2006 年 6 月 17 日 星期六 【晴】

話說我報左個街機比賽，
個遊戲係一個卡 Game 黎既，
咁我又唔係好夠卡用。
其實又唔係話完全唔夠既，
最緊要砌到幅合用既。
有日本人用全白卡，
一樣可以係全日本大賽成名，
亦有人用全閃卡。

先排發現阿包有玩呢 d 卡，
咁佢又少玩，
我咪問佢借卡 lor。

今日約左阿包食飯，
順手借卡。
不過見到佢個時，
佢唔係一個人 lor，
攪到我鬼死咁尷尬，
叫唔叫埋佢食野呢？

Anyway，
結果只有我同阿包去食。
去左朗豪坊間地中海燒烤，
點解去呢間呢？
通常都係有人想食既野，
又冇得去，
咁我就會去晒，
等佢羨慕下。

阿包話好彩佢細佬唔會去搵野食，
其實我都唔係，
尤其是一個人既時候。
搵野食，
都係一班人既時候先做姐。

開頭以為阿包冇乜點，
應該唔會有好多卡，
可能會比我少，
但係就可能可以補足我冇既卡。

點知……點知佢拿出來既，
係一套齊既「金卡」，
真係嚇死我咁多……

>>June 19, 2006 at 3:46:27 PM GMT+8

2006 年 6 月 16 日 星期五 【晴】

能放能收，
係一件好高境界的事，
關鍵係何時放，
何時收。
放既程度係點，
收既程度又係點。

A 君好「關心」自己既下屬，
得閒就會黎睇下你係唔係位；
有冇做緊野；
做緊公司野定私人野；
有冇傾私人電話；
有冇開 OT；
係咪比佢遲走等……

有時真係幾攪笑，
A 君會問下屬阿邊個邊個返左未。
有眼睇都知啦，
間房關晒燈，
唔通為省電咩？

實情就係佢想知下屬做緊乜，
求求其其找 D 野問……

有時電話有條線著左，
佢又會黎睇下究竟邊個講緊電話。

其實咁樣會唔會係收得太緊呢？

B 君就放得鬆少少，
不過一有大鑊野就好煩。
係你耳邊轟炸，
好鍾意同你研究「案情」。
最慘係你要聽佢不斷複述已知的事實，
而且係當你好需要專心做野既事候。

一講就講成個鐘，
講唔停咁。

結果效率就係呢 D 應放時收的情況下降低了。

>>June 19, 2006 at 2:52:08 PM GMT+8

2006 年 6 月 15 日 星期四 【晴】

今晚約左威哥食飯，
順手畀手信佢。
手信係一頂 NBA 球隊達拉斯既 Cap 帽，
唔知係咪我剋呢？
之前去旅行，
路經邊個州，
那個州唔係入唔到季後賽就係出左局。
今次買左呢頂帽，
即刻由領先二比零輸返場，
仲要係領先大半場輸返轉頭。
（按：最新消息係二比二打和）

約左佢九點半係商務等，
之後去左間 Pub 食飯，
順手睇波。
世界盃期間，
有波睇既地方自然有最底消費。
呢度都唔例外，
最低消費係每人 $80。

而呢度既晚餐，
大約係 $68。
都幾抵食，
有兩塊包同湯，
四隻焗田螺，
主菜係羊仔脾，
之後仲有餐茶同生果。
生果都唔係求求其其，
有西瓜波、橙同芒果。

呢度餐具都好認真，
食田螺有專用餐具 Tim。

為左個最低消費，
我地仲叫左兩個小食：
洋蔥圈同魷魚鬚，
實在太好食喇，
埋單二百蚊正。

去旅行之前，
有人叫我買腰果返黎，
（都唔知點解係美國買）

不過我一路都唔記得邊個叫，
而且因為時間關係去唔到那間市場，
結果冇買到。

今日終於知係邊個，
原來就係威哥。

>>June 16, 2006 at 4:29:44 PM GMT+8

2006 年 6 月 14 日 星期三 【晴】

溝通方法有好多種，
而我倆既溝通方法似乎亦不停地轉。
是未找到最好的？
還是環境因素變了，
最好的變了第二樣？

最初的是 ICQ，
後來變成電話。
之後又變返 ICQ，
漸漸地主力去了 Blog。

之後曇花一現既係「預約電話」。
過左一排，
突然變左 SMS。
最近，
又用返電話。

「變」係一件好事黎既，
前題係向「好」既一方變。

2006 年 6 月 13 日 星期二 【晴】

今日複習的係「使役形」。
一般來說，
使役形係「目上」的人對下級的人用。
（當然會有例外）

動記變化係咁轉既
Group I：
由 う 行轉 あ 行，
再加上 せる。

Group II：
加上 させる。

Group III：
来る => 来させる、
する => させる。

咁使役形有咩意思呢？
一般有「強制」、「許可」、「導致」既意思，
即係英文既 「Let」、「Make」咁。

舉個例：
母は玄也に野菜を食べさせる。
意思即係「媽媽要玄也吃蔬菜。」

之前講到，
使役形一般係上向下用既。
但係如果個動詞係感情動詞，
例如：心配する、泣く等，
而個主語係呢個感情動詞既原因的話，
就可以下向上用。

例如：
玄也は母を心配させた。
意思即係「玄也讓媽媽擔心了。」

兩個例句賓語後既助詞唔同，
一個係 に，
另一個係 を。
原來如果係及物動詞就用 に，
不及物動詞就用 を。

2006 年 6 月 12 日 星期一 【晴】

唔知係個電話壞，
定係現家呢個台差左。
以往收到電話既地方，
現在係直情冇訊號。
話說講緊電話，
返到屋企樓下，
咁入 Lift 收唔到係可預計既事，
咁我就選擇行後樓梯。
其實以前都試過，
不過個時手提電話未轉台，
可以 Keep 住個 Connection。
結果今次就斷左線，
我就要跑樓梯跑返屋先有返訊號。

講開手提電話，
話說我唔係香港個陣，
錄左個留言信箱，
話我唔係香港。
但呢個留言就出左事喇。
畀一個唔應該知道我過左 Boston 既人知道我過左去，
有 d 為自己既人生安全擔憂 tim……

2006 年 6 月 11 日 星期日 【晴】

昨晚返到屋企，
收到個電話。
我一見來電顯示「無姓名」，
個心就開始驚喇。
一般先打「133」或者完全停止示號既來電，
會係顯示「號碼保密」。
顯示「無姓名」既來電，
多數會係長途電話，
而打長途電話畀我既多數只有一個人……

點解知道係長途電話就驚呢？
話說據我了解，
佢呢個時候應該駕駛中，
同 Anna 落緊 New York 參加勇姐既婚禮。
（各位中學同學，
冇錯，勇者結婚喇）

駕駛途中，
點會冇啦啦打電話呢？
一就係塞車，
通常佢會打畀細佬，
但佢細佬返左香港，
打畀我唔奇。
但係佢隔離有 Anna 同佢傾計，
斷估未輪到打畀我。

餘下既一個可能性，
就係佢迷藥打黎求救。

但遠水豈能救近火？
更何況我都唔熟路。
雖然唔知幫唔幫到手，
但我都拿拿臨開電腦，
上網睇下找唔找到地圖。

不過當我一接電話，
我就知我擺左個大烏龍喇。
原來去婚禮係明天既事，
佢現在陪緊 Anna 返工，
但係又冇野做，
打黎問我拿日記個 URL。

虛驚一場……

>>June 14, 2006 at 4:34:12 PM GMT+8

2006 年 6 月 10 日 星期六 【晴】

媽媽今日生日，
夜晚係酒樓宴客。
請左七位太太，
剛剛夠腳打兩檯麻雀。
再加上家姐，
十個人食飯，
九女一男……

作為席上唯一一個男丁，
好自然地，
我繼續做墳化爐的角色。
每當個侍應清碟既時候，
「龍蝦呀，畀佢啦畀佢啦……」
「四季豆呀，畀佢啦畀佢啦……」

結果食左一碗滿既四季豆，
一碗滿既龍蝦加伊麵，
一碗翅之後，
我宣佈食飽，
從此之後，
成餐唔再食。
因為我知道再咁落去，
我食一餐就等同食三日。

所以為安全計，
都係唔好再食。

結果返屋企時，
我係拿住三袋打包，
Total 有七、八盒。
我真係唔明，
十個人食一圍全包宴，
點解可以餘下咁多？

同時我亦都慶幸我一早鳴金收兵，
如果唔係……

今日難得見到大姊，
不過我竟然唔記得帶手信畀佢，
真係失敗……

>>June 14, 2006 at 3:49:49 PM GMT+8

2006 年 6 月 9 日 星期五 【颱風】

今日落大雨，
三十分鐘內連續掛上黃雨、紅雨、黑雨。
係公司望出街外，
個天係黑色既，
就好似天黑咁。
要留意既係，
當時只係早上十一點幾。

食午飯個時，
同事問點解黑雨唔係放工。

一般黎講，
打風時（掛八號風球），
通常都可以提早收工。
但係落雨（就算落黑雨），
都好少可以提早收工。

根據勞工處份手則
「如果黑色暴雨警告在辦公時間內發出，
除非會有危險，
否則在戶內工作的僱員應留在工作地點如常當值，
而在戶外及空曠地區工作的僱員則應停止工作，
並立即到安全的地方暫避，
直至警告取消及天氣情況許可，
才恢復工作。」

其實都合理既，
打風可能打成日，
甚至交通會停，
可能返唔到屋企。

但係落雨呢？
交通未必會停，
而且係街外可能仲危險過係室內。
更何況黑雨好少掛成日姐，
一陣停左雨要再返工咪仲麻煩。

2006 年 6 月 8 日 星期四 【晴】

重回工作崗位，
面對的仍然係那些 Projects，
面對的仍然係那些難題，
解決方法仍然未有。
放完假叉完電，
唔知會唔會好 d。