2006 年 4 月 28 日 星期五 【晴】

原來，
唔夠精神下棋，
係會慘既。
今日放工落左去捉棋，
好大意，
好多地方都睇錯。
結果捉成差不多十鋪，
全部都輸晒。

第一盤就同師父捉九路棋，
力戰之後被「清盤」。
不過同佢捉，
其實唔係為左贏，
而係讓佢分析下我衰 d 乜，
可以點樣進步。

之後同 d 理論上棋力相當既人捉，
結果……
唔知係佢地進步神速，
定係我不進則退呢？

2006 年 4 月 27 日 星期四 【晴】

兩個星期前既一次「快會」，
開到三點幾。
開完會後，
因為其中一個同事要去郵局，
我又要去交電話費，
我地去左裕民坊個頭食燒味。
呢間食店既凍咖啡，
唔係一般既凍咖啡，
而係傳說中既冰鎮咖啡。
所謂冰鎮咖啡，
即係唔係在杯中加冰，
而係在杯咖啡既外邊以冰包圍，
從而降低杯咖啡既溫度。
如下圖：



咁有咩好處呢？
首先就唔會愈飲愈淡，
因為冰會溶，
咁就會溝淡了杯咖啡。
其次就係唔見飲，
因為 d 冰會佔據了唔少位置，
咁其實一杯凍咖啡，
可能半杯都沒有。



唔知佢地 d Menu 係咪成日被人偷呢？
佢地張 Menu（一張過膠既彩色 Menu）既下方寫住：
「如需本餐牌留念，
請往收銀處購買，
每本 100 元。

呢間燒味既味道唔係十分之好味，
不過價錢就十分貴。
只係食個下午茶餐，
承惠每人約五十元。
係觀塘裕民坊呢個地段，
直頭係貴呢！

>>May 2, 2006 at 5:32:03 PM GMT+8

2006 年 4 月 26 日 星期三 【晴】

今日打比賽，
賽制係雙淘汰賽。
雙淘汰賽即係有所謂敗者復活節，
亦即係話，
你要輸兩場先出局。
好不幸，
第一場我就對住今次個冠軍，
自然地大敗而回。
敗者復活戰，
對住實力不是強我好多既，
結局都係輸了，
飲恨出局。

2006 年 4 月 25 日 星期二 【晴】

今朝放左半日病假。
昨晚成晚都訓唔到，
發冷發熱，
訓一個鐘醒一個鐘咁。
個肚又勁痛，
個人曲埋一舊。
捱五點幾，
起身探熱，
一百零二度幾，
接近一百零三度，
食左啦退燒丸，
打左封 E-Mail 返公司請假，
就訓多陣。

唔知點解，
我鍾意用 E-Mail 請假。
可能因為我唔鍾意講電話，
可能因為靈活 d，
唔駛限時限刻。
（無理由晨早五點打畀佢請假掛）

訓到十一點，
打電話去掛號，
十二點就去睇醫生喇。
上到去先發覺唔記得禁錢，
探完熱就落去禁錢，
好彩銀行就係隔姐。

上返去，
坐左一陣就到我。
入到去見醫生，
經過一輪檢查，
醫生話我係腸胃炎。
有可能係食左 d 唔乾淨既野，
又有可能係感冒菌入腸胃。
拿藥個時，
好多藥喔！
一支藥水（色、味都好似椰汁），
五種藥丸（兩大三細），
一日食三次。

>>May 2, 2006 at 4:36:09 PM GMT+8

2006 年 4 月 24 日 星期一 【晴】

今晚約左舊同事食飯，
上個月結婚既舊同帶了相畀我地睇。
去左旺角朗豪坊附近既一間 Cafe，
不過呢間 Cafe 我就唔會再幫趁。
食物質素我唔識評，
唔係唔好食，
不過因為食得太趕，
所以試唔真 d 味。

點解食得咁趕呢？
一陣會講到。
至於點解唔推介，
不單服務質素唔好，
服務態度更加唔好。

話我地一行十一人，
大部份人八點鐘已經到左，
大約八點十五分落單。
落單個時都攪笑，
我們叫左七個餐，
兩個散叫。
佢數黎數去都話得八樣，
咁我地 Repeat 一次，
佢樣樣都話寫左，
我手數都數到九樣。
結果複左三次先找，
佢仲好意思話我地頭先冇 Order，
結果落單都落左五分鐘……

落單之時，
佢都透露過得一個人整（唔係佢，係仲驚），
如果唔係叫餐，
會耐少少。
咁等都預左，
不過坐左個幾鐘，
不單食物未上，
甚至飲品未上，
跟餐菜絲沙律都未上。
咁梗係追佢啦，
點知第二句佢就 Fight Back，
話我地八點五十分先落 Order。
八點五十分，
遲黎個兩個都到左，
第二輪都叫埋喇。

結果冇人忍到，
拉隊走。
焗飯佢話焗緊，
咁一半人去第二間找位先，
餘下一半（包括我）留低食埋佢。

下半場去左打冷，
好食 ^_^

>>April 27, 2006 at 6:59:35 PM GMT+8

2006 年 4 月 23 日 星期日 【颱風】

昨日帶新電話，
舊電話留了係屋企充電，
結果收唔到短訊。
凌晨五點先發覺這樣的一個短訊存在，
在訓之前覆左。

有人連續幾個星期六要加班，
我又何嘗唔係要星期日返工呢？
所以我好明白有幾辛苦既。

下午落油麻地打機，
與人對戰，
一負三勝，
新 Deck 似乎唔錯。
不過打完幾鋪就冇人打，
自己打電腦，
不過都有幾個人係後面睇。

之後坐車返公司。
一做就做到十二點。
點解咁清楚係十二點呢？
因為保安剛剛鎖正門，
我要經車場出。

見有時間，
又去打左兩鋪機。
一勝二負，
把握力有待改善。
以往打開穩守突擊，
新 Deck 講求攻，
還未熟習。

之後離開機鋪，
嘩！乜咁大雨呀？
好彩我有帶傘，
不過都濕晒。
離開觀塘時黃雨，
坐緊小巴時紅雨，
返到屋企時已經黑雨。

如果我再遲 d 走，
後果可能更不堪設想。

>>April 26, 2006 at 12:49:53 PM GMT+8

2006 年 4 月 22 日 星期六 【晴】

下午又去左捉圍棋。
去之前，
上左戰棋會望望。

中學讀書時，
因為課外活動的關係，
時常去位於尖東既戰棋會。
現在佢已經搬往旺角。

初頭係先達，
現在就係華僑。
同以前好唔同，
以前主要係賣棋，
又或者係 AD&D。
現家就賣 Card 多。
甚至有個 Area 畀人玩 Card Game，
人頭收費。

今日個圍棋聚會，
上半部係打機，
我們準時六點收機，
就開始下棋了。

今日我只係下九路，
輸四鋪，贏七八鋪左右。

發現自己既弱點，
就係太多心，
唔夠從一而終。
一時就想攻呢邊，
但係之後兩三手，
又唔係支援頭先個手棋，
而係另開戰場。

結果就係首先顧此失彼，
進而兩頭唔到岸。

其次就是有時下棋過急。
當然反應快，
某程度上可以給予對手一定壓力：
「你下的完全在我預料之內。」
但太快有時卻下錯。
有一鋪，
二選一，
選對就大勝，
選錯就輸，
結果我就選錯……

>>April 26, 2006 at 12:48:21 PM GMT+8

2006 年 4 月 21 日 星期五 【晴】

今日一樣係平淡既一日，
日頭返工，
夜晚 OT。
今晚食老麥，
同事落去買埋畀我。

做到十一點，
執野想走，
就係呢個時候，
老闆行出黎。
一傾就傾左大半個鐘，
結果都係差唔多十二點先走。
最慘係傾談既內容，
咪又係以前傾過個 d……

2006 年 4 月 20 日 星期四 【晴】

今日過得好平淡，
日頭返工，
放工去左打機。
一打就打左三個幾四個鐘。
以前部機可能輪成幾個鐘都未到自己打，
記得早幾個月，
機鋪未開門就去等，
結果好多時都係下午先有得玩。
四、五個 Friend 輪流玩，
玩到打烊。

現在？
好多時都有吉機，
就算要輪，
可能都只係等幾個字。
唔通就係呢部機既沒落？

我班 Friend 都冇玩，
現在打親都只係得我一個自己玩。
好彩都仲有得挑機，
唔係就悶死。

不過挑機，
都只係店內對戰。
如果可以好似日本個邊咁，
可以連線對戰，
我想趣味會更加大。

講返今日戰績，
其實都係為下個星期個比賽準備，
不過好似今次副 Deck 唔係好得，
贏少輸多。

睇黎要轉個第二副 Deck。
都有個初稿，
不過要下次先有得試。

離開機鋪，
已經係十二點，
坐地鐵返到去都成十二點半一點。

>>April 26, 2006 at 12:47:10 PM GMT+8

2006 年 4 月 19 日 星期三 【晴】

終於再有咖啡飲。
飲駛上次捷榮個 d 之後，
都係成個幾月冇買咖啡豆。
最主要原因係懶。

上次去紅磡，
落吉之島找唔到。
百佳又小選擇。
威哥話佢係機場買有八折，
咁咪托佢買 lor。

星期日佢唔記得，
星期一、星期二都唔記得，
今日佢幫我買左一包，
折左約六十，
但係冇散紙既關係，
畀左七十。
咁咪即係冇折到 lor，
咁山長水遠叫佢買出黎為乜？
真攪笑。