ~ 你次次都係咁 ~ 上次就
差喜歡戀愛！今次就差神奇！哈哈！我地唱完就番屋企嚕 ~ 又搭輕鐵 ~ 夜晚o係
度執書包 ~
完

>>April 6, 2005 at 8:18:21 PM GMT+8

2005 年 4 月 3 日 星期日 【微冷】

今日訓到好晏先起身，下午食龍蝦大餐！！！正斗！
夜晚去左婆婆度，好悶呀今日............紅寶快d回來呀！＞＜

>>April 3, 2005 at 7:47:25 PM GMT+8

2005 年 3 月 31 日 星期四 【颳風】

今日出左去同琪唱K呀！！＞＜臨出門口前先知阿茵又甩底！！唉 ~ 慣啦 ~
搭輕鐵出左去，去到neway，阿琪剛到 ~ 我地改番２個人之後，去左３１５ ~
第一隻都係唱〔呼天不應〕！唱得勁high ~ 唱得最好玩係今次！原來邵詠詩
就黎結婚！！！勁驚訝！佢竟然嫁得出！！死啦 ~ 咁呢個世界上咪好多人嫁唔
出？！唱到１１點１１，竟然咁快cut我地房？不過好開心，諗番起好多小學既野！
之後琪話要買野比佢個航航，買左件黑色T-shirt、一頂 ice fire cap 帽！買完之後，
上左阿琪屋企，勁影相，又傾計....... 好好玩！玩到４點９，走左，番到屋企，
沖涼.......夜晚，阿琪add左張鞏楠，勁玩佢！！send左張靚仔相比佢！話我個fd１７歲！
笑到我抽筋！
完

>>April 25, 2005 at 9:07:40 PM GMT+8

2005 年 3 月 30 日 星期三 【微冷】

今日成日係屋企煲碟，睇〔愛在哈佛〕，睇到４點幾，沖涼，練琴 ~
同琪、茵玩msn，哈哈 ~ 之後打左去neway book房，好多人呀 ~
１０點半都冇房 ~
完

>>March 30, 2005 at 8:06:45 PM GMT+8

2005 年 3 月 29 日 星期二 【酷熱】

今日同阿媽出左元朗睇錶，睇左好多間，搵唔岩心水，諗住買唐老鴨，點知
阿媽話唔買，又話隻錶太厚，又話核突，我戴姐又唔係你戴！把幾火咪唔買囉！
２點幾去左新北江，４點番到屋企，玩電腦..........同琪玩泡泡！睇喜馬拉亞星！
開頭都幾好笑，但睇到最尾好悶 ~ 一天過去.......
完

>>March 29, 2005 at 8:37:17 PM GMT+8

2005 年 3 月 28 日 星期一 【酷熱】

今日成日都o係屋企，起身個陣已經１０點幾，幫紅寶print完本書，睇〔吾妻
１６歲〕，好鬼抵死！一路睇一路食小籠包！正斗！之後阿叻send左中史同
中文既project比我印！勁多張！！印到我癲！同彭傾icq，好白癡呀！好想睇
IFPI 呀！居然叫我睇少１、２次唔緊要！哼！同紅寶傾電話！阿琪，你真唔好采，
咁岩比人查身份證，個警察真係衰，為左交差！食完飯，同紅寶、彭傾電話！
哈哈！耶穌的激情！夜晚，唱K日子搞左好耐！！終於搞掂！
完

>>March 28, 2005 at 8:24:12 PM GMT+8

2005 年 3 月 27 日 星期日 【颳風】

今朝去左學琴，學〔寒舍〕呀今日！嘰！去畫畫....好野！阿叻話４月去佢屋
企搞牛一！又有得同佢細佬玩！畫完，同阿媽行完元朗，３點幾，去左屯門！
去到，睇中左隻Mickey錶！不過冇黑色，諗住睇多幾間先買！行到６點幾，去
左食上海菜，超好味！最鐘意飲酸辣湯！！酸得黎又唔係好辣！正！食完，
阿媽話行到好攰，搭輕鐵番左屋企，今日冇浪漫滿屋睇！！！＞＜ 嗚嗚....

完

>>March 27, 2005 at 9:22:46 PM GMT+8