2006 年 6 月 27 日 星期二 【晴】

今晚上堂係復習「假定」，
假定係指有一定條件之下會點點點，
即係中文既「如果……就……」

表示假定既有四個：
ば、と、なら、たら

ば
形容詞將詞尾 い 轉做ければ，
形容動詞將詞尾 だ 轉做なら（ば），
動詞將「う」段轉做「え」段再加ば，
名詞係冇既。
ば 係表示前後句子的條件、因果關係，
較強調條件。

と
助詞と接係肯定式或否定式的原形之後，
表示「如果…」、「只要…」、「一…就…」，
較強調結果。
要留意既係後半句子唔可以係意志形、使讓形等等，
要描述一個事實既句字。

なら
なら 是單純的假設。
或者引出話題。
例如
「運動的話，踢足球吧。」
就應該用 なら。

たら
なら 中的 た 係指過去式中的 た。
比較強調前後發生的順序，
或者一些假設的事項，
一些勸告、建議時用。

雖然同為假設，
以時間軸的角度睇，
なら 同 たら 都有分別。

A なら B
B 發生先過 A

C たら D
C 發生先過 D

例如：
「吸煙的話，出去吧。」
表達的意思係先出去 -> 再吸煙，
所以應詃用 なら。

「感冒的話，食藥吧。」
表達的意思係先感冒 -> 再食藥，
應詃用 たら。

>>June 29, 2006 at 4:45:55 PM GMT+8

2006 年 6 月 26 日 星期一 【晴】

今晚約左中學時期定向會班幹事食飯。
我地個屆都叫大陣容，
一個學會十八個幹事，
邊度找？邊度找？

不過可惜最 Active 既 Member 就係呢十八個人，
常比賽的都係呢十八個人。
今日出席既有八個人，
約左係重慶食印度野。
印度野好多都係辣既，
佢地雖然有人記得我唔食得辣既，
不過係當佢地叫晒野食之後……

佢地有同我講邊 d 辣，
邊 d 冇咁辣，
不過係我食入口，
一樣係咁辣。

食完野，
去左星光行個邊間雪榚店。
佢地攪左好耐都未選到食咩，
我一望就想到喇，
因為我見到餐牌有咖啡加咖啡再加咖啡。
杯野叫做比利時之夢，
有咖啡雪榚（仲有一球朱古力雪樣），
有咖啡 Gelly，
仲有咖啡。

一班人聚舊，
少不免會話當年。
個年去聯會營，
佢地帶左氣槍去，
發生左好多趣事。

例如向前開槍，
後面個人背脊中招，
原來係 BB 彈反彈上天花板再落返黎。

又例如玩開槍射燈制熄燈，
結果射爛左個制等等……

>>June 29, 2006 at 4:15:50 PM GMT+8

2006 年 6 月 25 日 星期日 【晴】

今日係觀塘有最後一場外圍賽，
開賽時間係三點，
咁我起身已經一點，
沖過涼換件衫已經要飛奔出去。

點解咁晚先起身呢？
話說昨日落 Bar 睇波，
成三點幾先走，
返到屋企上埋網，
上床訓覺都成五點，
所以……

今日同星期二比，
完全變左另一個人咁，
打唔出水準，
又勁犯錯。
結果分組賽三場輸晒，
提早出局。

夜晚出左佐敦食飯，
食完落去打機練兵。
都係打得好差，
或者呢 d 先係我真正既實力，
又或者係因為唔夠訓。
（真係識得找藉口）

十點幾，
同埋攪比賽個班去左茶餐廳睇波。
之前最低消費係五十，
點知今日加到六十八。

咁叫飲叫小食啦，
我地有七個人，
佢畀左三個叉、三個匙我地。
我同佢講話畀多幾隻叉我啦，
點知佢拿左一隻畀我……

睇完一點鬆 d，
唔知係咪因為飲左兩杯凍啡，
攪到四點半先訓著……

>>June 26, 2006 at 5:10:32 PM GMT+8

2006 年 6 月 24 日 星期六 【晴】

今晚有個中學師兄約食飯，
原來係佢要結婚，
組兄弟團。
成班除了一個我唔識之外，
其他都係以前定向會共事過既。

咁橋早兩日定向會有人打黎話約星期一食飯，
咁我多口問句乜唔係星期六咩？
咁佢就以為我認錯人。

Anyway，
本來約左七點半尖咀等，
咁我下午過海為個比賽幫手，
咁橋撞到其中一個今晚會去食飯既。
咁比賽完左（大約六點半），
見未夠鐘，
咪打住機先。
點知之後收到林小姐電話，
（其實係馬先生找我）
話佢地兩個會遲到，
主人家都會遲到，
大約八點半先到……

到最後終齊人，
一路食一路傾。
我一路都以為已經有伴郎，
點知原來係未訂既，
結果就由星期六、日都唔駛返工既我頂上。

估唔到某人做完伴娘，
三個月後又輪到我做伴郎。
（打緊呢兩句既時候，
我係想緊二月同六月 XDDDDD）
其實伴郎要做 d 乜我唔知，
咁我得閒就要找下點做伴郎 Information。

食完飯去 Bar 睇波，
順手吹下水。
畀我八到樣野，
原來馬生問過主人家婚禮會洗幾多錢，
咁唔通……

其實人到左我地咁上下既年紀，
呢 d 宴會都應該會接踵而來。

>>June 26, 2006 at 5:10:00 PM GMT+8

2006 年 6 月 23 日 星期五 【晴】

話說早排艾力斯搵我幫佢換飛，
咁要用某大 ISP 既績分再加錢換。
雖然我係該公司用戶，
但因我同時有聯營信用卡，
所以不時 D 月費會換成另一種積分。
當然有需要既時候，
係可以將信用卡既績分轉換成 ISP 既績分。

我一直以為，
雖然係唔同 System 既積分，
但都係同一間公司既，
要由 A 績分兌換成 B 績分好易既事。
點知我星期一上去想兌換既時候，
發覺如果填表申請兌換績分，
需時係七個工作天。
而換飛既日期係星期二，
即係話一定趕唔切啦。

咁我找下有冇甚他快 D 既方法，
首先發現，
可以上網兌換既，
只要 Login 左就得，
但都需要兩個工作天。

既然上網攪係兩個工作天，
打 Hotline 兌換係咪應該會快 d？
係部電腦按兩按咪得 lor。

我立即打電話去 Hotline，
話想兌換績分。
個職員問左我身份證號碼同姓名之後，
話我知經 Hotline 兌換都要填 Form，
即係最少都要七個工作天。

條 Hotline 真係「有用」，
最攪笑係，
佢有需要核對我個人資料嗎？
直接話我知 Hotline 冇得兌換咪得 lor……

最後我都係上網兌，
亦都換唔到飛，
只係列後補。

但更火滾既仲未來，
今日我 Check 既時候，
亦即係網上兌換既四個作工天後，
發覺仲未兌換成功，
Send 個 E-mail 去問，
佢覆話我打錯個上網個 Login ID，
所以未兌換到。
收到我 E-mail 後已經即時更正返。

火滾一：
我平時上網 Login，
ID 係要打 [email protected]，
佢話我兌換個時，
應該打 xxx 就得，
唔駛打 yyyy.com……
咁都算。

最嬲係，
你收到我 E-mail，
可以即刻改，
點解打去 Hotline 唔可以即刻兌換？

>>June 26, 2006 at 5:09:05 PM GMT+8

2006 年 6 月 22 日 星期四 【晴】

終於成功變賣了部相機，
呢部相機自二零零四年十二月二十四日開始跟我。
買既日期其實係十九日，
不過返到屋企發現部機有問題，
結果二十四日拿去換。

呢部相機都跟過我唔少「戰役」，
零五年三月去 Anaheim 公幹、
同年六月旅行、
今年五月旅行、
大大少少追星同人像活動、
Twins、左麟右李、得心應手等演唱會、
碩士畢業典禮等等……

服十八個月既兵役，
總共按了三千二百五十二次快門。

今次 Body 連 Kit 鏡一起出售，
賣了畀一個深圳人士。
隨了部 DSLR 之外，
我連 DC 仔個 Wide Converter 都賣埋出去。

原本賣機，
係打算換新機。
不過點知好景不常，
個職員竟然冇留到機畀我，
簡直係晴天霹靂。

要我畀原價去買，
我又唔捨得。
現在整定我冇相機用。

更灰既係，
我賣完相機，
佢即刻出新 Version Firmware。
（佢曾經講過話對我部相機唔會再有 Further Upgrade）

早兩日，
有人驚我參加婚宴時，
會帶部相機去，
嚇親人。

現在唔駛驚啦，
我冇左部大機喇。
我仲有既只有個部就黎三歲既 C-750。

>>June 23, 2006 at 5:35:36 PM GMT+8

2006 年 6 月 21 日 星期三 【晴】

今日係每年一次既大日子，
有人問我做乜唔拿日假，
咁既然拿左假都冇地方去，
唔通去打一日機咩。

結果就梗係返工啦，
放左工去打機。
打打下艾文打電話黎，
話上阿力度睇波。
都好 wor，
我世界盃都冇乜點睇過，
難得今日早放工，
去睇波都好，
順手仲可以派手信。

晚飯同艾文食，
去左樓下間日本料理，
個定食幾抵食，
又刺身，又湯，
又有紅豆雪樣，
加一之後都係五十五元，
仲要好好味。

之後拉隊上阿力屋企，
上到去第一件事係派手信，
之後就係打四圈。
每逢我地四個聚埋，
總會打返四圈。

執完位坐低，
艾文驚訝地指住窗外說：
「點解出面有人影？」

我地其餘三個望一望出面，
然後阿力冷靜地說：
「我阿媽係出面掠緊衫……」

當堂笑到我同細牛肚都痛埋。
估唔到艾文可以傻到咁，
哈哈哈

>>June 23, 2006 at 4:01:01 PM GMT+8

2006 年 6 月 20 日 星期二 【晴】

新工咁耐以來都未試過盡時放工，
今晚第一次，
盡時六點半執野走人，
因為今晚要比賽。

今晚係某隻街機遊戲的外圍賽，
勝出的可以參加七月二日的決賽。
第二的可以參加同日舉行的遺材賽，
爭奪餘下的決賽席位。

本來今日場比賽係觀塘舉行，
不過因為近日部機壞左，
結果比賽移師到油麻地舉行。
原本可以收工慢條斯理行過隔離比賽，
但現在就要坐小巴趕出去。

賽制係十六個人分四組打單循環，
每組一人出線，
再抽籤打單淘汱賽。

今次我抽得一支好籤，
同組的實力不是太強，
競敵大多係其他組自相殘殺。
同組假想敵有一個，
好彩第一場唔係對佢。

講返個單循環，
你未打完第一場係唔知第二場對邊個。
因為係勝方交換對手，
咁所以好大機會係最後一場爭出線，
唔會出現打完第二場後已經變例行公事。

我同假想敵順利地都贏第一場，
即係話如無意外我地會係最後一場爭出線，
打呢種單循環第一場好緊要，
因為一輸就失左個主導權。

但係好景不常，
我第二場遭滑鐵盧，
但係假想敵同樣落敗，
結果就四個人一人三分。

如果同分，
係計對賽成績先，
分唔山勝負再計卡值。
因為四個人互勝既關係，
第三場就算贏都未必出線，
要贏過我那個同時輸先得，
總之就七國咁亂啦。

驚濤駭浪之下我贏左，
而隔離亦開出我想要既賽果，
結果我就憑較佳對賽成績出線。

四強對手頗強，
結果我再次險勝。
（事後我對手話佢輸輕敵）
決賽對手更強，
佢用既卡更係我比較擔心的組合，
地形亦對我不利，
幸好頭段我佔了先機，
Head 住黎打，
可惜最後四秒犯錯，
白白將冠軍送了畀人。

事後檢討，
雖然我技術差，
但講心理素質，
比賽經驗，
（話晒都入過港隊參加國際賽拿獎，
不過當然唔係呢個遊戲啦）
應用壓力，
（壓力平時應該減，
但係比賽應該好好應用）
我自信唔輸畀人。

不過集中力始終唔夠持久，
頭幾場都仲可以打晒心理戰，
控制戰局，
可惜到最後四秒失手。

雖然贏唔到第一，
但第二名都總算係一份唔錯既生日禮物。
呢度要多謝包哥早排借卡畀我，
雖然我到最後比賽都冇用到。
謝謝

>>June 23, 2006 at 3:07:18 PM GMT+8

2006 年 6 月 19 日 星期一 【晴】

今日發生左 d 傻野。
話說早排收到份生日禮物，
係一隻手錶黎既。
咁既然係生日禮物，
雖然一早拆左，
但都梗係留返生日先開始大。
咁今朝拿出黎睇下，
但為隻錶有得計時既緣故，
個錶面好多支針。

正中間有三支，
另外仲有三個細圓各一支。

咁中間個三支針，
以一般既理解係：
最肥短既係時針，
瘦 d 長 d 既係分針，
最幼既係秒針。

咁我一拿係隻錶一睇，
點解支秒針不動既？
但係睇返個日期時間，
又唔係差好多，
六月十八日既九點三十分。
（計返買錶地方既十二個鐘頭時差就係六月十九日喇）

奇怪喇，
唔通買錶那人估到我今朝會拿上手？
新錶無理由咁快冇電架 wor，
我現在戴緊個隻，
三年都未換電。

拿拿臨拿本說明書出黎睇，
一睇就發現：

個支最幼既針唔係顯示時間既秒針，
而係計時器既秒針。
真正顯示時間既秒針，
係個三個細圓既其中一個，
正中下方那個細圓，
細心一睇，
個支細針係轉緊既。

經過呢件事，
我發覺我真係孤陋寡聞。




賣機既事有少少曙光，
有三個人買 Information，
不過都仲未有人肯定話買。

另一方面，
賣新機那兒竟然話未有貨留畀我。
阿 Zooo 叫我 Hold 住唔好賣先，
但我覺得，
除非以後唔打算賣，
呢水賣唔到，
真係幾難再賣得出……

>>June 23, 2006 at 3:06:45 PM GMT+8

2006 年 6 月 18 日 星期日 【晴】

三國志大戰隻 Game 真係幾多人玩，
今日係旺角其中一場初賽，
又被我撞到個中學師弟大鼻。
今日我去做史記，
即係話記低每場比賽重點，
好等撰稿的有材料。
今日咁橋我就係坐係佢隔離記低佢既比賽，
你話呢個世界幾細呢？

比賽完左，
我落場練習，
結果二勝一負，
但係對小組出線愈來愈冇信心。