2003 年 7 月 11 日 星期五 【雨】

原本相約Linda過油麻地睇"天地無倫"。
不過連續幾日都過海,都是算了吧,只好硬著頭皮推掉了。

私房菜。菜拾伍。摩囉廟街18號3樓。
第三次來到這間店(即管叫就"店"吧),
依然都唔係話太好食,對我黎講直情貴夾唔飽。

>>July 12, 2003 at 1:24:26 AM GMT+8

2003 年 7 月 10 日 星期四 【雨】

成十一點先起身,剛發過夢的我,原來真有其事。
一直都有聽收音機的習慣,可能將新聞報告的訊息接收,再轉化為我的夢境。
之後睇番電視新閒,當然有少許出入。

屯門公路發生本港歷來最嚴重的交通事故，
造成二十一人死亡及二十人受傷，四十多名死傷者中包括九名教師。

事發時，一輛雙層巴士265M駛至屯門公路近汀九入新界方向的天橋頂，
懷疑被一輛突然切線的貨櫃拖架撞向尾部，
整輛巴士被推前掃毀天橋邊十米欄杆後，直插三十五米下的汀九山村，
車頭陷入泥土中，車頭車尾損毀變形，
多名乘客被拋出車外，亦有乘客被壓在車底。

一處令我異常討厭的地方~荃灣汀九。
因為"妳",雖然正確位置我唔肯定,我倒想死者之一會係"佢"。

三點,明愛。
上一個啟導舞台表演的課,講者叫阿Man.(Gabriel的朋友)
正正就係早前向文化中心見過面的其中一位。

Nice to meet u, Mandy.

六點半離開明愛,行落去搭旺角小巴轉地鐵去九龍塘。
<上左小巴便開始下起雨來,去到油麻地時還很大雨耶>
行過達之路,準備推門入CityU,就正正見到智康推門而出,碰過正著,
可能因為我剪左個新頭,又帶住副新眼鏡,佢不知所措咁,唔太認得我,哈哈。

CityU Canteen, 911大集會,交換禮物似的,分配黎近露營的物品。
不消一會就搞掂,橫掂都過到黎,留多陣啦！
可是最後只餘下我,Cherry,胸肌同阿蛋,去左KFC.
最近雞記又出番爆谷雞,我當然有買番盒食。

百佳shopping後,同Cherry,胸肌一齊地鐵,去到北角轉42.

巴士的重心位置在車輛中央，
最安全的座位亦是在中央附近，所以位於中央偏後的座位便是最安全的位置，
這些座位亦是乘坐巴士時最穩定的位置，
平日乘搭的時候也會感到較其他座位舒適，行車平穩，
當遇上意外時，該位置亦比較安全，
因為座位正位於全車的重心位，感受到的車輛搖擺程度亦不及其他座位嚴重。


>>July 12, 2003 at 1:06:00 AM GMT+8

2003 年 7 月 9 日 星期三 【晴】

自由黨主席田北俊，周日突然宣布辭去行政會議成員職位，
一直不肯就《基本法》廿三條立法時間讓步的行政長官董建華，也只好宣布押後恢復二讀。

政府縱為23條讓步，民憤依然熾烈，
民間人權陣線在立法會門外舉行「七九大集會」，有5萬多人參加，
當中不少是在「七一」50萬人大遊行後再次站出來，
希望完成「反對23，還政於民」這個未圓的夢。
團團環繞着立法會大樓那片無盡的綠色熒光燈海和白衣人海，
見證民眾對港府施政的強烈不滿，以及要求普選特首的堅持。

打俾Simon,約佢五點上去剪頭髮,都係時候剪番短個頭去露營,方便 d 嘛。
剪番上次差不多,再短少少咁。

準時七點到達課室,可是還未夠十個人來到。
Trek Camp課堂：團體精神。一個講就容易,做就有 d 難道的課題。
黎近個Camp就係以這個課題設計。
Polly同我都剪左頭髮,而阿蛋就俾個雷打中個頭,成熟 d 喎？ 好笑 ~

九點落堂... ...最後又去返吉野家食飯開會,傾下黎近個週末,
七個組員只可以帶五個背囊,阿Bear同Tracy都會缺席這個Camp.
少左Tracy,少左把聲。佢就開心啦！

無左Tracy,自己一個行去佐敦搭970返屋企。

>>July 11, 2003 at 2:16:59 AM GMT+8

2003 年 7 月 8 日 星期二 【晴】

早上,
落過一陣大雨。
起身閂閂窗,入房再訓過。

阿名入黎幫我整機(電腦)。其實佢係黎拎我部舊腦的底板同CPU.
個傻佬搭23過黎,但係向置富落再車,跟住再搭23落黎。
搞機,都係叫佢幫我將舊機個硬碟搬埋過黎部新機度。搞搞下,都差不多十二點。

上環文娛中心,上一個堂。
今年新動力會以一場表演取代社區研習報告。
巴士站,竟然一架 4 號都無,而且重有好多人向度等緊車。
可是又想不到仲可以點搭車過去,最後搭左23過西環再轉車。

橫掂都遲,遲多陣先上去五樓,食個車仔麵先。
揀完食乜,跟手 d 電話就係咁黎,好不容易才食完個麵同腐乳通菜。

兩點九左右,三點前入到去,全部人已經坐哂上台上面,
聽緊講者講解一下舞台上的種種。
總之就：唔講你唔未必知,講左又唔一定記得哂。
台左、台右；面向觀買up同down；側幕、射燈、台板、防火牆。

六點,同"Gabriel"(講者)一齊去食過下午茶飲杯野咁。
大伙兒一起去,可是只有我和 Linda 跟他聊。
原來佢讀演藝的,依家主要做燈光設計,亦熟悉舞台幕後單位。
黎近重會去法國工幹,認真利害。

同Linda一齊返過明愛,上圖書館。而我又陪佢癲左成個鐘。
Print左Tracy張相出黎,黎近有待使用。哈哈。
聊下呢樣聊下個樣,又好快就過左一個鐘,原先都無諗住留咁耐... ...

人言可畏~ 某些人實在令人太失望。
我可再無甚麼興趣再留戀,
聽過後,笑笑便算。還可以怎樣！哈。

搭23返屋企,姑姐慧賢同老豆媚姨都食到八八九九。


>>July 12, 2003 at 1:05:31 AM GMT+8

2003 年 7 月 7 日 星期一 【晴】

給各位衝勁營911的組員：


今日


2003年7月7日,


上午


早上九時許,


我地其中一位組員


女組員,


Tracy


何翠怡,


經已離開左我地.













...........飛左去日本,風流快活！

大家得閒就同佢祈下禱啦。希望佢有手信俾我地大家喇。

佢仲遺下一套Cook Set,同Umy對涼鞋...
星期三晚我會帶番黎俾大家,
大家"度"下有無空間放埋套CookSet落個Bag啦！

週三晚再見吧，朋友。

又一個晴天。午飯繼續食沙律。
下午三點,去到淺水灣,Elaine都係早我些少到,今次我經已叫佢過左海就打俾我。
搽完太陽油曬一陣,跟住就落水。
今日的水溫實在清涼,唔太凍唔太暖,認真舒服。

Elaine約左人,五點半走去沖身換衫,我繼續曬多陣。
佢走左無耐,聽住AM864的我就訓著左。
訓左半句鐘,大概聽到報新聞講緊董先生延遲23條二讀... ...
落水再浸多陣執野去沖身返屋企。

打電話返屋企阿麻仲未返,買盒叉燒燒肉飯做晚餐,
可是返到屋企,睇左陣電視,盒飯都未開始食,阿麻就回來了。

>>July 8, 2003 at 10:36:14 AM GMT+8

2003 年 7 月 4 日 星期五 【晴】

老豆同媚姨去完泰國返黎,
一時又話上深圳,一時又話去食 buffet.

晚上,去左銅鑼灣的萬福食 buffet.
total我食左十轉野。
我用左一個方法黎記錄我出去扮野的次數：利用木筷子的紙套,每出去拎野食都撕一段出來。
係咪好無聊喇。

這樣的香港人實在討厭。
臨走前,後面幾張桌的一枱客,
其中一位小姐俾女侍應弄污糟了件Tee恤,當然事發經過我睇唔到,
阿女侍應經已盡力幫佢抹緊,可是那小姐像不罷休似的,
及後見到店方提供了一件衫俾小姐佢暫穿,應該係幫小姐拎件衫去清洗一下咁。
睇見過女人亞吱亞左,個樣又好係衰俾面色出黎,巴之閉,又唔係甚麼名牌Tee,洗唔洗咁臭串。
如果唔係同老豆地一齊,我老早就行過去,拎埋杯野過去八卦下,跟手成杯野倒落個八婆度。
可惜......,女侍應,今次我實在幫妳唔到。
樣子甜美的妳,加上妳不知如何是好的表情,實在可愛。

>>July 9, 2003 at 1:33:04 PM GMT+8

2003 年 7 月 3 日 星期四 【晴】

又一日好天氣。
哪有不去曬曬太陽的理由呢！

朝早,Elaine問我有無野做？跟住就話過黎淺水灣。
上星期四放左佢隻飛機無去到赤柱,都唔可以話飛機的,
那天天氣又不好,而且佢又咁遲先過到黎,還有係阿Jack同女友去玩,做咩要做人電燈炟呢？

食完午飯,執好野坐多陣,等個八婆去到銅鑼灣,教佢搭埋車先出門口,
落到巴士站剛好有架73剛上完客,準預開走,好彩司機大佬都好好人俾我上埋,唔係就有排等。
小巴的確比巴士走得快！哈哈。廢嘛？
當我落到去7-11,回頭見到佢,Elaine經已換上比堅尼的Top.
都係行去四號救生亭那邊落蓆。
<好耐無幫過人搽太陽油了。>
趣聞：原來唔係個個女人都識得用錦條的，哈。

五點半左右去沖身離開。
上番去搭巴士,諗住出中環轉車,諗諗下都係唔好,中環放工繁忙時間搭車實好Q多人,
諗緊之際,973的出現,係貴些少,但係唔洗轉車,是但喇。
尋日想搭佢過海又無車,今日唔過海就搭呢架,真係笨實。

莫張瑞勤社區中心,新動力2003的燒烤聯誼大會@天台。轉眼又一年了。
燒完野食了,差不多時候,咁耐都無玩過集體遊戲,
咁我就拎左包綿花糖出黎,話玩數字綿花糖(即係數字球啦),
初時我地影帝,wawa,阿釗幾個舊動玩左陣,跟住就全部人一齊玩... ...
可是大多人了,成廿幾人,又不太好玩,(個人認為數字球最好玩係得六七個參加者,頂籠咪十個囉)
而且... ...唔知點解呢,新一代人比上一代人越來越唔好玩。

因為有人將包綿花糖亂咁拋,拋左出天台以外,遊戲完結。
執野清場。我同阿釗,影帝先行離去... ...
落到去又唔多好意思咁,送走佢兩個搭車,我又行番上去。

有我自然有野玩,執番 d 膠椅落樓下,
因為天台係無電梯的,只有將椅帶到五樓先可以放入電梯去三樓 / 禮堂放番好。
我當然唔會逐隻椅同你搬喇,咁點呢？
就係由一位朋友向天台果層,放椅垂直放下來,
而我就企向樓梯接住,再拋俾五樓的接應,再放入電梯。
就是這樣,好很快就清哂 d 椅。
其實這個玩法,上年已經玩過一次,有Kenneth同我一齊玩,還有誰就記不得了。
今年的有Jason,還有今屆新動力的朋友。唔知以後仲會唔會咁玩呢？

向四樓Office開定冷氣等其他人搞埋 d 手尾,當時只有我,Fiona同埋Jason.
跟住Fiona話我知,Jason係佢上年的組仔,而我就係佢當年的 Leader.原來如此。
今年Jason有份帶組,唔知佢 d 組仔係點架呢？

搞掂哂,走的走,未走的便去"可可店"食糖水。

>>July 25, 2003 at 1:24:25 AM GMT+8

2003 年 7 月 2 日 星期三 【晴】

訓得好飽呀！
大概睡多個12個鐘。

終於都去左沙灘喇！淺水灣。
三點多出門口搭73去,八達通已負資產,好彩有碎銀,唔係就... ...
去到淺水灣落車,過對面巴士站望望973往TST的資料,今晚有TrekCamp的課堂。

行落去沙灘啦,途中碰見豬仔包,朱Sir,朱君喻老師。
當佢迎面向著我行過黎的時候,
又白又滑又 baby face,眼仔細細的他,食住香橙味冰冰(雪條)前往巴士站。
而當我倆越行越近的時候,我就好似西部牛仔拔槍咁,一路行一路諗他姓甚名誰。
擦身而過的一刻：朱Sir！而佢同時亦撻出我全朵。
條友話學校考緊試,所以... ...

提番個款,袋番多少錢向身先。
八達通又負資產,銀包又無錢,玩到咁盡！
落沙灘,都係去番四號救生員更亭附近的位置落蓆。

搽太陽油啦,曬曬背面先,睇下雜誌,聽下森美小儀山寨王,樂得清閒。
接近四點半,Tracy黎到,又話想落水又話想游出浮台,
但係又唔想洗頭... ...跟住仲發現泳鏡爛左,認真搞鬼。
前日就話無泳衣,依家有泳衣,副鏡就爛左 ... ...不過最後都有落水。
水並沒有想象中的涼快,而且可以話暖暖地添。

差不多五點半了,係時候去沖身離開。
Tracy話想去行行淺水灣觀音那邊,可是當佢搞掂換好衫都已經接近六點,要去搭車了。
諗住一程車就搭973,但係等左一輪都未有車,最後搭出金鐘轉地鐵過尖沙咀。

點名簽到1903。講座：逆境自強。

九點過後完成講座,一組人去吃飯,吉野家。
吃過飯後,我地組(911)要立一個約,輪流寫一d 不應該做的事。
我地9個人一組,計埋兩位輔導員加埋都係十一個人,照計都係應該只有十一條約... ...誰不知！


原先約好話今晚落西環坐低飲杯野同洩兄傾下,又放飛機。
<如果有一天...當蛋婆遇上洩兄相遇聚首,會有咩化學作用呢？>

同Tracy行過佐敦搭970返屋企,等左好好好耐至有車黎,而且一黎就幾架囉。


>>July 25, 2003 at 1:14:29 AM GMT+8

2003 年 7 月 1 日 星期二 【晴】

七月一日，回歸紀念日。就這樣當了首六年的中國人。
今日,有大型的遊行活動"反23條遊行",由民間人權陣線發起的。
當與我可沒有參與這個遊行。

Trek Camp的遠足日。
0830向舂磡角消防局集合。約Tracy向香港仔食早餐再搭車去集合。
第一次行衛奕信徑。
開段就已經係咁上山行樓梯,真辛苦。而且有上山就即係又會要落山,可真苦了我得很！

先上孖崗山,過淺水灣峽再上紫羅蘭山,跟往去陽明山莊食Lunch。休息過後再去渣甸山End point.

三點左右解散,落小巴落灣仔食 d 野行下咁。

主辦機構表示有逾50萬人參加，警方說遊行是有35萬人。
雖然今次遊行是以反對23條為目的，但在遊行期間見到民眾呼喊的口號和標語看來，
示威者是表達六年以來對政府種種不滿情緒。
無論有50萬或35萬人遊行，已是自89年64大遊行以來最多，
同也較最初向警方申請的十萬人為多。

七一大遊行先頭隊伍在下午三時出發，以政府總部為終點，
由於遊行人士眾多，雖然有部份人中途插隊，
但很多人覺得既然警方早已明言是計算遊行人數是從維園正門出發作準，
所以寧願步行到維園，以致灣仔；銅鑼灣市面有兩條向相反方向遊行的長龍，
這也是在維園久候的人遲至下午五時四十分才能開始出發，七時半才完全離開。



>>July 25, 2003 at 1:00:16 AM GMT+8

2003 年 6 月 30 日 星期一 【晴】

難得的好天氣。
可是去唔得成沙灘。

老豆今日飛,去泰國渡假。朝早同阿麻飲早茶,去灣仔的合和中心。
約九點飲茶,咁即係要我八點起身並趕快地出去喇,
可是行完山,又無乜訓過的我,點起到身呢？
訓到九點幾,老豆打黎叫醒我出去... ...
灣仔合和實在不易前往,對我的住處而言。
我只好在天樂里附近落車行皇后大道東過去。
去到十點幾,佢地都吃飽了,我只好點個山竹牛肉便算,不過要等左好好耐先有得食。
媚姨同阿麻無等埋我的山竹牛肉黎,就過左去飲咖啡順便去游手間,留番我同老豆向度睇雜誌。

跟住阿麻要去灣仔街市買點東西,跟住搭的士,
我仲以為返屋企,原來係過銅鑼灣買野。
GiorDano,媚姨買左條褲有問題拎黎換,而我又買 d d 野咁。
買埋支After Sun,下一站去Adidas,阿麻睇見媚姨對新鞋幾正...而我就終於買了我的第一對跑鞋。

老豆差不多夠鐘去機場了,返屋企拎行理,我去拎埋 d 雜誌同埋DVD返屋企。
Tracy較早時間打過俾我,返到屋企我又打番俾佢聊番兩句。提佢快 d 洗衫,聽日要著嘛。
跟住話不如去沙灘曬太陽,誰不知差不多要出門口佢先話搵唔到泳衣,真令人失望。
我真係好想好想去沙灘呀！
最後只好去睇戲,上網睇下有咩睇,1645皇室Palace變形俠醫The Hulk.
Tracy小姐佢竟然送車尾,出到黎都經已開場,我只有去看看其他戲院有無其他戲睇啦。
行到去紐約戲院,5pm變形俠醫,等埋Tracy黎到剛剛好,買飛入場。
原先如果睇palace都係$60,依家睇紐約都要$60,原來如此浪費。



變形俠醫 The Hulk

導演： 李安
演員： 艾力賓拿, 珍妮花康納莉
片長： 139 mins

睇到中段都唔明為乜要叫"變形俠醫",睇到完場終於都可以明白。
電影用上了一定數量的分割畫面來加快節奏,
避免過長的不必要片段... ...向唔太亂的情況下,我倒也很欣賞這個。
可是用上了這個技術,片長仍有139分鐘,其實片中的動力場面不多。
而且我異常所賞主角的內褲。
好耐無黎紐約戲院睇過戲,勁冷囉！冷到Tracy起哂雞皮,猛叫快d 完場啦！

離開戲院,去搵 d 熱野食,行下行下走左去食粥。終於都暖番個身。
跟住同Tracy去買褲,... ...行到差不多九點幾十點,
要歸家了,聽朝要早起身嘛,0830向舂磡角消防局集合。
一齊行左去灣仔碼頭搭40,上車前去左7-11,買左盒飯食,都唔係十蚊？不過都okey吃得過。

>>July 24, 2003 at 9:38:54 PM GMT+8