2005 年 10 月 11 日 星期二 【晴】

4:00am,半夢半醒,摸到大貓公仔條尾,以為摸住肥仔隻手仔,果下仲好開心,到醒少少時,諗真d無可能,撐大對眼先知又係到發夢.......=.="
不過偶然能重溫一下摸摸肥仔的感覺,也是好的~

今朝一開電話收到個留言,一個叫阿玲 ge女仔,好熱心咁諗住幫我簽名,
仲打算搵埋朋友一齊簽....四個月了,估唔到仲有人會睇到,仲會肯幫手,好感激!
聽到佢一句公道自在人心......我即刻將個留言俾媽子聽一次....謝謝!

同事送左對陶瓷貓貓手信俾我,放低係?頭....很喜歡~
每次佢地去旅行,都會特地買一份禮物俾我,佢地咁錫我,
我離職果陣送D咩俾佢地好呢?????

我呢,同阿玲講電話時,令佢提起傷心事,整喊左佢...真係唔好意思!!
不過估唔到愛協D職員咁多個都係咁鬼衰!
我倒希望自己下輩子做隻貓,卻希望肥仔下輩子能做個人,他自己感受過,
下輩子該會很愛惜小動物.....

不得不提.....其實我係唔識用中文打sms...=.="
用英文都係異常精簡同打得巧慢....我真係唔係出生係呢個年代~~:p

上次在車上叫醒我的,原來不是護老院職員,是那兒的院長....=o=
今日派咭片俾黃太,叫佢介紹D老人入住....
仲講俾我D同事聽我會係車上熟睡....=.="
不過一個院長,會親身帶住咁多個老人黎睇醫生,對佢地又咁和藹,
應該都係一間唔錯GE院...

Anise行禮果日,熟ge同事都要返工,無人去....
你個樣好想我去咁喎....諗下先,我D假期已經係預支緊...所剩無幾~>.<
仲有寶恩個畢業禮........

嘩嘩嘩,今日一行幾個人行過(無幫趁),老闆娘的確又送甜品,
送到出埋門口俾我,因為佢又研製左新野~^^
又發現,原來佢唔係老闆,老闆係我地一直以為伙計果個阿叔....=o=~
但個老闆見佢"倒米"都仲好支持佢,打工遇著個咁好ge老闆,又可以整自己鍾意ge野,真不錯~
但都係唔明,點解送俾我...可能我太可愛~~:p

karen說了一個"驚喜"給我知,但太"驚喜"了,暫時不知道是什麼,
我應該唔會幾晚都訓唔著(都無咩點訓:p),不過會好期待,好期待~^v^


>>October 12, 2005 at 10:00:35 AM GMT+8

2005 年 10 月 11 日 星期二 【晴】

rheavv,
我呢.....以前算唔算開朗呢?!我都唔係好知,
不過唔會有野唔開心多過2日,除左阿嫲走果次另計~
呢家呢,就比較差d....改善中~~^^

我都覺blog幾好,因為我係果d,好多野都唔會講出口ge人,
咁有個日記,有d乜開心唔開心,見到d得意ge,都可以係到post下,唔錯吖~~^^

我同你相反呀,我呢排返工好空閒,所以係office"行來行去"....係真係悶到乜都無得做....=.="
=================================================
確吞,

肥仔離開之今,我一直都同佢講,叫佢唔好記住呢度所有野,放低仇恨,安心去投胎,
(信佛ge表姐教我一定要咁講,因為肥仔係被殺ge,會變遊魂,所以要咁同佢講,佢先可以安息)
所以我從來都無叫佢去搵返d兇手報仇(因為諗住仇恨留低比我就可以了,我會同佢報仇)

我都知報應多數都係報係下一世,有生之年未必見到,但內心都係想佢地今世現眼報...
我亦明白,我咁ge心態一樣係會有報應,.....
但佢地太過份!咁對肥仔之後,仍毫無悔意,由果段時間開始,就出現電話騷擾,
仲有好多扮簽名信ge毒email,我無諗過會有人咁無聊(賤),
但真係好巧恰囉,全部都係肥仔離去之後出現,四個兇手,諗都諗係邊個,不過我唔會理會,
咁做,佢地只係繼續加深佢地ge業!

由肥仔入門口果下,到我爬上左平台,未見到肥仔果刻,
我個心一路都只係諗住:"俾返肥仔我",佢地關門果刻,我無諗過肥仔會遭受到咁ge事.......
一切都太突然,一切都太遲.....

當晚我抱住肥仔後,我直頭唔去理佢地果家人死唔死,我眼中只有肥仔....
難過得要命時,迫不得意才放下肥仔暫託表姐懷中,入去同個沙展理論....
我唔希望肥仔聽到世界上有d咁賤ge差人!肥仔ge世界,本應是美好的!
3個警察入面,個沙展係唯一唔敢行近肥仔ge人,.....
事後,有諗過,果刻應該抱肥仔係兇手面前,俾佢地睇清楚,26樓,26樓扔落去,
肥仔俾佢地整到點樣,不過我相信肥仔唔想見到d賤人........
仇恨>>報仇,係我腦海就好似一個惡性偱環咁,諗到其一,就會聯想其二.....

不過為左肥仔,為左家人,為左自己,我好努力咁控制住自己ge思想方向.....但願我做得到!

確吞,也想再次多謝你,謝謝你對我的關心,謝謝你畫了一幅在笑的肥仔,謝謝你送我漂亮的咭!

>>October 12, 2005 at 9:57:09 AM GMT+8

2005 年 10 月 10 日 星期一 【微冷】

<===好耐無用個呢個頭~~佢終於再出現了!


2:00pm-醒~
醒醒訓訓,這四個月的日子都過得不太正常,"失眠"時會起來看書,上網,
像偷了未來的時間一樣,感覺像變老了~>.<
是時候要調節一下...

寶珠姐來了我家,研究一堆令人頭痛GE數~
換轉我係佢,要睇果本睇到鬥雞GE書,我一定發癲~
不過,我英文水平有限,亦唔係好記得點計之下,加上我表達能力極有限.....
.幾條數仔都搞左好耐...^.^"
之後就係我家食晚飯,佢係第一個朋友係我屋企食晚飯呢~
可惜佢好多都唔掂得...我媽子的廚藝不錯的,多點上來吃飯~
雖然呢家無左可愛ge小肥望住你夾緊ge餸,又無左佢係腳邊攝來攝去,
但還有可愛的小玲"陪吃"啊~XD

寶珠對我間房似乎好好奇,仲俾佢一睹咩叫"亂葬崗"~
識佢咁耐(都差唔多十年咯...),好似又真係無俾佢入過間房,因為佢怕動物,
以前肥仔係到,佢邊可能坐得咁安樂,佢同肥仔會一人佔一個角落,
佢怕肥仔,而肥仔見佢咁大動作,又會匿係角落,
諗返起個情景都覺得搞笑.......兩個傻瓜~>u<
所以寶珠每次上黎,肥仔都係我間房坐監,係到呱呱叫,寶恩又驚到呱呱叫...:p

天氣開始涼喇.....早幾日去探肥仔時,攬住佢件衫仔,喊左陣....
攬住佢件衫,比摸住佢冰冰冷冷ge骨灰盅,感覺仲大d.....
舊年呢個時間,佢都開始痴人抱抱喇.....

原來sem break不足一個月....>o<

某日興致勃勃咁同細佬講去bbq,諗起要約人又唔想搞了,
每次約咁大堆頭,都好煩吓....:p



>>October 12, 2005 at 8:23:38 AM GMT+8

2005 年 10 月 9 日 星期日 【炎熱】

0300-訓唔著想起身食D野,落床企唔穏,怕跌落地反而仆左埋書枱,
中左眉心....慘叫左一聲之後返床訓就算~
今朝起身,眉心紅腫左一舊野...極度礙眼!!!!!

覺得今日心情不錯的,要保持住.....

原來聽日又有假放,但覺得重陽好似好遠咁...
探肥仔時,佢個位附近又多左幾位"鄰居",除左上次已有的那隻狗,
其他都好像沒人拜祭.......望上去,覺得佢地好孤單....
職員說,其他的主人,都不想承認寵物已離去,所以很多都不敢來探望....
我覺得,我還可以去探肥仔,已比較"幸運"....

今日lunch得自己一個人食,唔想自己一個坐係度食,所以買外賣,
點知老闆娘又請我食糖水,於是戇居居咁坐左係到食.........
飽到個外賣都無乜點食過~:p
佢呢家連我行過都會追出黎送甜品俾我...佢係咪諗住包辦我每個月GE糖水呢??!
再咁樣,我唔好意思再行果條路呢~~^^"

我也料你會看到,也知道你會有點點點點的介懷...
但這確是我的感覺,也許你不會明白...

放工,返屋企坐左陣就出去同例湯睇戲,中途撞到彭小康,一個想同佢道謝GE人!
不過見到佢時,我又講唔出口,因為講講下好大機會會喊出黎....
所以我都走得好快....=.=",係呢度講返:"多謝你!"

同例湯係優豬良品收獲什豐~
[電車男]幾好睇吖,同預期差唔多~

兩日以來,直至洗澡時才眼淚淺流,算是不錯了~
2:00AM -訓

reggie,
我幫你問左"月滿園"GE職員,他們找不到你的小狗的登記,
沒被認領的骨灰,而近似的名字只有BB這個,我把你的聯絡電話留給了職員,
他也即場致電聯絡你,但電話沒人接聽...他稍後會再聯絡你~
希望你能尋回你的小狗~^^




>>October 12, 2005 at 8:18:01 AM GMT+8

2005 年 10 月 9 日 星期日 【晴】

rheavv,
對,我恨他們一世!
願我不會變成魔鬼~

晚上很早已看了marble擊球了,乾脆利落,很棒!
然後,瞄到了你有link brownie日誌,看了一連串的回憶日誌 &
Alice老家的虎和酷兩隻貓貓,同樣肥肥的,很可愛~
我就是想替肥仔整一個這樣的回憶錄,不過肥仔多數的照片都是用傻瓜機拍下的,
要花很長時間才可以scan好,而家又唔敢去揭d相簿,
都唔知幾時先會同佢整.......=.="

>>October 9, 2005 at 5:19:33 PM GMT+8

2005 年 10 月 9 日 星期日 【晴】

rheavv,

不能調遷的,我家已是自置居所(肥仔唯一最熟悉的地方.....),
對方亦是(如果我沒記錯的話),之前我也想過要搬,但現在改變想法了,
他們也別要搬.我可看著他們何時受到報應,搬得太遠,我就無法看到~
肥仔在他家被奪命的,相信天會在那裏給魔鬼同等報應!
怨怨相報可時了<==這我明白的,但做不到...
我這輩子也沒有仇恨過誰,現在有,一共四個!

常要你擔心,不好意思~-.-\
去探完肥仔,心情也好了點,別擔心~

>>October 9, 2005 at 4:36:00 PM GMT+8

2005 年 10 月 8 日 星期六 【晴】

訓到好晏先肯起身,其實好早醒左,訓返咁多,無理由仲會攰,不過我好鍾意攬住張床,由d風吹埋黎ge感覺,好舒服....

黃太約我今日行山,好似行打鼓嶺,不過小玲實在太耐無勞動過,行行下不省人事就搞著佢了,約定下次再同佢行過,等我keep住做返下d運動先。

寶恩今日都係黎唔到,身兼兩職,係辛苦d架喇,睇下姐姐邊日得閒帶你去食雪糕,乖~

由於身子差左,所以媽子不停同我進補,但我最唔鍾意食呢d野.....咪搞~
均衡飲食就可以了~

無心情出街玩,數數手指,都推左4個活動,目的:清晒係房ge"雜物"!!

秋高氣爽.......乾~
好想去踩單車~





>>October 9, 2005 at 3:43:30 PM GMT+8

2005 年 10 月 7 日 星期五 【颳風】

沒有睡過.....洗個臉,洗個頭,就去上班了~
黑眼圈漸漸變成紫紅色了,用厚粉也遮掩不住了....

尋日撞到兇手,今朝撞到兇手一家個細女,真係橋~
唔同GE係,今次我唔係未訓醒,主動貼近佢GE係我,
我要望真D,清清楚楚咁認住佢地個樣,無論做人做鬼,都唔會放過佢地

同同事講起呢兩日都遇到兇手,她們竟放了個防狼器給我~
我估,下次再遇到時,要用它的人不會是我....

Anise講開大陸醫院問題,咪同佢講下阿嫲入住果陣,
要額外俾錢先會有醫生巡房同其他荒唐GE制度,
佢好愕然:"我以為你嫲仲係到...平時聽你提起,話佢好錫你地..."
我:"係呀,咁以前係好錫嘛~"
A:"你都無話佢唔係到.."
我:"你都無問過我佢係唔係到~^^"

跟住佢再八下阿嫲因乜離世&離世GE情境,問得好detail?,
知道我捉住阿嫲隻手,望住佢流左最後滴眼淚,慢慢無氣息,
再幫手換壽衣,由暖變冷....佢無端端喊左出黎,
然後摸住我個頭講:"你究竟幾多歲?點解咁細個女,已經好似經歷左好多野咁?
點解你唔走開?你頭先ge表情好似另一個人咁..."
我:"都唔細啦,兩年前啦,阿嫲走果陣,都70幾...邊有人會願走開..."
Anise無再出聲,只係攬住我,係咁摸我個頭....
傻瓜,喊緊果個係你呢.....生老病死,邊有得避...
而且呢家諗起阿嫲,都只係剩返思念,唔會痛....
不過不得不承認,經歷肥仔ge事之後,我都覺得自己衰老左好多...
外表唔知......心態就變化好大.....

感情豐富ge anise...下次都係唔同佢講呢d野,
亦都唔好用憐憫ge眼神望住我....我唔要人地用呢d眼神望我..
我都只係一個好平常ge人黎....

最近幾個星期六,原本約左我ge朋友都唔得閒,今日又無緣去睇"電車男"喇,oh~
去探完肥仔,我去邊樹好呢...?
今日得我一個去探肥仔,nicole怕狗,卡路怕狗,寶珠怕狗......
佢地陪我入去,喊果個一定唔係我.....:p

1313-搭車入粉嶺,
1440-多左好多狗狗呢.....勁大隻,高過我,仲要狂吠喎,搞到我都有d驚~
1530-1700去元朗,搭左超耐車呢....
1700-2000阿端姐因為想我陪佢收鋪食飯仔,竟然出動"迷魂香(薰)",不過就只係陪左佢收鋪,
趕返屋企食飯仔~
2100食飯,沖涼,訓覺...累~


>>October 9, 2005 at 2:32:30 PM GMT+8

2005 年 10 月 7 日 星期五 【晴】

我不是仁慈,也不想對魔鬼仁慈!

>>October 8, 2005 at 4:50:51 AM GMT+8

2005 年 10 月 6 日 星期四 【微冷】

kitty拎左成袋disney 公仔返黎,小玲係六十幾仔公仔入面搵到欠缺ge其中6隻,
跟住某社工行過又送一隻俾我,呢家仲差6隻咋~^^

話說一大班女同事集體訂購左好幾箱貨品,當中大部份都係女性用品,
咁佢地個個就好私私縮縮咁去分野啦,然後某男社工行過,各女同事即時四散,
男同事好無奈咁同我講:"我頭先都幫佢地分好晒啦!佢地仲要搞咁耐ge?"
其實我都睇住之前係佢幫手分架....反而會尷尬GE原來會係女仔,funny~~
其實都係日常用品啫~

嘩嘩嘩~今日去食飯,老闆大平買d甜品之餘,仲送埋自伙涼茶!!!
我同anise又食又拎~~

2000-訓
0000-噩夢乍醒,唔記得個夢係我追住殺人/人地追住我黎殺,淨係知好驚咁醒左...
我怕我有天也會變成魔鬼.....朋友們如發現我變得陌生,別怕我....我還是我....

0100-0400 沖涼,ONLINE:約定例湯每個星期去做一次運動,細佬也將離港讀書...
寫日記,在關了燈的廳中呆坐....
0500前,避免夜半醒來的家人發現我仍坐廳中,走回房中裝睡...
我想,該要再約見心理醫生了....最近狀況好像變差了....
情況變壞,開始想把所有的事都收藏起來,把日記也關掉,
雖然這樣等同自我封閉......該畫如何打開心窗???
只想做個平凡的人,過簡單的生活,只求睡得安穏,何以變成這樣?



>>October 8, 2005 at 4:42:03 AM GMT+8