2006 年 8 月 16 日 星期三 【晴】

信用卡 d 績分，
每兩年就要 Renew 一次，
用唔晒就歸零。
而下一次既歸零，
就係今個月尾。

電台成日都有 Show 攪，
d 分可以用黎換飛。
不過 d 飛好多人換，
所以成日都換唔到。

原本 d 分舊年用得著，
不過打極電話都打唔通，
結果換唔到年尾頒獎禮既飛。

五萬幾六萬分，
有成萬分上個月換左黃金十年既飛。
餘下既分，
留返黎換森小歌劇團既飛。

換飛由昨日早上開始，
一如所料，
係打極都唔通。
呢個時候，
有個自動重撥既電話多好。
鍵入電話號碼，
個電話就會自動撥，
我可以做自己野，
直接佢撥通為止。

不過我發覺個電話唔係即刻重撥，
而係等一段時間先重撥。
而呢個時間，
唔係一個常數。

我記得以前學過，
如果大家係以同一個固定既頻率重撥，
都係撞線既機會會好大。

但大家都用唔同既頻率重撥，
咁邊個用 A Hz，
邊個用 B Hz？
結果就用一個 Random Time 既方法，
每次線路繁忙，
就會 Delay 一個 Random 既時間才重撥。
而 Random 既 Range，
會隨著撥唔通既次數而增大。

結果係午飯前訂到飛，
二零零六年九月九日晚，
就有得睇喇。

>>August 17, 2006 at 3:18:29 PM GMT+8

2006 年 8 月 15 日 星期二 【晴】

只聞樓梯響既活動，
終於有影睇喇。
收到電話，
星期四去唱 K wor。
但係我發覺，
我好似要加班，
唔知到時去唔去到呢？

2006 年 8 月 14 日 星期一 【晴】

飛來飛去，
落機不足二十四小時，
又乘飛機近去。
一個星期後先返黎，
我都想去旅行呀……

不過我好似五月先去完旅行，
但係下次旅行，
可能已經係一年後既事……

錢唔係一個問題，
最大問題係年假……

細牛提意話串埋復活節、
或者其他紅日，
咁就可以用少 D 年假。
不過自己一個去就係，
多過一個人去件事就複雜好多。

2006 年 8 月 13 日 星期日 【晴】

今日係第三次戶外訓練，
地點係荃灣既白石橋。
原本約八點係荃灣地鐵站等，
但係「浮誇」響起時（我電話既鬧鐘聲），
已經係七點半。
即刻換衫出門口啦，
結果我遲左廿分鐘。
去到荃灣再轉小巴，
之後跑上山，
去到既時候，
訓練仲未開始。

之前幾日落雨，
沼澤地現晒出黎，
結果大部份人都中招。
不過 D 鞋本來冇中咁多泥既，
不過佢地去到沼澤時，
又驚呢樣、又驚個樣，
結果就中左仲多泥。

其實佢地行（跑）得快，
快 D 過左個沼澤仲好。
佢地行得慢，
隻腳浸落沼澤仲深，
結果未仲髒……

訓練兩點正式完結，
大隊開始落山。
望一望隻錶，
想趕去機場都趕唔切。

夜晚上左阿力家食飯，
阿力姐個女識行識講野了，
唔知影如幾時識呢？

夜晚終於收到返到香港既第一通電話，
原本我以為三點會收到既。
不過我四點打畀阿包，
冇消息……
結果就八點幾九點先收到……

>>August 14, 2006 at 3:55:32 PM GMT+8

2006 年 8 月 12 日 星期六 【晴】

今朝去左黃埔睇早場，
一套漫畫改篇既電影 -- 死亡筆記。
但係我好似話睇龍虎門先，
不過結果買飛個時唔記得左。

套漫畫我喜歡睇，
尤其是第一部，
即係到 L 同奇拿分勝負為止。
之後第二部既 M & N，
開始有 D 勉強喇……

講返套電影，
D 人物做得幾神似，
例如夜神、 L 咁。
不過故事內容我覺得有點比不上漫畫。

有人會話，
要同漫畫一模一樣不如睇漫畫。
但係我覺得，
既然有漫畫，
少不免會有比較。

電影既節奏有點慢，
同埋有過多既「讀白」，
畫面好似係附加既，
即係好似聽緊收音機既「廣播劇」咁……

另外劇情有 D 犯駁，
好似係導演同觀眾鬥智多過故事中既角色鬥智。

例如有一幕講夜神安排好一個局，
但係中段佢拿支筆出黎。
問題係故事到呢度，
拿支筆出黎騙既只會係觀眾，
故事既其他角色係未知支筆有咩用。
咁，
拿支筆出黎做咩呢？

電影係 L 同夜神相遇既一刻完結，
結果會係十一月上演。
據聞結局會係有別於漫畫，
希望唔會再令我失望啦。

>>August 14, 2006 at 3:55:06 PM GMT+8

2006 年 8 月 11 日 星期五 【晴】

估唔到，
咆哮左兩日，
最後出錯既，
唔係 Hardware。
粒 Chips 完全冇問題，
唔 Work 既原因，
係因為 Power Control Default 係 Off 既。
當 Set 返個 Register 做 On 時，
粒 Chip 即刻動了。
再睇返份 Reference，
原來有一頁係講 Power Up Sequence，
點會咁大意架？

2006 年 8 月 10 日 星期四 【晴】

咩係 API？
API 係 Application Program Interface，
又或者串成 Application Programming Interface，
中文譯做應用程序編程接口。

簡單 D 黎講，
就係將一個複雜既系統劃分成較少的組件，
API 就係呢 D 組件溝通的橋樑。

現在我做緊既 System，
就 Provide 左好多 API 畀我 Call。
咁呢 d API 下層做 D 乜，
我唔知亦唔需要知，
我只要知道，
我跟足 Document 去餵 d Input 畀佢，
佢就識做我想做既野，
同埋畀返 Ouput 我。

製造 API，
目的係方便用佢既人，
而唔係方便寫佢既人。
如果為左方便寫佢既人，
到用時會唔方便，
咁仲駛乜用 API？
直接 Access 好過啦！

講咁大段野，
其實就係為左講 d 好火既野。
話說個 System 要同一粒 Chips 通過 I2C 呢個 Protocol 溝通。
咁個 System 已經提供左 API 去 Read 同 Write 呢粒 Chips。
咁 Read 那個就要畀 Address 做 Input，
咁今日試完，
發覺 Read 唔到野返黎。

有人就話唔應畀 Address 個 Read 既 API，
因為係 Protocol 中，
Read 係冇得畀 Addrees 既，
佢係會 Return 返 Current Addrees 既野。

（差開少少講，
如果你要 Read 某個特定 Address，
就要首先 Write d Dummy Byte 去 Move 個 Address……）

咁人地份 API Document 講到明要畀 Address，
唔畀就 Call 都 Call 唔到，
畀左 Address 佢，
佢底層會唔會 Write Dummy，
又或者唔用個 Input 都好，
我唔知亦都唔需要知。

但係那個人就同我爭論左半個鐘。

上面大部份都係用電腦人語言寫既，
可能有人唔明，
或者我舉個例會易明 d。

假設有張證件，
上面係冇相片既。
但係你交申請表時，
要求你交一張相片，
唔交就唔同你辦理。
現在有個人用左個鐘同我爭論，
因為證件上冇相，
所以你交申請表時唔應該交埋相，
交左相做出黎張證件係錯既……

>>August 11, 2006 at 12:04:31 PM GMT+8

2006 年 8 月 9 日 星期三 【晴】

今日真係好貴火，
原本約左人七點踢波，
結果我七點半先可以離開公司。
只係落左場十分鐘……

火既唔係因為要加班，
如果「真係」有野做，
我唔介意留晚些。
不過……

2006 年 8 月 8 日 星期二 【晴】

今晚上堂，
又多左位新同學，
應該係舊同學回歸才對。
之前三個星期，
佢去左日本讀日文暑期班。

佢話大部份去既都係年青人，
好少好似佢呢 d 出左黎社會做事既。
咁又係呀，
有幾多個打工仔可以隨便拿到連續三個星期既假期丫？

上堂既時候，
老師叫我地問佢一 d 問題。
其中一個問佢旅行代總數係幾多，
同學仔答 30K，
全場嘩然。
老師唔知港幣兌日元係幾多，
當有同學計左畀佢之後，
老師都嘩一聲！

2006 年 8 月 7 日 星期一 【晴】

今晚走時，
因為想快 d 返屋企，
所以上左架不時少坐既巴士 215x。

點解少上呢，
雖然架巴士好快出到油尖旺。
上車之後第一個站已經係九龍灣，
再下一個站已經係紅磡。
但係因為呢架巴士會經尖沙咀，
繁忙時間係會好塞既，
所以一般都唔會坐呢架巴士。

今晚走個時都大約十點幾十一點，
過晒繁忙時間，
自然可以坐呢架巴士。

又，
通常架巴士途經尖沙咀時，
大部份乘客都已經落車。
到我係尾二個站落車時，
通常都已經冇其他乘客。
但今日驚見有其他人，
而最驚訝既，
呢個人係識既。

原來阿 Sing 已經搬左去九龍站住，
呢個世界真係細。