2004 年 2 月 1 日 星期日 【乍暖還寒】

晨早五點鐘起身……………….
救命！
眼都未開得晒就上左車喇…
不過今日早左成半粒鐘去到聯合醫院，六點半太早到喇！下次都係約六點三巴士站等就好喇～大家仲要記得帶口罩！
我同阿連都好無奈囉．．咁早到又唔想咁早上去換衫，咁就惟有去醫院餐廳食下早餐先囉～
好在我地趁呢個空檔食左野先咋！否則就要等到同其他同學仔一齊到九點半先有得食野，實餓死喇！
結果我同阿連食左兩次早餐，不過夾埋都係一人食左一份早餐無食得過量既～
晏晝我同 Nancy 夾份食左個揚州炒飯，雖然只係食左半個飯，但係已經好滯好飽呀！兩點食完，但係我五點幾仲好飽…
成日聽其他同學仔講聯合好嚴，攪到我尋晚訓得好差呀><..
但係今日出到去又唔覺喎～staff 完部都好好人，只要我地有唔清楚又主動問，佢地就好肯教我地~
不過一開始俾個ＩＣ問書問到勁驚！因為佢地好多野做，咩都講得好急問得好急
好在我都好好彩答岩晒，尤其 Doris 企係旁邊睇住我地答，我又唔敢偷望佢面色嘛.. 但係佢事後都讚我地識答呀~ 開心~~~~
聯合既 settings 同大埔好唔同，一入到去病房真係好唔慣，要時間適應返
佢地寫既字好潦好難睇，又無連貫性！咁我咪請教 Doris 囉，但就係連 Doris 都睇唔出佢地寫咩先至高明呀！勁！
.................... 仲等我擺咁多時間落去睇排版添..><::..
抽左簽下兩個星期既考試次序啦～我係８Ｂ最後一個考，咪即係驚得最耐果個！所以遲考唔一定好…
好不容易先捱到放學.. 太早起身，唔慣，又好累好累呀..
成日都痰上頸... 好慘好煩.. 唔知邊個會比較快 d 好返無晒病呢?? 鬥快丫~~

Nancy 多謝你個靚靚長洲手信呀~~
估唔到你真係去旅行發癲之餘都不忘我呢@@~~~~~!!!!!!!!!!!! 多謝多謝^^ 我不會同某某講架喇~~

收到一個這樣的醫貓：
您知道家庭（FAMILY）這個詞的意味著什麼嗎？
家庭（FAMILY）= 爸爸 (F) ATHER和 (A) ND 媽媽 (M) OTHER，我 (I) 愛 (L) OVE 你們 (Y) OU。

>>February 2, 2004 at 2:50:16 PM GMT+8

2004 年 1 月 31 日 星期六 【晴】

好唔願起身呀..
俾鬧鐘嘈醒左都仲好累
對眼好乾又睜唔開咁..
今朝又遲過家欣一步踏入去新時代啦~ 佢 daddy 見到我就第一時間俾左兩封利是我~ 多謝晒呀@@~~~~~~~~
估唔到佢地咁好人~~~ 之前未放假已經有新年禮物，而家又有利是逗！
祝你地新年快樂！身體健康！工作愉快！家欣學業進步！書法猛進！快高長大！聽教聽話！越大越靚女！
今日臨落堂十五分鐘又係同家欣玩佢個公仔筆袋同埋我個檸檬水樽
佢個粉紅色公仔筆袋改名叫做熊仔 POST PET，我個檸檬哈哈笑就梗係姓黃名叫檸檬 LEMON 啦～
之後家欣仲畫埋漢堡包店同售貨員係張白紙度，再畫多幾個現成既漢堡包﹑橙汁﹑牛角包﹑波板糖！仲有食物籃添呀！
真係好靚好正架！！自己好耐無咁樣玩啦～小朋友既創意其實幾好架！家欣仲要拎返屋企填顏色添喎@@~
家欣放學就同 daddy & mummy 去新城市間風月堂食晏~ 好開心呢~~
佢今個新年又去左海洋公園，連埋前一排總共去左果度三次啦！真幸福呀～
今日見到有個的士司機一路開車一路食煙！好離譜呀佢！！

今日熱左好多啦.. 今朝發現自己有一舊好大的痰上左頸，可惜咳佢唔出.. 痰上頸講唔到野好慘..

晏晝馬鞍山伯娘同堂哥至軒黎拜年，伯娘無咩點變，但係至軒就肥左大隻左成熟左好多呀！
至軒而家係見習土木工程師，成日都要出地盤，但佢話要實習四年先可以考牌做工程師喎～不過佢咁叻一定考到架啦！

今日二月一日係逸安護 SHAWCARE 上莊大日子呀~~~~
恭喜！恭喜呀～～
SHAWCARE 上莊啦＠＠ 需要理由嗎？^^~＊

>>February 2, 2004 at 12:48:30 PM GMT+8

2004 年 1 月 30 日 星期五 【晴】

而家既時間過得越黎越快呀...
諗返起除夕倒數都仲好似只係無幾耐之前既事
估唔到話咁快就係二零零四年一月最尾一日
唔通係快樂不知時日過？唔知呢~ 快樂點都好過唔開心既^^
今朝去 Ms Lam 屋企拜年，不過無利是收架～因為林小姐仲未同龍生拉埋天窗
Ms Lam快ｄ結婚啦～希望下年我地去你屋企拜年有埋龍生係側邊呀！仲要好好參觀一下新居添^^
今朝同阿連一齊等小巴等得好慘呀！
由九點半等到十點兩個字，足足等左八個字車都仲係未上到車呀！架架爆滿，架架飛站！！
當我地等到好不耐煩既時候，後面有個女人走埋黎撩我地一齊搭的士，再加多兩位男士就夠五個人一架的士喇～
點知我地一上左架的士就見到有架吉小巴到站！激死未！！
但係我地都上左的士咯… 無理由走返過對面馬路搭小巴嘛… 唉………….
原本一直搭去 Ms Lam 屋企應該五十蚊左右，但係我地五個人唔係同一個目的地，行多左路，所以要六十幾蚊喇
我同阿連係最後落車，所以減除左佢地三個人三十蚊之後，我地兩個要包底俾埋果三十幾蚊，比起搭小巴多出四倍幾！
不過今次去 Ms Lam 屋企又幾好喎~ 有好好味的芝士餅﹑蘋果批﹑鹽水雞翼﹑焗雞翼﹑梳乎里～
我食左好多蘋果批呀！因為實在好鐘意食有水果 "涵" 既甜品囉^^ 我地仲可以睇住 Ms Lam 整梳乎里偷師添~
見到 Ms Lam 屋企有咁多整甜品既用具覺得好正，攪到我而家好想即刻去買焗爐整甜品呀~
我地係廚房笑班男仔有電視睇有波睇就得，好易滿足
我地女仔就有玩 scrabble，玩左一陣就去睇 Ms Lam 整梳乎里啦~ Eva 同 Carrie仲有玩按摩椅添
我地發現左 Ms Lam 個浴室磅可能係磅輕人架~~ 所以磅得好開心，但係 Ms Lam 話個磅係準架喎.. 欺騙下我地都可以卦><..
我兩點鍾要返新時代，所以要早走，不過又因為想等食埋梳乎里至走，時間都好趕，但係好在搭小巴兩點鐘岩岩好無遲到
收到黃生封利是，雖然唔係大封，都好過無啦～而我自己無錢派就派糖啦！
黃生又請我食曲奇餅，但係我唔知揀邊隻款好，佢見我揀唔定就寸我揀男朋友實好奄尖！
攪錯呀！之前已經俾你係我既學生面前踢爆左好多次，今次又俾你當話題黎講！
細路仔的確係童言無忌，如欣做做下數無啦啦抬起頭同我講佢媽咪就黎碌爆卡，原因係佢買左好多鑽石
如欣仲話佢今年逗左三萬蚊利是添呀！我好羨慕呀！可惜都係得個恨字，我諗我唔會收到咁多利是錢囉..
仲有呀~ 如欣話佢屋企有個豬仔錢箱入滿晒錢好重，而入面既銀仔唔係媽咪俾，而係係街執！
估唔到細路女係可以執到咁多錢！又逗到咁多利是錢！
世途險惡呀！如果我係壞人，如欣你屋企實俾我爆竊左好耐，你自己亦都可能已經俾我綁架左喇..
如欣同子健臨放學又屈我派利是，佢地既理由仲要無理得要命！傻啦！未結婚係唔會派利是架～
放學一路行返屋企一路講電話，唔收線都無事，一收線就出事喇！
我竟然俾一間村屋入面既人倒水落我個頭同埋身！
果一刻我簡直嚇呆左，根本係拍戲先可能有既情節，點可能會發生係我身上！
但好無奈呢個情況真係發生係我身上囉..
好在唔係太多水，我未至於變成隻落湯雞，但係… 希望唔係洗腳水喇……
返到屋企食左兩塊年糕，食左碗粉葛湯，好味～

睇第三次醫生喇.. 希望呢係醫生開既藥有效，咁就可以快快好返
難得肥左就唔可以俾佢瘦返啦～
忍痛飲多ｄ水食多ｄ野，西藥真係好削架......
唔好唔開心啦.. 見到你咁樣我都唔好過..

>>January 31, 2004 at 2:09:42 PM GMT+8

2004 年 1 月 29 日 星期四 【乍暖還寒】

今朝八點幾九點先起身
無上氣概果兩堂啦..
算啦.. 大通之嘛~ 有碌屎就得
十一點睇醫生，個葉醫生咁鬼衰架！唔俾醫生紙我，要我上PE take attendance 然後坐埋一邊睇人打波
唉.. 同病相憐呀… 兩個病人走在一起就是沒事可以做..
點解食左咁耐藥都唔好架？淨係退左燒，喉嚨仲要越黎越痛.. 痛到食唔到野..
見到你咁好擔心.. 但又唔知有咩可以做得到…
我要好快咁好返呀！
呢幾日要好早好早訓，飲好多好多水，食好多好多生果！
希望咁樣可以早少少好返無事啦..
今日有手信收@@~ 好靚~~ 不過唔似得人地有兩樣都係同一隻色既~>

>>January 30, 2004 at 11:14:03 AM GMT+8

2004 年 1 月 28 日 星期三 【乍雨乍晴】

今朝又係火車第五卡撞到 Nancy~
你好勤力呀~~
如果我有你一半就好啦！
今日好似病病地，成朝流鼻水又怒塑鼻水
仲有少少頭痛﹑咳﹑喉嚨痛﹑好累上唔到堂添呀……
好在今日教既野都唔係太深奧難明，就算我勁釣魚都上埋佢，因為遲下出 ward要考咁就上埋佢唔走堂睇醫生囉
不過晏晝講完電話又好左少少喎~ 起碼唔似得上晝咁唔知上緊咩^^
下晝 tutorial 仲有粟米片食，因為我地要互相學餵野，咁就有免費野食喇～但係無加奶既..
天文台早幾日又話呢兩日會暖，但係我今日仲覺得好凍喎.. 隻手仲簡直係冰凍添！
好少一連凍咁多日囉~
今日我食晏前 & 食晏後都撞到中同呢～仲要兩次都撞到ＢＢ~ 其餘的仲有阿 gut, suen, 李建
上網睇 record，原來我借左幾本書過左期喇.. 聽朝要帶出沙田還左佢先得！遲左幾日啦><..
我諗今晚可以睇完本 << 活在過去 愛在過去 >> 啦~~
聽朝氣概八點半咁早上堂我應該都起唔到身返學架啦.. 而且咁累唔上 lu ~
book 左十一點睇醫生，要記得拎醫生紙先可以唔上籃球果堂呀！

又會唔岩既.. 唔怕唔怕，個公仔斷繩一定係幫我地擋左一劫！而家大家都會平安無事！
病都會好快好返架啦^^
我今日睇書終於知道點解條頸巾會翹起啦~ 仲有破解既方法添~~ 好開心~~~
不過唔好要我再拆再織呀！只怕越拆得多ｄ冷就越衰架咋！

>>January 30, 2004 at 11:14:34 AM GMT+8

2004 年 1 月 27 日 星期二 【晴】

新年假後第一日返學
但係我既白癡野….
又再一次好不應該地發生左..
我竟然唔記得左今朝八點半要返中大補兩堂 physio. 呀！
係兩堂呀！
我已經無溫到上堂既野，仲要再加多兩堂新野，所以下晝原有既兩堂我係理所當然地發呆同遊魂
一日四堂就係咁俾我錯過左喇…… 最後又係要問好體貼既 Nancy 借碌屎黎抄囉><::..
不過我今日上晝都唔係白過左既~ 陪人睇醫生都算係一件有意義的事卦？？
原來 clinic 而家專登開左間房俾有發燒既人入去睇醫生，亦都俾我知道口探同肛探的探熱針有咩唔同囉~
其實都幾攪笑，自己做左半年學護，出左咁多次 ward，take 左咁多次 temp，竟然而家先知..
晏晝同中同食飯呀～今次有讀ＵＳＴ但今日黎中大 sit 堂的瑩瑩
還有一見返我就先後異口同聲話十年都撞唔到我的 Eva 同趙展，仲有收稅
仲撞到好多其他中同架！Suen，李建，小琳，阿葉，Debby…… ＆Ａ班的中同呢！
偶爾聚一聚又唔係太差既～
firm 左今個星期六去 Ms Lam 屋企拜年＆玩呀@@~ 唔該 Eva~~
講起 Eva，佢今日同我講佢尋日一次過睇左我五十篇日記！
好犀利呀！我亦都好開心你咁有心咁有興趣咁有耐性睇左我咁多篇日記架^^！
仲要多謝你俾我那份 belated birthday gift 添~~ 雖然份禮物係遲到，但我都係一樣咁鍾意同收藏，我一視同仁架嘛！

初七人日，祝人人生日快樂！日日都開開心心！想果樣有果樣啦！

>>January 30, 2004 at 11:09:00 AM GMT+8

2004 年 1 月 26 日 星期一 【乍雨乍晴】

唔好意思呀．．我九點半鐘先醒
攪到你咁遲先有早餐食添..
早知會肚餓我就尋日煲定粥喇！
搭車果陣諗住買好多野架！但去到發覺唔多夠時間就淨係買左奶同埋早餐..
諗住夜晚肚餓的話可以整熱ｄ奶黎飲，又唔使空肚食藥嘛～
成晚訓得唔好都出街，實好累啦..
好在都唔係白費~ 我今次終於買到野返屋企啦！
超開心呀！返到屋企又無俾人鬧，又個個都讚件褸靚架＠＠！
天文台又話今晚會暖返少少既，但係我都唔多覺喎..
不過病的話就要小心，唔好著咁少衫訓覺又或者周屋走喇～訓多ｄ啦！我都係~

>>January 27, 2004 at 3:46:25 PM GMT+8

2004 年 1 月 24 日 星期六 【乍雨乍晴】

大猴年初四
係星期日黎架
我又做左白癡野啦..
俾張導師上課紀錄表 出賣左我啦！以為今日要返新時代，但原來佢初六啟市囉！白走一趟喇！
太白癡了.. 所以都唔敢即刻返屋企，去左 seven 睇埋雜誌先返去~
返到去鞋都未除爸爸就話今日未買報紙，叫我落街買.. 又唔早少少講.. 唔使我又落過去嘛！
喉嚨今日有少少痛，唔係好舒服，希望唔好病呀.. 睇黎都麻麻地咁，病係遲早既事喇..
今日見唔到家欣，問唔到佢可唔可以改下個星期日既時間，咁我就無緣去旅行啦
成班傻人去玩惟獨是我無得去.. 我都好想同你地去玩呀.. 但係時間唔許可........................
你地呀！玩還玩記得買返個手信俾我呀～～
仲要影多ｄ相同 video 俾我睇呀！！雖然我去唔到咋，我都好想睇下你地玩得幾開心架嘛～玩得開心ｄ丫～
前一排 format 左部 notebook 咩都洗晒，呢幾日成日都係坐係部野前面度對住部野 dwonload 歌
好慘呀.. 最好有人 send 晒俾我，咁我就唔使咁樣啦～

>>January 27, 2004 at 4:14:43 AM GMT+8

2004 年 1 月 23 日 星期五 【乍雨乍晴】

赤口大年初三～
尋晚織左四舊冷喇
今朝織埋餘下的一舊就完成了～
哈哈～窄左又長左喎！岩晒囉^^ 不過手工差少少，無時間要超趕貨嘛.. 收貨啦～～
遲到喇！攪到阿連要企係樓下食左咁耐風，唔應該啦！要反醒下呀@@^^~~
今日喉嚨開始痛，有少少辛苦.. 唔知會唔會又病過..
行左咁耐旺角可以一樣野都買唔到好失望呀！！成日都係有心買野就唔會俾我買到野既..
要搵日出去再買過呀！唔信今個新年一樣野都買唔到呀！！
五點左右去左香葉棧食下午茶，飲完杯薑茶好舒服，但以後都唔好再加水再飲.. 實在太難飲喇！
七點幾八點就去紅點食左個炭燒鰻魚飯（原來入面好唔掂，得出面見得人架咋..）
可能價錢比較貴，連呢段食飯黃金時間都無咩人入去食野既
人家肚餓呀！唔知邊個叫人食快ｄ呢！
人家食多幾啖之嘛.. 唔使係度偷笑喎.. 人家肥得起嘛～人地恨唔到架～
要澄清我絕對無一百三十或者一百四十磅咁重呀！只係有人feel 錯晒估計唔掂咋！！
諗住十點幾返到屋企，結果係十二點先返到去.. 又俾人鬧喇......

>>January 25, 2004 at 8:24:38 AM GMT+8

2004 年 1 月 22 日 星期四 【乍雨乍晴】

寒冷的大年初二~
朝早食好好味既薑粥
冬天咁凍食薑粥好正呢～
尋日問伯娘借左對十號針返黎今朝織，ｄ冷拆左再織己經差左好多
我織左舊幾冷架喇！但係織到下晝三點幾覺得織得好肉酸，頂唔順要拆晒佢！
再織過囉～不過驚織唔切，所以織得快就織得比上次織得無咁靚無咁工整
但都係唔明點解無論我鬆少少手或者就自己力度，頭尾都會翹翹地既！好想知點解會咁！
今次織得快過上次喇～織左八個鐘左右，天氣凍織到對手凍到好似死人手咁樣.. 由入面凍出黎架..
晏晝係食我最鍾意既雜食呀~
即係咩都食少少（其實都唔少架啦.. 因為好多野都鍾意食囉！為食的人就是這樣的了><::...）
食左媽咪整既好味年糕（初二先可以切開黎食，因為寓意開年喎～）
仲有朱古力呀，糖呀，蛋卷呀，餅餅呀，蘿蔔糕呀．．．　總之好多我都好鍾意食架～如果唔係又點會食得多呢？

>>January 25, 2004 at 8:00:35 AM GMT+8

withloveyan's diary 廣告 讀者留言 |  路人留言   | 發完d蛋,隔一隔渣先至倒入去d奶 >>June 27, 2006 at 12:16:24 PM GMT+8 整燉奶~~~超好食呢~~~ <b >>June 24, 2006 at 5:29:34 AM GMT+8 哈~~ 我就 book &#21 >>August 24, 2005 at 2:33:55 AM GMT+8 哈哈，但我相信如果自己成日都咁開 >>August 23, 2005 at 11:59:15 PM GMT+8 嗚.....彭暉寸我....＞＿ >>August 23, 2005 at 4:33:12 PM GMT+8 哈...我d皮膚唔查果d護膚品都 >>August 23, 2005 at 12:38:27 PM GMT+8 我又係呀!!!成日都死火架!!! >>July 19, 2005 at 2:37:44 PM GMT+8 今日岩岩上完第十三堂，後日就考中 >>July 19, 2005 at 2:31:03 PM GMT+8 賤得你&#21526;~~ 仲要 >>July 19, 2005 at 2:19:58 PM GMT+8 哈，你唔識就咪老點果兩個外國人啦 >>July 19, 2005 at 2:02:16 PM GMT+8 TO: 收稅~ <br>咁就星期 >>July 11, 2005 at 1:10:39 PM GMT+8 小咩又想做嘛~~~?? <br> >>July 11, 2005 at 1:06:50 PM GMT+8 好好好可愛呀～ <br>你果度仲 >>July 11, 2005 at 12:57:15 PM GMT+8 好ar...我今日食左杧果火腿三 >>July 11, 2005 at 12:19:47 PM GMT+8 死婆你&#21526;!! <b >>July 11, 2005 at 4:04:51 AM GMT+8 我公司附近都ok 多野食 <br >>July 10, 2005 at 1:57:59 PM GMT+8 ooo..... 咁我諗諗先lu >>July 9, 2005 at 3:28:05 PM GMT+8 唔好睇的 <br>好假...不過 >>July 9, 2005 at 5:25:07 AM GMT+8 ur 偉仔 ng doi hap >>July 8, 2005 at 7:21:07 AM GMT+8 咁你睇完話我知好唔好睇&#215 >>July 7, 2005 at 12:45:03 PM GMT+8 次次都係經過, 睇一兩條 <br >>July 7, 2005 at 12:35:15 PM GMT+8 無錯~~ 我真係食&#21655 >>July 6, 2005 at 3:04:46 AM GMT+8 你係咪食埋d熱氣野，又唔刷乾淨牙 >>July 5, 2005 at 3:26:53 PM GMT+8 總之係唔好的事喇= =..... >>July 5, 2005 at 2:30:25 AM GMT+8 7月15日有什麼事呢？ >>July 4, 2005 at 2:03:29 PM GMT+8 咁好唔好睇先~??? <br> >>July 4, 2005 at 9:09:39 AM GMT+8 恐龍在我公司走行10分鐘左右 < >>July 3, 2005 at 11:41:55 PM GMT+8 係呀係呀!!!恐龍呀~~~ 不過 >>July 2, 2005 at 12:38:59 PM GMT+8 哇～閣下可算行程豐富呀﹗ <br >>July 2, 2005 at 12:17:03 PM GMT+8 嘩..... d 衫衫好靚呀!! >>June 25, 2005 at 11:42:35 AM GMT+8 yanyan, 您要堅強點啊!! >>June 12, 2005 at 6:27:02 AM GMT+8 我 pass &#21655;筆 >>June 10, 2005 at 7:28:34 AM GMT+8 考筆試.....如果冇時間溫果本 >>June 7, 2005 at 11:23:02 PM GMT+8 護士姐姐, <br> <br> >>May 31, 2005 at 12:05:03 AM GMT+8 梗係全港至有規模,合格率又高的香 >>May 8, 2005 at 5:15:08 AM GMT+8 你跟邊間學車呀? <br>我都學 >>May 7, 2005 at 4:32:37 PM GMT+8 我諗間公司係真~N~ 因為我都上 >>May 2, 2005 at 3:30:18 AM GMT+8 嘩犀利！ <br>佢俾卡片你即係 >>April 26, 2005 at 10:56:32 AM GMT+8 我也感到您的失望... <br> >>April 23, 2005 at 9:29:21 AM GMT+8 希望您可以成功Drop 那大通吧 >>April 18, 2005 at 1:41:50 AM GMT+8 19 <br> <br>午飯前相 >>March 8, 2005 at 3:06:14 PM GMT+8 "被看到講電話，為甚麼要那麼慌張 >>February 27, 2005 at 5:57:16 PM GMT+8 我都祝奶奶 & all shaw >>February 13, 2005 at 10:49:53 AM GMT+8 其實那三頭狗真是很大隻呢!!! >>February 13, 2005 at 6:11:31 AM GMT+8 椅子還未坐暖就走啦~~ <br> >>February 11, 2005 at 3:12:57 PM GMT+8 對﹗我們真的很久沒上你家…所以都 >>February 11, 2005 at 12:52:08 PM GMT+8 Noel 姐好鍾意您個相架~~~ >>February 5, 2005 at 7:22:29 PM GMT+8 我聽日會返去完成所有相架~ <b >>January 26, 2005 at 4:04:35 PM GMT+8 我們拋下了阿史去找Profess >>January 25, 2005 at 12:19:54 PM GMT+8 多謝你&#21707;-->咁多 >>January 20, 2005 at 1:42:49 PM GMT+8

人氣: 28038

Design & Scripting by ShowHappy.Net