2006 年 5 月 8 日 星期一 【晴】

上個星期發生左件好攪笑既事。
話說上星期四會考英文科課程乙試卷二考試，
試卷中一條佔 22 分的填充選擇題，
刊登了試題出處網址。
考評局截至六號中午，
共收到 98 宗投訴及查詢（現在應該有更多），
懷疑有考生到洗手間用手機上網，
查閱答案。

有趣的事該篇考試文章的內容，
講手提電話可以用來上網。
變相提醒考生出貓的方法。

而考評局不單後知後覺，
甚至事後話聲稱冇發現有人作弊，
也沒有甚麼有效的補救方法。

講開考試，
讀大學時有部份是 Open Book Exam，
考試時任你翻睇資料，
一樣可以考起不少人。

其實現在科技發達，
想要的資料上網就可以 Search 到，
不需要背誦。
以背誦為主的考試，
是否已經過時呢？

其實學習在乎融會貫通，
（當然有部份資料是需要「知道」的）
舉個例，
我想知放杯冰水係室溫下，
冰多久會完全溶掉。
在網上很容易可以找到公式，
重要的，
唔係在於記得條公式係乜，
而係每個參數應該填 d 咩數字入去，
餘下的，
可以手計、計數機計、甚至電腦計。
重要的，
不是背了條公式，
而係知道如何「運用」。

>>May 9, 2006 at 5:50:02 PM GMT+8

2006 年 5 月 7 日 星期日 【晴】

今朝晨早就入左大埔海濱公園，
個度有場定向週年短途賽舉行。
我沒有報名，
不過之後舉行既百米定向，
我就幫手做 Start。

九點半去到，
比賽其實十二點先開始（正確係近一點）。
想預先佈置起點咩？
唔得 wor，
一黎短途賽未完，
有 d 物資未拿到。
二黎都係因為短途賽未完，
個起點會阻住人比賽。
結果成十二點先開始佈置。
而係我佈置既同時，
APOC2006 開展儀式舉行。
今次既 APOC 大使係陳鍵鋒同黃安琪。
就係人人拿住部相機影相既同時，
我就係度做野……

個比賽連事後工夫，
做到四點幾五點。
搬埋野返總會，
結果六點幾先返到屋企。

換衫既時候發覺，
d 頸呀、手手腳腳都曬到紅晒，
仲有 d 痛 tim。

2006 年 5 月 6 日 星期六 【晴】

今日約左 JackyHo 同 D 文睇 MI:3，
去左觀塘 APM 睇。
一黎就 D 文住觀塘，
二黎就我睇完返工。

之前睇 Newsgroup，
話 Maggie Q 有句廣東話對白好似粗口，
聽落又真係幾似。

睇完之後既感覺係，
冇乜特別。
特務既工具冇乜特別，
有 D 仲好冇邏輯。
例如帶部 Printer，
Print 張相遮住個 Cam，
咁都冇光入，
個畫面咪黑晒 Lor……

2006 年 5 月 5 日 星期五 【晴】

尋晚換完身份證，
係尖東 KFC 食左個桶餐。
之後落左旺角 CAFE 打 PSP，
打到一點鐘。
今日訓晒又去 CAFE。

今日係一條龍活動，
下午打機，
夜晚下棋。

不過下到七八點食晚飯，
Vanvan 到左，
叫我地幫手打隻怪獸，
咁我地有班又開始打機。

結果分左兩 Groups，
一 Group 下棋，
一 Group 打機。
玩到十二點左右，
打機既打完，
下棋既未下完。

我又去下返幾盤，
全敗……

2006 年 5 月 4 日 星期四 【晴】

今晚去換身份證，
問媽媽借左 d 粉底。
今次應該係第二次塗粉底，
第一「次」係中二個時係紅館佈道會個時。

講返換領身份證，
原本約左一班人去。
不過到今日，
呢個又話有事唔去；
那個又話冇下場節目唔去；
有兩個又話今日個樣唔係好得，
去到都唔換。
結果，
只有兩個去換。

我理論上今日唔換唔得，
因為新證要十日鬆 d 先有得拿。
如果今日唔換再約既話，
就離開左香港都未拿到。

換領新身份證，
比當年補領舊身份證快少少。
不過我唔明，
理論上佢己經有晒我個人資料，
但都要我填一次 Form，
冇改就咪鬼需要人填啦，
簡直勞民傷財。

埋到 Counter 1，
首先「指導」我填 Form，
然後打兩隻姆指既手指模，
佢講左一句：「你 d 手指模幾清楚 wor」
我當堂無言以對。

之後影相，
影左兩張，
之後話第一張個頭側左，
又影左張。
之後係咁畀我睇個兩張相。
「呢張係第二張，呢張係第三張，呢張係第二張……」

我後來先發現原來佢等緊我選相……

之後去左等候區，
坐左一陣又見另一個人。
問我係咪同一地點拿證，
之後就走得。

>>May 8, 2006 at 3:07:55 PM GMT+8

2006 年 5 月 3 日 星期三 【晴】

今日中午約左舊同事食飯，
撞到另外幾個舊同事。
佢地話：
「個頭瘦左，
但個身就肥左，
現家食多左野吧……」
我當堂唔識應對……

2006 年 5 月 2 日 星期二 【晴】

事隔兩個星期，
日文堂終於復課。
今次有個新同學，
佢以前都係係呢度學日文，
佢以前老師姓姜，
亦即係我第一個日文老師。
有新同學，
自然要自我介紹，
老師仲要我地一人問新同學一條問題，
我係最後一個，
問得既都畀其他同學仔問晒，
我唯有問佢鍾唔鍾意份工……

我發覺我有 d 同學比我多一本課本，
點解我冇呢？
小息時，
去受付問啦。
佢話呢本係後加書，
要拿返單元一張收據黎（現在讀緊單元五），
先畀返我。
要唔要補錢我冇問，
下次先算。

我覺得好無理 Lor，
第一、
單元五加既書，
點解要拿單元一既單黎？
照計佢應該有晒我資料啦，
何況學生證都應該證明到我係到讀。

第二、
呢 d Information，
唔係應該佢主動同我講咩？
剛剛俾尾數個時，
佢都唔同我講，
要我問佢先講，
有冇攪錯。

2006 年 5 月 1 日 星期一 【晴】

事隔四個幾月，
今日再去剪髮。
今日係時後一個機會剪。
四號會去影相拿身份證，
如果今日唔剪，
之後兩日都唔得閒，
咁我就會有張長頭髮相既身份證。
咁剪左，
就可以有張修好頭髮相既身份證。

通常一剪頭髮，
我就剪到好盡。
今次亦唔例外，
剪到好短好短。

剪完之後，
Auntie Yip 問我後面點解唔留長 d，
留返條尾。
係 Wor，
可以考慮下，
下次咁整都好。

2006 年 4 月 30 日 星期日 【晴】

呢兩日踢左兩場波，
第一場係昨日睇，
下午四點半係跑馬地，
同 IE 舊生踢。

約四點鐘時代等，
不過我四點都未返到屋企拿衫，
結果當然遲大到。
好耐冇踢波，
今場終於開始有返 D 感覺，
打後衛，
有幾班可以閘停個波，
畀人過唔畀波過。
不過對於高空波既處理，
仍然有改善既空間。

第二場係今日下午係秀雅道踢，
同紐版踢。
呢場就打得好差，
一球單刀唔入，
幾球力壓硬射唔入。

輪到我打後個時就好火，
冇人回防，
成日三打二、四打二，
點打 wor。

之後守龍，
高空波我贏晒。
不過都失左兩球，
第一球係有人 Handball，
全世界停晒，
係對面個前鋒照截波照射。
第二球係冷箭，
擋到都入。

今日踢波之前，
買左杯咖啡 Jerry 焦糖咖啡返公司飲，
好好味。
返左公司兩個零三個鐘，
覆左封 E-Mail，
做左幾個 Test 就夠鐘踢波喇。

>>May 3, 2006 at 5:38:11 PM GMT+8

2006 年 4 月 29 日 星期六 【晴】

今朝去睇早場，
唔知因為今日唔係公眾假期，
又唔係星期日，
又或者因為十一點開場，
所以唔難買飛。

我記得以前係上述日子睇早場，
一係要一早九點去買飛，
一係要一早網上訂飛。
今天我十點幾先出門口，
開場前十五分鐘先到戲院（旺角百老匯），
都大把位選。
就算開左場，
入座率都冇十個巴仙。

講返套戲，
黑社會二之以和為貴。
套戲好多變態野，
我覺得好恐怖，
但某 d 人可能會鐘意睇。

而故事內容，
好明顯就係講緊現實既香港，
仲要好到題。

其中有一幕，
d 道具好假，
影住一隻斷腳，
但個質感好膠。

都仲有少少美中不足既地方，
就係因為有第一集既關，
好自然會將第一、二集聯埋一齊想。
第一集同第二集中間有兩年既空白期，
電影冇好詳細交代呢兩年發生咩事，
但係第一、二集既人物性恪就有好大既變化。

如果冇第一集，
今集會係唔錯。
但因為有第一集，
令到第二集好似會有 d 犯駁既地方。
呢個亦係呢套戲美中不足既地方。

>>May 3, 2006 at 5:36:56 PM GMT+8